ⲁϥⲑⲱⲛ ⲡⲁⲗⲁⲥ

ⲁⲓⲛⲉϩⲥⲓⲇⲉ ⲟⲩⲟϩ ⲉⲧⲁⲓⲥⲁϫⲓ ⲙ̀ⲡⲓϫⲓⲙⲓ ⲙ̀ⲡⲁⲗⲁⲥ ⲙ̀ⲙⲟⲛϣϫⲟⲙⲙ̀ⲙⲟⲓ ⲉϣⲓⲛⲓ ⲛ̀ϩⲗⲓⲛ̀ⲣⲱⲙⲓ ⲙⲏⲡⲱⲥ ⲛ̀ⲧⲟⲩ 

ϯϣⲓⲡⲓ ⲛⲏⲓ ⲙ̀ⲙⲟⲛⲅⲁⲣ ⲡⲉⲧⲕⲁϯ ⲉⲣⲟⲓ ⲁⲓⲕⲱϯⲙⲉⲛ ⲛ̀ⲥⲁ ⲧⲁⲁⲥⲡⲓ ϧⲉⲛⲛⲉⲛϫⲱⲙ ⲛ̀ⲧⲉ ϯϩⲓⲥⲧⲟⲣⲓⲁ ⲁⲗⲗⲁ ⲁⲩⲧⲁⲙⲟⲓ ϫⲉⲁⲥⲧⲁⲕⲟ ⲟⲩⲟϩ ⲁⲥⲉⲣⲁⲑⲟⲩⲱⲛϩ ⲁⲓⲕⲱϯⲇⲉ ⲛ̀ⲥⲱⲥ ϧⲉⲛϯⲉⲕⲕⲗⲏⲥⲓⲁ ⲁⲩϫⲟⲥ ⲛⲏⲓ ϫⲉⲡⲉⲥⲗⲁⲟⲥ ⲁϥⲉⲣⲡⲱⲃϣ ⲙ̀ⲙⲟⲥ ⲛ̀ⲥⲉⲕⲁϯ ⲉⲣⲟⲥ ⲁⲛ ϯⲛⲟⲩ ⲁⲓϣⲉⲛⲏⲓ ⲉⲛⲓⲙⲟⲛⲁⲥⲧⲏⲣⲓⲟⲛ ⲟⲩⲟϩ ⲡⲉϫⲱⲟⲩ ⲛⲏⲓ ϫⲉⲁⲛϯ ⲛⲉⲛϫⲱⲙ ⲛ̀ⲁⲡⲁⲥ ⲉⲃⲟⲗ ϫⲉⲁⲛⲟⲛⲅⲁⲣ ⲁⲛⲟⲛ ϩⲁⲛⲓⲇⲓⲱⲧⲏⲥ ⲛ̀ⲣⲱⲙⲓ ⲙ̀ⲡⲉⲛϭⲓⲥⲃⲱ ⲛ̀ⲧⲉⲡⲁⲓⲕⲟⲥⲙⲟⲥ ⲟⲩⲇⲉ ⲛ̀ⲛⲉⲥϣⲱⲡⲓ ⲙ̀ⲙⲟⲛ ⲁⲓϩⲱⲗ ⲉⲛⲓⲣⲉⲙⲛ̀ⲭⲏⲙⲓ ⲙ̀ⲫⲁⲣⲁⲱ ⲙ̀ⲃⲉⲣⲓ ⲡⲉϫⲱⲟⲩ ⲛⲏⲓ ϫⲉⲧⲉⲕⲁⲥⲡⲓ ⲥⲟⲛⲓ ⲛ̀ϯⲙⲉⲧⲟⲩⲉⲓⲛⲓⲛ ⲁⲛⲟⲛⲇⲉ ⲧⲉⲛⲧⲟⲩⲃⲟⲥ ⲉⲃⲟⲗϩⲁ ⲡⲑⲱⲗⲉⲃ ⲛ̀ⲧⲉ ⲛⲓⲕⲉⲁⲥⲡⲓ ⲛ̀ⲗⲁⲥ ⲙⲏⲡⲱⲥ ⲛ̀ⲧⲟⲩⲙⲟⲩϯ ⲉⲣⲟⲛ ϫⲉϩⲁⲛϣⲉⲙⲙⲱⲟⲩ ⲧⲉⲛⲛⲁⲧⲁⲕⲟⲅⲁⲣ ⲙ̀ⲙⲟⲥ ϩⲓⲛⲁ ⲛ̀ⲧⲉⲛⲧⲟⲩⲃⲟⲥ ⲁⲩϫⲕⲥ ϫⲉϯⲕⲉⲁⲥⲡⲓ ⲙ̀ⲃⲉⲣⲓⲧⲉ ϯⲁⲥⲡⲓ ⲛ̀ⲗⲁⲥ ⲛ̀ⲁⲡⲁⲥ ⲙ̀ⲙⲓⲛⲙ̀ⲙⲟⲥ ⲁⲩⲥⲱⲃⲓ ⲙ̀ⲙⲟⲓ ⲁⲩϫⲟⲥ ϫⲉⲕⲕⲁϯ ⲁⲛ ϫⲉⲕⲥⲱⲟⲩⲛ ⲁⲛ ⲛ̀ⲧⲉⲕⲁⲥⲡⲓ ⲙ̀ⲃⲉⲣⲓ ⲛ̀ⲑⲟⲕ ⲟⲩⲣⲉⲙⲛ̀ⲭⲏⲙⲓ ⲙ̀ⲙⲏⲓ ⲁⲛ ⲁⲓϣⲉⲡϣⲉⲙⲙⲟ ⲉⲓⲕⲱϯ ⲛ̀ⲥⲱⲥ ⲛⲓⲥⲟⲫⲟⲥⲇⲉ ⲁⲩϫⲟⲥ ⲛⲏⲓ ϫⲉⲧⲉⲛⲕⲁϯ ⲉⲣⲟⲥ ⲕⲁⲗⲱⲥ ⲧⲉⲛⲥⲁϫⲓⲙⲉⲛ ⲙ̀ⲙⲟⲥ ⲁⲛ ⲁⲓⲧⲁⲥⲑⲟ ⲉⲛⲁϣⲫⲏⲣ ⲁⲩϫⲟⲥ ⲛⲏⲓ ⲛ̀ⲑⲟⲕ ⲟⲩϩⲟⲡⲗⲟⲥ ⲙⲁϯϩⲓⲱⲧⲕ ⲛ̀ϯϧⲉⲗⲗⲓⲃϣ ⲟⲩⲟϩ ⲁⲙⲟⲛⲓ ⲛ̀ⲧⲉⲕⲥⲏϥⲓ ⲉⲧⲁⲓϫⲟⲥ ϫⲉϯⲉⲣⲉⲧⲓⲛ ⲛ̀ϯϩⲓⲣⲏⲛⲏ ⲁⲩⲱϣ ⲉⲃⲟⲗ ⲉⲩϫⲱⲙ̀ⲙⲟⲥ ϫⲉⲉⲓⲥ ⲡⲓⲡⲣⲟⲇⲟⲧⲏⲥ ϯϫⲱⲙⲙⲟⲥ ⲛⲱⲧⲉⲛ ϫⲉϯⲛⲁⲥϧⲁⲓ ⲛ̀ⲧⲁⲁⲥⲡⲓ ϩⲓ ⲡϣⲱ ⲛ̀ⲧⲉ ⲫⲓⲟⲙ ⲟⲩⲟϩ ⲁⲣⲉϣⲁⲛ ⲛⲓϩⲱⲙⲓ ⲱⲙⲥ ⲙ̀ⲙⲟⲥ ϯⲛⲁⲥϧⲏⲧⲥ ⲛ̀ⲕⲉⲥⲟⲡ 

ϯⲡⲁⲣⲁⲥⲕⲉⲩⲏ ⲧⲉ ϯⲕⲩⲣⲓⲁⲕⲏ

 ϧⲉⲛⲭⲏⲙⲓ ϯⲡⲁⲣⲁⲥⲕⲉⲩⲏ ⲧⲉ ϯⲕⲩⲣⲓⲁⲕⲏ ϣⲁⲓϣⲉⲛⲏⲓⲇⲉ ⲉϯⲉⲕⲕⲗⲏⲥⲓⲁ ⲛ̀ϯⲡⲁⲣⲁⲥⲕⲉⲩⲏ ϫⲉϣⲁⲓⲉⲣϩⲱⲃ ⲛ̀ϯⲕⲩⲣⲓⲁⲕⲏ ⲓⲥϫⲉⲛ ⲧⲁⲙⲉⲧⲕⲟⲩϫⲓ ⲁⲓⲉⲣϣⲫⲏⲣⲓ ϫⲉⲁⲩⲙⲟⲩϯ ⲉⲡⲓⲧⲱⲧⲉⲣ ⲛ̀ⲧⲉ ϯⲉⲕⲕⲗⲏⲥⲓⲁ ϫⲉϯⲁⲛⲍⲏⲃ ⲛ̀ⲧⲉ ϯⲕⲩⲣⲓⲁⲕⲏ ⲁⲗⲗⲁ ϣⲁⲛⲣⲁⲟⲩⲱ ⲛ̀ϯⲡⲁⲣⲁⲥⲕⲉⲩⲏ  

ϧⲉⲛⲧⲁⲙⲉⲧⲕⲟⲩϫⲓ ⲛⲉ ϣⲁⲓϣⲉⲛⲏⲓ ⲉϯⲉⲕⲕⲗⲏⲥⲓⲁ ⲛ̀ϯⲡⲁⲣⲁⲥⲕⲉⲩⲏ ϣⲁⲓϣⲗⲏⲗ ⲛ̀ϯⲁⲛⲁⲫⲟⲣⲁ ⲟⲩⲟϩ ⲱϣ ⲛ̀ⲛⲓϩⲩⲙⲛⲟⲥ ϧⲉⲛⲡϫⲓⲛⲑⲱⲟⲩϯ ⲛ̀ⲧⲉ ⲛⲓⲇⲓⲁⲕⲱⲛ ⲙⲉⲛⲉⲛⲥⲁ ⲫⲁⲓ ⲛⲉ ϣⲁⲓ ϣⲉⲛⲏⲓ ⲉϯⲁⲛⲍⲏⲃ ⲛ̀ⲧⲉ ϯⲕⲩⲣⲓⲁⲕⲏ ⲁⲓⲓ̀ ⲉϩⲣⲉⲛ ϩⲁⲛⲙⲏϣ ⲛ̀ϣⲫⲏⲣ ⲛ̀ⲭⲣⲓⲥⲧⲓⲁⲛⲟⲥ ⲙ̀ⲙⲁⲩ 

ⲡⲉϫⲉ ⲓⲏ̅ⲥ̅ ϫⲉⲁⲙⲱⲓⲛⲓ ϩⲁⲣⲟⲓ ⲟⲩⲟⲛ ⲛⲓⲃⲉⲛ ⲉⲧϧⲟⲥⲓ ⲟⲩⲟϩ ⲉⲧⲟⲡⲧ ϧⲁ ⲛⲟⲩⲉⲧⲫⲱⲟⲩⲓ ⲁⲗⲗⲁ ϯⲉⲕⲕⲗⲏⲥⲓⲁ ⲥϫⲟⲥ ϫⲉⲁⲙⲱⲓⲛⲓ ϩⲁⲣⲟⲓ ⲱ ⲛⲓⲭⲣⲓⲥⲧⲓⲁⲛⲟⲥ ⲛ̀ⲟⲣⲑⲟⲇⲟⲝⲟⲥ ⲡⲓⲛⲁϩϯⲅⲁⲣ ⲁϥϣⲱⲡⲓ ⲛ̀ⲟⲩⲥⲟⲃⲧ ⲟⲩⲧⲉ ⲛⲓⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲛⲉⲙⲛⲓⲕⲉⲭⲱⲟⲩⲛⲓ ⲛⲉⲛⲥⲃⲟⲧⲇⲉ ⲛ̀ⲧⲉ ϯⲉⲕⲕⲗⲏⲥⲓⲁ ⲙ̀ⲡⲁⲩⲁⲣⲉϩ ⲉⲣⲟⲥ ⲁⲗⲗⲁ ⲥⲉⲫⲱⲣϫ ⲟⲩⲧⲉ ⲛⲓⲥⲛⲏⲟⲩ ⲉⲧϧⲉⲛⲡⲓⲕⲟⲥⲙⲟⲥ ⲛ̀ⲟⲩⲱⲧ ⲉⲑⲃⲉ ⲡⲟⲩⲛⲁϩϯ ⲥⲉϣⲗⲏⲗ ⲉⲩϫⲱⲙⲙⲟⲥ ϫⲉⲁⲣⲓⲥⲟⲃⲧ ⲉⲣⲟⲥ ⲛ̀ⲛⲉⲥⲕⲓⲙ ϣⲁ ⲉⲛⲉϩ

ⲱⲟⲩⲛⲓⲁⲧϥ ⲙ̀ⲫⲏⲉⲧⲧⲁⲕⲟ ⲛ̀ⲛⲓⲥⲟⲃⲧ ⲛ̀ⲧⲉ ⲛⲉⲛϩⲏⲧ ⲛⲉⲙⲛⲉⲛⲛⲟⲩⲥ ϩⲓⲛⲁ ⲛ̀ⲧⲉⲛⲉⲣⲁⲅⲁⲡⲁⲛ ⲙ̀ⲡⲓⲟⲩⲁⲓ ⲡⲓⲟⲩⲁⲓ ϧⲉⲛⲟⲩⲙⲉⲑⲙⲏⲓ ⲟⲩⲟϩ ⲛ̀ⲧⲉⲛⲙⲉⲓ ⲛ̀ϯⲟⲓⲕⲟⲩⲙⲉⲛⲏ ⲛⲉⲙⲟⲩⲟⲛⲛⲓⲃⲉⲛ ⲉⲧϣⲟⲡ ⲛ̀ϧⲏⲧⲥ

ⲡⲭ̅ⲥ̅ ϥⲭⲏ ϧⲉⲛϯⲉⲕⲕⲗⲥⲓⲁ ⲙⲟⲛⲟⲛ ⲓⲏ̅ⲥ̅ⲇⲉ ϥϣⲟⲡ ⲥⲁⲃⲟⲗ ⲛ̀ⲛⲓⲥⲃⲟⲧ ⲛ̀ϯⲉⲕⲕⲗⲏⲥⲓⲁ   

 

ϯⲅⲛⲱⲥⲓⲥ ϧⲉⲛⲡϣⲁϥⲉ

 ϯⲥⲁϩⲟⲩⲓ ⲁⲛ ⲙ‌ⲡⲭⲁⲕⲓ ⲁⲗⲗⲁ ⲡⲓⲭⲁⲕⲓⲙⲉⲛ ϥⲥⲁϩⲟⲩⲓ ⲙ‌ⲙⲟⲓ ϣⲁϯⲛⲟⲩ ϥϭⲟϫⲓ ⲛ‌ⲥⲱⲓ ⲛ‌ϫⲉⲡⲧⲁⲕⲟ ⲁⲗⲗⲁ ⲙ‌ⲡⲉϥϣⲧⲁϩⲟⲓ

ⲁⲛⲟⲕⲅⲁⲣⲡⲉ ⲫⲟⲩⲱⲓⲛⲓ ⲛⲉⲙⲧϧⲏⲓⲃⲓ
ⲁⲛⲟⲕⲡⲉ ϯⲁⲗⲏⲑⲓⲁ ⲛⲉⲙϯⲁⲡⲁⲧⲏ
ⲁⲛⲟⲕⲡⲉ ⲡⲓⲑⲉⲃⲓⲏⲟⲩⲧ ⲛⲉⲙⲡⲓϭⲁⲥⲓϩⲏⲧ
ⲁⲛⲟⲕⲡⲉ ⲡⲓⲙⲱⲓⲧ ⲛⲉⲙⲡⲓⲟⲥⲓ
ⲁⲛⲟⲕⲡⲉ ⲡⲓⲁϩⲟ ⲛⲉⲙⲡⲧⲁⲕⲟ
ⲁⲛⲟⲕⲡⲉ ⲡⲓϧⲣⲱⲟⲩ ⲉⲧⲱϣ ϧⲉⲛⲡϣⲁϥⲉ ⲁⲗⲗⲁ ⲙ‌ⲙⲟⲛⲡⲉⲧⲁϥⲥⲟⲑⲙⲉⲧ ϫⲉⲁⲓⲫⲱⲧ ⲉⲃⲟⲗϩⲁ ⲡⲓⲕⲟⲥⲙⲟⲥ

ⲛⲁⲣⲉ ⲡⲓⲕⲟⲥⲙⲟⲥ ⲙⲡϣⲁ ⲙ‌ⲙⲟⲓ ⲁⲛ ⲡⲉ ⲉⲓⲥⲱⲣⲉⲙ ϩⲓⲛⲓϣⲁϥⲉⲩ ⲛⲉⲙⲛⲓⲧⲱⲟⲩ ⲛⲉⲙⲛⲓⲃⲏⲃ ⲛⲉⲙⲛⲓⲭⲟⲗ ⲛ‌ⲧⲉⲡⲕⲁϩⲓ ⲁⲛⲟⲕⲇⲉ ϩⲱ ϯⲙⲡϣⲁ ⲙ‌ⲡⲓⲕⲟⲥⲙⲟⲥ ⲁⲛ ϫⲉⲁⲛⲟⲕ ⲛⲉ ⲡⲉ ⲡⲉϥⲟⲩⲱⲓⲛⲓ

ⲁⲛⲟⲕⲡⲉ ⲧϣⲱϯ ⲙ‌ⲙⲱⲟⲩ ⲛ‌ⲱⲛϧ ⲉⲑⲙⲉϩ ⲙ‌ⲫⲁⲣⲙⲁⲅⲓⲁ

ⲁⲕϣⲁⲛⲕⲁϯ ⲉⲣⲟⲓ ⲭⲛⲁⲕⲁⲧ ⲛ‌ⲥⲱⲕ ⲇⲉⲟⲥ ⲭⲛⲁⲙⲟϣⲓ ⲛ‌ⲥⲱⲓ
ⲁⲕϣⲧⲉⲙⲕⲁϯ ⲉⲣⲟⲕ ⲭⲛⲁϩⲓⲱⲛⲓ /ⲙ‌ⲙⲟⲓ ϩⲱⲥ ϩⲉⲣⲉⲧⲓⲕⲟⲥ ⲛⲉⲕⲱⲛⲓ ⲥⲉⲛⲁⲑⲱⲙ ⲛ‌ⲣⲱⲓ ⲁⲗⲗⲁ ⲧⲁⲥⲟⲫⲓⲁ ⲥⲛⲁⲭⲁⲣⲱⲥ ⲁⲛ

ⲡⲓⲙⲁⲧⲟⲓ ⲛⲉⲙⲡⲓⲁⲛⲁⲭⲱⲣⲓⲧⲏⲥ

ϧⲉⲛⲥⲟⲩⲁⲓ ⲙ̀ⲡⲓⲁⲃⲟⲧ ⲫⲁⲙⲉⲛⲱⲑ ⲛ̀ϯⲣⲟⲙⲡⲓ ⲙ̇ⲙⲁϩⲁⲯ̅ⲙ̅ⲃ̅ ⲙ̇⳥ ⲁⲛⲟⲕ ⲡⲉϣⲉⲛϯ ⲉⲓⲥϧⲁⲓ ⲙ̀ⲡⲁⲥⲟⲛ ⲁⲅⲁⲑⲟⲛ ϫⲉϣⲟⲣⲡⲙⲉⲛ ⲛ̀ⲉⲛⲭⲁⲓⲛⲓⲃⲉⲛ ϯⲡⲣⲟⲥⲕⲩⲛⲉⲥⲓⲥ ⲙ̀ⲙⲟⲕ ⲭⲁⲓⲣⲉⲓⲛ ⲓⲥϫⲉ ⲁⲕⲥⲱⲧⲉⲙ ⲉϩⲁⲛⲙⲏϣ ⲛ̀ⲥⲙⲏ ⲉⲑⲃⲉ ⲛⲓⲉⲙⲗⲁϧ ⲉⲧⲁⲩϣⲱⲡⲓ ⲟⲩⲧⲉ ⲛⲓⲥⲛⲏⲟⲩ ⲉⲁⲩⲥⲕⲁⲛⲇⲁⲗⲉⲍⲉⲓ ⲙ̀ⲙⲟⲓ ⲛ̀ϫⲉϩⲁⲛⲙⲟⲛⲁⲭⲟⲥ ⲕⲉ ⲡⲁⲗⲓⲛ ⲟⲛ ⲁⲩⲙⲟⲩϯ ⲉⲣⲟⲓϫⲉⲓⲟⲩⲇⲁⲥ ⲟⲩⲟϩ ⲁⲩϫⲟⲥ ϫⲉⲁⲛⲟⲕ ⲟⲩϩⲉⲗⲗⲏⲛⲟⲥ ϫⲉⲙ̀ⲡⲓⲙⲟϣⲓ ⲛ̀ⲥⲱⲟⲩ ϩⲱⲥ ⲉⲥⲱⲟⲩ ⲛ̀ⲁⲧⲕⲁϯ ϫⲉⲉⲓⲥ ⲟⲩϣⲃⲱⲧ ⲛ̀ϫⲟⲙ ⲛ̀ⲧⲱⲟⲩ ⲟⲩⲟϩ ⲥⲉⲛⲁϯϩⲁⲡ ⲉⲣⲟⲓ ⲛ̀ⲭⲱⲗⲉⲙ ⲛⲁⲓ ⲉⲧⲁⲩⲭⲱ ⲙ̀ⲡⲓⲥⲱⲟⲩⲛ ⲛ̀ⲥⲱⲟⲩ ⲉⲑⲃⲉⲫⲁⲓ ϯⲛⲁⲧⲁⲙⲟⲕ ϩⲟⲡⲱⲥ ⲛ̀ⲧⲉⲕϣⲧⲉⲙⲉⲣⲙ̀ⲫⲣⲏϯ ⲙ̀ⲫⲏⲉⲧⲉ ⲛ̀ⲧⲉϥⲥⲱⲟⲩⲛ ⲙ̀ⲙⲁⲩ ⲡⲉϫⲉ ⲡⲓⲥⲟⲫⲟⲥ ϫⲉⲙ̀ⲡⲉⲣⲁⲙⲟⲛⲓ ⲛ̀ⲟⲩⲥⲁϫⲓ ϧⲉⲛⲟⲩⲥⲏⲟⲩ ⲛ̀ⲟⲩϫⲁⲓ ⲉ̀ϣⲁⲩⲥⲟⲩⲉⲛϯⲥⲟⲫⲓⲁⲅⲁⲣ ϧⲉⲛⲡⲓⲥⲁϫⲓ ⲟⲩⲟϩ ϯⲙⲉⲧⲥⲁⲃⲉ ϧⲉⲛⲡⲓⲗⲁⲥ ⲉ̀ϣⲱⲡⲟⲩⲛ ⲁⲩϣⲁⲛϭⲟϫⲓ ⲛ̀ⲥⲱⲓ ⲛ̀ⲥⲉϣⲱϣ ⲙ̀ⲙⲟⲓ ⲟⲩⲟϩ ⲛ̀ⲥⲉϫⲉ ⲡⲉⲧϩⲱⲟⲩ ⲛⲓⲃⲉⲛ ⲛ̀ⲥⲱⲓ ⲉⲩϫⲉⲙⲉⲑⲛⲟⲩϫ ⲉ̀ⲣⲟⲓ ⲉⲑⲃⲉⲧⲟⲩⲙⲉⲧⲛⲁϣⲧϩⲏⲧ ⲉⲕⲉⲉⲙⲓ  ⲉϯⲙⲉⲑⲙⲏⲓ ⲱ ⲡⲓⲙⲁⲕⲁⲣⲟⲓⲥ ⲁⲛⲟⲕⲅⲁⲣ ϯϥⲓⲣⲱⲟⲩϣ ⲁⲛ ϧⲁⲛⲓϧⲓⲥⲓ ⲉⲧⲁⲓϣⲟⲡⲟⲩ ⲁⲗⲗⲁ ϯⲉⲣⲙⲉⲑⲣⲉ ϧⲁϯⲙⲉⲑⲙⲏⲓ  ⲉ̀ϣⲁⲩⲥⲟⲩⲉⲛϯⲥⲟⲫⲓⲁⲅⲁⲣ ϧⲉⲛⲡⲓⲥⲁϫⲓ ⲟⲩⲟϩ ϯⲙⲉⲧⲥⲁⲃⲉ ϧⲉⲛⲡⲥⲁϫⲓ ⲙ̀ⲡⲓⲗⲁⲥ ⲟⲩⲟϩ ⲛ̀ⲑⲟⲕⲇⲉ ϩⲱⲕ ⲉⲕⲉ̀ⲥⲟⲩⲉⲛⲑⲙⲏⲓ ⲟⲩⲟϩ ⲉⲣⲉ ⲑⲙⲏⲓ ⲁⲓⲕ ⲛ̀ⲣⲉⲙϩⲉ ⲕⲉⲡⲁⲗⲓⲛ ⲟⲛ ⲉⲕⲉⲉⲙⲓ ϫⲉϯⲙⲉⲧⲙⲁⲓϯⲧⲱⲛ ⲑⲱⲗⲉⲃ ⲛ̀ϯⲯⲩⲭⲏ ⲟⲩⲟϩ ϯⲙⲉⲧϭⲁⲥⲓϩⲏⲧ ϣⲁⲥϯⲟⲩⲃⲉ ϯⲅⲛⲱⲥⲓⲥ ⲙ̀ⲙⲏⲓ ⲡϩⲏⲧⲇⲉ ⲙ̀ⲡⲥⲁⲃⲉ ϣⲁϥⲙⲉⲩⲓ ⲉⲟⲩⲡⲁⲣⲁⲃⲟⲗⲏ ⲟⲩⲟϩ ⲫⲟⲩⲱϣ ⲛ̀ⲟⲩⲥⲁⲃⲉⲡⲉ ⲟⲩⲙⲁϣϫ. ⲉⲑⲃⲉ ⲫⲁⲓ ϯⲥϧⲁⲓ ⲛⲁⲕ ⲛ̀ⲧⲁⲓⲉⲡⲓⲥⲧⲟⲗⲏ ⲑⲁⲓ ⲟⲩⲟϩ ϯⲛⲁⲟⲩⲱⲣⲡ ⲛⲁⲕ ⲟⲛ ⲛ̀ⲛⲓⲉⲡⲓⲥⲧⲟⲗⲏ ⲉⲧⲁⲓⲥϧⲏⲧⲟⲩ ⲁⲣⲓⲧⲁⲅⲁⲡⲏ ⲙ̀ⲡⲉⲣϯϩⲁⲡ ϩⲓⲛⲁ ⲛ̀ⲧⲟⲩϣⲧⲉⲙϯϩⲁⲡ ⲉⲣⲟⲕ ⲁⲗⲗⲁ ⲱϣ ⲟⲩⲟϩ ⲕⲁϯ ⲉⲓⲥ ⲛ̀ⲉⲡⲓⲥⲧⲟⲗⲏ ⲫⲗⲟⲅⲟⲥ ⲉⲑⲟⲩⲁⲃ ⲙⲁⲣⲉϥϣⲱⲡⲓ ⲙ̀ⲫⲁⲛⲟⲥ ⲙ̀ⲡⲉⲕⲛⲟⲩⲥ ⲟⲩϫⲁⲓ 

ⲙⲏⲓⲥ ⲛ̀ⲁⲅⲁⲑⲟⲛ ϩⲓⲧⲉⲛⲙⲁⲣⲕⲟⲥ 

 ϧⲉⲛⲥⲟⲩⲁⲓ ⲙ̇ⲡⲓⲁⲃⲟⲧ ⲭⲟⲓⲁⲕ ⲛ̇ϯⲣⲟⲙⲡⲓ ⲙ̇ⲙⲁϩⲁⲯ̅ⲙ̅ⲃ̅ ⲙ̇⳥ ⲁⲛⲟⲕ ⲡⲉϣⲉⲛϯ ⲡⲓⲉⲗⲁⲭⲓⲥⲧⲟⲥ ⲉⲓⲥϧⲁⲓ ⲙ̀ⲡⲁⲥⲟⲛ ⲡⲓϭⲱⲓϫ ⲙ̇ⲙⲁⲧⲟⲓ ⲛ̇ⲧⲉⲡⲉⲛⲕⲁϩⲓ ϫⲉⲭⲁⲓⲣⲉ ⲁⲓⲓ̀ ⲉϩⲣⲁⲕ ⲓⲥϫⲉⲛ ⲕ̅ⲉ̅ ⲛ̀ⲣⲟⲙⲡⲓ ⲛⲁⲕⲥⲁϫⲓ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛⲟⲩⲙⲟⲑⲛⲉⲥ ⲛⲁⲕⲥⲱⲃⲓ ⲟⲩⲟϩ ϫⲉⲛϫⲉⲛ ⲁⲛⲥⲉϩⲉⲛⲕⲉ ⲛⲉⲙⲛⲉⲛⲉⲣⲏⲟⲩ ⲟⲩⲟϩ ⲁⲛⲥⲁϫⲓ ⲛⲉⲙⲛⲉⲛⲉⲣⲏⲟⲩ ⲛ̀ϩⲉⲃⲇⲟⲙⲁⲥ ⲛⲓⲃⲉⲛ ⲁⲛⲉⲣ ⲛⲓⲟⲩⲛⲟⲩ ⲛ̀ⲧⲉⲛⲓⲉϫⲱⲣϩ ⲉⲛϭⲓⲥⲃⲱ ⲉⲧⲉⲛⲁⲥⲡⲓ ϩⲓⲛⲁ ⲛ̀ⲧⲉⲛⲥⲁϫⲓ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲛⲉⲙⲡⲓⲁⲧⲑⲱⲟⲩⲓ ⲛⲉⲙⲑⲟⲩⲑⲙⲟⲥ ⲛⲉⲙⲁⲓⲑⲁⲙⲓⲟ ⲛⲁⲛⲑⲱⲟⲩϯ ⲛ̀ⲥⲁⲃⲃⲁⲧⲟⲛⲛⲓⲃⲉⲛ ⲛ̀ⲧⲉⲛⲥⲁϫⲓ ⲛⲉⲙⲛⲉⲛⲉⲣⲏⲟⲩ . 

ⲉⲧⲁⲛⲓⲣⲟⲙⲡⲓⲇⲉ ⲥⲓⲛⲓ ⲁⲛϣⲓⲃϯ ⲁⲓⲙⲉⲓⲙⲉⲛ ⲛ̀ⲛⲓⲥϧⲁⲓ ⲛ̀ⲧⲉⲛⲁⲓⲟϯ ⲟⲩⲟϩ ⲁⲓⲥⲱⲧⲉⲙ ⲉⲡⲟⲩϧⲣⲱⲟⲩ ⲉⲧⲱϣ ⲉⲃⲟⲗϧⲉⲛⲛⲟⲩⲥϧⲁⲓ ⲉⲃⲟⲗϩⲓⲧⲟⲧⲟⲩ ⲁⲓⲥⲱⲟⲩⲛ ⲛ̀ϯⲙⲉⲑⲙⲁⲓⲣⲱⲙⲓ ⲛⲓⲥϧⲁⲓ ⲛ̀ⲧⲉ ⲡⲧⲱⲟⲩ ⲛ̀ϣⲓϩⲏⲧ ⲁⲩⲧⲥⲁⲃⲟⲓ ⲛ̀ⲧⲁⲭⲱ ⲛⲱⲟⲩ ⲛ̀ⲟⲩⲟⲛ ⲛⲓⲃⲉⲛ 

ⲁⲓⲙⲉⲓⲅⲁⲣ ϫⲉⲧⲉⲛⲁⲥⲡⲓ ⲁⲥⲙⲟⲩ ⲟⲩⲟϩ ⲙ̀ⲙⲟⲛ ⲱⲛϧ ⲭⲏ ϧⲉⲛⲡϫⲱⲛⲧ ⲟⲩⲇⲉ ⲡⲓⲙⲟⲥϯ ⲁⲓⲁⲣⲉϩ ⲉϯϩⲓⲥⲧⲟⲣⲓⲁ ⲛ̀ⲧⲉⲧⲉⲛⲁⲥⲡⲓ ⲟⲩⲟϩ ⲁⲓϩⲓⲧⲥ ϧⲉⲛⲫⲓⲟⲙ ⲁⲓϣⲱⲡⲓ ⲙ̀ⲫⲣⲏϯ ⲛ̀ⲟⲩϩⲉⲣⲙⲓⲧⲏⲥ ϧⲉⲛⲡⲓⲉⲣⲫⲉⲓ ⲛ̀ⲧⲉⲧⲉⲛⲁⲥⲡⲓ 

ⲛ̀ⲑⲟⲕⲇⲉⲁⲕϣⲱⲡⲓ  ⲙ̀ⲫⲣⲏϯ ⲛ̀ⲟⲩⲙⲁⲧⲟⲓ ⲉⲕϯⲟⲩⲃⲉ ⲛⲏⲉⲧϯ ⲉ̀ϧⲟⲩⲛ ⲉϩⲣⲉⲛ ⲧⲉⲛⲁⲥⲡⲓ ⲁⲕⲉⲣⲭⲣⲓⲁ ⲛ̀ⲧⲉⲕϭⲓⲥⲓ ⲙ̀ⲡⲧⲁⲡ ⲛ̀ⲧⲉ ⲧⲉⲛⲁⲥⲡⲓ ⲁⲕⲛⲁⲩ ⲉⲛϫⲁϫⲓ ⲛ̀ⲧⲉ ⲧⲉⲛⲁⲥⲡⲓ ϧⲉⲛⲙⲁⲓ ⲛⲓⲃⲉⲛ ϣⲁ ⲛⲓⲥⲁϫⲓ ⲛ̀ⲧⲉⲧⲉⲛⲁⲥⲡⲓ ⲁⲕϫⲓⲙⲓⲅⲁⲣ  ⲛ̀ϩⲁⲛϫⲁϫⲓ ϧⲉⲛϩⲁⲛⲥⲁϫⲓ ⲙ̀ⲫⲣⲏϯ ⲛ̀ϯϩⲉⲇⲟⲙⲁⲥ ⲛⲉⲙϯⲡⲁⲣⲁⲥⲕⲉⲩⲏ ⲛⲉⲙⲡⲓⲥⲁⲃⲃⲁⲧⲟⲛ ⲁⲕⲉⲣⲉⲡⲓⲑⲩⲙⲓⲛ ⲛ̀ⲧⲉⲕⲧⲟⲩⲃⲟ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲉⲃⲟⲗϩⲁ ⲧⲉⲥϩⲓⲥⲧⲟⲣⲓⲁ ⲉⲕⲉⲣⲉⲧⲓⲛ ⲛ̀ⲧⲉⲕⲉⲣⲃⲉⲣⲓ ⲛ̀ⲧⲉⲛⲁⲥⲡⲓ ⲟⲩⲟϩ ⲁⲕⲉⲙⲗⲁϧ ⲛⲉⲙⲟⲩⲟⲛ ⲛⲓⲃⲉⲛ ⲉⲑⲟⲩⲱϣ ⲁⲛ ⲛ̀ⲧⲉϥϭⲓ ⲟⲩⲥⲏϥⲓ ⲟⲩⲟϩ ⲙⲓϣⲓ ⲉ̀ϫⲉⲛⲧⲉⲛⲁⲥⲡⲓ ϧⲉⲛⲣⲱⲥ ⲛ̀ⲧⲥⲏϥⲓ ⲛ̀ⲧⲉ ⲫⲗⲁⲥ 

ⲛⲉ ⲛⲉⲛⲓⲟϯ ⲙ̀ⲙⲟⲛⲁⲭⲟⲥ ⲉⲣⲁⲥⲕⲓⲛ ⲟⲩⲟϩ ⲁⲛⲟⲕϧⲁ ⲡⲓϫⲱⲃ ⲛ̀ⲣⲉϥⲉⲣⲛⲟⲃⲓ ⲉⲓⲉⲙⲟϣⲓ ⲛ̀ⲥⲱⲟⲩ ⲙ̀ⲙⲟⲛϣϫⲟⲙ ⲙ̀ⲙⲟⲓ ⲛ̀ⲧⲁϩⲓⲟⲩⲓ ⲛ̀ⲛⲓⲁⲣⲉⲧⲏ ⲧⲏⲣⲟⲩ ⲉⲧⲁⲩⲧⲥⲁⲃⲟⲓ ⲛ̀ⲧⲁⲙⲓϣⲓ ⲛⲉⲙⲁⲕ ⲉ̀ϫⲉⲛ ⲧⲉⲛⲁⲥⲡⲓ ϫⲉⲟⲩⲏⲓ ⲁⲛⲟⲕ ⲟⲩⲣⲉϥⲃⲱⲧⲥ ⲁⲛ

ⲁⲛϩⲓⲟⲓ ⲛⲉⲙⲛⲉⲛⲉⲣⲏⲟⲩ ⲛ̀ϩⲟ ⲟⲩⲃⲉ ϩⲟ ϫⲉⲟⲩⲏⲓ ⲁⲛⲟⲕ ⲛⲁⲓⲣⲏⲥ ⲡⲉ ϧⲉⲛⲛⲓⲅⲣⲁⲫⲏ ⲉⲙⲁϣⲱ ⲟⲩⲟϩ ⲛⲁⲣⲉ ⲡⲁⲕⲁϯ ⲥⲉⲃⲧⲱⲧ ⲡⲉ ⲉⲥⲟϩⲓ ⲛ̀ⲛⲓⲥⲁϫⲓ ⲛ̀ⲧⲉ ⲛⲓϩⲉⲣⲉⲧⲓⲕⲟⲥ ϧⲉⲛⲧⲥⲟⲫⲓⲁ ⲛ̀ⲧⲉ ⲛⲉⲛⲓⲟϯ ⲛ̀ⲑⲟⲕⲇⲉ ⲁⲕϯ ⲟⲩⲃⲏⲓ ϧⲉⲛⲟⲩⲙⲉⲧϫⲱⲣⲓ ⲉⲣⲉ ϯⲃⲁⲕⲓ ϯⲱⲟⲩ ⲛⲁⲕ ⲉⲙⲁϣⲱ ⲁⲗⲗⲁ ⲙⲉⲛⲉⲛⲥⲁ ⲧⲁⲓⲥⲃⲱ ⲧⲏⲣⲥ ⲁⲕⲟⲩⲱϣ ⲉⲑⲃⲉ ϯⲙⲉⲧϭⲁⲥⲓϩⲏⲧ ⲉⲧⲁⲥϣⲱⲡⲓ ⲙ̀ⲙⲟⲕ ⲁⲕϩⲉⲓ ⲉⲧⲟⲧⲕ ⲙ̀ⲡⲓⲇⲁⲓⲙⲱⲛ ⲛ̀ⲧⲉ ⲡϫⲱⲛⲧ 

ⲉⲓⲉⲭⲁⲕ ⲛ̀ⲥⲱⲓ ⲱ ⲡⲓⲙⲁⲧⲟⲓ ⲛ̀ⲧⲉϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲟⲩⲟϩ ⲉⲓⲉⲧⲁⲥⲑⲉ ⲉⲧⲁⲕⲉⲗⲓ ⲉⲓⲥⲟⲙⲥ ⲉⲛⲓⲥϧⲁⲓ ⲛ̀ⲁⲡⲁⲥ ⲟⲩⲟϩ ⲉⲓⲉⲥϧⲁⲓ ⲛ̀ⲧⲁⲁⲥⲡⲓ ϧⲉⲛⲟⲩϩⲓⲣⲏⲛⲏ ⲥⲁⲃⲟⲗ ⲙ̀ⲡⲓϣⲑⲟⲣⲧⲉⲣ ⲛ̀ⲧⲉⲡⲓⲕⲟⲥⲙⲟⲥ

ⲟⲩϫⲁⲓ ⲡⲁⲥⲟⲛ ϫⲉⲁⲕϯϩⲓⲱⲧⲕ ⲛ̀ϯϧⲉⲗⲓⲃϣ ⲛⲉⲙϯⲡⲉⲣⲓⲕⲉⲫⲁⲗⲉⲁ ⲛ̀ⲧⲉⲛⲓⲙⲁⲧⲟⲓ ⲁⲕϧⲱⲧⲉⲃ ⲛ̀ⲛⲉⲕϫⲁϫⲓ ϧⲉⲛⲡⲉⲕⲕⲟⲛⲧⲁⲣⲓⲟⲛ ϯⲛⲁⲭⲁⲕ ⲛ̀ⲥⲱⲓ ⲙⲏⲡⲟⲧⲉ ⲛ̀ⲧⲉⲕⲡⲗⲩⲧⲏ ⲙ̀ⲙⲟⲓ ϧⲉⲛⲡⲉⲕϫⲱⲛⲧ 

ⲟⲩϫⲁⲓ ⲡⲁⲥⲟⲛ ϫⲉⲙ̀ⲙⲟⲛϣϫⲟⲙ ⲙ̀ⲙⲟⲓ ⲉϫⲟⲩϣⲧ ⲉⲡⲓⲥⲛⲟϥ ϩⲓⲧⲟⲧⲕ 

ⲟⲩϫⲁⲓ ⲡⲁⲥⲟⲛ ⲙ̀ⲡⲁϯⲥⲱⲧⲉⲙ ⲉⲡϧⲣⲱⲟⲩ ⲉⲧϫⲟⲥ ⲛⲁⲕ ϫⲉⲟⲩ ⲡⲉⲧⲁⲕⲁⲓϥ ⲧⲥⲙⲏ ⲙ̀ⲡⲥⲛⲟϥ ⲙ̀ⲡⲉⲕⲥⲟⲛ ⲱϣ ⲉ̀ϩⲣⲏⲓ ϩⲁⲣⲟⲓ ⲉ̀ⲃⲟⲗϧⲉⲛⲡⲕⲁϩⲓ

ⲛ̀ⲑⲟⲕⲇⲉ ⲕⲉⲙⲓ ⲉⲫⲙⲁ ⲛ̀ⲧⲉⲧⲁⲕⲉⲗⲓ ⲁⲕϣⲁⲛⲧⲱⲃϩ ⲛ̀ϯϩⲓⲣⲏⲛⲏ ⲕⲱⲗϩ ϩⲓⲣⲉⲛ ⲫⲣⲟ ⲛ̀ⲧⲁⲕⲉⲗⲗⲓⲁ ⲟⲩⲟϩ ϯⲛⲁⲉⲣⲟⲩⲱ ⲛⲁⲕ

_________________________________

ϧⲉⲛⲥⲟⲩⲍ̄ ⲙ̇ⲡⲓⲁⲃⲟⲧ ⲭⲟⲓⲁⲕ ⲁⲯ̅ⲙ̅ⲃ̅ ⲙ̇ⲙⲁⲣⲧⲩⲣⲟⲥ ⲁⲛⲟⲕ ⲡⲉϣⲉⲛϯ ⲉⲓⲥϧⲁⲓ ⲙ̇ⲡⲓⲙⲁⲧⲟⲓ ϫⲉⲭⲁⲓⲣⲉⲓⲛ ϯϣⲓⲛⲓ ⲉⲣⲟⲕ ⲉⲓⲥ ⲁⲓⲭⲁⲕ ⲛ̀ⲥⲱⲓ ⲁⲗⲗⲁ ⲁⲕϭⲟϫⲓ ⲛ̀ⲥⲱⲓ ϧⲉⲛⲙⲁⲓⲛⲓⲃⲉⲛ ϩⲱⲥ ⲙⲁⲧⲟⲓ ⲙ̀ⲙⲏⲓ ⲙ̀ⲡⲁⲕⲭⲁⲙⲁⲛⲏⲓ ⲛ̀ⲧⲁⲫⲱⲧ ⲉⲃⲟⲗϩⲁ ⲡⲉⲕϩⲟ ⲁⲕⲟⲡⲧⲇⲉ ϩⲱⲥ ϫⲁϫⲓ ⲟⲩⲟϩ ⲉⲕϯϩⲁⲡ ⲉⲣⲟⲓ ⲟⲩⲟϩ ⲁⲕⲱⲣϫ ϫⲉⲛ̀ⲛⲉⲕⲛⲁⲭⲁ ⲧⲉⲕⲥⲏϥⲓ ⲛ̀ⲥⲱⲕ ϣⲁⲛⲧⲉⲕϧⲟⲙϧⲉⲙ ⲙ̀ⲙⲟⲓ ⲥⲁⲡⲉⲥⲏⲧ ⲛ̀ⲛⲉⲕϭⲁⲗⲁⲩϫ ⲛⲓⲙⲅⲁⲣ ϧⲉⲛⲛⲓⲣⲱⲙⲓ ⲉⲑⲛⲁⲥⲉⲙⲛⲓ ⲛⲁⲕ ⲛ̀ⲧⲉϥϩⲓⲣⲏⲛⲏ ⲁⲛⲟⲕⲇⲉ ϯⲛⲁⲫⲱⲧ ⲉⲧⲁⲣⲓ ⲟⲩⲟϩ ⲉⲓⲉⲙⲟⲩⲛ ⲉⲃⲟⲗ ⲉⲥⲙⲟⲩ ⲉⲧⲉⲛⲁⲥⲡⲓ ϧⲉⲛⲡⲉⲥⲉⲣⲫⲉⲓ ⲛⲉⲙⲛⲁⲥⲛⲏⲟⲩ 

ϯϫⲟⲩϣⲧⲉⲃⲟⲗϧⲁⲧϩⲏ ⲙ̀ⲡⲉⲕϫⲓⲛⲧⲁⲥⲑⲟ ⲁⲭⲛⲁⲕⲱⲗϩ ϩⲓⲣⲉⲛ ⲫⲣⲟ ⲛ̀ⲧⲁⲕⲉⲗ ⲓⲉ ⲁⲭⲛⲁⲧⲁⲕⲟ ⲙ̀ⲡⲓⲉⲣⲫⲉⲓ ⲧⲏⲣϥ ⲛⲉⲙⲛⲏⲉⲧⲡⲣⲉⲃⲉⲩⲓⲛ ⲛ̀ϧⲏⲧϥ ⲉⲓⲥ ⲟⲩϩⲉⲃⲇⲟⲙⲁⲥ ⲁⲥⲥⲓⲛⲓ ⲛ̀ⲑⲟⲕⲇⲉ ⲁⲕⲑⲱⲟⲩϯ ⲛ̀ⲛⲓⲕⲉⲙⲁⲧⲟⲓ ϩⲓⲛⲁ ⲛ̀ⲧⲟⲩⲙⲓϣⲓ ⲟⲩⲃⲏⲓ ⲁⲕⲧⲁⲙⲟⲅⲁⲣ ⲙ̀ⲙⲱⲟⲩ ϫⲉⲁⲛⲟⲕ ⲟⲩϫⲁϫⲓ ⲉⲧⲁⲩⲧⲁⲕⲟ ⲛ̀ⲧⲉⲛⲕⲉⲗⲗⲓⲁ ⲙ̀ⲡⲟⲩϫⲓⲙⲓ ⲛ̀ⲟⲩⲥⲏϥⲓ ⲁⲩⲛⲁⲩ ⲉⲡⲁⲕⲁϣ ⲛⲉⲙⲛⲁⲉⲡⲓⲥⲧⲟⲗⲏ ⲛⲉⲙϩⲁⲛⲅⲣⲁⲫⲏ ⲛ̀ⲁⲡⲁⲥ ⲟⲩⲟϩ ⲁⲩⲓ̀ ϩⲁⲣⲟⲓ ⲛ̀ϫⲉⲛⲓⲙⲁⲧⲟⲓⲉⲩⲉⲣⲡⲓⲣⲁⲍⲓⲛ ⲙ̀ⲙⲟⲓ ⲉⲩϫⲱⲙ̀ⲙⲟⲥ ϫⲉⲡⲱⲥ ⲁⲕϫⲉⲟⲩⲁ ⲟⲩⲟϩ ⲕⲥⲁϩⲟⲩⲓ ⲛ̀ⲛⲉⲕⲁⲣⲭⲱⲛ ⲛⲉⲙⲛⲉⲕⲥⲩⲅⲅⲉⲛⲏⲥ ⲛⲉⲙⲡⲉⲛⲛⲟⲩϯ ⲡⲉϫⲏⲓ ⲛⲱⲟⲩ ϫⲉϯⲥⲁϩⲟⲩⲓ ⲁⲛ ⲙ‌ⲡⲭⲁⲕⲓ ⲁⲗⲗⲁ ⲡⲓⲭⲁⲕⲓⲙⲉⲛ ϥⲥⲁϩⲟⲩⲓ ⲙ‌ⲙⲟⲓ ϣⲁϯⲛⲟⲩ ϥϭⲟϫⲓ ⲛ‌ⲥⲱⲓ ⲛ‌ϫⲉⲡⲧⲁⲕⲟ ⲁⲗⲗⲁ ⲙ‌ⲡⲉϥϣⲧⲁϩⲟⲓ

ⲁⲛⲟⲕⲅⲁⲣⲡⲉ ⲫⲟⲩⲱⲓⲛⲓ ⲛⲉⲙⲧϧⲏⲓⲃⲓ
ⲁⲛⲟⲕⲡⲉ ϯⲁⲗⲏⲑⲓⲁ ⲛⲉⲙϯⲁⲡⲁⲧⲏ
ⲁⲛⲟⲕⲡⲉ ⲡⲓⲑⲉⲃⲓⲏⲟⲩⲧ ⲛⲉⲙⲡⲓϭⲁⲥⲓϩⲏⲧ
ⲁⲛⲟⲕⲡⲉ ⲡⲓⲙⲱⲓⲧ ⲛⲉⲙⲡⲓⲟⲥⲓ
ⲁⲛⲟⲕⲡⲉ ⲡⲓⲁϩⲟ ⲛⲉⲙⲡⲧⲁⲕⲟ
ⲁⲛⲟⲕⲡⲉ ⲡⲓϧⲣⲱⲟⲩ ⲉⲧⲱϣ ϧⲉⲛⲡϣⲁϥⲉ ⲁⲗⲗⲁ ⲙ‌ⲙⲟⲛⲡⲉⲧⲁϥⲥⲟⲑⲙⲉⲧ ϫⲉⲁⲓⲫⲱⲧ ⲉⲃⲟⲗϩⲁ ⲡⲓⲕⲟⲥⲙⲟⲥ

ⲛⲁⲣⲉ ⲡⲓⲕⲟⲥⲙⲟⲥ ⲙⲡϣⲁ ⲙ‌ⲙⲟⲓ ⲁⲛ ⲡⲉ ⲉⲓⲥⲱⲣⲉⲙ ϩⲓⲡϣⲁϥⲉ ⲛ̀ⲥⲓⲛⲁ ⲛⲉⲙⲡⲧⲱⲟⲩ ⲛ̀ⲧⲉ ϣⲓϩⲏⲧ ⲛⲉⲙⲛⲓⲃⲏⲃ ⲛⲉⲙⲛⲓⲭⲟⲗ ⲛ‌ⲧⲉⲡⲕⲁϩⲓ ⲁⲛⲟⲕⲇⲉ ϩⲱ ϯⲙⲡϣⲁ ⲙ‌ⲡⲓⲕⲟⲥⲙⲟⲥ ⲁⲛ ϫⲉⲁⲛⲟⲕ ⲁⲛ ⲡⲉ ⲡⲉϥⲟⲩⲱⲓⲛⲓ. ⲁⲛⲟⲕⲡⲉ ⲧϣⲱϯ ⲙ‌ⲙⲱⲟⲩ ⲛ‌ⲱⲛϧ ⲉⲑⲙⲉϩ ⲙ‌ⲫⲁⲣⲙⲁⲅⲓⲁ

ⲁⲣⲉⲧⲉⲛϣⲁⲛⲕⲁϯ ⲉⲣⲟⲓ ⲧⲉⲧⲉⲛⲛⲁⲭⲁⲧ ⲛ‌ⲥⲁ ⲑⲏⲛⲟⲩ ⲓⲉ ⲧⲉⲧⲉⲛⲛⲁⲙⲟϣⲓ ⲛ‌ⲥⲱⲓ
ⲁⲣⲉⲧⲉⲛϣⲧⲉⲙⲕⲁϯ ⲉⲣⲟⲓ ⲧⲉⲧⲉⲃⲛⲁϩⲓⲱⲛⲓ ⲙ‌ⲙⲟⲓ ϩⲱⲥ ϩⲉⲣⲉⲧⲓⲕⲟⲥ ⲛⲉⲧⲉⲛⲱⲛⲓ ⲥⲉⲛⲁⲑⲱⲙ ⲛ‌ⲣⲱⲓ ⲁⲗⲗⲁ ⲧⲁⲥⲟⲫⲓⲁ ⲥⲛⲁⲭⲁⲣⲱⲥ ⲁⲛ

ⲟⲩϫⲁⲓ ⲡⲁⲥⲟⲛ

__________________________________

ⲁⲩⲥⲱⲃⲓ ⲙ̀ⲙⲟⲓ ⲉⲩϫⲱⲙⲙⲟⲥ ⲛⲏⲓ ϫⲉⲛ̀ⲑⲟⲕⲇⲉ ⲉⲭⲟⲩⲉϩ ⲛ̀ⲥⲁϯⲅⲛⲱⲥⲓⲥ ⲛⲉⲙϯⲥⲟⲫⲓⲁ ⲛⲉⲙϯⲙⲉⲧⲇⲓⲕⲉⲟⲥ ⲛ̀ⲧⲉⲡⲁⲓⲕⲟⲥⲙⲟⲥ ⲫⲁⲓ ⲉⲧϩⲱⲟⲩ ⲛ̀ⲑⲟⲕⲟⲩⲛ ⲟⲩⲁⲛⲁⲭⲱⲣⲓⲧⲏⲥ ⲁⲛ ⲁⲗⲗⲁ ⲟⲩϩⲉⲣⲉⲧⲓⲕⲟⲥ ϫⲉⲟⲩⲏⲓⲅⲁⲣ ⲉⲣⲉⲣⲱⲕ ⲟⲩⲏⲛ ϧⲉⲛⲛⲓⲙⲉⲧⲉⲫⲗⲏⲟⲩ ⲟⲩⲟϩ ⲟⲩⲟⲓ ⲛⲁⲕ ϫⲉⲁⲕⲕⲱⲧ ⲛⲁⲕ ⲛϩⲁⲛⲩⲕⲉⲗⲗⲓⲁ ⲛⲏⲉⲧⲉ ⲙ̀ⲡⲟⲩϯϩⲏⲟⲩ ⲛⲁⲕ ⲛ̀ⲑⲟⲕ ⲟⲩⲕⲟⲩϫⲓ ϧⲉⲛⲛⲓⲁⲣⲉⲧⲏ ⲁⲕⲟⲩⲱⲙⲅⲁⲣ ⲉⲃⲟⲗϧⲉⲛ ⲡⲟⲩⲧⲁϩ ⲙ̀ⲡⲓϣϣⲏⲛ ⲛ̀ⲧⲉⲡⲉⲙⲓ ⲉ̀ⲡϣⲓⲃϯ ⲛ̀ϯⲥⲟⲫⲓⲁ ⲛⲉⲙϯⲙⲉⲧⲁⲧⲥⲃⲱ ⲟⲩⲟϩ ϯⲫⲁⲣⲁⲙⲅⲓⲁ ⲛ̀ⲧⲉⲡⲓⲉⲙⲓ ⲁⲥⲧⲁϩⲟⲕ ⲟⲩⲟⲓ ⲙ̀ⲙⲟⲕ ϫⲉⲁⲕⲉⲣⲡⲓⲑⲩⲙⲓⲛ ⲙ̀ⲡⲓⲉⲙⲓ ϫⲉⲭⲛⲁⲉⲣⲛⲉⲕⲉϩⲟⲟⲩ ⲧⲏⲣⲟⲩ ⲉⲕⲕⲱϯ ⲛ̀ⲥⲁϯⲅⲛⲱⲥⲓⲥ 

ⲁⲛⲟⲛⲅⲁⲣ ⲁⲛⲟⲛ ϩⲁⲛⲓⲇⲓⲱⲧⲏⲥ ⲛ̀ⲣⲱⲙⲓ ⲙ̀ⲡⲉⲛϭⲓⲥⲃⲱ ⲛ̀ⲧⲉⲡⲁⲓⲕⲟⲥⲙⲟⲥ ⲟⲩⲇⲉ ⲛ̀ⲛⲉⲥϣⲱⲡⲓ ⲙ̀ⲙⲟⲛ ⲁⲛⲟⲩⲱⲙⲅⲁⲣ ⲉⲃⲟⲗϧⲉⲛ ⲡⲟⲩⲧⲁϩ ⲙ̀ⲡⲓϣϣⲏⲛ ⲛ̀ⲧⲉⲡⲱⲛϧ 

ⲡⲉϫⲁϥ ⲛⲏⲓ ⲛ̀ϫⲉⲟⲩⲣⲉϥⲃⲱⲧⲥ ϫⲉⲁⲕⲟⲩⲉϩ ⲉϫⲉⲛ ⲡⲓⲙⲁⲧⲟⲓ ⲛ̀ⲁⲅⲁⲑⲟⲥ ⲙ‌ⲫⲣⲏϯ ⲛ̀ⲟⲩⲟⲩⲱⲛϣ ⲙ̀ⲡⲉϥⲕⲱϯ

ⲁⲓⲉⲣⲟⲩⲱ ⲛⲱⲟⲩ ⲧⲏⲣⲟⲩ ⲁⲓϫⲱⲙⲙⲟⲥ ϫⲉⲁⲣⲉϩⲇⲉ ⲉ‌ⲣⲱⲧⲉⲛ ⲉ‌ⲃⲟⲗϩⲁ ⲛⲓⲥⲟⲫⲟⲥ ⲛ‌ⲛⲟⲩϫ ⲛⲏ ⲉⲑⲛⲏⲟⲩ ϩⲁⲣⲱⲧⲉⲛ ϧⲉⲛϩⲁⲛϩⲉⲃⲥⲱ ⲛⲉⲥⲱⲟⲩ ⲥⲁϧⲟⲩⲛⲇⲉ ⲙ‌ⲙⲱⲟⲩ ϩⲁⲛⲟⲩⲱⲛϣ ⲛ‌ⲣⲉϥϩⲱⲗⲉⲙ ⲛⲉ. ⲁϥϧⲣⲁϫⲣⲉϫ ⲛ̀ⲛⲉϥⲛⲁϫϩⲓ ⲛ̀ϫⲉⲡⲓⲙⲁⲧⲟⲓ ⲉⲧⲁϥⲥⲟⲑⲙⲉⲧ ⲁϥϩⲟⲛϩⲉⲛ ⲛ̀ⲧⲟⲩⲉⲣⲃⲁⲥⲁⲛⲍⲓⲛ ⲙ̀ⲙⲟⲓ 

ⲁⲛⲟⲕⲇⲉ ⲁⲓϭⲓⲉⲣϧⲟⲧ ⲉⲑⲃⲉⲧⲟⲩⲙⲉⲧⲁⲧⲉⲙⲓ. ⲟⲩⲟϩ ⲁⲓϣⲱⲛⲓ ⲉⲑⲃⲉ ⲛⲟⲩⲁⲛⲟⲙⲓⲁ ⲧⲥⲃⲱ ⲛ̀ⲧⲉ ⲧⲟⲩϩⲓⲣⲏⲛⲏ ⲉ̀ϩⲣⲏⲓ ⲉ̀ϫⲱⲓ ϧⲉⲛⲛⲁⲗⲉⲗⲉⲭⲏⲙⲓ ⲛ̀ⲑⲱⲟⲩ ⲁⲩⲑⲉⲗⲏⲗ. ⲉⲧⲓ ⲉⲓϩⲉϫϩⲱϫ ϧⲉⲛϩⲱⲃⲛⲓⲃⲉⲛ ⲁⲗⲗⲁ ⲛ̀ⲧⲁϩⲉϫϩⲱϫ ⲁⲛ ⲉⲩϩⲓⲟⲩⲓ ⲙ̀ⲙⲟⲓ ⲉ̀ⲃⲟⲗ ⲁⲗⲗⲁ ⲛ̀ⲧⲁϩⲱⲟⲩⲓ ⲉ̀ⲃⲟⲗ ⲁⲛ ⲉⲩϭⲟϫⲓ ⲛ̀ⲥⲱⲓ ⲁⲗⲗⲁ ⲁϥⲭⲱ ⲙ̀ⲙⲟⲛ ⲉⲩⲣⲱϧⲧ ⲙ̀ⲙⲟⲓ ⲉ̀ϧⲣⲏⲓ ⲁⲗⲗⲁ ϯⲧⲁⲕⲏⲟⲩⲧ ⲁⲛ ⲉⲑⲃⲉ ⲧⲟⲩⲙⲉⲧⲛⲓϣϯ ⲛ̀ⲛⲁⲓ ⲉⲧⲉ ⲙ̀ⲡⲟⲩϫⲓⲙⲓ ⲛ̀ⲟⲩⲥⲏϥⲓ ⲙ̀ⲡⲟⲩϧⲟⲧϧⲉⲧ ⲡⲉϫⲱⲟⲩ ⲛⲁϥ ϫⲉⲫⲁⲓ ⲟⲩϩⲉⲣⲉⲧⲓⲕⲟⲥ ⲁⲗⲗⲁ ⲟⲩⲙⲁⲧⲟⲓ ⲁⲛ ⲉⲧⲁⲩⲛⲁⲩⲇⲉ ⲛ̀ϫⲉⲛⲓⲙⲁⲧⲟⲓ ϫⲉⲥⲉⲛⲁϫⲉⲙϩⲏⲟⲩ ⲛ̀ϩⲗⲓ ⲁⲛ ⲁⲗⲗⲁ ⲙⲁⲗⲗⲟⲛ ⲟⲩϣⲑⲟⲣⲧⲉⲣ ⲡⲉⲑⲛⲁϣⲱⲡⲓ ⲁⲩϭⲓ ⲛ̀ⲟⲩⲙⲱⲟⲩ ⲁⲩⲓⲁ ⲛⲟⲩϫⲓϫ ⲉ̀ⲃⲟⲗ ⲙ̀ⲡⲉⲙⲑⲟ ⲙ̀ⲡⲓⲙⲁⲧⲟⲓ ⲉⲩϫⲱ ⲙ̀ⲙⲟⲥ ϫⲉⲧⲉⲛⲟⲓ ⲛ̀ⲁⲑⲛⲟⲃⲓ ⲉ̀ⲃⲟⲗϩⲁ ⲡⲥⲛⲟϥ ⲛ̀ⲧⲉ ⲡⲁⲓϩⲉⲣⲉⲧⲓⲕⲟⲥ ⲛ̀ⲁⲧⲥⲏϥⲓ ⲛ̀ⲑⲟⲕ ⲉⲕⲉⲉ̀ⲣⲱϣⲓ

ⲡⲉϫⲁϥ ⲛⲏⲓ ⲛ̀ϫⲉⲡⲓⲙⲁⲧⲟⲓ ϫⲉϯⲉⲣⲭⲣⲓⲁ ⲁⲛ ⲛ̀ⲣⲉϥϯⲥⲃⲱ ⲟⲩⲟϩ ⲉⲣⲉⲡⲁϩⲏⲧ ⲑⲏⲧ ⲁⲛ ⲛⲉⲙⲛⲏⲉⲧϯⲥⲃⲱ ⲛⲏⲓ ⲛ̀ϯⲛⲁⲥⲟⲗⲥⲉⲗ ⲛ̀ⲛⲓⲥⲁϫⲓ ⲁⲛ ϧⲉⲛⲟⲩⲙⲉⲧⲫⲓⲗⲟⲥⲟⲫⲟⲥ ⲛⲏⲉⲧⲁⲓⲓⲣⲓ ⲉⲣⲱⲟⲩ ⲁⲛ ϧⲉⲛⲟⲩⲙⲉⲧⲡⲉⲣⲓⲟⲣⲅⲟⲥ ⲁⲗⲗⲁ ϧⲉⲛⲟⲩϫⲱϥ ⲛ̀ϩⲏⲧ ⲛ̀ⲑⲟⲕⲡⲉ ⲕⲟⲛⲓ ⲛ̀ⲟⲩⲙⲁⲑⲏⲧⲏⲥ ⲛ̀ⲥⲟϫ ⲡⲉ ⲁⲕⲁⲣⲉϩ ⲉⲛⲁⲓⲥⲁϫⲓ ⲁⲗⲗⲁ ⲛ̀ⲑⲟⲕ ⲟⲩⲃⲁⲗϩⲏⲧ ⲁⲛⲟⲕⲅⲁⲣ ⲡⲉ ⲫⲏⲉⲧϭⲟⲥⲓ ⲑⲱⲓ ⲧⲉ ϯϫⲟⲙ ⲛⲉⲙⲡⲓⲱⲟⲩ ⲛⲉⲙⲡⲓⲁⲙⲁϩⲓ ϯⲛⲁϧⲟⲙϧⲉⲙ ⲛ̀ⲧⲉⲕⲫⲓⲗⲟⲥⲟⲫⲓⲁ ⲛ̀ⲕⲟⲥⲙⲓⲕⲟⲛ

__________________________________

ⲡⲉϫⲉⲡⲓⲣⲱⲙⲓ ⲛ̀ⲁⲅⲁⲑⲟⲥ ϫⲉⲙ̀ⲡⲉⲣϯ ⲉ̀ϧⲟⲩⲛ ⲉ̀ϩⲣⲉⲛ ⲡⲓⲡⲉⲧϩⲱⲟⲩ ⲟⲩⲟϩ ⲉⲓⲥⲡⲓⲣⲉϥϭⲓⲟⲩⲓ̀ⲇⲉ ⲛ̀ⲑⲟϥ ⲁϥⲓ̀ ⲁϥϭⲓⲟⲩⲓ̀ ⲛ̀ⲧⲉⲕⲥⲏϥⲓ ⲛⲉⲙⲧⲉⲕϧⲉⲗⲗⲓⲃϣ ⲟⲩⲟϩ ⲁ̀ⲛⲟⲕ ⲉⲧⲁⲓⲓ̀ ⲉϩⲣⲁϥ ⲁⲓϣⲉⲛϩⲏⲧ ϧⲁⲣⲟⲕ ⲁⲓⲙⲟⲩⲣ ⲛ̀ⲛⲉⲕⲉⲣϧⲱⲧ ⲁⲓϯ ⲛⲉϩ ϩⲓ ⲏⲣⲡ ⲛ̀ⲥⲱⲟⲩ ⲉⲧⲁϥⲧⲁⲗⲟϥ ⲁⲓⲙⲟⲩϯⲇⲉ ⲙ̀ⲡⲓⲣⲉϥϭⲓⲟⲩⲓ ϩⲓⲛⲁ ⲛ̀ⲧⲉϥⲉⲣⲙⲉⲧⲁⲛⲟⲓⲛ ⲁⲗⲗⲁ ⲙ̀ⲡⲉϥⲟⲩⲱϣ ⲁⲓⲧⲁⲙⲉ ⲛⲓⲕⲉⲙⲁⲧⲟⲓ ⲙⲏⲡⲱⲥ ⲛ̀ⲧⲟⲩϭⲓⲟⲩⲓ ⲛ̀ⲛⲟⲩⲥⲏϥⲓ ⲟⲛ ⲛ̀ⲑⲟⲕⲇⲉ ⲁⲕϫⲟⲥ ⲛⲏⲓ ϫⲉⲙ̀ⲡⲓⲛⲁⲩ ⲉⲡⲓⲣⲉϥϭⲓⲟⲩⲓ ⲁⲗⲗⲁ ϯⲧⲁϫⲣⲏⲟⲩⲧ ϫⲉⲛ̀ⲑⲟϥ ⲟⲩⲙⲟⲛⲁⲭⲟⲥ ⲡⲉ ϯⲛⲟⲩⲇⲉ ⲁⲕϫⲓⲙⲓ ⲛ̀ⲧⲉⲕⲥⲏϥⲓ ⲁⲗⲗⲁ ⲙ̀ⲡⲉⲕⲟⲩⲉⲙϩⲑⲏⲕ ⲉⲁⲕⲕⲁⲧⲏⲅⲟⲣⲓⲛ ⲛ̀ⲟⲩⲙⲟⲛⲁⲭⲟⲥ ⲉⲑⲃⲉⲟⲩ ⲁⲕⲟⲩⲱϣ ⲛ̀ⲟⲩⲕⲁⲥⲧⲣⲟⲛ ⲟⲩⲧⲉ ⲛⲉⲛⲕⲉⲗⲗⲓⲁ ⲛⲧⲉⲛⲓⲙⲟⲛⲁⲭⲟⲥ ⲉⲑⲃⲉⲟⲩ ⲁⲕⲉⲣⲉⲧⲓⲛ ⲛ̀ⲧⲟⲩⲁⲓⲕ ⲛ̀ⲟⲩⲁⲣⲭⲏⲙⲁⲛⲇⲣⲓⲧⲏⲥ 

ⲁⲓϫⲟⲩϣⲧ ⲉ̀ⲡϣⲱⲓ ⲁⲓⲛⲁⲩ ⲉⲟⲩⲁϧⲱⲙ ⲉϥⲣⲏⲥ ⲟⲩⲟϩ ⲉϥⲉⲣⲛⲩⲙⲫⲓⲛ ⲟⲩⲟϩ ⲉⲓⲥ ⲟⲩⲁⲃⲱⲕ  ⲙ̀ⲫⲣⲏϯ ⲛ̀ⲟⲩⲙⲟⲩⲓ ⲉϥϩⲉⲙϩⲉⲙ ⲉϥⲕⲱϯ ⲛ̀ⲥⲁ ⲉⲙϥ ⲙ̀ⲡⲓⲁϧⲱⲙ ⲟⲩⲟϩ ⲡⲓⲁϧⲱⲙⲇⲉ ϫⲉⲙ̀ⲡⲉϥϯ ⲉ̀ϧⲟⲩⲛ ⲉϩⲣⲉⲛ ⲡⲓⲁⲃⲱⲕ ⲁⲗⲗⲁ ⲁϥϩⲁⲗⲁⲓ ⲛ̀ϫⲉ ⲡⲓⲁϧⲱⲙ ⲥⲁⲡϣⲱⲓ ⲟⲩⲟϩ ⲙ̀ⲡⲉ ⲡⲓⲁⲃⲱⲕ ⲧⲁϩⲟϥ

_______________________________

ϧⲉⲛⲥⲟⲩⲕ̄ⲁ̄ ⲙ̇ⲡⲓⲁⲃⲟⲧ ⲭⲟⲓⲁⲁⲕ ⲁⲯ̅ⲙ̅ⲃ̅ ⲙ̇ⲙⲁⲣⲧⲩⲣⲟⲥ ⲡⲉϣⲉⲛϯ ϥⲥϧⲁⲓ ⲙ̀ⲡⲓⲙⲁⲧⲟⲓ ϫⲉⲁⲓϫⲟⲥ ⲛⲁⲕ ϫⲉϯⲛⲁⲕⲏⲛⲇⲉ ϯⲛⲟⲩ ⲉⲓⲥⲁϫⲓ ⲛⲉⲙⲁⲕ ⲉⲑⲃⲉ ⲡⲁⲓϩⲱⲃ ⲁⲫⲣⲱϣⲓ ϣⲱⲡⲓ ⲧⲟⲧⲉ ⲁⲕⲑⲱⲟⲩϯ ⲛ̀ⲛⲓⲙⲟⲛⲁⲭⲟⲥ ⲁⲕϣⲉⲛⲁⲕ ⲉⲧⲁⲅⲟⲣⲁ ⲁⲕⲱϣ ⲉⲃⲟⲗ ⲉⲕϫⲱⲙⲙⲟⲥ  ϫⲉⲡⲁⲛⲁⲑⲏⲙⲁ ⲛ̀ϩⲏⲧ ϥⲭⲏ ϧⲉⲛⲧⲉⲧⲉⲛⲙⲏϯ ⲉⲧⲁⲕϣⲉⲛⲁⲕ ⲉϯ ⲕⲁⲑⲉⲇⲣⲁ ⲁⲕⲥϧⲁⲓ ⲛ̀ⲟⲩⲧⲟⲙⲟⲥ ⲙ̀ⲃⲉⲣⲓ ⲁⲕϫⲟⲥ ϫⲉⲛⲁⲛⲉⲥⲅⲁⲣ ⲉⲥⲉⲏⲣⲡ ϧⲉⲛⲟⲩⲥⲟϭⲛⲓ ⲉⲛⲁⲛⲉϥ ⲉϩⲟⲧⲉ ⲉⲥⲉⲙⲱⲟⲩ ϧⲉⲛⲟⲩⲙⲉⲧϭⲁⲥⲓϩⲏⲧ ⲙⲁϩⲑⲏⲧⲉⲛⲟⲩⲛ ⲉⲛⲓⲑⲙⲏⲓ ⲛⲏⲉⲧⲁⲩⲥⲉⲏⲣⲡ ϧⲉⲛⲟⲩⲥⲟϭⲛⲓ ⲉⲛⲁⲛⲉϥ ⲟⲩⲟϩ ⲙ̀ⲡⲉⲣϯϩⲑⲏⲧⲉⲛ ⲑⲏⲛⲟⲩ ⲉⲡⲁⲓⲁⲛⲁⲭⲱⲣⲓⲧⲏⲥ ⲫⲁⲓ ⲉⲧⲉⲙⲙⲁⲩ ⲛ̀ⲥⲙⲟⲧ ⲛ̀ⲇⲁⲓⲙⲟⲛ ⲫⲏⲉⲧⲥⲉⲙⲱⲟⲩ ϧⲉⲛⲟⲩⲙⲉⲩⲓ ⲉϥⲥⲙⲟⲛⲧ ⲁⲛ ⲁⲩⲥⲉⲏⲣⲡⲅⲁⲣ ⲛⲉⲙⲡⲉⲛ⳪̅ ⲓⲏ̅ⲥ̅  ⲡⲭ̅ⲥ̅ ⲛ̀ϫⲉⲛⲁⲛ̀ⲏⲓ ⲙ̀ⲡⲉⲧⲣⲟⲥ ⲡⲓⲁⲡⲟⲥⲧⲟⲗⲟⲥ ⲛⲉⲙⲛⲉϥⲙⲁⲑⲏⲧⲏⲥ ⲧⲏⲣⲟⲩ ⲡⲁⲓⲁⲛⲁⲭⲱⲣⲓⲧⲏⲥⲇⲉ ⲫⲁⲓ ⲉⲧⲉⲙⲙⲁⲩ ⲁϥⲥⲉⲙⲱⲟⲩ ϧⲉⲛⲟⲩⲙⲉⲧϭⲁⲥⲓϩⲏⲧ ⲁⲩⲥⲉⲙⲱⲟⲩ ϩⲱⲟⲩ ⲛ̀ϫⲉⲛⲓⲫⲓⲗⲟⲥⲓⲫⲟⲥ ⲉⲧⲉ ⲡⲩⲑⲁⲅⲟⲣⲁⲥⲡⲉ ⲛⲉⲙⲇⲓⲟⲅⲉⲛⲏⲥ ⲛⲉⲙⲡⲗⲁⲧⲱⲛ ⲛⲉⲙⲛⲓⲕⲉⲙⲁⲛⲓⲭⲉⲟⲥ ⲉⲧⲁⲩⲓ̀ ⲉⲃⲟⲗ ⲛ̀ϧⲏⲧⲟⲩ ⲛⲉⲙϯⲑⲱⲟⲩⲧⲥ ⲧⲏⲣⲥ ⲛ̀ⲧⲉⲛⲓⲥⲁⲃⲉⲩ ⲛ̀ⲛⲟⲩϫ ⲛⲁⲓ ⲉⲧⲁⲩⲥⲣⲱϥⲧ ⲉϩⲁⲛⲛⲓϣϯ ⲛ̀ⲛⲟⲃⲓ ⲛ̀ⲧⲁⲓⲙⲁⲓⲏ ϩⲱⲥⲧⲉ ⲛ̀ⲧⲟⲩϣⲱⲡⲓ ⲛ̀ⲁⲧⲥⲟⲩⲉⲛⲫⲛⲟⲩϯ ⲟⲩⲟϩ ⲛ̀ⲧⲟⲩⲟⲩⲱϣⲧ ⲛ̀ⲛⲓⲓⲇⲱⲗⲟⲛ ⲉⲧⲥⲟϥ 

ⲉⲓⲥ ⲟⲩϩⲉⲣⲉⲧⲓⲕⲟⲥ ⲙ̀ⲃⲉⲣⲓ ⲁϥⲟⲩⲉϩ ⲛ̀ⲥⲁ ⲛⲓϩⲏⲗⲗⲓⲛⲟⲥ ⲁϥϣⲁⲙϣⲉⲓϧ ⲟⲩⲟϩ ⲥⲁⲧⲟⲧⲟⲩ ⲁⲩⲥⲟϭⲛⲓ ⲛ̀ⲟⲩⲥⲟϭⲛⲓ ⲛ̀ϣⲱⲣⲡ ⲛ̀ϫⲉⲛⲓⲁⲣⲭⲓⲉⲣⲉⲩⲥ ⲛⲉⲙⲛⲓⲡⲣⲉⲥⲃⲩⲧⲉⲣⲟⲥ ⲛⲉⲙⲛⲓⲇⲓⲁⲕⲟⲛⲟⲥ ⲛⲉⲙⲛⲓⲙⲟⲛⲁⲭⲟⲥ ⲛⲉⲙⲡⲓⲙⲁⲛ̀ϯϩⲁⲡ ⲧⲏⲣϥ ⲁⲩⲥⲱⲛϩ ⲙ̀ⲙⲟⲓ ⲟⲩⲟϩ ⲁϥϣⲉⲛⲧ ⲛ̀ϫⲉⲛⲓⲁⲣⲭⲱⲛ ϫⲉ ⲛ̀ⲑⲟⲕ ⲡⲉ ⲡⲥⲟⲫⲟⲥ ⲛ̀ⲧⲉ ⲛⲓϩⲉⲣⲉⲧⲓⲕⲟⲥ ⲙ̀ⲃⲉⲣⲓ ⲁⲛⲟⲇⲉ ⲉⲧⲁⲓⲉⲣⲟⲩⲱ ⲡⲉϫⲏⲓ ⲛⲱⲟⲩ ϫⲉ ⲛ̀ⲑⲱⲧⲉⲛ ⲁⲧⲉⲧⲉⲛϯϩⲁⲡ ⲉⲣⲟⲓ ⲙ̀ⲡⲁⲧⲉⲧⲉⲛⲥⲟⲑⲙⲉⲧ ⲟⲩⲟϩ ⲛⲁⲩⲉⲣⲕⲁⲧⲏⲅⲟⲣⲓⲛ ⲛ̀ϩⲁⲛⲙⲏϣ ϧⲁⲣⲟⲓ ⲛ̀ϫⲉⲛⲓⲁⲣⲭⲓⲉⲣⲉⲩⲥ ⲡⲓⲙⲁⲧⲟⲓⲇⲉ ⲁϥⲉⲣⲟⲩⲱ ⲛⲱⲟⲩ ⲉϥϫⲱⲙ̀ⲙⲟⲥ ϫⲉⲧⲉⲧⲉⲛⲟⲩⲱϣ ⲛ̀ⲧⲁⲭⲱ ⲛⲱⲧⲉⲛ ̀ⲉⲃⲟⲗ ⲙ̀ⲡⲁⲓϩⲉⲣⲉⲧⲓⲕⲟⲥ ⲉⲧⲥⲱϥ  ⲟⲩ ⲟⲩⲛ ⲡⲉϯⲛⲁⲁⲓϥ ⲙ̀ⲫⲏⲉⲧⲉⲧⲉⲛϫⲱ ⲙ̀ⲙⲟⲥ ⲉ̀ⲣⲟϥ ϫⲉ ⲡⲥⲟⲫⲟⲥ ⲛ̀ⲧⲉ ⲛⲓϩⲉⲣⲉⲧⲓⲕⲟⲥ ⲛ̀ⲑⲱⲟⲩⲇⲉ ⲟⲛ ⲁⲩⲱϣ ⲉ̀ⲃⲟⲗ ϫⲉⲙⲁⲣⲉϥⲉⲣⲁⲛⲁⲑⲏⲙⲁ ⲁϥϫⲟⲥ ⲛⲏⲓ ⲛ̀ϫⲉⲡⲓⲁⲙⲧⲟⲓ ⲉ̀ⲃⲟⲗⲅⲁⲣ ϧⲉⲛ ⲛⲉⲕⲥⲁϫⲓ ⲁⲩϯϩⲁⲡ ⲉ̀ⲣⲟⲕ 

ⲡⲉϫⲏⲓ ⲛⲁⲕ ϫⲉϯⲛⲁⲕⲏⲛⲇⲉ ϯⲛⲟⲩ ⲉⲓⲥⲁϫⲓ ⲛⲉⲙⲁⲕ ⲉⲑⲃⲉ ⲡⲁⲓϩⲱⲃ ⲁⲫⲣⲱϣⲓ ϣⲱⲡⲓ ⲁⲕⲧⲱⲛϣ ⲟⲩⲟϩ ⲁⲕⲥⲱⲃⲓ ⲙ̀ⲙⲟⲓ ⲟⲩⲟϩ ⲁⲕϩⲱⲟⲩϣ ⲟⲩⲟϩ ⲁⲕⲥⲁϩⲟⲩⲓ

ⲁⲓϫⲟⲥ ⲛⲁⲕ ϫⲉⲭⲁⲣⲱⲕ ⲁⲗⲗⲁ ⲁⲕⲱϣ ⲉⲃⲟⲗ ⲉⲕϫⲱⲙⲙⲟⲥ ϫⲉⲙ̀ⲫⲱⲣ ⲉⲡϧⲁⲉⲇⲉ ⲁⲩϯϫⲟⲙ ⲛⲏⲓ ⲁⲓⲑⲱⲙ ⲛ̀ⲣⲱⲕ ϣⲁ ϩⲁⲛⲁⲧⲟⲟⲩⲓ ⲟⲩⲟϩ ⲛ̀ϧⲣⲏⲓ ϧⲉⲛⲡⲁⲓⲉϫⲱⲣϩ ⲙ̀ⲡⲁⲧⲉ ⲟⲩⲁⲗⲉⲕⲧⲱⲣ ⲙⲟⲩϯ ⲁⲕⲭⲁⲧ ⲛ̀ⲥⲱⲕ

ⲉⲓⲥ ⲁⲕⲕⲱⲧ ⲛ̀ⲟⲩⲙⲟⲛⲁⲥⲧⲏⲣⲓⲟⲛ ⲙ̀ⲃⲉⲣⲓ ⲁⲩⲁⲓⲕ ⲙ̀ⲡⲉϥⲓⲱⲧ ⲁⲩⲑⲱⲟⲩϯ ⲛ̀ϫⲉⲛⲓⲙⲁⲧⲟⲓ ⲛⲉⲙⲛⲓⲙⲟⲛⲁⲭⲟⲥ ⲛⲉⲙⲛⲏⲉⲧⲁⲩⲛⲁϩϯ ϫⲉⲁⲛⲟⲕ ⲟⲩϩⲉⲗⲗⲏⲛⲟⲥ ⲡⲉ ϯⲛⲟⲩⲇⲉ ϯⲧⲟⲩⲃⲟ ⲛ̀ⲧⲁⲕⲉⲗⲗⲓⲁ ⲟⲩⲟϩ ϯⲕⲱⲧ ⲙ̀ⲙⲟⲥ ⲛ̀ⲕⲉⲥⲟⲡ. ⲁⲫⲣⲱϣⲓ ϣⲱⲡⲓ ⲟⲩϫⲁⲓ

_________________________________________________

ⲉⲧⲓ ⲉⲓϩⲉⲙⲥⲓ ⲉⲓⲛⲟⲩⲃⲧ ⲛ̀ϩⲁⲛⲃⲏⲧ ⲉⲓϯϩⲑⲏⲓ ⲉⲡⲁϩⲱⲃ ⲛ̀ϫⲓϫ ⲟⲩⲇⲉ ⲙ̀ⲡⲓⲥⲟⲙⲥ ⲉⲣⲱⲟⲩ ⲉⲛⲁⲩ ⲁⲗⲗⲁ ⲁⲩⲱϣ ⲉ̀ⲃⲟⲗ ⲉⲩϫⲱⲙⲙⲟⲥ ⲙ̀ⲡⲓⲙⲁⲧⲟⲓ ϫⲉⲡⲑⲉⲟⲥ ⲉϥⲉⲥⲙⲟⲩ ⲉⲣⲟⲕ ⲕⲁⲧⲁ ⲡⲓϧⲓⲥⲓ ⲟⲩⲟϩ ⲉϥⲉϯⲃⲉⲭⲉ ⲛⲁⲕ ϧⲉⲛⲧⲫⲉ 

ⲁⲛⲟⲕⲇⲉ ⲁⲓⲕⲱⲧ ⲛ̀ⲟⲩⲥⲟⲃⲧ ⲉϥϭⲟⲥⲓ ⲉⲓⲉⲣϩⲟϯⲅⲁⲣ ϧⲁⲧϩⲏ ⲛ̀ⲛⲓⲙⲟⲛⲁⲭⲟⲥ ⲉⲑⲙⲟϣⲓ ⲛ̀ⲥⲱϥ ⲟⲩⲟϩ ⲁⲥϣⲱⲡⲓ ⲉⲓⲭⲏ ϧⲉⲛⲟⲩⲙⲁ ⲉⲓⲉⲣⲡⲣⲟⲥⲉⲩⲭⲉⲥⲑⲉ ⲉⲧⲁⲓⲕⲏⲛ ⲡⲉϫⲉ ⲟⲩⲁⲓ ⲛ̀ⲛⲉϥⲙⲁⲑⲏⲧⲏⲥ ⲛⲏⲓ ϫⲉⲡⲱⲥ ⲁⲕⲭⲁ ⲡⲉⲕⲥⲟⲛ ⲛ̀ⲥⲱⲕ ⲡⲉϫⲏⲓⲇⲉ ⲛⲁϥ ϫⲉϩⲟⲧⲁⲛ ⲁⲕϣⲁⲛⲉⲣⲁⲅⲁⲡⲁⲛ ⲛ̀ⲟⲩⲁⲓ ⲉⲕⲉ̀ⲁⲓϥ ⲛ̀ⲥⲣⲁϩ 

ⲥⲉⲱϣ ⲉⲃⲟⲗ ⲉⲩϫⲱⲙⲙⲟⲥ ϫⲉⲙⲁⲣⲉⲛⲧⲁⲛϧⲟ ⲛ̀ⲧⲉⲛⲁⲥⲡⲓ ⲁⲗⲗⲁ ⲥⲉⲥⲁϫⲓ ϧⲉⲛϩⲁⲛⲕⲉⲁⲥⲡⲓ ⲛ̀ⲗⲁⲥ ⲁⲩⲟⲩⲱϣⲧ ⲙ̀ⲙⲟϥ ⲁⲩⲙⲟⲩϯ ⲉⲣⲟϥ ϫⲉⲡⲓⲥⲁⲃⲉ 

ⲡⲉϫⲉ ⲡⲓⲙⲁⲧⲟⲓ ϫⲉⲛⲓⲙⲅⲁⲣ ϧⲉⲛⲛⲓⲙⲟⲛⲁⲭⲓⲥ ⲉⲧⲟⲛⲓ ⲙ̀ⲙⲟⲓ ϧⲉⲛϯⲙⲁⲓⲏ ⲛⲉⲙⲡⲓϩⲙⲟⲧ ⲁⲛⲟⲕⲇⲉ ϯⲱⲣⲕ ⲛ̀ⲧⲫⲉ ⲛⲉⲙⲡⲕⲁϩⲓ ⲛ̀ⲧⲁϯϣⲱϣ ⲛ̀ⲛⲏⲉⲑⲙⲟϣⲓ ⲛ̀ⲥⲁ ⲛⲉⲛⲓⲟϯ ⲁⲩⲉⲛⲕⲟⲧⲅⲁⲣ ⲁⲩⲙⲧⲟⲛ ⲙ̀ⲙⲱⲟⲩ ⲛ̀ϫⲉⲛⲉⲧⲉⲛⲓⲟϯ ⲟⲩⲇⲓⲁⲑⲏⲕⲏⲇⲉ ⲙ̀ⲃⲉⲣⲓ ⲉⲓⲉⲥⲙⲛⲏⲧⲥ ⲛⲱⲧⲉⲛ ⲙⲟϣⲓⲟⲩⲛ ⲛ̀ⲥⲱⲓ ⲟⲩⲟϩ ⲭⲁ ⲛⲓⲣⲉϥⲙⲱⲟⲩⲧ ⲙⲁⲣⲟⲩⲑⲱⲙⲥ ⲛ̀ⲛⲟⲩⲣⲉϥⲙⲱⲟⲩⲧ  ⲛⲁⲥⲛⲏⲟⲩ ⲁ̀ⲛⲟⲕ ϯⲙⲉⲩⲓ ⲉ̀ⲣⲟⲓ ϫⲉⲁⲓⲟⲩⲱ ⲁⲓⲧⲁϩⲟ ⲟⲩⲁⲓⲇⲉ ⲉⲓⲓⲣⲓⲙⲉⲛ ⲙ̀ⲡⲱⲃϣ ⲛ̀ⲛⲁⲫⲁϩⲟⲩ ⲉⲓⲥⲱⲟⲩⲧⲉⲛⲇⲉ ⲙ̀ⲙⲟⲓ ⲉ̀ⲛⲁⲧϩⲏ ⲁⲛⲟⲛⲇⲉ ϩⲱⲛ ϧⲁⲛⲏⲉⲧⲟⲛϧ ⲙⲁⲣⲉⲛⲉⲣⲫⲙⲉⲩⲓ ϫⲉⲙ̀ⲡⲁⲣⲉ ϩⲗⲓ ⲉⲗ ⲟⲩⲧⲱⲓⲥ ⲙ̀ⲃⲉⲣⲓ ⲛ̀ⲧⲉϥϩⲓⲧⲥ ⲉ̀ⲟⲩⲫⲉⲗϫⲓ ⲛ̀ϩⲃⲟⲥ ϣⲁⲥⲱⲗⲓⲅⲁⲣ ⲙ̀ⲡⲉⲥⲙⲟϩ ⲉ̀ⲃⲟⲗ ϩⲓ ⲡⲓϩⲃⲟⲥ ⲟⲩⲟϩ ϣⲁⲣⲉ ⲟⲩⲫⲱϧ ϣⲱⲡⲓ ⲛ̀ϩⲟⲩⲟ ⲟⲩⲇⲉ ⲙ̀ⲡⲁⲩϩⲓ ⲏⲣⲡ ⲙ̀ⲃⲉⲣⲓ ⲉ̀ⲁⲥⲕⲟⲥ ⲛ̀ⲁⲡⲁⲥ ⲙ̀ⲙⲟⲛ ϣⲁⲣⲉ ⲛⲓⲁⲥⲕⲟⲥ ⲫⲱϧ ⲟⲩⲟϩ ϣⲁⲣⲉ ⲡⲓⲏⲣⲡ ⲫⲱⲛ ⲉ̀ⲃⲟⲗ ⲟⲩⲟϩ ϣⲁⲣⲉ ⲛⲓⲁⲥⲕⲟⲥ ⲧⲁⲕⲟ ⲁⲗⲗⲁ ϣⲁⲩϩⲓ ⲏⲣⲡ ⲙ̀ⲃⲉⲣⲓ ⲉ̀ⲁⲥⲕⲟⲥ ⲙ̀ⲃⲉⲣⲓ ⲟⲩⲟϩ ϣⲁⲩϥⲓ ⲛ̀ⲛⲟⲩⲉⲣⲏⲟⲩ ⲱⲟⲩⲛⲓⲁⲧⲟⲩ ⲛ̀ⲁⲡⲁ ⲕⲗⲁⲩⲇⲓⲟⲥ ⲛⲉⲙⲁⲡⲁ ⲡⲓⲥⲉⲛϯ ⲛⲉⲙⲁⲡⲁ ⲭⲣⲓⲥⲧⲟⲇⲟⲗⲟⲥ ⲛ̀ⲑⲱⲟⲩⲅⲁⲣ ⲁⲩϭⲓⲙⲱⲓⲧ ϧⲁϫⲱⲛ ⲉϧⲟⲩⲛ ⲉⲡⲁⲓⲙⲱⲓⲧ ⲙ̀ⲃⲉⲣⲓ ⲫⲁⲓ

ⲉⲓⲥ ⲧϧⲁⲉ ⲛ̀ⲧⲁⲉⲡⲓⲥⲧⲟⲗⲏ ⲁⲥⲧⲁϩⲟⲓ ⲛⲉⲛⲕⲩⲕⲕⲗⲟⲥⲇⲉ ⲛ̀ⲧⲉ ⲛⲓⲡⲟⲗⲉⲙⲟⲥ ⲛⲁⲧⲁⲕⲟ ⲛ̀ⲧⲁϩⲓⲣⲏⲛⲏ ⲡⲉϫⲉ ⲥⲟⲕⲣⲁⲧⲏⲥ ⲡⲓⲫⲓⲗⲟⲥⲟⲫⲟⲥ ϫⲉγνώθι σε αυτόν ⲉϣⲁⲩⲟⲩⲁϩⲙⲉϥ ϫⲉⲥⲱⲟⲩⲛ ⲙ̀ⲙⲓⲛ ⲙ̀ⲙⲟⲕ ⲁⲛⲟⲕⲇⲉ ⲉⲓⲉⲧⲁⲥⲑⲟ ⲉⲧⲁⲣⲓ ⲉⲓⲉⲕⲱⲧ ⲙ̀ⲫⲏⲉⲧⲁϥⲧⲁⲕⲟ ⲉⲓⲉⲥⲱⲟⲩⲛ ⲙ̀ⲙⲓⲛ ⲙ̀ⲙⲟⲓ ⲕⲁⲗⲱⲥ ⲉⲓⲉϣⲑⲁⲙ ⲙ̀ⲫⲣⲟ ⲛ̀ⲧⲁⲣⲓ

ⲉⲛⲁⲓϣⲉ ⲉⲃⲟⲗ ϣⲁ ϯϣⲱϯ ϩⲓⲛⲁ ⲛ̀ⲧⲁⲙⲉϩ ⲧⲁⲁⲛⲧⲗⲏⲙⲁ ⲁⲓⲱϣ ⲛ̀ⲟⲩⲥϧⲁⲓ ⲙ̀ⲃⲉⲣⲓ ⲥⲥϧⲏⲟⲩⲧⲅⲁⲣ ϫⲉⲟⲩϩⲉⲣⲉⲧⲓⲕⲟⲥ ϥⲭⲱⲡ ⲙ̀ⲛⲁⲓ ⲧⲟⲧⲉ ⲁⲓⲧⲁⲥⲑⲟ ⲁⲓⲉⲣⲛⲏⲥⲧⲉⲩⲓⲛ ϣⲁ ⲫⲛⲁⲩ ⲛ̀ϩⲁⲛⲁⲣⲟⲩϩⲓ ⲟⲩⲟϩ ⲉⲧⲁ ⲣⲟⲩϩⲓⲇⲉ ϣⲱⲡⲓ ⲁⲓϣⲉ ⲉⲃⲟⲗ ⲛ̀ⲧⲁϣⲧⲉⲙⲙⲟⲩϫⲧ ⲛⲉⲙⲛⲓⲕⲉⲙⲁⲧⲟⲓ ⲉⲧⲟⲩⲙⲟⲩϯ ⲉⲣⲱⲟⲩ ϫⲉⲛⲓⲙⲟⲛⲁⲭⲟⲥ ⲛ̀ⲧⲉⲡⲓⲙⲱⲓⲧ ⲙ̀ⲃⲉⲣⲓ

ⲉⲧⲁⲓⲱϣ ⲛ̀ⲛⲓⲥϧⲁⲓ ⲁⲭⲣⲉⲙⲣⲉⲙ ⲁⲓϫⲟⲥ ϫⲉⲡⲓⲉϫⲱⲣϩ ⲉⲧⲉⲙ̀ⲙⲁⲩ ⲉϥⲉ̀ⲉⲣⲭⲁⲕⲓ ⲟⲩⲟϩ ⲛ̀ⲛⲉϥⲕⲱϯ ⲛ̀ⲥⲱϥ ⲛ̀ϫⲉ ⲫⲣⲏ ⲉ̀ⲃⲟⲗ ⲙ̀ⲡϣⲱⲓ ⲟⲩⲇⲉ ⲛ̀ⲛⲉϥⲓ ⲉ̀ϫⲱϥ ⲛ̀ϫⲉ ⲫⲟⲩⲱⲓⲛⲓ ϥⲉ̀ϭⲓⲧϥ ⲛ̀ϫⲉⲡⲭⲁⲕⲓ ⲛⲉⲙⲧϧⲏⲓⲃⲓ ⲙ̀ⲫⲙⲟⲩ ⲉϥⲉ̀ⲓ̀ ⲉ̀ϫⲱϥ ⲛ̀ϫⲉⲟⲩⲅⲛⲟⲫⲟⲥ ⲉⲩⲉ̀ⲉⲣⲭⲁⲕⲓ ⲛ̀ϫⲉⲛⲓⲥⲓⲟⲩ ⲛ̀ⲧⲉⲡⲓⲉϫⲱⲣϩ ⲉⲧⲉⲙ̀ⲙⲁⲩ ⲛ̀ⲛⲟⲩⲉⲣϩⲩⲡⲟⲙⲉⲛⲓⲛ ⲟⲩⲇⲉ ⲛ̀ⲛⲟⲩⲓ̀ ⲉ̀ⲫⲟⲩⲱⲓⲛⲓ ⲟⲩⲟϩ ⲛ̀ⲛⲟⲩⲛⲁⲩ ⲉ̀ⲡⲓⲥⲓⲟⲩ ⲛ̀ⲧⲉ ϩⲁⲛⲁⲧⲟⲟⲩⲓ ⲉϥϣⲁⲓⲱⲟⲩ ⲉⲑⲃⲉⲟⲩⲅⲁⲣ ⲁⲩϯ ⲙ̀ⲫⲟⲩⲱⲓⲛⲓ ⲛ̀ⲛⲏⲉⲧϧⲉⲛ ⲡⲭⲁⲕⲓ ϫⲉⲛⲁⲉϩⲟⲟⲩ ⲁⲩⲙⲟⲩⲛⲕ ⲙ̀ⲫⲣⲏϯ ⲛ̀ⲟⲩⲭⲣⲉⲙⲧⲥ: ⲟⲩⲟϩ ⲛⲁⲕⲁⲥ ⲁⲩϫⲱϫ ⲙ̀ⲫⲣⲏϯ ⲛ̀ⲟⲩϫⲁϫⲱ. ⲁⲓⲙⲓϣⲓ ⲙ̀ⲫⲣⲏϯ ⲛ̀ⲟⲩⲥⲓⲙ ⲟⲩⲟϩ ⲁϥϣⲱⲟⲩⲓ ⲛ̀ϫⲉⲡⲁϩⲏⲧ: ϫⲉⲁⲓⲉⲣⲡⲱⲃϣ ⲉ̀ⲟⲩⲱⲙ ⲙ̀ⲡⲁⲱⲓⲕ ⲉ̀ⲃⲟⲗ ϩⲁ ⲧⲥⲙⲏ ⲛ̀ⲧⲉⲡⲁϥⲓⲁϩⲟⲙ. ⲡⲁⲕⲁⲥ ⲁϥⲧⲱⲙⲓ ⲉ̀ⲧⲁⲥⲁⲣⲝ ⲁⲓⲉⲣ ⲙ̀ⲫⲣⲏϯ ⲛ̀ⲟⲩϩⲙⲏ ⲉ̀ⲃⲟⲗ ϩⲓⲡϣⲁϥⲉ: ⲁⲓϣⲱⲡⲓ ⲙ̀ⲫⲣⲏϯ ⲛ̀ⲟⲩⲙⲟⲩⲗⲁϫ ϧⲉⲛⲟⲩⲏⲓ ⲉϥϣⲱϥ. ⲁⲓⲉⲣϣⲣⲱⲓⲥ: ⲟⲩⲟϩ ⲁⲓϣⲱⲡⲓ ⲙ̀ⲫⲣⲏϯ ⲛ̀ⲟⲩϭⲁϫ: ⲉϥⲥⲱϫⲡ ϩⲓϫⲉⲛ ⲟⲩϫⲉⲛⲉⲫⲱⲣ ⲙ̀ⲙⲁⲩⲁⲧϥ. ⲁⲓⲟⲩⲉⲙⲕⲉⲣⲙⲓ ⲙ̀ⲫⲣⲏϯ ⲛ̀ⲟⲩⲱⲓⲕ: ⲟⲩⲟϩ ⲡⲁⲥⲱ ⲁⲩⲑⲟⲧϥ ⲛⲏⲓ ⲛⲉⲙⲟⲩⲣⲓⲙⲓ. ⲛⲁⲉϩⲟⲟⲩⲇⲉ ⲁⲩⲣⲓⲕⲓ ⲙ̀ⲫⲣⲏϯ ⲛ̀ⲟⲩϧⲏⲓⲃⲓ ⲟⲩⲟϩ ⲁ̀ⲛⲟⲕ ⲁⲓϣⲱⲟⲩⲓ ⲙ̀ⲫⲣⲏϯ ⲛ̀ⲟⲩⲥⲱⲟⲩⲃⲉⲛ. ⲁ̀ⲛⲟⲕ ⲡⲉ ⲡⲓⲣⲱⲙⲓ ⲉⲧϫⲟⲩϣⲧ ⲉ̀ⲟⲩⲙⲉⲧϩⲏⲕⲓ

ⲉⲁϥⲙⲟⲩϯ ⲛ̀ϫⲉⲟⲩⲁⲗⲉⲕⲧⲱⲣ ⲁⲩⲕⲱⲗϩ ϩⲓⲣⲉⲛ ⲫⲣⲟ ⲛⲧⲁⲕⲉⲗⲗⲓⲁ ⲛ̀ϫⲉϣⲟⲙⲧ ⲙ̀ⲙⲟⲛⲁⲭⲟⲥ ⲉⲛⲟⲩⲣⲁⲛ ⲛⲉ ⲙⲁⲣⲕⲟⲥ ⲛⲉⲙⲡⲓⲥⲉⲛⲑⲉⲟⲥ ⲛⲉⲙⲡⲓⲙⲟⲩⲓ ⲙⲁⲣⲕⲟⲥⲇⲉ ⲁϥϫⲟⲥ ⲛⲏⲓ ϫⲉⲧⲉⲛⲟⲩⲉϩ ⲛ̀ⲥⲱⲕ ϧⲉⲛⲡⲉⲕϩⲏⲧ ⲧⲏⲣϥ ⲟⲩⲟϩ ⲧⲉⲛⲕⲱϯ ⲛ̀ⲥⲁ ⲧⲉⲕⲥⲟⲫⲓⲁ ⲙ̀ⲡⲉⲣϯϣⲓⲡⲓ ⲛⲁⲛ ⲧⲉⲛⲉⲣϩⲟϯⲅⲁⲣ ϧⲁⲧϩⲏ ⲙ̀ⲡⲓⲙⲁⲧⲟⲓ ⲁⲛ ⲁⲕⲉⲣⲟⲩⲱ ⲛⲱⲟⲩ ϫⲉⲕⲁⲗⲱⲥ ⲁⲧⲉⲧⲉⲛⲓ̀ ⲡⲉϫⲉ ⲙⲁⲣⲕⲟⲥⲇⲉ ϫⲉϩⲏⲡⲡⲉ ⲁ̀ⲛⲟⲛ ⲁⲛⲭⲁ ⲡⲉⲧⲉⲛⲧⲁⲛ ⲁⲛⲙⲟϣⲓ ⲛ̀ⲥⲱⲕ ⲙ̀ⲡⲉⲣⲫⲱⲛϩ ⲙ̀ⲡⲉⲕϩⲟ ⲥⲁⲃⲟⲗ ⲙ̀ⲙⲟⲛ ⲣⲉⲕ ⲡⲉⲕⲙⲁϣϫ ⲉⲣⲟⲛ ⲭⲱⲗⲉⲙ ⲥⲱⲧⲉⲙ ⲉⲣⲟⲛ ⲡⲓⲙⲁⲧⲟⲓⲇⲉ ⲉ̀ⲃⲟⲗ ϩⲁ ⲡϩⲟ ⲙ̀ⲡⲉϥϫⲱⲛⲧ ⲛⲉⲙⲡⲉϥⲙⲃⲟⲛ. ⲉ̀ⲁϥϥⲁⲓ ⲙ̀ⲙⲟⲛ ⲁϥⲣⲁϧⲧⲉⲛ ⲉ̀ϧⲣⲏⲓ: ⲁⲓⲁⲥⲡⲁⲍⲉⲙⲉⲛ ⲙ̀ⲙⲱⲟⲩ ⲁⲓϯ ⲛ̀ⲟⲩⲱⲓⲕ ⲛⲱⲟⲩ ⲛⲉⲙⲟⲩϫⲏ ⲛ̀ⲁⲣϣⲓⲛ ⲟⲩⲟϩ ⲁⲩⲟⲩⲱⲙ ⲟⲩⲟϩ ⲁⲩⲥⲱ ⲟⲩⲟϩ ⲁϥⲧⲱⲛϥ ⲛ̀ϫⲉⲡⲓⲙⲟⲩⲓ ⲁϥϣⲉⲛⲁϥ ⲟⲩⲟϩ ⲉⲧⲁ ⲣⲟⲩϩⲓⲇⲉ ϣⲱⲡⲓ ⲁⲓϫⲟⲩϣⲧ ⲉⲃⲟⲗϧⲉⲛⲡⲓϫⲟⲩϣⲧ ⲁⲓⲛⲁⲩ ⲉⲣⲟϥ ⲉϥⲛⲏⲟⲩ ⲉⲃⲟⲗϧⲉⲛ ⲡⲓⲙⲟⲛⲁⲥⲧⲏⲣⲓⲟⲛ ⲛ̀ⲧⲉⲡⲓⲙⲁⲧⲟⲓ ⲟⲩⲟϩ ⲉⲧⲁⲓⲥⲱⲧⲉⲙ ⲉⲡϧⲣⲱⲟⲩ ⲛ̀ⲧⲉ ⲡⲓⲙⲁⲧⲟⲓ ⲁⲓϣⲗⲁϩⲛ̀ϩⲏⲧ ϫⲉⲟⲩⲟⲓ ⲛⲏⲓ ⲫⲏ ⲅⲁⲣ ⲉⲧⲁϥⲥⲉⲡ ⲧⲉϥϫⲓϫ ⲛⲉⲙⲏⲓ ϧⲉⲛⲡⲓⲃⲓⲛⲁϫ ⲫⲁⲓ ⲉⲧⲉⲙⲙⲁⲩ ⲡⲉⲑⲛⲁⲧⲏⲓⲧ ϩⲁⲣⲁ ⲡⲁⲓⲁⲫⲟⲧ ⲛⲁⲥⲉⲛⲧ ⲙ̀ⲙⲟⲛϯ ⲁⲥⲟⲩⲓ ⲟⲩⲇⲉ ⲥⲏϥⲓ ⲡⲗⲏⲛ  ⲁⲡⲁϩⲏⲧ ⲁϥⲃⲉⲃⲓ ⲛ̀ⲟⲩⲥⲁϫⲓ ⲛ̀ⲁⲅⲁⲑⲟⲛ: ϯⲛⲁϫⲱ ⲛ̀ⲛⲁϩⲃⲏⲟⲩⲓ ⲁ̀ⲛⲟⲕ ⲛ̀ⲛⲓⲙⲁⲑⲏⲧⲏⲥ ⲡⲁⲗⲁⲥ ⲟⲩⲕⲁϣⲡⲉ ⲛ̀ⲧⲉⲟⲩⲥⲁϧ ⲉϥϣⲉⲃϣⲱⲃ ⲛ̀ⲥϧⲁⲓ. 

ϯⲛⲟⲩⲇⲉ ⲁⲓⲉⲙⲓ ϫⲉⲙ̀ⲙⲟⲛ ⲙⲁⲑⲏⲧⲏⲥ ⲛ̀ⲧⲏⲓ ⲛⲁⲓⲅⲁⲣ ⲛⲉ ⲛⲉⲛⲙⲁⲑⲏⲧⲏⲥ ⲛ̀ⲧⲉⲡⲱⲛϧ ϯⲅⲛⲱⲥⲓⲥⲇⲉ ⲥϭⲓⲙⲱⲓⲧ ϧⲁϫⲱⲟⲩ ⲟⲩⲟϩ ⲫⲣⲏ ⲛ̀ⲧⲉϯⲙⲉⲑⲙⲏⲓ ⲉⲣⲟⲩⲱⲓⲛⲓ ⲉⲣⲱⲟⲩ ϯⲥⲟⲫⲓⲁⲅⲁⲣ ϯⲕⲁϯ ⲛⲱⲟⲩ ⲟⲩⲟϩ ϯⲉⲡⲓⲥⲧⲏⲙⲏ ⲥⲁⲣⲉϩ ⲉⲣⲱⲟⲩ

ⲉ̀ϣⲱⲡⲇⲉ ⲁⲓϣⲁⲛϯⲛⲱⲟⲩ ⲛ̀ⲟⲩⲕⲁϣ ⲥⲉⲛⲁⲥϧⲁⲓ ⲛ̀ⲛⲓⲅⲣⲁⲫⲏ ⲛⲉⲙⲛⲓϫⲱⲙ ⲛ̀ⲧⲉⲛⲓⲫⲓⲗⲟⲥⲟⲫⲟⲥ ⲟⲩⲟϩ ϧⲟⲧϧⲉⲧ ϧⲉⲛϯⲃⲓⲃⲗⲓⲟⲑⲏⲕⲏ ⲛ̀ⲧⲉⲁⲗⲉⲝⲁⲛⲇⲣⲓⲁⲥ ⲡⲗⲏⲛ ⲕⲁⲛ ⲁⲩϣⲁⲛϯⲛⲱⲟⲩ ⲛ̀ⲟⲩⲥⲏϥⲓ ⲧⲉⲛⲛⲁϫⲫⲟ ⲛⲁⲛ ⲙ̀ⲡⲧⲁⲕⲟ 

ⲁⲡⲟⲩϧⲣⲱⲟⲩ ⲫⲟϩ ϣⲁⲁⲩⲣⲏⲕⲥ ⲛ̀ϯⲟⲓⲕⲟⲩⲙⲉⲛⲏ ⲟⲩⲟϩ ⲉⲧⲁⲛϧⲟⲧϧⲉⲧ ⲛ̀ⲛⲓⲅⲣⲁⲫⲏ ⲁⲛⲥⲱⲧⲉⲙ ⲉⲡⲓⲙⲁⲧⲟⲓ ⲉϥⲱϣ ⲉⲃⲟⲗ ⲉϥϫⲱⲙ‌ⲙⲟⲥ ϫⲉⲙⲟϣⲓ ⲛ̀ⲥⲱⲓ ϫⲉⲁⲛⲟⲕ ⲙ̀ⲙⲁⲩⲁⲧ ⲡⲉⲑⲛⲁϭⲓⲙⲱⲓⲧ ϧⲁϫⲉⲛⲑⲏⲛⲟⲩ ⲉⲡⲓⲁϩⲟ ⲙ̀ⲙⲏⲓ ⲟⲩⲟϩ ⲛ̀ⲟⲩϩⲟϯ ϧⲉⲛⲟⲩϩⲟϯ ⲁϥⲓ̀ ϩⲁⲣⲟϥ ⲛ̀ϫⲉⲙⲁⲣⲕⲟⲥ ⲡⲓⲫⲓⲗⲟⲥⲟⲫⲟⲥ ⲟⲩⲟϩ ⲡⲉϫⲁϥ ⲛⲁϥ ϫⲉⲉⲓⲥ ⲛⲓⲅⲣⲁⲫⲏ ⲥⲉϯϩⲁⲡ ⲉⲛⲉⲕⲥⲁϫⲓ ⲁⲛⲟⲕⲇⲉ ϩⲱ ⲉⲧⲁⲓϫⲉⲙⲛⲟⲙϯ ⲁⲓϫⲟⲥ ⲛⲁϥ ϫⲉⲉⲓⲥ ⲛⲓⲛⲟⲙⲟⲥ ⲟⲛ ⲥⲉϯϩⲁⲡ ⲉⲣⲟⲕ ⲡⲉϫⲁϥ ⲛⲏⲓ ϫⲉⲉⲕⲉⲟⲩⲉϩ ⲛ̀ⲥⲱⲓ ⲁⲓⲉⲣⲟⲩⲱ ⲛⲁϥ ⲉⲩϫⲱⲙⲙⲟⲥ ϫⲉⲁⲕϩⲱⲟⲩϣ ⲙ̀ⲙⲟⲓ ⲟⲩⲟϩ ⲁⲕⲥⲁϩⲟⲩⲓ ⲙ̀ⲙⲟⲓ ⲟⲩⲟϩ ⲁⲕⲧⲱⲛϣ ⲙ̀ⲙⲟⲓ ⲁϥⲉⲗⲕϣⲁⲓ ⲙ̀ⲙⲟⲓ ⲉϥϫⲱⲙ‌ⲙⲟⲥ ϫⲉⲛ̀ⲑⲟⲕ ⲟⲩⲁⲩⲑⲁⲇⲏⲥ ⲙ̀ⲡⲉⲕϯϩⲑⲏⲕⲅⲁⲣ ⲉⲛⲁⲥⲁϫⲓ ⲉⲧⲁⲕⲉⲣⲡⲁⲣⲁⲃⲉⲛⲓⲛ ⲉⲕϩⲓⲡϩⲟ ⲙ̀ⲙⲟⲓ ϧⲉⲛⲟⲩϩⲓⲡϩⲟ ⲧⲟⲧⲉ ⲁⲛϯϩⲁⲡ ⲉⲣⲟⲕ ⲉⲑⲃⲉ ⲧⲉⲕⲙⲉⲧϭⲁⲥⲓϩⲏⲧ ⲁⲛⲟⲕⲇⲉ ⲙ̀ⲡⲓϥⲁⲓ ⲛ̀ϫⲱⲓ ⲉⲓⲛⲟⲩⲃⲧ ⲛ̀ϩⲁⲛⲃⲏⲧ ⲡⲉϫⲏⲓ ⲛⲁϥ ϧⲉⲛⲟⲩⲥⲙⲏ ⲉⲥⲥⲉⲙⲛⲏⲟⲩⲧ ϫⲉⲉ̀ⲃⲟⲗⲅⲁⲣ ϧⲉⲛⲛⲉⲕⲥⲁϫⲓ ⲉⲕⲉ̀ⲙⲁⲓ ⲟⲩⲟϩ ⲉ̀ⲃⲟⲗ ϧⲉⲛⲛⲉⲕⲥⲁϫⲓ ⲉⲩⲉ̀ϯϩⲁⲡ ⲉ̀ⲣⲟⲕ ϯⲛⲟⲩⲇⲉ ⲁⲕⲥⲁϩⲟⲩⲓ ⲙ̀ⲙⲟⲓ ⲛ̀ⲕⲉⲥⲟⲡ ⲕⲉⲙⲡϣⲁⲙⲉⲛ ⲁⲛ ⲛ̀ⲧⲁϫⲉⲙⲡⲉⲕϣⲓⲛⲓ ⲟⲩⲇⲉ ⲉⲣⲡⲉⲕⲙⲉⲩⲓ ⲉⲧⲓ ⲉⲓⲧⲁⲥⲑⲟ ⲁϥⲙⲟϣⲓ ⲛ̀ⲥⲱⲓ ⲛ̀ϫⲉⲙⲁⲣⲕⲟⲥ ⲉϥⲉϯⲛⲟⲙϯ ⲛⲏⲓ ⲡⲉϫⲁϥ ϫⲉⲁⲓϫⲱⲛⲧ ⲉⲧⲁϥⲡⲁⲣⲁⲃⲛⲉⲓⲛ ⲉⲛⲓⲉⲛⲧⲟⲗⲏ ⲛ̀ⲧⲉⲛⲓⲙⲁⲧⲟⲓ ⲁⲛⲟⲛⲇⲉ ϩⲱⲛ ϧⲁⲛⲏⲉⲧⲟⲓ ⲛ̀ⲣⲉⲙⲛ̀ϫⲱⲓⲗⲓ ⲙ̀ⲡⲁⲓⲙⲁ ⲉⲛⲉⲁⲣⲉϩ ⲉⲛⲓⲛⲟⲙⲟⲥ ⲛ̀ⲧⲉⲛⲓⲥⲟⲫⲟⲥ ⲛⲉⲙⲛⲓⲕⲁⲱⲛⲱⲛ ⲛ̀ⲛⲓⲁⲥⲕⲏⲧⲏⲥ ⲛ̀ⲓⲟϯ ⲡⲉϥⲗⲟⲅⲟⲥⲇⲉ ⲁϥⲥⲟⲗⲥⲉⲗ ⲛ̀ⲧⲁⲯⲩⲭⲏ 

ⲛ̀ϩⲣⲏⲓ ϧⲉⲛⲡⲓⲉϫⲱⲣϩ ⲁϥⲕⲱⲗϩ ϩⲓⲣⲉⲛ ⲫⲣⲟ ⲛ̀ⲧⲁⲣⲓ ⲛ̀ϫⲉⲡⲓⲙⲁⲧⲟⲓ ⲉⲧⲁⲓⲟⲩⲱⲛ ⲙ̀ⲫⲣⲟ ⲡⲉϫⲁϥ ⲛⲏⲓ ϫⲉⲕⲁⲧⲁⲫⲣⲏϯ ⲉⲧⲉ ⲛⲓⲙⲁⲛ̀ϣⲁⲓ ⲟⲩⲏⲟⲩ ⲉ̀ⲃⲟⲗ ⲛ̀ⲛⲓⲙⲁⲛϩⲱⲧⲡ ⲁⲩⲑⲣⲟⲩⲟⲩⲉⲓ ⲙ̀ⲙⲟⲛ ⲛ̀ϫⲉⲛⲉⲛϩⲏⲧ ⲁⲗⲗⲁ ⲙⲁⲣⲉⲛⲧⲁⲥⲑⲟ ⲉⲧⲉⲛⲛⲓϣϯ ⲛ̀ⲁⲅⲁⲡⲏ ⲉϧⲟⲩⲛ ⲉⲧⲉⲛⲁⲥⲡⲓ ⲙ̀ⲡⲉⲣϯⲟⲩⲛ ⲟⲩⲃⲏⲓ ⲛⲁϩⲣⲉⲛ ⲡⲓⲙⲏϣ ⲙ̀ⲡⲉⲛⲑⲣⲉ ⲫⲣⲏ ϣⲁⲓ ⲉϫⲉⲛⲛⲉⲕⲥⲁϫⲓ ⲁⲙⲟⲩ ϩⲁⲣⲟⲓ ⲛ̀ⲭⲱⲡ ⲛ̀ϩⲣⲏⲓ ϧⲉⲛⲛⲓⲉϫⲱⲣϩ ⲛ̀ⲧⲉⲕⲥⲁϫⲓ ⲛⲉⲙⲏⲓ ⲛ̀ⲧⲟⲩϣⲧⲉⲙⲥⲱⲧⲉⲙ ⲉⲧⲉⲕⲥⲙⲏ ⲛ̀ϫⲉⲟⲩⲟⲛⲛⲓⲃⲉⲛ ⲥⲉ ⲟⲛⲧⲱⲥ ⲡⲁⲥⲟⲛ ϣⲁ ϯⲛⲟⲩ ϯⲧⲁⲓⲟ ⲙ̀ⲙⲟⲕ ⲁⲡⲁϩⲏⲧ ϣⲑⲟⲣⲧⲉⲣ ⲛ̀ⲥⲱϥ ⲁⲓⲉⲣⲡⲉϥⲙⲉⲩⲓ ⲉⲛⲁϥⲟⲓ ⲛ̀ϧⲉⲗϣⲓⲣⲓ ⲉϥⲧⲥⲁⲃⲟⲓ ⲛ̀ⲧⲁⲥⲉϩⲉⲙⲕⲓ ⲟⲩⲟϩ ⲟⲛ ⲁⲓⲉⲣⲫⲙⲉⲩⲓ ⲛ̀ⲧⲉϥⲥⲙⲏ ⲉϥϫⲱ ⲛ̀ⲟⲩϩⲱⲇⲏ ⲙ̀ⲃⲉⲣⲓ ⲉϫⲉⲛⲧⲉϥⲃⲁⲕⲓ ⲉⲛⲉ ⲁϥⲟⲩⲉⲙϩⲑⲏϥ ⲛⲁⲓⲛⲁⲭⲱ ⲛⲁϥ ⲉⲃⲟⲗ ⲁⲗⲗⲁ ⲁϥⲥⲁϫⲓ ⲙ̀ⲫⲣⲏϯ ⲛ̀ⲛⲓϣⲉⲙⲙⲱⲟⲩ ⲛⲉⲙⲏⲓ ⲧⲟⲧⲉ ⲁⲓⲉⲙⲓ ϫⲉⲁⲡⲓⲙⲁⲧⲟⲓ ⲉⲧⲟϩⲓ ⲉ̀ⲣⲁⲧϥ ⲙ̀ⲡⲁⲙⲑⲟ ⲁϥϧⲱⲧⲉⲃ ⲙ̀ⲡⲁⲥⲟⲛ ⲉⲧⲁϥⲧⲥⲟⲓ ⲙ̀ⲡⲓϩⲉⲙⲕⲓ ⲉⲛⲟⲩⲉⲙⲑⲉⲣⲙⲟⲥ ⲛⲉⲙⲡⲓⲃⲩⲭⲕⲓ ⲛⲉⲙⲛⲉⲛϣⲫⲏⲣ ⲉⲛⲙⲟϣⲓ ⲛⲉⲙⲛⲉⲛⲉⲣⲏⲟⲩ ϧⲉⲛⲛⲓϧⲓⲣ ⲛ̀ⲧⲉⲃⲁⲃⲩⲗⲱⲛ ⲛ̀ⲭⲏⲙⲓ ⲛⲉⲙⲣⲁⲕⲟϯ ⲛⲉⲙⲱⲛ ⲁⲓϣⲉⲛϩⲏⲧ ϧⲁⲣⲟϥ ⲛⲁⲓⲛⲁϫⲟⲥ ⲛⲁϥ ϫⲉϯⲭⲱ ⲛⲁⲕ ⲉⲃⲟⲗ ⲁⲗⲗⲁ ⲟⲩⲟⲛⲧⲏⲓ ϩⲁⲣⲟⲕ ϫⲉϯⲁⲅⲁⲡⲏ ⲛ̀ⲧⲉϣⲟⲣⲡ ⲁⲕⲭⲁⲥ ⲛ̀ⲥⲱⲕ ⲁⲗⲗⲁ ⲁⲓⲭⲁⲣⲱⲓ ⲁϥⲥⲟⲙⲥ ⲉⲣⲟⲓ ⲟⲩⲟϩ ⲁⲓⲥⲁϫⲓ ϧⲉⲛⲟⲩⲕⲟⲩϫⲓ ⲛ̀ⲥⲙⲏ ⲉⲓϫⲱⲙ̀ⲙⲟⲥ ⲛⲁϥ ϫⲉⲁⲓⲕⲏⲛⲇⲉ ⲉⲓⲥⲁϫⲓ ⲛⲉⲙⲁⲕ ⲉⲑⲃⲉ ⲡⲁⲓϩⲱⲃ ⲁⲫⲣⲱϣⲓ ϣⲱⲡⲓ 

ⲉⲧⲁⲧⲟⲟⲩⲓⲇⲉ ϣⲱⲡⲓ ⲁⲓϯⲙⲡⲁⲟⲩⲟⲓ ⲉⲛⲓϧⲉⲗⲗⲟⲓ ⲉⲓⲉⲣⲉⲧⲓⲛ ⲛ̀ⲟⲩⲥⲟϭⲛⲓ ⲉⲛⲁⲛⲉϥ ⲡⲉϫⲉ ⲡⲓϧⲉⲗⲗⲟ ⲛⲏⲓ ϫⲉⲫⲏⲉⲧϣⲁⲛϣ ⲉⲡⲉϥϫⲁϫⲓ ϥⲉⲣⲛⲟⲃⲓ ⲉⲣⲟϥ ⲙ̀ⲙⲓⲛⲙ̀ⲙⲟϥ ⲡⲓⲙⲁⲑⲏⲧⲏⲥⲇⲉ ⲛ̀ⲧⲉⲡⲓϧⲉⲗⲗⲟ ⲁϥϣⲉⲙϣⲏϫⲓ ⲟⲩⲟϩ ⲁϥϥⲓⲁϩⲟⲙ ⲟⲩⲟϩ ⲁϥϫⲟⲥ ⲛⲏⲓ ϫⲉⲉⲕⲉⲃⲱⲗ ⲉⲃⲟⲗ ⲛ̀ⲛⲓⲥⲱⲛϩ ⲛ̀ⲧⲉⲡϫⲱⲛⲧ ⲟⲩⲟϩ ⲡⲉϫⲉ ⲡⲓϧⲉⲗⲗⲟ ⲙ̀ⲡⲉϥⲙⲁⲑⲏⲧⲏⲥ ϫⲉⲙⲁⲑⲁⲙⲓⲟ ⲛⲁⲛ ⲛ̀ⲟⲩⲕⲟϫⲓ ⲛ̀ⲁⲣϣⲓⲛ ⲟⲩⲟϩ ⲁϥⲑⲁⲙⲓⲟϥ ⲡⲉϫⲁϥ ϫⲉϩⲉⲣⲡ ϩⲁⲛⲱⲓⲕ ⲛⲁⲛ ⲟⲩⲟϩ ⲁϥϩⲟⲣⲡⲟⲩ ⲛ̀ⲑⲟϥⲇⲉ ⲁϥⲙⲟⲩⲛ ⲉⲃⲟⲗ ⲁϥⲧⲥⲁⲃⲟⲓ ⲛ̀ⲧⲥⲟⲫⲓⲁ ⲛ̀ⲧⲉⲛⲓϧⲉⲗⲗⲟⲓ ⲙ̀ⲡⲓⲉϩⲟⲟⲩ ⲧⲏⲣϥ ⲛⲉⲙⲡⲓⲉϫⲱⲣϩ ⲧⲏⲣϥ ⲉⲡⲉϥⲣⲁⲥϯⲇⲉ ⲁⲓⲓ̀ ⲉϩⲣⲉⲛ ⲁⲙⲁ ⲧⲁⲙⲁⲛⲏ ⲑⲏⲉⲧⲁⲥⲑⲁϩⲙⲉⲧ ⲉⲡⲉⲥⲃⲏⲃ ⲟⲩⲟϩ ⲡⲉϫⲁⲥ ⲛⲏⲓ ϫⲉⲛ̀ⲑⲟⲕ ⲟⲩⲃⲱⲕ ⲁⲛ ⲡⲓⲁⲩⲑⲁⲇⲏⲥⲅⲁⲣ ⲉϥⲥⲟⲛϩ ⲙ̀ⲙⲓⲛⲙ̀ⲙⲟϥ ϧⲉⲛⲡⲓⲡⲩⲣⲅⲟⲥ ⲛ̀ⲧⲉⲧⲉϥⲙⲉⲧϭⲁⲥⲓϩⲏⲧ ⲡⲓⲥⲁⲃⲉⲇⲉ ϥⲕⲱϯ ⲛ̀ⲥⲁϯⲉⲡⲓⲥⲧⲏⲙⲏ ϣⲁ ⲁⲩⲣⲏϫⲥ ⲛ̀ϯⲟⲩⲕⲟⲩⲙⲉⲛⲏ ⲉ̀ϣⲱⲡⲟⲩⲛ ⲁⲣⲉϣⲁⲛ ϯⲅⲛⲱⲥⲓⲥ ⲁⲓⲕ ⲛ̀ⲣⲉⲙϩⲉ ⲟⲛⲧⲱⲥ ⲭⲛⲁⲉⲣⲣⲉⲙϩⲉ ⲁⲓⲧⲁⲥⲑⲟ ⲉⲓⲣⲁϣⲓ ⲟⲩⲟϩ ⲁⲓⲥⲉⲙⲛⲓ ⲙ̀ⲡⲓⲥⲟⲃⲧ ϩⲓⲛⲁ ⲛ̀ⲧⲉϥϣⲧⲉⲙϫⲉⲙⲡⲁϣⲓⲛⲓ ⲛ̀ϫⲉⲡⲓⲙⲁⲧⲟⲓ ⲁⲩⲑⲱⲟⲩϯ ⲛ̀ϫⲉⲛⲓⲥⲛⲏⲟⲩ ⲟⲩⲟϩ ⲁⲩϯⲛⲟⲙϯ ⲛⲏⲓ ⲉⲧⲁⲓⲛⲁⲩⲇⲉ ⲉ̀ⲛⲓⲙⲏϣ ⲁⲓϣⲉⲛⲏⲓ ⲉ̀ⲡϣⲱⲓ ⲉ̀ϫⲉⲛ ⲡⲓⲧⲱⲟⲩ ⲟⲩⲟϩ ⲉⲧⲁⲓϩⲉⲙⲥⲓ ⲁⲩⲓ̀ ϩⲁⲣⲟⲓ ⲛ̀ϫⲉⲛⲓⲙⲁⲑⲏⲧⲏⲥ ⲟⲩⲟϩ ⲉⲧⲁⲓⲟⲩⲱⲛ ⲛ̀ⲣⲱⲙⲓ ⲛⲁⲓϯⲥⲃⲱ ⲛⲱⲟⲩ ⲉⲓϫⲱⲙ̀ⲙⲟⲥ ϫⲉⲣⲉϩⲇⲉ ⲉ̀ⲣⲱⲧⲉⲛ ⲉ̀ⲃⲟⲗϩⲁⲛⲓⲥⲁϧ ⲛ̀ⲛⲟⲩϫ ⲛⲏⲉⲑⲛⲏⲟⲩ ϩⲁⲣⲱⲧⲉⲛ ϧⲉⲛϩⲁⲛϩⲉⲃⲥⲱ ⲛⲉⲥⲱⲟⲩ ⲥⲁϧⲟⲩⲛⲇⲉ ⲙ̀ⲙⲱⲟⲩ ϩⲁⲛⲟⲩⲱⲛϣ ⲛ̀ⲣⲉϥϩⲱⲗⲉⲙ ⲟⲩ ⲧⲉ ⲧⲕⲟⲓⲛⲱⲛⲓⲁ ⲛ̀ⲟⲩⲟⲩⲱⲛϣ ⲛⲉⲙⲟⲩϩⲓⲏⲃ ⲁϣ ⲧⲉ ⲧϩⲓⲣⲏⲛⲏ ⲛ̀ⲟⲩⲃⲟⲓϣⲓ ⲛⲉⲙⲟⲩⲟⲩϩⲟⲣ ⲙ̀ⲙⲟⲛϣϫⲟⲙ ⲛ̀ⲟⲩⲣⲉϥϫⲱⲛⲧ ⲉⲑⲙⲁⲓⲟ ⲡⲓⲣⲓⲕⲓⲅⲁⲣ ⲛ̀ⲧⲉ ⲙⲡⲉϥϫⲱⲛⲧⲡⲉ ⲡⲉϥϩⲉⲓ

ϯⲥⲟⲫⲓⲁ ⲧⲏⲣⲥ ⲟⲩ ⲉ̀ⲃⲟⲗ ϩⲓⲧⲉⲛ ϯⲅⲛⲱⲥⲓⲥ ⲟⲩⲟϩ ⲥϣⲟⲡ ⲛⲉⲙⲁⲥ ϣⲁ ⲉⲛⲉϩ

ⲡⲓⲭⲗⲟⲙ ⲛ̀ⲧⲉϯⲥⲟⲫⲓⲁⲡⲉ ⲡϫⲓⲛⲕⲱϯ ⲛ̀ⲥⲁϯⲅⲛⲱⲥⲓⲥ ⲉⲥϯⲟⲩⲱ ⲛ̀ⲟⲩϩⲓⲣⲏⲛⲏ ⲛⲉⲙⲟⲩⲕⲱⲧ

ⲙ̀ⲡⲉⲣⲉⲣⲙⲉⲧϣⲟⲃⲓ ⲙ̀ⲡⲉⲙⲑⲟ ⲉ̀ⲃⲟⲗ ⲛ̀ⲛⲓⲣⲱⲙⲓ ⲙⲁϩⲑⲏⲧⲉⲛ ⲉ̀ⲣⲱⲧⲉⲛ ⲛⲉⲙⲛⲉⲅⲉⲛⲥⲫⲟⲧⲟⲩ

ⲙ̀ⲡⲉⲣϭⲓⲥⲓ ⲙ̀ⲙⲱⲧⲉⲛ ϫⲉⲛ̀ⲛⲉⲧⲉⲛϩⲉⲓ ⲛ̀ⲧⲉⲧⲉⲛⲓⲛⲓ ⲛ̀ⲟⲩϣⲱϣ ⲉ̀ϫⲉⲛⲧⲉⲧⲉⲛⲯⲩⲭⲏ

ⲓⲥϫⲉ ⲁⲧⲉⲧⲉⲛⲛⲁϯ ⲙ̀ⲡⲉⲧⲉⲛⲟⲩⲟⲓ ⲉ̀ⲉⲣⲃⲱⲕ ⲛ̀ϯⲙⲉⲑⲙⲏⲓ ⲥⲉⲃⲧⲉⲧⲉⲛⲯⲩⲭⲏ ⲉ̀ϩⲁⲛⲡⲓⲣⲁⲥⲙⲓⲥ

ⲥⲟⲩⲧⲉⲛ ⲡⲉⲧⲉⲛϩⲏⲧ ⲟⲩⲟϩ ϥⲁⲓ ⲉ̀ⲣⲱⲧⲉⲛ ⲛ̀ⲧⲉⲧⲉⲛϣⲧⲉⲙϫⲁⲡϫⲉⲡ ϧⲉⲛⲡⲥⲏⲟⲩ ⲛ̀ⲛⲉⲧⲉⲛϧⲓⲥⲓ

ϩⲱⲃⲛⲓⲃⲉⲛ ⲉⲑⲛⲏⲟⲩ ⲉ̀ϫⲉⲛⲑⲏⲛⲟⲩ ϣⲟⲡⲟⲩ ⲉ̀ⲣⲱⲧⲉⲛ ⲛ̀ⲧⲉⲧⲉⲛϣⲱⲡⲓ ⲛ̀ⲣⲉϥⲱⲟⲩⲛϩⲏⲧ ϧⲉⲛⲡⲕⲁϩⲓ 

ϩⲁⲛⲙⲏϣⲅⲁⲣ ⲛⲏⲉⲑⲙⲉⲩⲓ ⲛ̀ϧⲏⲧⲟⲩ ⲡⲗⲁⲛⲁⲛ ⲙ̀ⲙⲱⲟⲩ ⲟⲩⲟϩ ⲁⲛⲟⲩⲙⲉⲩⲓ ⲉⲧϩⲱⲟⲩ ϯⲥⲗⲁϯ ⲙ̀ⲙⲱⲟⲩ

ⲡϩⲏⲧ ⲙ̀ⲡⲥⲁⲃⲉ ϣⲁϥⲙⲉⲩⲓ ⲉⲟⲩⲡⲁⲣⲁⲃⲟⲗⲏ ⲟⲩⲟϩ ⲫⲟⲩⲱϣ ⲛ̀ⲟⲩⲥⲁⲃⲉ ⲡⲉ ⲟⲩⲙⲁϣϫ

ⲙ̀ⲡⲉⲣϯ ⲟⲩⲃⲉ ϯⲙⲉⲑⲙⲏⲓ

ⲙ̀ⲡⲉⲣⲁⲙⲟⲛⲓ ⲛ̀ⲟⲩⲓⲁⲣⲟ ⲉϥϧⲁϯ

ⲙ̀ⲡⲉⲣⲫⲟⲣϣⲕ ⲉ̀ⲃⲟⲗ ϧⲁⲧⲉⲛ ⲟⲩⲣⲱⲙⲓ ⲛⲥⲟϫ ⲙ̀ⲡⲉⲣϭⲓ ⲙ̀ⲡϩⲟ ⲛ̀ⲟⲩϫⲱⲣⲓ 

ϯ ⲉ̀ϫⲉⲛ ϯⲙⲉⲑⲙⲏⲓ ϣⲁⲉ̀ϧⲣⲏⲓ ⲉ̀ⲫⲙⲟⲩ

ⲟⲩⲟϩ ϧⲉⲛⲫⲛⲁⲩ ⲛ̀ϩⲁⲛⲁⲧⲟⲟⲩⲓ ⲁϥⲧⲁⲥⲑⲟ ⲛ̀ϫⲉⲡⲓⲙⲁⲧⲟⲓ ⲙ̀ⲡⲉⲙⲑⲟ ⲛ̀ⲟⲩⲟⲛ ⲛⲓⲃⲉⲛ ⲉϥⲱϣ ⲉⲃⲟⲗ ⲉϥϫⲱⲙ‌ⲙⲟⲥ ϫⲉⲕⲧⲁⲓⲟ ⲁⲛ ⲛ̀ⲛⲉⲕⲓⲟϯ ⲟⲩⲟϩ ⲙ̀ⲡⲁϯⲉⲣⲟⲩⲱ ⲛⲁϥ ⲁⲟⲩⲁⲓ ϫⲟⲥ ⲛⲁϥ ϫⲉⲡⲓⲁⲛⲁⲭⲱⲣⲓⲧⲏⲥ ϥⲧⲁⲓⲟ ⲛ̀ϯⲙⲉⲑⲙⲏⲓ ⲛ̀ϥⲟⲩⲱϣⲧ ⲁⲛ ⲛ̀ⲛⲉϥⲓⲟϯ ⲙ̀ⲫⲣⲏϯ ⲛ̀ⲛⲓⲁⲛⲟⲙⲟⲥ ⲁⲣⲓⲁⲅⲁⲡⲏ ⲙ̀ⲡⲉⲣϫⲉⲙⲉⲑⲛⲟⲩϫ ⲁⲡⲉⲛⲥⲁϧ ⲙⲁⲣⲕⲟⲥ ⲁϥⲥⲱⲧⲉⲙ ⲉⲣⲟϥ ⲟⲩⲟϩ ⲁϥϫⲟⲥ ⲛⲁϥ ϫⲉⲁϫⲟⲥ ⲛⲏⲓ ϫⲉⲡⲱⲥ ⲕⲥⲁϩⲟⲩⲓ ⲙ̀ⲡⲁⲓⲣⲱⲙⲓ ⲡⲉϫⲉⲡⲓⲙⲁⲧⲟⲓ ⲛⲁϥ ϫⲉⲁⲛⲟⲕ ⲟⲩⲙⲁⲧⲟⲓ ⲉⲓϯ ⲟⲩⲃⲉ ⲛⲓϩⲉⲣⲉⲧⲓⲕⲟⲥ ⲛⲉⲙⲛⲓϭⲁⲥⲓϩⲏⲧ ⲡⲁⲓⲁⲛⲭⲱⲣⲓⲧⲏⲥⲇⲉ ⲫⲁⲓ ⲉⲧⲉⲙⲙⲁⲩ ⲁϥⲣⲓⲕⲓ ϯⲛⲟⲩⲇⲉ ⲟⲩⲟⲛⲧⲏⲓ ϩⲁⲣⲟϥ ϫⲉϯⲁⲅⲁⲡⲏ ⲛ̀ⲧⲉϣⲟⲣⲡ ⲁϥⲭⲁⲥ ⲛ̀ⲥⲱϥ ⲡⲉϫⲉ ⲙⲁⲣⲕⲟⲥ ⲛⲁϥ ϫⲉⲉⲕⲉⲣ ⲟⲩⲙⲏϣ ⲛ̀ⲥⲁϫⲓ ⲟⲩⲟϩ ⲙ̀ⲡⲁⲕⲥⲱⲧⲉⲙ ⲉϩⲗⲓ ⲛ̀ⲣⲱⲙⲓ ⲁⲙⲏⲛ ⲁⲙⲏⲛ ϯϫⲱⲙⲙⲟⲥ ⲛⲁⲕ ⲟⲩⲑⲙⲏⲓ ⲁⲛ ⲙ̀ⲫⲏⲉⲧⲁⲕϫⲟϥ ⲁⲣⲓⲟⲩⲓⲛⲁⲓ ⲛⲉⲙⲁⲛ ⲟⲩⲟϩ ⲭⲁⲣⲱⲕ ⲁϥⲙ̀ⲃⲟⲛ ⲛ̀ϫⲉⲡⲓⲙⲁⲧⲟⲓ ⲟⲩⲟϩ ⲁϥⲟⲩⲱϩⲉⲙ ⲙ̀ⲫⲏⲉⲧⲁϥϫⲟϥ ⲁⲙⲁⲣⲕⲟⲥ ϫⲟⲥ ⲛⲁϥ ϫⲉⲑⲱⲙ ⲛ̀ⲣⲱⲕ ⲉⲥϣⲉ ⲁⲛ ⲛ̀ⲧⲟⲩⲉⲙⲗⲁϧ ⲛ̀ϫⲉⲛⲏⲉⲧⲁⲩϯϩⲓⲱⲧⲟⲩ ⲛ̀ϯⲥⲭⲏⲙⲁ ⲫⲁⲓⲅⲁⲣⲡⲉ ⲡⲓⲧⲱⲟⲩ ⲙ̀ⲡⲓϩⲟⲥⲉⲙ ⲉⲧⲉϣⲓⲏⲧⲡⲉ ⲡⲓⲙⲁ ⲉϣⲁⲩϣⲓ ⲛ̀ⲛⲓϩⲏⲧ ⲛⲉⲙ ⲛⲓⲙⲉⲩⲓ ⲛ̀ϧⲏⲧϥ ϧⲉⲛⲟⲩⲇⲓⲁⲕⲕⲣⲏⲥⲓⲥ ⲙ̀ⲙⲏⲓ ⲟⲩⲟⲛ ⲛⲓⲃⲉⲛ ⲉⲧϯⲙⲁϯ ϧⲉⲛ ⲡⲁⲓⲕⲁⲛⲱⲛ ⲧϩⲓⲣⲏⲛⲏ ⲉ̀ϩⲣⲏⲓ ⲉ̀ϫⲱⲟⲩ ⲛⲉⲙⲡⲓⲛⲁⲓ  ⲙⲁⲣⲉ ⲡⲓⲟⲩⲁⲓ ⲡⲓⲟⲩⲁⲓ ϫⲟⲥ ϫⲉⲁⲛⲟⲕⲇⲉ ⲛ̀ⲛⲉⲥϣⲱⲡⲓ ⲛⲏⲓ ⲛ̀ⲧⲁϣⲟⲩϣⲟⲩ ⲙ̀ⲙⲟⲓ ⲉⲃⲏⲗ ϧⲉⲛϯⲙⲉⲑⲙⲏⲓ ⲙ̀ⲙⲁⲩⲁⲧⲥ ⲱⲟⲩⲛⲓⲁⲧϥⲙⲉⲛⲙ̀ⲡⲓⲣⲱⲙⲓ ⲉⲧⲕⲱϯ ⲛ̀ⲥⲁϯⲁⲗⲏⲑⲓⲁ ϧⲉⲛⲡϣⲱⲕ ⲙ̀ⲡⲉϥϩⲏⲓ ⲟⲩⲟⲓ ⲙ̀ⲡⲧⲱⲟⲩ ⲙ̀ⲡⲓϩⲟⲥⲉⲙ ⲉⲑⲃⲉ ⲛⲓⲥⲕⲁⲛⲇⲁⲗⲟⲛ ⲁⲛⲁⲅⲕⲏⲅⲁⲣ ⲛ̀ⲧⲟⲩⲓ ⲛ̀ϫⲉⲛⲓⲥⲕⲁⲛⲇⲁⲗⲟⲛ ⲡⲗⲏⲛ ⲟⲩⲟⲓ ⲙ̀ⲡⲓⲣⲱⲙⲓ ⲉⲧⲉⲡⲓⲥⲕⲁⲛⲇⲁⲗⲟⲛ ⲓ̀ ⲉ̀ⲃⲟⲗ ϩⲓⲧⲟⲧϥ ⲁⲓⲱⲣⲕ ⲟⲩⲟϩ ⲛ̀ⲛⲁⲟⲩⲱⲙ ⲛ̀ϩⲑⲏⲓ ϫⲉⲫⲏⲉⲧⲁⲣⲉϩ ⲉⲛⲁⲓⲉⲛⲧⲟⲗⲏ ϯⲛⲁⲧⲁⲓⲟ ⲙ̀ⲡⲉϥⲣⲁⲛ ⲁⲗⲗⲁ ⲫⲏⲉⲑⲛⲁⲁⲙⲉⲗⲏⲥ ϯⲛⲁϩⲓⲧϥ ⲥⲁⲃⲟⲗ ⲛ̀ϣⲓⲏⲧ ⲛ̀ⲧⲁϥⲱϯ ⲙ̀ⲡⲉϥⲣⲁⲛ ⲛ̀ⲧⲁⲣⲱⲕϩ ⲛ̀ⲛⲉϥⲉⲡⲓⲥⲧⲟⲗⲏ ⲛⲉⲙⲛⲉϥⲕⲁⲧⲏⲅⲏⲥⲓⲥ ⲁⲛⲁⲡⲟⲧⲁⲍⲉⲥⲑⲉⲅⲁⲣ ⲙ̀ⲡⲓⲕⲟⲥⲙⲟⲥ ⲛ̀ⲧⲉⲛⲁⲓⲁⲓ ϧⲉⲛⲧⲡⲟⲗⲏⲧⲉⲓⲁ ⲛⲉⲙϯⲥⲟⲫⲓⲁ ⲙ̀ⲡⲉⲛⲑⲣⲉⲛⲑⲱⲗⲉⲃ ⲙ̀ⲫⲣⲁⲛ ⲉⲧⲧⲁⲓⲏⲟⲩⲧ ⲛ̀ⲧⲉ ⲡⲁⲓⲙⲁ ⲉⲑⲟⲩⲁⲃ ⲫⲁⲓ ⲧⲟⲧⲉ ⲁⲥⲙⲟⲩⲛϩⲱⲟⲩ ⲛ̀ϫⲉⲧⲫⲉ ⲟⲩⲟϩ ⲛⲓⲙⲟⲛⲁⲭⲟⲥ ⲁⲩⲫⲱⲧ ⲉⲛⲟⲩⲣⲓ 

ⲁⲛⲟⲕⲇⲉ ⲉⲧⲁⲓⲥⲱⲧⲉⲙ ⲉⲛⲉϥⲉⲛⲧⲟⲗⲏ ⲁⲓϭⲓϣⲫⲏⲣⲓ ϫⲉⲙⲁⲣⲕⲟⲥ ⲡⲉⲧϯ ⲉ̀ϩⲣⲏⲓ ⲉ̀ϫⲱⲓ ⲟⲩⲟϩ ⲁⲛⲟⲕ ⲙ̀ⲡⲓⲥⲁϫⲓ ⲁⲓⲧⲁⲥⲑⲟ ⲉⲧⲁⲣⲓ ⲉⲓⲉⲣⲙⲉⲗⲉⲧⲁⲛ ϧⲉⲛⲛⲓⲅⲣⲁⲫⲏ ⲧⲉⲱⲥ ⲛⲓⲕⲉⲙⲟⲛⲁⲭⲟⲥ ⲉⲣⲡⲣⲉⲥⲃⲉⲩⲓⲛ ⲉ̀ϩⲣⲏⲓ ⲉ̀ϫⲱⲛ 

ⲁⲡⲁⲝ ⲁⲡⲗⲱⲥ ⲁⲥⲧⲁⲕⲟ ⲛ̀ϫⲉϯⲙⲉⲧϩⲏⲧ ⲛ̀ⲟⲩⲁⲓ ⲛ̀ⲧⲉϯⲁⲅⲁⲡⲏ ϩⲁⲣⲁ ⲛⲓⲙ ⲡⲉⲧⲟⲩⲛⲟϥ ⲙ̀ⲙⲟϥ ϯⲛⲟⲩ ⲡⲉϫⲁϥ ⲛ̀ϫⲉⲡⲓⲯⲁⲗⲧⲏⲥ ϫⲉϩⲏⲡⲡⲉ ⲟⲩⲡⲉⲑⲛⲁⲛⲉϥ ⲓⲉ ⲟⲩⲡⲉⲧϩⲟⲗϫ: ⲉ̀ⲃⲏⲗ ⲉ̀ϩⲁⲛⲥⲛⲏⲟⲩ ⲉⲩϣⲟⲡ ϩⲓ ⲟⲩⲙⲁ ϩⲁⲣⲁ ⲛⲓⲙ ⲛⲉ ⲛⲁⲓⲥⲛⲏⲟⲩ ⲟⲩⲟϩ ⲁϥⲑⲱⲛ ⲡⲁⲓⲙⲁ ⲁϥϧⲟⲙϧⲉⲙ ⲙ̀ⲙⲟⲛ ⲛ̀ϫⲉⲡⲓⲡⲟⲗⲉⲙⲟⲥ 

ⲛ̀ϯⲛⲁⲓ̀ ⲉⲃⲟⲗϧⲉⲛⲧⲁⲣⲓ ⲁⲛ ⲟⲩⲇⲉ ⲛ̀ϯⲛⲁⲣⲓⲙⲓ ϧⲉⲛ ⲟⲩⲛϣⲁϣⲓ ⲁⲛ ⲉⲓⲉⲛⲟⲩⲃⲧ ⲛ̀ϩⲁⲛⲃⲏⲧ 

ⲟⲩⲟⲓ ⲛⲏⲓ ϫⲉⲁⲛⲟⲕ ⲟⲩϧⲉⲗϣⲁⲓⲣⲓ ⲛ̀ⲁⲧⲥⲃⲱ ⲁⲛ ⲟⲩⲇⲉ ⲙ̀ⲡⲓⲉⲣϧⲉⲗⲗⲟ ϩⲱⲥ ⲥⲁⲃⲉ 

ⲟⲩⲟⲓ ⲛⲏⲓ ϫⲉⲁⲛⲟⲕ ⲟⲩⲙⲁⲧⲟⲓ ⲁⲛ ⲟⲩⲇⲉ ⲁⲛⲟⲕ ⲟⲩⲣⲉϥⲉⲣϩⲓⲣⲏⲛⲏ ⲁⲛ 

ⲟⲩⲟⲓ ⲛⲏⲓ ϫⲉⲁⲓⲉⲣⲁⲙⲉⲗⲏⲥ ϫⲉⲙ̀ⲡⲓⲁⲣⲉϩ ⲉⲛⲓⲉⲛⲧⲟⲗⲏ ⲛ̀ⲧⲉⲛⲓϧⲉⲗⲗⲟⲓ 

ⲟⲩⲟⲓ ⲛⲏⲓ ϫⲉⲁⲓⲕⲱϯ ⲛ̀ⲥⲁⲛⲓⲡⲁⲑⲟⲥ ⲟⲩⲟϩ ⲁⲓⲭⲁϯⲥⲟⲫⲓⲁ ⲛ̀ⲥⲱⲓ

ⲟⲩⲟⲓ ⲛⲏⲓ ϫⲉⲁⲓϯϩⲁⲡ ⲉⲛⲓⲕⲉⲭⲱⲟⲩⲛⲓ ⲟⲩⲟϩ ⲙ̀ⲡⲓϯϩⲁⲡ ⲉⲧⲁⲯⲩⲭⲏ

 

ⲉⲓⲥ ⲁⲛⲧⲁⲕⲟ ⲛ̀ⲟⲩϩⲉⲃⲇⲟⲙⲁⲥ ⲉⲛⲉⲙⲗⲁϧ ϧⲁ ⲡⲥⲁϫⲓ ϩⲉⲃⲇⲟⲙⲁⲥ

 ⲛⲁⲥⲛⲁϣⲧ ⲛ̀ϫⲉ ⲧⲁⲓϩⲉⲃⲇⲟⲙⲁⲥ ⲑⲁⲓ ϫⲉⲟⲩⲟⲛ ⲟⲩⲡⲟⲗⲉⲙⲟⲥ ⲟⲩⲃⲉ ⲛⲓⲥⲁϫⲓ ⲛ̀ⲟⲩⲉⲓⲛⲓⲛ ⲉⲧϧⲉⲛ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲓⲥϫⲉⲛ ⲧⲁⲙⲉⲧϧⲉⲗϣⲓⲣⲓ ⲁⲓϭⲓⲥⲃⲱ ⲉⲡⲥⲁϫⲓ ϩⲉⲃⲇⲟⲙⲁⲥ ϯⲛⲟⲩ ϯⲥⲱⲧⲉⲙ ⲉⲛⲓⲥⲉⲛⲥⲉⲛ ⲉⲃⲟⲗ ⲛ̀ⲧⲉ ⲕⲗⲁⲩⲇⲓⲟⲥ ⲗⲁⲃⲓⲃ ⲛⲉⲙⲛⲓⲙⲟⲩϯ ⲛ̀ⲧⲉ ⲡⲉϥϧⲣⲱⲟⲩ ⲁϥϯⲇⲉ ⲉ̀ϧⲟⲩⲛ ⲉⲛⲉⲛⲥⲁϫⲓ ⲛ̀ⲟⲩⲉⲓⲛⲓⲛ ⲟⲩⲟϩ ⲁϥⲕⲱⲧⲙⲉⲛ ⲛ̀ⲧⲉϥⲁⲥⲡⲓ 

ⲡⲓⲥⲁϫⲓ ϩⲉⲃⲇⲟⲙⲁⲥ ϯⲛⲟⲩ ⲡⲉ ⲡⲓ⳥ ⲛ̀ⲧⲉ ⲧϧⲏⲓⲃⲓ ⲛ̀ⲧⲉ ⲛⲉⲛⲥⲁϫⲓ ⲛ̀ⲧⲉ ⲗⲁⲃⲓⲃ ϯⲉⲣϩⲉⲗⲡⲓⲥ ⲛ̀ⲧⲉ ϯϩⲓⲣⲏⲛⲏ ϣⲱⲡⲓ ⲛ̀ϩⲣⲏⲓ ϧⲉⲛϯϩⲉⲃⲇⲟⲙⲁⲥ ⲉⲑⲛⲏⲟⲩ 

ⲱ ⲛⲉⲙⲧⲁⲁⲥⲡⲓ ⲉⲧⲉ ⲡⲓⲟⲩⲁⲓ ⲡⲓⲟⲩⲁⲓ ϯϩⲓⲱⲧⲥ ⲛ̀ⲛⲉϥⲉⲓⲇⲉⲁ ⲛⲓⲙⲅⲁⲣ ϧⲉⲛⲛⲓⲣⲱⲙⲓ ⲉⲑⲛⲁⲩ ⲉⲣⲟⲥ ⲁϭⲛⲉ ⲛⲓϩⲃⲱⲥ ⲛ̀ⲧⲉ ⲛⲓⲫⲁⲣⲁⲱ ⲓⲉ ⲛⲓⲙⲅⲁⲣ ϧⲉⲛⲛⲓⲡⲓⲥⲧⲟⲥ ⲉⲧⲥⲱⲧⲉⲙ ⲉⲣⲟⲥ ⲉⲥⲉⲥⲁϫⲓ ⲁϭⲛⲉ ⲛⲓⲥⲙⲏ ⲛ̀ⲧⲉ ⲛⲓϩⲩⲙⲛⲟⲥ ⲓⲉ ⲛⲁⲩ ⲉⲣⲟⲥ ⲁϭⲛⲉ ⲡⲓⲥⲭⲏⲙⲁ ⲛⲓⲙ ⲡⲉⲧⲧⲁⲓⲟ ⲙ̀ⲙⲟⲥ ϩⲱⲥ ⲁⲥⲡⲓ ⲙ̀ⲙⲟⲛ ϩⲱⲥ ⳥

 

ⲉⲓⲥ ϯⲁⲡⲁⲧⲏ ⲛ̀ⲧⲉ ⲛⲓⲛⲁϩϯ ⲉⲧⲭⲣⲟϥ ⲁⲩϩⲓⲧⲥ ⲛ̀ⲧⲉⲛⲁⲥⲡⲓ ⲉⲡⲓϣⲧⲉⲕⲟ ⲛ̀ⲧⲉ ⲫⲁⲣⲁⲱ ⲛⲉⲙⲛⲓⲕⲉⲗⲗⲓⲁ ϧⲉⲛⲡⲕⲁϩⲓ ⲛ̀ⲭⲏⲙⲓ

 

ⲱ ⲉⲧⲁⲁⲥⲡⲓ ⲁⲙⲟⲓ ⲛ̀ⲧⲁⲛⲁⲩ ⲉⲣⲟ ⲁϭⲛⲉ ⲁⲡⲁⲧⲏ ⲛⲓⲃⲉⲛ ⲉⲓⲉⲛⲁⲩ ⲉⲣⲟ ϧⲉⲛⲡⲉⲕⲁϩⲓ ϧⲉⲛⲡⲉⲥⲏⲟⲩ ϯϥⲓⲣⲱⲟⲩϣⲅⲁⲣ ⲁⲛ ϧⲁ ⲛⲏⲉⲧⲁⲩⲑⲙⲓⲟ ⲙ̀ⲙⲟ ⲟⲩⲇⲉ ⲛⲏⲉⲧⲁⲩϯϩⲑⲏⲟⲩ ⲁⲛ ⲉⲣⲟ

ⲛⲓⲙ ⲡⲉ ⲡⲉⲣⲁⲛ ⲁⲣⲓⲁⲅⲁⲡⲏ ⲥⲁϫⲓ ϩⲓⲛⲁ ⲛ̀ⲧⲁⲥⲱⲧⲉⲙ ⲉⲡⲉϧⲣⲱⲟⲩ ⲁⲣⲓⲟⲩⲛⲁⲓ ⲙⲁⲧⲉⲙⲙⲟⲓ ⲛ̀ⲛⲓⲥⲁϫⲓ ⲛ̀ⲧⲉ ⲛⲏⲉⲧⲁⲩϥⲓⲣⲱⲟⲩϣ ϧⲁⲣⲟ ⲛⲏⲉⲧⲁⲩⲥϧⲁⲓ ⲛ̀ⲧⲟⲩⲥⲟⲫⲓⲁ ϧⲉⲛ ⲧⲉⲛⲁⲥⲡⲓ

 

ⲧⲟⲧⲉ ⲧⲉⲛⲛⲁϯϩⲑⲏⲛ ⲁⲛ ⲉⲛⲉⲛⲛⲟⲩⲛⲓ ⲛ̀ⲧⲉ ϯⲁⲥⲡⲓ ⲟⲩⲟϩ ⲧⲉⲛⲛⲁϭⲓⲥⲙⲏ  

ⲛⲉⲛⲥⲁϫⲓ ⲛ̀ⲟⲩⲉⲓⲛⲓⲛ ⲉⲧϧⲉⲛϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ

 ϧⲉⲛⲧⲁⲙⲉⲧϧⲉⲗϣⲓⲣⲓ ⲁⲓϭⲓⲥⲃⲱ ⲉϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϧⲉⲛⲡⲥⲱⲟⲩϩ ⲉⲧϭⲟⲥⲓ ⲛ̀ⲧⲉ ⲛⲓⲥⲃⲱⲟⲩⲓ ⲛ̀ⲣⲉⲙⲛ̀ⲭⲏⲙⲓ ⲡⲓⲫⲱϣ ⲛ̀ⲧⲉ ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲁⲩϫⲟⲥ ⲛⲏⲓ ⲛ̀ϫⲉ ⲛⲓⲥⲁϧ ϫⲉⲉⲛⲉ ⲁⲕϫⲓⲙⲓ ⲛ̀ⲟⲩⲥⲁϫⲓ ⲛ̀ⲟⲩⲉⲓⲛⲓⲛ ⲛⲉⲙⲟⲩⲥⲁϫⲓ ⲛ̀ⲣⲉⲙⲛ̀ⲭⲏⲙⲓ ⲉⲕⲉⲥⲱⲧⲡ ⲙ̀ⲡⲓⲥⲁϫⲓ ⲉⲧϧⲁⲉ ϫⲉⲁⲛⲟⲛ ϩⲁⲛⲣⲉⲙⲛ̀ⲭⲏⲙⲓ ⲟⲩⲟϩ ⲉ̀ⲛⲉϭⲓⲥⲓ ⲙ̀ⲡⲧⲁⲡ ⲛ̀ⲧⲉ ⲧⲉⲛⲁⲥⲡⲓ

 

ⲁⲓⲉⲣϩⲏⲧⲥⲇⲉ ⲛ̀ⲧⲁⲱϣ ⲛ̀ⲛⲓⲥϧⲁⲓ ⲛⲁ ⲕⲗⲁⲩⲇⲓⲟⲥ ⲗⲁⲃⲓⲃ ⲟⲩⲟϩ ⲙ̀ⲡⲓϫⲓⲙⲓ ⲛ̀ϩⲁⲛⲥⲁϫⲓ ⲛ̀ⲟⲩⲉⲓⲛⲓⲛ ⲙ̀ⲙⲁⲩ ⲁⲓϯⲕⲁϯ ⲉⲣⲟϥ ⲁⲗⲗⲁ ⲉⲧⲁⲓⲉⲣϩⲏⲧⲥ ⲛ̀ⲧⲁⲱϣ ⲛ̀ϯⲗⲉⲓⲧⲟⲣⲅⲓⲁ ⲛⲉⲙϯⲯⲁⲗⲙⲱⲇⲓⲁ ⲛⲉⲙⲙϫⲉⲩⲁⲅⲅⲉⲗⲓⲟⲛ ⲛⲉⲙⲛⲓⲉⲡⲓⲥⲧⲟⲗⲏ ⲙ̀ⲡⲁⲩⲗⲟⲥ ⲛⲉⲙⲛⲓⲉⲡⲓⲥⲧⲟⲗⲏ ⲛ̀ⲕⲁⲑⲟⲗⲓⲕⲟⲛ ⲛⲉⲙϯⲇⲓⲁⲑⲏⲕⲏ ⲙ̀ⲃⲉⲣⲓ ⲛⲉⲙⲛⲉⲛⲃⲓⲟⲥ ⲛ̀ⲧⲉ ⲛⲓ⳥ ⲛⲉⲙⲛⲓⲁⲅⲓⲟⲥ ⲛⲉⲙⲛⲓⲡⲁⲧⲣⲓⲁⲣⲭⲏⲥ ⲛⲉⲙⲛⲉⲛⲥⲁϫⲓ ⲛ̀ⲧⲉ ⲛⲉⲛⲓⲟϯ ⲛ̀ⲧⲉ ⲡϣⲁϥⲉ ⲉⲧⲟⲩⲙⲟⲩϯ ⲉⲣⲱⲟⲩ ϫⲉⲁⲡⲟⲫⲑⲉⲅⲙⲁⲧⲁ ⲧⲱⲛ ⲡⲁⲧⲣⲉⲟⲛ ⲕⲉ ⲡⲁⲗⲓⲛ ⲟⲛ ⲁⲓⲱϣ ⲙ̀ⲡⲓⲥⲧⲓⲥ ⲥⲟⲫⲓⲁ ⲛⲉⲙⲡⲓⲉⲩⲁⲅⲅⲉⲗⲓⲟⲛ ⲕⲁⲧⲁ ⲓⲟⲩⲇⲁⲥ ⲛⲉⲙⲛⲓⲥϧⲁⲓ ⲛ̀ⲧⲉ ϯⲅⲛⲱⲥⲓⲥ ⲁⲓϫⲓⲙⲓ ⲛ̀ϩⲁⲛⲙⲏϣ ⲛ̀ⲥⲁϫⲓ ⲛ̀ⲟⲩⲉⲓⲛⲓⲛ ϧⲉⲛⲥϧⲁⲓ ⲛⲓⲃⲉⲛ

ⲡⲁⲗⲓⲛ ⲟⲛ ⲁⲓⲱϣ ⲛ̀ⲛⲓⲗⲉⲝⲓⲕⲟⲛ ⲉⲑⲟⲩⲱⲛϩ ⲉⲃⲟⲗ ⲛ̀ⲛⲓⲛⲟⲩⲛⲓ ⲛ̀ⲧⲉ ⲥⲁϫⲓ ⲛⲓⲃⲉⲛ  ⲉⲧⲟⲩⲙⲟⲩϯ ⲉϥⲁⲓ ⲛⲉϯⲉⲧⲩⲙⲟⲗⲟⲅⲓⲁ ⲛ̀ⲧⲉ ⲛⲓⲥⲁϫⲓ ⲁⲓϫⲓⲙⲓⲅⲁⲣ ⲛ̀ϩⲁⲛⲙⲏϣ ⲛ̀ⲥⲁϫⲓ ⲛ̀ⲟⲩⲉⲓⲛⲓⲛ ⲛⲉⲙϩⲁⲛⲥⲁϫⲓ ⲛ̀ⲁⲣⲁⲃⲟⲥ ⲛⲉⲙϩⲁⲛⲥⲁϫⲓ ⲉⲃⲟⲗϧⲉⲛ ϯⲙⲉⲧϩⲉⲃⲣⲉⲟⲥ ⲛⲉⲙ ϯⲁⲥⲡⲓ ⲛ̀ⲧⲉ ⲛⲓⲡⲉⲣⲥⲓⲥ  

ⲁⲙⲟⲕⲙⲉⲕ ϫⲉⲉⲑⲃⲉ ⲟⲩ ϯϭⲓⲥⲃⲱ ⲉϯⲙⲉⲧⲣⲉⲙⲛ̀ⲭⲏⲙⲓ ⲙⲏ ϯⲟⲩⲱϣ ⲛ̀ⲧⲁⲧⲟⲩⲃⲟ ⲛ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲉⲃⲟⲗϩⲁ ⲡⲑⲱⲗⲉⲃ ⲛ̀ⲧⲉ ⲛⲓⲕⲉⲁⲥⲡⲓ ⲓⲉ ϯⲟⲩⲱϣ ⲉⲥⲁϫⲓ ⲕⲁⲧⲁ ⲧⲁⲥⲡⲓ ⲛ̀ⲧⲉ ⲛⲁⲓⲟϯ ⲟⲩⲟϩ ⲙⲏ ⲥⲉⲑⲱⲗⲉⲃ ⲛ̀ϯⲙⲉⲧⲣⲉⲙⲛ̀ⲭⲏⲙⲓ ⲓⲉ ⲥⲉⲉⲣⲛⲁϣϯ ⲙ̀ⲙⲟⲥ

ⲁⲣⲏⲟⲩ ⲉϩⲟⲧⲉ ⲉⲧⲫⲁϣⲓ ⲛ̀ⲛⲓⲥⲁϫⲓ ϧⲉⲛ ⲡⲓⲗⲉⲝⲓⲕⲟⲛ ⲛ̀ⲧⲉ ⲧⲁⲁⲥⲡⲓ ⲁⲩϭⲓⲧⲟⲩ ⲉⲃⲟⲗϩⲁ ϩⲁⲛⲕⲉⲁⲥⲡⲓ ⲛ̀ⲗⲁⲥ ⲫⲁⲓ ϥⲟⲩⲱⲛϩ ⲉⲃⲟⲗ ⲛ̀ϯϩⲓⲥⲧⲟⲣⲓⲁ ⲛ̀ⲧⲉ ⲛⲓⲥⲁϫⲓ ⲛⲉⲙⲛⲓⲙⲉⲩⲓ ⲛⲉⲙⲡⲕⲁϩⲓ ⲛⲉⲙⲛⲓ ⲣⲱⲙⲓ 

ⲛⲉⲛⲓⲟϯ ⲁⲩⲧⲥⲁⲃⲟⲛ ⲛ̀ⲧⲉⲛϣⲱⲡⲓ ⲛ̀ϩⲁⲛⲇⲓⲕⲉⲟⲥ ⲙⲏⲡⲟⲧⲉ ⲛ̀ⲧⲉⲛϭⲓⲛϫⲟⲛⲥ ⲓⲉ ϯ ⲉϧⲣⲏⲓ ⲉ̀ϧⲟⲩⲛ ⲡⲓⲭⲉⲧ ⲛ̀ϫⲓⲛϫⲏ  ⲁⲛⲟⲕⲇⲉ ϩⲱ ⲛ̀ⲛⲁϭⲟϫⲓ ⲛ̀ⲥⲁ ⲛ̀ⲧⲉⲛⲥⲁϫⲓ ⲉⲧⲁⲩⲥⲁϫⲓ ⲙ̀ⲙⲱⲟⲩ ⲛ̀ϫⲉⲛⲁⲓⲟϯ ϫⲉϩⲁⲛⲥⲁϫⲓ ⲛ̀ϣⲉⲙⲙⲱⲟⲩ ⲡⲉ ⲛⲁⲓⲥⲁϫⲓ ⲁⲩϣⲱⲡⲓ ϧⲉⲛⲛⲉⲛⲗⲁⲥ ⲛ̀ⲧⲉ ⲛⲉⲛⲓⲟϯ ⲁⲩⲑⲣⲟⲩⲥϧⲁⲓ ⲛ̀ⲧⲟⲩⲥⲟⲫⲓⲁ ⲛⲉⲙⲛⲟⲩⲉⲙⲓ ⲁⲩⲉⲣⲭⲣⲁⲥⲑⲉ ⲙ̀ⲙⲱⲟⲩ ϧⲉⲛⲛⲟⲩⲉⲡⲓⲥⲧⲟⲗⲏ ⲛⲉⲙⲛⲟⲩⲙⲩⲑⲟⲥ ⲙⲏ ⲁⲛⲟⲕ ⲟⲩⲛⲓϣϯ ⲁⲛⲟⲕ ⲉⲛⲉⲛⲓⲟϯ ϣⲁⲛⲧⲁⲛⲁϩϯ ϫⲉϯⲉⲙⲓ ⲓⲉ ϯⲧⲁⲓⲟ ⲛ̀ⲧⲁⲁⲥⲡⲓ ⲉⲛⲏⲉⲧⲁⲩⲥⲁϫⲓ ⲙ̀ⲙⲟⲥ ⲓⲥϫⲉⲛ ⲧⲟⲩⲙⲉⲧⲁⲗⲟⲩ ⲙⲏ ⲁⲛⲟⲕ ⲟⲩⲇⲓⲕⲉⲟⲥ ⲁⲛ ϩⲱⲥⲧⲉ ⲛ̀ⲧⲁϥⲱϯ ⲛ̀ⲛⲓⲥⲁϫⲓ ⲉⲃⲟⲗϧⲉⲛ ⲣⲱⲓ ⲕⲁⲧⲁ ⲛⲟⲩⲛⲟⲩⲛⲓ ⲛⲉⲙⲧⲟⲩⲉⲧⲩⲙⲟⲗⲟⲅⲓⲁ ⲙ̀ⲫⲱⲣ

 

ⲁⲛⲟⲛⲅⲁⲣ ⲧⲏⲣⲉⲛ ⲡϣⲏⲣⲓ ⲙ̀ⲡⲕⲁϩⲓ ⲛ̀ⲟⲩⲱⲧ ⲛⲉⲙⲡⲓⲕⲟⲥⲙⲟⲥ  ⲛ̀ⲟⲩⲱⲧ ⲙⲁⲣⲉ ⲛⲉⲛⲗⲁⲥ ⲟⲩⲛ ⲧⲁⲓⲟ ⲛ̀ⲥⲁϫⲓ ⲛⲓⲃⲉⲛ ⲁϭⲛⲉ ϧⲟⲧϧⲉⲧ ⲟⲩⲇⲉ ϣⲑⲟⲣⲧⲉⲣ ⲉⲛⲉⲧⲁⲓⲟ ⲟⲩⲛ ⲙ̀ⲫⲗⲁⲥ ⲛ̀ⲧⲉ ⲛⲉⲛⲓⲟϯ ⲙⲏⲡⲟⲧⲉ ⲛ̀ⲧⲉ ϯⲁⲡⲁⲧⲏ ⲛ̀ⲧⲉ ⲡⲓⲧⲟⲩⲃⲟ ⲑⲣⲉⲛⲧⲁⲕⲟ ⲛ̀ⲧⲉⲛⲁⲥⲡⲓ ⲉⲛϭⲟϫⲓ ⲛ̀ⲥⲁ ⲥⲁϫⲓ ⲛⲓⲃⲉⲛ ⲟⲩⲟϩ ⲙⲉⲛⲉⲛⲥⲱⲥ ⲁⲣⲏⲟⲩ ⲛⲓⲣⲱⲙⲓ ⲥⲉⲛⲁϯⲟⲩⲃⲉ ⲛⲓⲕⲁⲡ ⲛ̀ⲥϧⲁⲓ ⲛ̀ⲟⲩⲉⲓⲛⲓⲛ

ⲕⲗⲁⲩⲇⲓⲟⲥ ⲗⲁⲃⲓⲃ ⲁϥⲙⲉⲛⲣⲉ ϯⲁⲡⲁⲧⲏ ⲛ̀ⲧⲉⲡⲧⲟⲩⲃⲟ ⲁϥⲟⲩⲱϣ ⲛ̀ⲧⲉϥϥⲱϯ ⲛ̀ϯϩⲓⲥⲧⲟⲣⲓⲁ ⲛ̀ϯⲁⲥⲡⲓ ⲛ̀ⲧⲉϥⲑⲁⲙⲓⲟⲥ ⲕⲁⲧⲁ ⲧⲉϥⲫⲁⲛⲧⲁⲥⲓⲁ  ⲁⲗⲗⲁ ⲛⲉⲛⲓⲟϯ ⲁⲩⲧⲁⲙⲟⲛ ⲛ̀ⲧⲉⲛⲉⲣⲁⲅⲁⲡⲁⲛ ⲉⲟⲩⲟⲛ ⲛⲓⲃⲉⲛ ⲟⲩⲟϩ ⲁⲛⲟⲕⲇⲉ ϩⲱ ϯⲉⲣⲁⲅⲁⲡⲁⲛ ⲛ̀ⲥⲁϫⲓ ⲛⲓⲃⲉⲛ