ϫⲟⲩϩⲉ ⲛⲉⲙⲧϩⲩⲇⲣⲓⲁ

 ⲛⲉ ⲟⲩⲟⲛ ⲟⲩⲣⲉϥϯϩⲁⲡⲡⲉ ϧⲉⲛⲟⲩⲃⲁⲕⲓ ⲛ̀ϥⲉⲣϩⲟϯ ⲁⲛ ϧⲁⲧϩⲏ ⲛ̀ⲛⲓⲇⲓⲕⲉⲟⲥ ⲟⲩⲟϩ ⲛ̀ϥϣⲓⲡⲓ ϧⲁⲧϩⲏ ⲛ̀ⲛⲓⲣⲱⲙⲓ ⲛⲉ ⲟⲩⲟⲛ ⲟⲩⲥⲁⲃⲉⲇⲉⲡⲉ ⲉⲧⲟⲩⲙⲟⲩϯ ⲉ̇ⲣⲟϥ ϫⲉϫⲟⲩϩⲉ ϧⲉⲛϯⲃⲁⲕⲓ ⲉⲧⲉⲙⲙⲁⲩ ϫⲟⲩϩⲉⲇⲉ ⲁϥⲓ̇ ⲉⲡⲓⲣⲉϥϯϩⲁⲡ ⲉϥⲉⲣⲉⲧⲓⲛ ⲛ̀ⲟⲩϩⲩⲇⲣⲓⲁ ϩⲓⲛⲁ ⲛ̀ⲧⲉϥⲙⲉϩⲙⲱⲟⲩ ⲡⲓⲣⲉϥϯϩⲁⲡ ⲁϥⲧⲏⲓϥ ⲛⲁϥ ⲉϥϫⲱ ⲙ̀ⲙⲟⲥ ϫⲉⲉⲓⲥ ϯϩⲩⲇⲣⲓⲁ ⲁⲛⲓⲧϥ ⲛⲏⲓ ⲛ̀ⲭⲱⲗⲉⲙ ⲛ̀ⲧⲁϣⲧⲉⲙϩⲓⲧⲕ ⲉⲡⲓϣⲧⲉⲕⲟ ⲟⲩⲟϩ ⲉⲧⲁ ϫⲟⲩϩⲉ ⲙⲉϩⲙⲱⲟⲩ ⲁϥⲧⲁⲥⲑⲟ ⲉⲡⲉϥⲏⲓ ⲟⲩⲟϩ ⲙⲉⲛⲉⲛⲥⲱⲥ ⲁϥϣⲉⲛⲁϥ ⲉⲡⲓⲣⲉϥϯϩⲁⲡ ⲁϥϯⲛⲁϥ ⲛ̀ϯϩⲩⲇⲣⲓⲁ ⲟⲩⲟϩ ⲟⲛ ⲁϥϯⲛⲁϥ ⲛ̀ⲟⲩⲕⲟⲩϫⲓ ⲛ̀ⲕⲉⲗⲟⲗ ⲁϥⲉⲣϣⲫⲏⲣⲓ ⲛ̀ϫⲉⲡⲓⲣⲉϥϯϩⲁⲡ ⲟⲩⲟϩ ⲁϥϣⲓⲛⲓ ⲛ̀ϫⲟⲩϩⲉ ⲉϥϫⲱⲙ̀ⲙⲟⲥ ϫⲉⲟⲩ ⲡⲉ ⲫⲁⲓ ⲁϫⲟⲩϩⲉ ϫⲟⲥ ⲛⲁϥ ϫⲉⲧⲉⲕϩⲩⲇⲣⲓⲁ ⲁⲥⲙⲓⲥⲓ ⲛ̀ⲟⲩⲕⲟⲩϫⲓ ⲛ̀ⲕⲉⲗⲟⲗ ϧⲉⲛⲟⲩϩⲱⲃ ⲛ̀ϣⲫⲏⲣⲓ ⲙ̀ⲡⲁⲣⲁⲇⲟⲝⲟⲛ ⲟⲩⲱⲟⲩ ⲙ̀ⲫϯ ⲡⲓⲣⲉϥϯϩⲁⲡⲇⲉ ⲙ̀ⲡⲉϥⲛⲁϩϯ ϫⲉⲫⲁⲓⲡⲉ ϧⲉⲛⲟⲩⲙⲉⲑⲙⲏⲓ ⲁⲗⲗⲁ ⲁϥϭⲓ ⲛ̀ⲧϩⲩⲇⲣⲓⲁ ⲛⲉⲙⲧⲕⲉⲗⲟⲗ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ ⲉⲡⲉϥⲣⲁⲥϯⲇⲉ ϫⲟⲩϩⲉ ⲁϥⲓ̇ ⲉϩⲣⲉⲛ ⲡⲓⲣⲉϥϯϩⲁⲡ ⲉϥⲉⲣⲉⲧⲓⲛ ⲛ̀ⲧϩⲩⲇⲣⲓⲁ ϩⲓⲛⲁ ⲛ̀ⲧⲉϥⲙⲉϩⲙⲱⲟⲩ ⲛ̀ⲕⲉⲥⲟⲡ ⲟⲩⲟϩ ⲛ̀ϯⲟⲩⲛⲟⲩ ⲁⲡⲓⲣⲉϥϯϩⲁⲡ ϥⲧⲏⲓⲥ ⲛⲁϥ ϫⲟⲩϩⲉⲇⲉ ⲁϥϭⲓⲧϩⲩⲇⲣⲓⲁ ⲟⲩⲟϩ ⲁϥⲱⲥⲕ ⲉⲙⲁϣⲱ ⲟⲩⲟϩ ⲉ̇ⲧⲁϥϣⲑⲟⲣⲧⲉⲣ ⲛ̀ϫⲉⲡⲓⲣⲉϥϯϩⲁⲡ ⲁϥϣⲉⲛⲁϥ ⲉⲡⲏⲓ ⲛ̀ϫⲟⲩϩⲉ ⲉϥϫⲟⲛⲧ ⲟⲩⲟϩ ⲁϥⲱϣ ⲉ̇ⲃⲟⲗ ⲉϥϫⲱⲙ̀ⲙⲟⲥ ϫⲉ ⲛⲁϥ ϫⲉⲁⲥⲑⲱⲛ ⲧⲁϩⲩⲇⲣⲓⲁ ϫⲟⲩϩⲉⲇⲉ ⲁϥϫⲟⲥ ⲛⲁϥ ϫⲉⲧⲉⲕϩⲩⲇⲣⲓⲁ ⲛⲉ ⲟⲩⲟⲛ ⲟⲩⲛⲓϣϯ ⲛ̀ϧⲙⲟⲙ ⲛⲉⲙⲁⲥⲡⲉ ⲟⲩⲟϩ ⲁⲥⲙⲟⲩ ⲁⲥⲙ̀ⲧⲟⲛ ⲙ̀ⲙⲟⲥ ⲟⲩⲱⲟⲩ ⲙ̀ⲫϯ ϧⲉⲛⲛⲏⲉⲧϭⲟⲥⲓ ⲧⲟⲧⲉ ⲁⲡⲓⲣⲉϥϯϩⲁⲡ ϭⲓϣⲓⲡⲓ ϫⲉⲁϥϣⲁⲛⲕⲁⲧⲏⲅⲟⲣⲓⲛ ⲛ̀ϫⲟⲩϩⲉ ⲥⲉⲛⲁⲉⲣⲥⲕⲁⲛⲇⲉⲗⲉⲍⲉⲓⲛ ⲙ̀ⲙⲟϥ ⲉⲑⲃⲉ ⲧⲕⲉⲗⲟⲗ

ⲧϣⲱϯ ⲙ̀ⲫⲙⲱⲟⲩ

ⲁⲟⲩⲁⲓ ⲛ̀ⲛⲉⲛⲓⲟϯ ⲟⲩⲱⲣⲡ ⲙ̀ⲡⲉϥⲙⲁⲑⲏⲧⲏⲥ ⲉⲙⲉϩⲙⲱⲟⲩ. ⲛⲁⲣⲉⲧϣⲱϯⲇⲉⲡⲉ ⲟⲩⲏⲟⲩ ⲛ̀ⲑⲣⲓ ⲉⲙⲁϣⲱ. ⲁϥⲉⲣⲡⲱⲃϣⲇⲉ ⲉϭⲓⲫⲛⲟϩ ⲛⲉⲙⲁϥ. ⲉⲧⲁϥⲓ̇ⲇⲉ ⲉϫⲉⲛⲧϣⲱϯ ⲁϥⲉⲙⲓ ϫⲉⲙ̀ⲡⲉϥⲓ̇ⲛⲓ ⲛⲉⲙⲁϥ ⲙ̀ⲫⲛⲟϩ. ⲁϥⲓⲣⲓ ⲛ̀ⲟⲩϣⲗⲏⲗ ⲁϥⲙⲟⲩϯ ⲉϥϫⲱⲙ̀ⲙⲟⲥ ϫⲉⲧϣⲱϯ ⲡⲁⲓⲱⲧ ⲡⲉⲧϫⲱ ⲙ̀ⲙⲟⲥ ϫⲉⲙⲟϩ ⲙ̀ⲡⲁⲅⲅⲓⲟⲛ ⲙ̀ⲙⲱⲟⲩ ⲟⲩⲟϩ ⲁⲫⲙⲱⲟⲩ ϩⲉⲙⲥⲓ ⲉⲡⲉϥⲙⲁ ⲁϥϫⲟⲥ ⲟⲛ ϫⲉϧⲉⲛⲫⲣⲁⲛ ⲛ̀ⲓⲏ̅ⲥ̅ ⲡⲭ̅ⲥ̅ ⲡϣⲏⲣⲓ ⲙ̀ⲫϯ ⲉⲧⲟⲛϧ ⲁⲙⲟⲩ ⲉⲡϣⲱⲓ ⲁⲗⲗⲁ ⲡⲓⲙⲱⲟⲩ ⲙ̀ⲡⲉϥⲓ̀ ⲉⲡϣⲱⲓ ⲧⲟⲧⲉ ⲁϥϫⲱⲛⲧ ⲧⲟⲩⲛⲟⲩ ⲛ̀ϫⲉⲡⲓⲙⲁⲑⲏⲧⲏⲥ ⲁϥⲧⲁⲥⲑⲟ ⲉⲡⲉϥⲓⲱⲧ ⲉϥϫⲱ ⲙ̀ⲙⲟⲥ ϫⲉⲡⲁⲓⲱⲧ ⲁⲓⲧⲱⲃϩ ϫⲉϩⲓⲛⲁ ⲛ̀ⲧⲉⲫϯ ⲧⲁⲙⲟⲓ ⲉ̀ⲟⲩⲙⲏⲓⲛⲓ ⲉ̀ⲃⲟⲗϧⲉⲛⲧⲫⲉ ⲁⲗⲗⲁ ⲙ̀ⲡⲟⲩⲧⲏⲓϥ ⲛⲏⲓ ⲓⲥϫⲉ ⲁⲕⲉⲣⲙⲉⲑⲣⲉ ⲛ̀ϯⲙⲉⲑⲙⲏⲓ ⲛⲁⲣⲉ ⲡⲓⲙⲱⲟⲩ ⲙⲉϩⲡⲁⲓⲁⲅⲅⲓⲟⲛ ⲫⲁⲓ ⲉⲧⲉⲙⲙⲁⲩ ⲥⲥϧⲏⲟⲩⲧⲅⲁⲣ ϫⲉϩⲱⲃ ⲛⲓⲃⲉⲛ ⲉⲧⲉⲧⲉⲛⲛⲁⲉⲣⲉⲧⲓⲛ ⲙ̀ⲙⲟϥ ϧⲉⲛⲟⲩⲡⲣⲟⲥⲉⲩⲭⲏ ⲛⲁϩϯ ϫⲉⲁⲣⲉⲧⲉⲛϭⲓ ⲟⲩⲟϩ ⲉⲥⲉ̀ϣⲱⲡⲓ ⲛⲱⲧⲉⲛ

ⲡⲓϧⲉⲗⲗⲟⲇⲉ ⲙ̀ⲡⲉϥⲟⲩⲱⲛ ⲛ̀ⲣⲱϥ ⲟⲩⲟϩ ⲁϥⲧⲏⲓϥ ⲙ̀ⲫⲛⲟϩ 

ⲉ̀ⲧⲁ ⲁⲡⲁ ⲑⲉⲟⲇⲱⲣⲟⲥ ϫⲉⲙⲡϣⲓⲛⲓ ⲙ̀ⲙⲁⲛⲗⲁⲩ

ⲉ̀ⲧⲁϥϣⲉ ⲉ̀ϧⲟⲩⲛ ⲛ̀ϫⲉⲁⲡⲁ ⲑⲉⲟⲇⲱⲣⲟⲥ ⲛⲁϥⲙⲟϣⲓⲡⲉ ϧⲉⲛⲙⲁⲛⲗⲁⲩ ⲛⲓⲁⲗⲱⲟⲩⲓⲇⲉ ⲛⲁⲩⲕⲱϯⲡⲉ ⲉ‌ⲛⲁⲩ ⲉ‌ⲁⲡⲁ ⲑⲉⲟⲇⲱⲣⲟⲥ ϫⲉⲛⲓⲙⲡⲉ ⲟⲩⲟϩ ⲛⲁⲩϣϫⲉⲙϫⲟⲙ ⲁⲛⲡⲉ ⲉⲑⲃⲉ ⲡⲓⲙⲏϣ ϫⲉⲛⲉ ϩⲁⲛⲕⲟⲩϫⲓ ⲛⲉ ϧⲉⲛⲧⲟⲩⲙⲁⲓⲏ

ⲉⲧⲁⲩϭⲟϫⲓ ⲉⲉ̀ⲧϩⲏ ⲁⲩϣⲉ ⲛⲱⲟⲩ ⲉ̀ϩⲣⲏⲓ ⲉⲉ̀ϫⲉⲛⲟⲩϣϣⲏⲛ ϩⲓⲛⲁⲛ̀ⲧⲟⲩⲛⲁⲩ ⲉ̀ⲣⲟϥ ⲟⲩⲟϩ ⲛⲁϥⲥⲓⲛⲓⲡⲉ ⲉ̀ⲃⲟⲗ ϩⲓⲧⲉⲛⲙⲁⲛⲗⲁⲩ

ⲡⲓⲥⲑⲟⲓ ⲛ̀ⲧⲉⲡⲓⲕⲣⲓⲛⲟⲛ

ⲛⲉ ⲟⲩⲟⲛ ⲟⲩϭⲣⲟⲙⲡϣⲁⲗ ⲙ̀ⲙⲁⲩ ⲉⲛⲁⲥϩⲉⲙⲥⲓ ϩⲓϫⲉⲛⲛⲓⲥⲱⲟⲩϩⲓ ϧⲉⲛⲟⲩⲙⲁϩ ⲟⲩⲧⲉ ⲛⲓⲕⲗⲁⲇⲟⲥ ⲛ̀ⲧⲉⲟⲩϣϣⲏⲛ ⲉⲧⲁ ϩⲁⲛⲁⲧⲟⲟⲩⲓⲇⲉ ϣⲱⲡⲓ ⲁⲥϩⲁⲗⲁⲓ ⲛ̀ϫⲉϯϭⲣⲟⲙⲡϣⲁⲗ ⲟⲩⲟϩ ⲉⲧⲁⲥⲕⲟⲧⲥ ⲁⲩⲫⲱϫⲓ ⲛ̀ϫⲉⲛⲓⲥⲱⲟⲩϩⲓ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ 

ⲛⲉⲟⲩⲟⲛⲧⲉⲥⲟⲩⲙⲁⲥⲃ̅ ⲟⲩⲟϩ ⲛⲉϣⲁⲥϩⲁⲗⲁⲓ ϫⲉϩⲓⲛⲁ ⲛ̀ⲧⲉⲥⲓ̀ⲛⲓ ⲛⲱⲟⲩ ⲛ̀ⲟⲩϧⲣⲉ ⲙ̀ⲫⲛⲁⲩ ⲛ̀ϣⲟⲣⲡ ⲕⲁⲧⲁ ⲉϩⲟⲟⲩ ⲛⲓⲙⲁⲥⲇⲉ ⲛⲁⲩⲟϩⲓ ⲛⲁⲥ ϫⲉϩⲓⲛⲁ ⲛ̀ⲧⲉⲥⲧⲉⲙⲙⲱⲟⲩ ϫⲉⲛⲉ ⲙ̀ⲙⲟⲛϣϫⲟⲙ ⲙ̀ⲙⲱⲟⲩ ⲛ̀ⲧⲟⲩϩⲁⲗⲁⲓ 

ⲉⲧⲁϩⲁⲛⲁⲧⲟⲟⲩⲓⲇⲉ ϣⲱⲡⲓ ⲁⲥϩⲁⲗⲁⲓ ⲛ̀ϫⲉϯϭⲣⲟⲙⲡϣⲁⲗ ϩⲟⲡⲱⲥ ⲛ̀ⲧⲉⲥⲓ̀ⲛⲓ ⲛ̀ⲟⲩϧⲣⲉ ⲉⲑⲃⲉⲡⲉⲥⲙⲁⲥⲃ̅ ⲟⲩⲟϩ ⲉ̀ⲧⲁⲥⲧⲁⲥⲑⲟ ⲉⲫⲙⲁϩ  ⲙ̀ⲡⲉⲥϫⲓⲙⲓ ⲙ̀ⲡⲉⲥⲙⲁⲥⲃ̅ ⲁⲥⲕⲱϯ ⲛ̀ⲥⲱⲟⲩ ⲥⲁⲥⲫⲓⲣ ⲙ̀ⲫⲙⲁϩ ⲟⲩⲟϩ ⲁⲥϩⲁⲗⲁⲓ ⲛ̀ⲧⲉⲥⲕⲱϯ ⲛ̀ⲥⲱⲟⲩ ⲥⲁⲡⲉⲥⲏⲧ ⲙ̀ⲡⲓϣϣⲏⲛ ϫⲉⲁⲣⲏⲟⲩ ⲡⲓⲛⲓϥⲓ ⲁϥϩⲓⲧⲟⲩ ⲡⲗⲏⲛ ⲙ̀ⲡⲉⲥϫⲉⲙⲟⲩ

ⲁⲥϩⲁⲗⲁⲓⲇⲉ ϣⲁⲧⲫⲉ ϫⲉϩⲁⲣⲁ ⲁⲩϩⲁⲗⲁⲓ ⲁⲗⲗⲁ ⲙ̀ⲡⲉⲥϫⲓⲙⲓ ⲙ̀ⲙⲱⲟⲩ ⲟⲩⲟϩ ⲁⲥϣⲉⲛⲁⲥ ⲉⲧⲗⲓⲙⲛⲏ ϫⲉϩⲁⲣⲁ ⲁⲩⲱⲙⲥ ⲟⲩⲟϩ ⲙ̀ⲡⲉⲥⲛⲁⲩ ⲉⲛⲟⲩⲥⲱⲙⲁ ⲁⲥⲓ̀ⲇⲉ ⲉϩⲣⲉⲛ ⲡⲓⲭⲣⲱⲙ ⲁⲗⲗⲁ ⲙ̀ⲡⲉⲥⲥⲱⲧⲉⲙ ⲉⲡⲟⲩϧⲣⲱⲟⲩ ⲟⲩⲇⲉ ⲙ̀ⲡⲉⲥⲛⲁⲩ ⲉⲛⲟⲩⲕⲟⲩϫⲓ ⲛ̀ⲧⲉⲛϩ ⲁⲥⲧⲁⲥⲑⲟⲇⲉ ⲉⲡⲉⲥⲙⲁϩ ⲡⲗⲏⲛ ⲙ̀ⲡⲉⲥⲟⲩⲉⲙϩⲗⲓ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ

ⲁⲥϩⲁⲗⲁⲓⲇⲉ ⲥⲁⲡⲉⲙⲉⲛⲧ ⲟⲩⲟϩ ⲁⲥⲥⲱⲧⲉⲙ ⲉⲡⲟⲩϧⲣⲱⲟⲩ ⲛ̀ϯⲟⲩⲛⲟⲩ ⲁⲥⲓⲱⲥ ⲙ̀ⲙⲟⲥ ϩⲓⲛⲁ ⲛ̀ⲧⲉⲥⲓ̀ ⲉϩⲣⲉⲛⲡⲉⲥⲙⲁⲥⲃ̅ ⲟⲩϩⲟϯ ϧⲉⲛⲟⲩϩⲟϯ ⲁⲥⲛⲁⲩ ⲉ̀ⲟⲩⲛⲓϣϯ ⲛ̀ⲅⲁⲗⲉⲁⲅⲣⲁ ⲉⲥⲏϣ ϧⲉⲛⲟⲩϣⲁϣⲧ ⲟⲩⲟϩ ⲉⲣⲉⲡⲓⲙⲁⲥⲃ̅ ϣⲟⲡ ⲛ̀ϧⲏⲧϥ ⲟⲩⲟϩ ⲉⲣⲉⲛⲟⲩⲕⲟⲩϫⲓ ⲛ̀ⲧⲉⲛϩ ⲉⲩϧⲏⲕ ⲁϯϭⲣⲟⲙⲡϣⲁⲗ ϩⲓⲕⲱϯ ⲛ̀ϯⲅⲁⲗⲉⲁⲅⲣⲁ ⲟⲩⲟϩ ⲁⲥⲛⲟⲩⲕⲉⲣ ⲙ̀ⲙⲟⲥ ⲧⲟⲧⲉ ⲁⲛⲉⲥϫⲉϥϣⲁⲓ ϯⲥⲛⲟϥ ⲁⲥϣⲉⲛⲁⲥⲇⲉ ⲉⲡϣⲱⲓ ⲟⲩⲟϩ ⲁⲥⲓⲱⲥ ⲙ̀ⲙⲟⲥ ⲥⲁⲡⲉⲥⲏⲧ ⲉⲥⲕⲱⲗϩ ⲉ̀ϫⲉⲛϯⲅⲁⲗⲉⲁⲅⲣⲁ ϣⲁⲛⲧⲁ ⲛⲉⲥϧⲣⲓⲙ ⲁⲩϯⲥⲛⲟϥ ⲟⲛ ⲉⲡϧⲁⲓⲇⲉ ⲁⲥϩⲁⲗⲁⲓ ⲥⲁⲡϣⲱⲓ 

ⲟⲩⲟϩ ⲧⲟⲧⲉ ⲁϥⲣⲉⲕⲧⲫⲉ ⲛ̀ϫⲉⲟⲩⲛⲓϣϯ ⲛ̀ⲁϧⲱⲙ ⲉϥⲓⲏⲥ ⲥⲁⲡⲉⲥⲏⲧ ⲙ̀ⲫⲣⲏϯ ⲛ̀ⲟⲩⲥⲉⲧⲉⲃⲣⲏϫ ⲟⲩⲟϩ ⲁϥⲕⲱⲗϩ ⲉ̀ϫⲉⲛϯⲅⲁⲗⲉⲁⲅⲣⲁ ⲁⲥⲓ̀ ⲛ̀ϫⲉϯϭⲣⲟⲙⲡϣⲁⲗ ⲥⲁⲫⲁϩⲟⲩ ⲙ̀ⲙⲟϥ ⲁⲡⲓⲁϧⲱⲙⲇⲉ ϫⲟⲩϣⲧ ⲉ̀ⲣⲟⲥ ⲟⲩⲟϩ ⲁϥϭⲛⲉϫⲱϥ ⲟⲩⲟϩ ⲁϥϩⲁⲗⲁⲓ ⲥⲁⲡϣⲱⲓ ⲉⲧⲫⲉ ⲟⲩⲟϩ ⲁϥⲉⲣⲁⲑⲟⲩⲱⲛϩ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ

ⲁⲥⲓ̀ ⲛ̀ϫⲉϯϭⲣⲟⲙⲡϣⲁⲗ, ⲉϯⲅⲁⲗⲉⲁⲅⲣⲁ ⲟⲩⲟϩ ⲁⲥⲛⲁⲩ ⲉ̀ⲟⲩⲣⲱⲙⲓ ⲉϥⲧⲉⲙⲙⲟ ⲙ̀ⲡⲉⲥⲙⲁⲥⲃ̅ ⲁⲥϩⲁⲗⲁⲓ ⲉⲡⲓⲓⲁϩϣϣⲏⲛ ⲟⲩⲟϩ ⲁⲥⲑⲱⲟⲩϯ ⲛ̀ϩⲁⲛⲕⲟⲩϫⲓ ⲛ̀ⲛⲁⲫⲣⲓ ⲁⲥϣⲉ ⲉ̀ϧⲟⲩⲛ ⲉⲡⲉϥⲏⲓ ⲟⲩⲟϩ ⲉⲧⲁϥϣⲉⲛⲁϥ ⲉϯⲥⲓⲱⲟⲩⲛⲓ ⲛ̀ⲧⲉϥⲓⲁⲧⲟⲧϥ  ⲁⲥⲙⲟⲩϫⲧ ⲛ̀ⲛⲓⲕⲟⲩϫⲓ ⲛ̀ⲛⲁⲫⲣⲓ ⲛⲉⲙϯϧⲣⲉ ⲉⲧⲭⲏ ϧⲉⲛⲧⲉϥⲃⲓⲛⲁϫ ⲟⲩⲟϩ ⲁⲥⲫⲱⲧ ⲉ̀ⲃⲟⲗ ϧⲉⲛⲡⲓϣⲟⲩϣⲧ ⲛ̀ⲭⲱⲗⲉⲙ ⲟⲩⲟϩ ⲉⲧⲁ ⲡⲓⲣⲱⲙⲓ ⲟⲩⲱⲙ ⲁϥⲱϣ ⲉ̀ⲃⲟⲗ ϧⲉⲛⲟⲩⲛⲓϣϯ ⲛ̀ⲥⲙⲏ ⲟⲩⲟϩ ⲁϥϣⲉⲛⲁϥ ⲉⲡⲓⲙⲁⲛϭⲓⲫⲁϧⲣⲓ

ⲁⲥϩⲁⲗⲁⲓⲇⲉ ⲛ̀ϫⲉϯϭⲣⲟⲙⲡϣⲁⲗ ⲟⲩⲟϩ ⲁⲥⲑⲱⲟⲩϯ ⲛ̀ϩⲁⲛⲕⲣⲓⲛⲟⲛ ⲉⲩⲭⲏ ⲟⲩⲧⲉⲛⲓϣⲟⲛϯ ⲁⲥⲧⲁⲥⲑⲟ ⲉⲡⲉⲥⲙⲁⲥⲃ̅ ⲟⲩⲟϩ ⲁⲥⲭⲁⲛⲓⲕⲣⲓⲛⲟⲛ ⲛⲁϩⲣⲱⲟⲩ ⲁⲟⲩⲁⲓ ⲟⲩⲱⲙ ⲛ̀ⲛⲓⲕⲣⲓⲛⲟⲛ ⲟⲩⲟϩ ⲁϥϩⲓⲡⲉϥⲑⲏⲟⲩ ⲡⲓⲭⲉⲧ ⲙ̀ⲡⲉϥⲟⲩⲱⲙ ⲁⲥϩⲁⲗⲁⲓⲇⲉ ⲉ̀ⲡⲉⲥⲏⲧ ⲛ̀ϫⲉϯϭⲣⲟⲙⲡϣⲁⲗ ⲟⲩⲟϩ ⲁⲥⲕⲟⲧⲥ ⲟⲩⲟϩ ⲉⲣⲉⲟⲩϭⲗⲏ ϧⲉⲛⲛⲉⲥϧⲣⲓⲙ ⲛⲁⲥⲁⲙⲟⲛⲓ ⲛ̀ⲧⲉⲥϭⲓⲱϯ ⲟⲩⲟϩ ⲙ̀ⲡⲉϯϭⲗⲏ ϫⲱⲕϩ ⲙ̀ⲙⲟⲥ ⲁϯϭⲣⲟⲙⲡϣⲁⲗ ϩⲓⲧⲥ ⲛ̀ϯϭⲗⲏ ϧⲉⲛϯⲅⲁⲗⲉⲁⲅⲣⲁ ⲡⲓⲕⲉⲙⲁⲥⲙⲉⲛ ⲁϥⲕⲱⲗϩ ⲛ̀ⲛⲉϥⲧⲉⲛϩ ⲁⲗⲗⲁ ⲙ̀ⲡⲉϥϣϩⲁⲗⲁⲓ ϯϭⲗⲏⲇⲉ ⲁⲥϫⲱⲕϩ ⲙ̀ⲙⲟϥ ⲁϥⲙⲕⲁϩ ⲁϥϫⲟⲩϣⲧ ⲉⲧⲉϥⲙⲁⲩ ⲟⲩⲟϩ ⲁϥⲙⲟⲩ

ⲉⲧⲁϥⲕⲟⲧϥ ⲛ̀ϫⲉⲡⲓⲣⲱⲙⲓ ⲉ̀ⲃⲟⲗϧⲉⲛⲡⲟⲙⲁⲛϭⲓⲫⲁϧⲣⲓ ⲁϣⲱⲗⲉⲙ ⲉⲡⲓⲥⲑⲟⲓⲛⲟⲩϥⲓ ⲛ̀ⲧⲉⲛⲓϣⲱϣⲉⲛ ⲁϥⲛⲁⲩ ⲉⲛⲓⲕⲣⲓⲛⲟⲛ ⲛⲉⲙⲡⲓⲙⲁⲥⲃ̅ ⲉⲑⲙⲱⲟⲩⲧ ⲁⲗⲗⲁ ⲙ̀ⲡⲉϥⲛⲁⲩ ⲉϯϭⲗⲏ ϫⲉⲛⲁⲥϭⲓϧⲏⲓⲃⲓ ϧⲁⲧⲥⲕⲏⲡⲓ ⲛ̀ⲧⲉⲛⲓϩⲣⲏⲣⲓ ⲟⲩⲟϩ ⲉⲧⲁϥⲟⲩⲱⲛ ⲙ̀ⲫⲣⲟ ⲛ̀ⲧⲉϯⲅⲁⲗⲉⲁⲅⲣⲁ ⲁϥϫⲉⲩ ⲛ̀ⲧⲟⲧϥ ⲟⲩⲟϩ ⲛ̀ϯⲟⲩⲛⲟⲩ ⲁϯϭⲗⲏ ϫⲉⲕϩⲡⲓⲣⲱⲙⲓ ⲁϥϩⲓⲧⲥ ⲥⲁⲃⲟⲗ ⲛ̀ϯⲅⲁⲗⲉⲁⲅⲣⲁ ⲟⲩⲟϩ ⲁϥϩⲱⲙⲓ ⲉ̀ϫⲱⲥ ⲟⲩⲟϩ ⲁϥⲓⲱⲥ ⲉⲡⲓⲙⲁⲛϭⲓⲫⲁϧⲣⲓ ⲛ̀ⲕⲉⲥⲟⲡ ⲉϥⲱϣ ⲉ̀ⲃⲟⲗ

ⲁϯϭⲣⲟⲙⲡϣⲁⲗ ⲱⲗⲓ ⲙ̀ⲡⲉⲥⲙⲁⲥ ⲟⲩⲟϩ ⲁⲥⲑⲟⲙⲥϥ ⲟⲩⲧⲉⲛⲓϣⲟⲛϯ ⲟⲩⲟϩ ⲁⲥⲑⲱⲙⲥ ⲙ̀ⲡⲓⲭⲉⲧ ⲟⲩⲧⲉⲛⲓⲕⲣⲓⲛⲟⲛ ⲟⲩⲟϩ ⲧϧⲏⲓⲃⲓ ⲛ̀ⲛⲓⲧⲉⲛϩ ⲛ̀ⲧⲉⲡⲓⲁϧⲱⲙ ⲁⲩⲉⲣϧⲏⲓⲃⲓ ⲛ̀ⲛⲓⲕⲣⲓⲛⲟⲛ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ 

ⲁϥⲕⲟⲧϥ ⲛ̀ϫⲉⲡⲓⲣⲱⲙⲓ ⲉⲡⲏⲓ ⲟⲩⲟϩ ⲙ̀ⲡⲉϥϣⲱⲗⲉⲙ ⲉⲟⲩⲥⲑⲟⲓⲛⲟⲩϥⲓ ⲁϥϫⲟⲩϣⲧ ⲁϥⲛⲁⲩ ⲉϯⲅⲁⲗⲉⲁⲅⲣⲁ ⲉⲧϣⲟⲩⲓⲧ ⲡⲁⲗⲓⲛ ⲟⲛ ⲛⲓϣⲱϣⲉⲛ ⲁⲩⲗⲱⲙ ⲟⲩⲟϩ ⲧϣⲟⲗϩⲥ ⲛ̀ⲧⲉϯϭⲗⲏ ϩⲓⲡⲕⲁϩⲓ 

ϯϭⲣⲟⲙⲡϣⲁⲗⲇⲉ ⲛⲁⲥⲟϩⲓ ⲉ̀ϫⲉⲛⲟⲩⲕⲗⲁⲇⲟⲥ ⲟⲩⲟϩ ⲁⲡⲓⲣⲱⲙⲓ ⲥⲱⲧⲉⲙ ⲉⲧⲉⲥⲥⲙⲏ ⲁⲗⲗⲁ ⲙ̀ⲡⲉϥϣⲛⲁⲩ ⲉ̀ⲣⲟⲥ ⲟⲩⲟϩ ⲉⲧⲁϥϭⲓⲥⲙⲏ ⲁϥⲣⲓⲙⲓ ϧⲉⲛⲟⲩⲉⲛϣⲁϣⲓ ⲁϥⲥⲟⲃϯ ⲛ̀ⲟⲩϧⲣⲉ ⲉⲑⲃⲉ ⲛⲓϩⲁⲗⲁϯ ⲟⲩⲟϩ ⲁϥⲭⲁϥ ϩⲓⲡⲓϣⲟⲩϣⲧ ⲁⲩⲑⲱⲟⲩϯⲙⲉⲛ ⲛ̀ϫⲉⲟⲩⲙⲏϣ ⲛ̀ϩⲁⲗⲁϯ ⲟⲩⲟϩ ⲁⲩⲟⲩⲱⲙ ϯϭⲣⲟⲙⲡϣⲁⲗⲇⲉ ⲙ̀ⲡⲉⲥⲟⲩⲱⲙ ⲟⲩⲟϩ ⲁⲥⲙⲟⲩⲛ ⲉ̀ⲃⲟⲗ ⲉⲥⲙⲟⲩϯ ⲛ̀ϣⲟⲙⲧ ⲛ̀ⲥⲟⲡ

ⲛⲓⲣⲱⲙⲓⲇⲉ ⲉⲧϧⲉⲛⲡⲁⲓϯⲙⲓ ⲁⲩⲙⲟⲩϯ ⲉ̀ⲡⲉⲥϧⲣⲱⲟⲩ ϫⲉⲡⲓⲛⲉϩⲡⲓ ⲟⲩⲟϩ ⲁⲣⲟⲩϩⲓ ϣⲱⲡⲓ ⲟⲩⲟϩ ⲁⲧⲟⲟⲩⲓ ϣⲱⲡⲓ 

ⲁϥⲑⲱⲛ ⲡⲉⲕⲥⲟⲛ

ⲁ̅

ⲁϥⲑⲱⲛ ⲡⲉⲕⲥⲟⲛ

ϩⲁⲣⲁ ⲁϥⲙⲟⲩ ⲓⲉ ⲁⲩϧⲟⲑⲃⲉϥ

ⲁⲩϭⲓⲧϥ ⲛ̀ϫⲟⲛⲥ ⲓⲉ ⲁⲩⲧⲏⲓϥ ⲉ̀ⲧⲟⲧⲟⲩ

ϩⲁⲣⲁ ⲁϥϩⲓⲡϩⲟ ⲛ̀ⲧⲉⲕⲙⲉⲧⲥⲟⲛ ϫⲉⲕⲁⲕⲱⲥ ⲁⲕϣⲓⲛⲓ ⲙ̀ⲙⲟϥ

ⲁⲕⲃⲉⲣⲃⲱⲣϥ ⲉ̀ⲃⲟⲗ ⲙ̀ⲫⲣⲏϯ ⲛ̀ⲟⲩⲣⲉϥⲙⲱⲟⲩⲧ ⲉϥⲟ̀ⲣⲉⲃ:

ϩⲁⲣⲁ ⲁϭⲓϣϣⲱⲟⲩ ⲉϯⲙⲉⲧⲁⲙⲉⲗⲏⲥ ⲛⲉⲙⲡⲓⲉⲡⲓⲑⲩⲙⲓⲁ ⲉⲑⲃⲉ ⲫⲁⲓ ⲁϥⲭⲁⲡⲓⲁⲟⲩⲏⲧ ⲛ̀ⲥⲱϥ

ⲁϥⲑⲱⲛⲡⲉ ⲡⲓⲃⲏⲃ ⲉⲧⲁ ⲡⲉⲕⲥⲟⲛ ϯⲧⲁⲓⲟϥ

ϩⲁⲣⲁ ⲁϥⲥⲱⲣⲉⲙ ϩⲓⲡϣⲁϥⲉ

ⲛⲓⲑⲏⲣⲓⲟⲛ ⲛⲁϩⲟⲗⲙⲉϥ

ⲫⲣⲏ ⲛⲁⲭⲁϥ ⲛ̀ⲥⲱϥ

ⲓⲉ ϥⲛⲁⲉⲣⲡⲉⲛⲙⲉⲩⲓ ⲁϥϣⲁⲛϣⲉⲡϣⲉⲙⲙⲟ

ⲡⲉϫⲏⲓ ϫⲉⲙⲏ ⲁ̀ⲛⲟⲕ ⲡⲟⲩⲣⲓⲧ ⲙ̀ⲡⲁⲥⲟⲛ

ⲁϧⲟⲓ ⲛⲉⲙⲁϥ ϩⲱϥ

ⲁϥϯϧⲓⲥⲓ ⲛⲏⲓ

ⲁϥϣⲉⲛⲁϥ ⲉ̀ϫⲉⲛⲛⲓⲥⲟⲃⲧ ⲛ̀ⲧⲉⲧⲉⲛⲃⲁⲕⲓ ⲙ̀ⲫⲣⲏϯ ⲛ̀ⲟⲩⲣⲱⲙⲓ ⲛ̀ⲣⲉϥⲟⲩⲃⲱⲧⲥ 

ⲓⲥ ⲛⲓⲥⲟⲃⲧ ⲛ̀ⲧⲉⲧⲉⲛⲃⲁⲕⲓ ⲁⲩϩⲉⲓ ϯⲛⲟⲩ

ⲡⲱⲥ ⲁⲩϩⲉⲓ ⲛ̀ϫⲉⲛⲓⲥⲟⲃⲧ

ⲛⲓⲙⲛⲉ ⲛⲓϫⲁϫⲓ ⲛ̀ⲧⲉⲧⲉⲛⲃⲁⲕⲓ

ⲁϥⲑⲱⲛ ⲡⲉⲛⲗⲁⲟⲥ

ⲁⲩⲑⲱⲛ ⲛⲓϧⲉⲗⲗⲟⲓ

ⲟⲩⲟⲓ ⲛⲁⲛ ϯⲛⲟⲩ

ⲛⲓⲙ ⲡⲉⲑⲛⲁϭⲓⲙⲱⲓⲧ ϧⲁϫⲱⲛ

ⲁⲩⲑⲱⲛ ⲛⲓⲁⲗⲱⲟⲩⲓ

ⲟⲩⲟⲓ ⲛⲁⲛ ϯⲛⲟⲩ

ⲛⲓⲙ ⲡⲉⲑⲛⲁⲑⲱⲙⲥ ⲙ̀ⲙⲟⲛ

ⲁⲩⲑⲱⲛ ⲛⲓⲭⲏⲣⲁ ⲛⲉⲙⲛⲓⲟⲣⲫⲁⲛⲟⲥ

ⲛⲓⲙ ⲡⲉⲑⲛⲁⲧⲱⲃϩ ⲉ̀ϫⲱⲛ

ⲉⲑⲃⲉ ⲟⲩ ⲥⲉⲥⲟⲗⲥⲉⲗ ⲙ̀ⲙⲱⲟⲩ

ⲁⲥⲑⲱⲛ ϯⲃⲓⲃⲗⲓⲟⲑⲏⲕⲏ

ⲙⲏ ⲡⲓⲭⲣⲱⲙ ⲛⲁⲧⲥⲁⲃⲟⲛ

ⲁⲛ ⲧⲉⲛⲛⲁⲱϣ ⲙ̀ⲡⲓϫⲥⲃⲥ

ⲙⲏ ⲡⲓⲕⲁϣ ⲟⲩϫⲱⲣⲓ ⲡⲉ ⲉⲧⲥⲏϥⲓ

ⲡⲱⲥ ⲁϥϩⲓⲥⲧⲟⲣⲓⲍⲓⲛ ⲛ̀ϫⲉϯⲥⲏϥⲓ

ⲁⲥⲥϧⲁⲓⲅⲁⲣ ϧⲉⲛⲡⲓⲥⲛⲟϥ ⲛ̀ⲧϣⲉⲃⲓⲱ ⲙ̀ⲡⲓⲙⲉⲗⲁⲛ

ⲛⲓⲙⲡⲉ ⲫⲣⲁⲛ ⲉⲧⲥϧⲏⲟⲩⲧ ϩⲓⲛⲉⲛϣⲱⲃϣ ⲛⲉⲙⲛⲉⲛϭⲓⲥⲓ

ⲛⲓⲥⲛⲁⲩϩ ⲙ̀ⲡⲁⲩⲥⲟⲗⲥⲉⲗ ⲛ̀ⲛⲉⲛϭⲁⲗⲁⲩϫ ⲁⲗⲗⲁ ⲉⲑⲃⲉ ⲟⲩ ⲁⲩⲥⲱⲛϩ ⲙ̀ⲙⲟⲛ

ⲓⲥ ⲡⲕⲁϩⲓ ⲕⲓⲙ ⲟⲩⲟϩ ⲫⲓⲟⲙ ϩⲓⲕⲱϯ ⲉ̀ⲣⲟⲛ ϣⲁⲩⲙⲟⲩϯ ⲉ̀ⲡⲉⲛⲕⲁϩⲓ ⲙ̀ⲃⲉⲣⲓ ϫⲉⲡϫⲟⲓ

ⲓⲥ ⲟⲩⲕⲁϩⲓ ⲙ̀ⲃⲉⲣⲓ

ⲁⲩϯⲣⲉⲛⲧ ⲛ̀ⲟⲩⲣⲁⲛ ⲙ̀ⲃⲉⲣⲓ

ⲙ̀ⲙⲟⲛ ⲡⲉⲑⲙⲟⲩϯ ⲉⲡⲁⲣⲁⲛ

ϩⲏⲡⲡⲉ ⲓⲥ ⲁⲓϫⲓⲙⲓ ⲙ̀ⲡⲁⲥⲟⲛ

ⲁⲗⲗⲁ ⲁϥⲑⲱⲛ ⲡⲉⲛⲗⲁⲥ

ⲃ̅

ⲉⲧⲁϥⲛⲁⲩ ⲉ̀ⲣⲟⲓ ⲁϥⲛⲉϥⲧ ⲣⲱϥ ⲛ̀ⲥⲱⲃⲓ ⲟⲩⲟϩ ⲁϥⲛⲉϥⲣⲱϥ ϧⲉⲛϩⲁⲛⲉⲣⲙⲱⲟⲩⲓ ⲟⲩⲟϩ ⲁϥⲙⲟϣⲓ ⲛ̀ⲥⲁ ⲛⲉϥϭⲓⲥⲉⲩ

ⲁⲥⲑⲱⲛ ⲧϧⲏⲓⲃⲓ ⲛ̀ⲧⲯⲩⲭⲏ ⲙ̀ⲡⲁⲥⲟⲛ ϯⲛⲟⲩ

ϯⲉⲙⲓ ⲁⲛ

ⲙⲏ ⲁ̀ⲛⲟⲕ ⲡⲟⲩⲣⲓⲧ ⲙ̀ⲡⲁⲥⲟⲛ

ⲁϧⲟⲓ ⲛⲉⲙⲁϥ ϩⲱϥ

ⲛⲁϭⲓⲥⲉⲩ ⲥⲉⲙⲟⲩϯ ⲉ̀ⲡⲁⲣⲁⲛ ⲙ̀ⲃⲉⲣⲓ

ⲉⲓⲉ̀ⲓ̀ ⲉ̀ϧⲟⲩⲛ ⲉⲡⲏⲓ ⲛ̀ⲛⲁⲛⲟⲩϯ ⲙ̀ⲃⲉⲣⲓ

ⲉⲓⲉ̀ⲟⲩⲱϣⲧ ⲛⲁϩⲣⲱⲟⲩ ϧⲉⲛⲛⲟⲩϩⲟϯ

ⲡⲉϫⲱⲟⲩ ⲛⲏⲓ ϫⲉⲛⲟⲩⲛⲟⲩϯ ⲁⲩⲑⲁⲙⲓⲟ ⲙ̀ⲡⲁⲛⲟⲩϯ

ⲟⲩⲟϩ ⲟⲛ ⲁⲩϧⲟⲑⲃⲉϥ

ⲙⲏ ⲛⲓⲛⲟⲩϯ ⲙⲟⲩ

ⲡⲉϫⲱⲟⲩ ⲛⲏⲓ ϫⲉⲡⲉⲕⲛⲟⲩϯ ⲡⲉⲕⲛⲟⲩϯ ⲉⲑⲃⲉ ⲟⲩ ⲁϥⲭⲁⲕⲟⲩⲛ ⲛ̀ⲥⲱϥ

ⲁ̀ⲛⲟⲕⲇⲉ ⲁⲓⲱϣ ⲉ̀ⲃⲟⲗ ⲉⲓϫⲱⲙ̀ⲙⲟⲥ ϫⲉⲉⲗⲱⲓ ⲉⲗⲱⲓ ⲗⲁⲙⲁ ⲥⲁⲃⲁⲭⲑⲁⲛⲓ ⲁⲩϭⲓ ⲙ̀ⲡⲁⲡ̅ⲛ̅ⲁ̅ ⲉ̀ϧⲣⲏⲓ ⲉⲛⲟⲩϫⲓϫ 

ϯⲛⲟⲩⲇⲉ ϯϣⲟⲡ ⲁϭⲛⲉⲡ̅ⲛ̅ⲁ̅ 

ⲁⲩⲓ̀ⲛⲓ ⲛⲏⲓ ⲛ̀ⲟⲩⲯⲩⲭⲏ ⲙ̀ⲃⲉⲣⲓ

ⲁⲩⲕⲱϣ ⲛ̀ⲛⲁⲕⲁϣ

ⲁⲩⲣⲱⲕϩ ⲛ̀ⲛⲁϫⲱⲙ

ⲟⲩⲟϩ ⲁⲩⲧⲥⲟⲓ ⲟⲩⲟϩ ⲁⲩⲧⲉⲙⲙⲟⲓ

ⲛⲉ ϣⲁⲓⲟⲩⲱⲙ ⲉ̀ⲃⲟⲗϧⲉⲛⲛⲓⲗⲉϥⲗⲓϥⲓ ⲛⲏ ⲉ̀ϣⲁⲩϩⲉⲓ ⲉ̀ⲃⲟⲗ ϩⲓϯⲧⲣⲁⲡⲉⲍⲁ ⲛ̀ⲧⲉⲛⲁϭⲓⲥⲉⲩ ⲟⲩⲟϩ ⲁⲓⲥⲓ 

ⲁⲩϯⲛⲏⲓ ⲛ̀ⲛⲟⲩϫⲱⲙ

ⲁⲩⲧⲥⲁⲃⲟⲓ ⲛ̀ⲧⲟⲩⲥⲟⲫⲓⲁ

ⲁⲓⲉⲣⲙⲉⲗⲉⲧⲁⲛ ϧⲉⲛⲛⲟⲩⲅⲣⲁⲫⲏ

ⲡⲉϫⲱⲟⲩ ϫⲉⲑⲁⲓⲧⲉ ⲧⲉⲛⲥⲟⲫⲓⲁ

ⲑⲁ ⲛⲓⲙⲧⲉ ϯⲥⲟⲫⲓⲁ

ⲛⲓⲙ ⲁϥⲑⲁⲙⲓⲟⲥ

ⲡⲉϫⲱⲟⲩ ϫⲉⲥⲉⲛⲁⲧⲏⲓⲧ ⲉ̀ⲃⲟⲗ ⲁⲓϣⲧⲉⲙⲥⲱⲧⲉⲙ ⲛ̀ⲥⲱⲟⲩ

ⲁⲓⲣⲓⲙⲓ ⲟⲩⲟϩ ⲁⲓⲛⲉϩⲡⲓ

ⲁⲓⲥⲱⲧⲉⲙ ⲟⲩⲟϩ ⲁⲓⲛⲁⲩ ⲟⲩⲟϩ ⲁⲓⲣⲉⲕ ⲡⲁⲙⲁϣϫ: ⲁⲓⲉⲣⲡⲱⲃϣ ⲙ̀ⲡⲁⲗⲁⲟⲥ ⲛⲉⲙⲡⲏⲓ ⲛ̀ⲧⲉⲡⲁⲓⲱⲧ

ϫⲉⲛⲁⲓϭⲓⲥⲉⲩ ⲉⲣⲟⲩⲣⲟ ⲉϩⲣⲏⲓ ⲉϫⲱⲓ ϫⲉⲟⲩⲏⲓ ⲛ̀ⲑⲱⲟⲩⲡⲉ ⲛⲁϭⲓⲥⲉⲩ

ⲁⲩⲑⲱⲙ ⲛ̀ⲣⲱⲓ ⲛ̀ⲧⲁϣⲧⲉⲙϫⲱ

ⲅ̅

ⲛ̀ϩⲣⲏⲓ ϧⲉⲛⲡⲓⲉϫⲱⲣϩ ⲁⲓ̀ ⲉ̀ⲃⲟⲗϧⲉⲛⲡⲏⲓ ⲛ̀ⲛⲁϭⲓⲥⲉⲩ 

ⲁⲓⲉⲣⲡⲓⲉϫⲱⲣϩ ⲧⲏⲣϥ ⲉⲓⲙⲟϣⲓ

ⲁⲓⲙⲟϣⲓ ⲛ̀ⲥⲁ ⲛⲓⲥⲓⲟⲩ ⲛⲉⲙⲡⲓⲓⲟϩ

ⲛ̀ⲑⲟⲕ ⲛⲓⲙ

ⲁⲛⲟⲕ ⲡⲉϣⲉⲛϯ ⲉⲓⲥϧⲁⲓ ⲛⲁⲕ ⲱ ⲫⲏⲉ̀ⲧⲱϣ ⲛ̀ⲧⲁⲓⲉⲡⲓⲥⲧⲟⲗⲏ ⲑⲁⲓ ϫⲉⲭⲁⲓⲣⲉⲓⲛ ⲕⲁⲗⲱⲥ ⲁⲕⲓ̀ ϯⲥⲱⲟⲩⲛ ⲙ̀ⲙⲟⲕ ⲁⲛ ⲁⲗⲗⲁ ϯⲙⲟⲕⲙⲉⲕ ϫⲉⲛ̀ⲑⲟⲕ ⲛⲓⲙ ⲟⲩⲟϩ ⲡⲱⲥ ⲁⲕϭⲓⲥⲃⲱ ⲉ̀ϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϩⲁⲣⲁ ⲟⲩⲛ ⲁⲕϥⲓⲣⲱⲟⲩϣ ϧⲁⲧⲁⲓⲁⲥⲡⲓ ⲛⲏⲉ̀ⲧϭⲓϧⲏⲓⲃⲓ ϧⲁⲧⲥⲕⲉⲡⲏ ⲛ̀ⲧⲉⲛⲉⲥⲧⲉⲛϩ.

ϩⲁⲣⲁ ⲟⲩⲛ ⲁⲕⲕⲱϯ ⲛ̀ⲥⲁⲛⲓⲉⲡⲓⲥⲧⲟⲗⲏ ⲛ̀ⲁⲡⲁⲥ ⲛⲏⲇⲉ ⲉ̀ⲧⲁⲩⲥϧⲏⲧⲟⲩ ⲛⲁⲛ ⲛ̀ϫⲉⲛⲉⲛⲓⲟϯ ⲓⲉ ⲁⲕϯϩⲑⲏⲕ ⲉ̀ⲛⲓϩⲏⲕⲓ ⲛⲁⲓⲇⲉ ⲉ̀ⲧⲁ ⲫⲣⲏ ⲭⲁⲩ ⲛ̀ⲥⲱϥ ϫⲉϯϭⲣⲟⲙⲡⲓ ⲉⲑⲛⲉⲥⲱⲥ ⲉ̀ⲧⲟⲩⲙⲟⲩϯ ⲉ̀ⲣⲟⲥ ϫⲉⲧⲉⲛⲁⲥⲡⲓ ⲙ̀ⲡⲉⲥⲛⲟϩⲉⲙⲅⲁⲣ ⲉ̀ⲃⲟⲗϧⲉⲛⲡⲓⲫⲁϣ ⲛ̀ⲧⲉⲡⲓⲣⲉϥϫⲱⲣϫ  ⲁⲩϧⲟⲙϧⲉⲙⲇⲉ ⲛ̀ϫⲉⲛⲏⲉ̀ⲧⲥⲁϫⲓ ⲙ̀ⲙⲟⲥ ⲟⲩⲟϩ ⲛⲁ ⲫⲗⲁⲥ ⲉⲣⲉ ⲛⲟⲩⲗⲁⲥ ϣⲁⲧ ϩⲓⲧⲉⲛϯⲙⲉⲧⲁⲧⲉⲙⲓ

ϩⲁⲣⲁ ⲟⲩⲛ ⲁⲕⲉⲗⲕϣⲁⲓ ⲉⲕϫⲱ ⲙ̀ⲙⲟⲥ ϫⲉⲛⲓⲕⲁⲥ ⲛ̀ⲧⲉϯϭⲣⲟⲙⲡⲓ ⲙ̀ⲡⲁⲥϯϧⲏⲓⲃⲓ ⲛ̀ϩⲗⲓ ⲁⲛ ⲓⲉ ⲁⲕⲥⲱⲃⲓ ⲙ̀ⲙⲟⲛ ⲉⲕϫⲱ ⲙ̀ⲙⲟⲥ ϫⲉⲭⲁ ⲛⲓⲣⲉϥⲙⲱⲟⲩⲧ ⲙⲁⲣⲟⲩⲕⲉⲥ ⲛⲟⲩⲣⲉϥⲙⲱⲟⲩⲧ ⲛ̀ⲑⲱⲧⲉⲛⲇⲉ ⲙⲟϣⲓ ⲛ̀ⲥⲁⲡⲓⲕⲟⲥⲙⲟⲥ 

ⲁ̀ⲛⲟⲛⲇⲉ ϩⲱⲛ ⲁⲥⲟⲣⲙⲉⲕ ⲉ̀ⲃⲟⲗ ⲉⲛϫⲱ ⲙ̀ⲙⲟⲥ ϫⲉϩⲏⲡⲡⲉ ⲓⲥ ⲡⲓⲁϧⲱⲙ ⲁϥⲛⲟϩⲙ ⲉ̀ⲃⲟⲗϧⲉⲛⲡⲓⲫⲁϣ ⲛ̀ⲧⲉⲡⲓⲣⲉϥϫⲱⲣϫ ⲟⲩⲟϩ ⲡⲓⲫⲁϣ ⲁϥϧⲟⲙϧⲉⲙ ⲟⲩⲟϩ ⲡⲓⲁϧⲱⲙ ⲁϥⲛⲟϩⲉⲙ ⲉϥⲭⲏⲡⲇⲉ ϧⲉⲛⲛⲓⲃⲏⲃ ⲛⲉⲙⲛⲓⲧⲱⲟⲩ ⲛⲉⲙⲡϯⲙⲓ ⲉ̀ⲧⲟⲩⲙⲟⲩϯ ⲉ̀ⲣⲟϥ ϫⲉⲡⲓⲥⲟⲗⲥⲉⲗ ⲓⲉ ϧⲉⲛϯⲛⲓϣϯ ⲙ̀ⲡⲟⲗⲓⲥ ⲁⲗⲉⲝⲁⲛⲇⲣⲉⲁⲥ ⲟⲩⲟϩ ⲁⲛⲉⲣⲫⲙⲉⲩⲓ ⲙ̀ⲫⲁⲓ ⲟⲩⲟϩ ⲁⲛϫⲉⲙⲛⲟⲙϯ ⲙ̀ⲫⲣⲏϯ ⲙ̀ⲫⲏⲉ̀ⲧⲟⲃⲓ ⲉⲧⲁϥϫⲉⲙⲛⲟⲙϯ ⲉ̀ⲁϥϣⲁⲛⲛⲁⲩ ⲉ̀ⲡⲓⲙⲱⲟⲩ ⲛ̀ⲛⲟⲩϫ ϧⲉⲛⲡϣⲁϥⲉ ⲉ̀ⲧⲉ ⲙ̀ⲡⲉⲛⲫⲟϩⲙⲉⲛ ⲉ̀ⲡⲓⲙⲱⲟⲩ ⲛ̀ⲛⲟⲩϫ ⲁⲛⲥⲟⲣⲙⲟⲩⲇⲉ ⲛ̀ⲛⲏⲉ̀ⲧⲕⲱϯ ⲛ̀ⲥⲁⲧⲁⲓⲁⲥⲡⲓ ⲑⲁⲓ ⲉ̀ⲧⲉⲙⲙⲁⲩ 

ϯⲛⲟⲩⲙⲉⲛ ⲁⲛϫⲉⲙⲉⲑⲛⲟⲩϫ ϩⲟⲡⲱⲥ ⲛ̀ⲧⲟⲩϯⲧⲁⲓⲟ ⲙ̀ⲙⲟⲛ ϯⲙⲉⲑⲙⲏⲓⲇⲉ ⲁⲥϯⲑⲉⲃⲓⲟ ⲛⲁⲛ ⲟⲩⲟϩ ⲁϭⲓϣϣⲱⲟⲩ ⲙ̀ⲡϣⲟⲩϣⲟⲩ ⲉ̀ϩⲟⲧⲉϯⲁⲗⲏⲑⲓⲁ ϫⲉⲉⲛⲉ ⲁⲛϭⲛⲉϫⲱⲛ ⲛ̀ⲑⲙⲏⲓ ⲛ̀ⲁⲥⲛⲁⲁⲓⲧⲉⲛ ⲛ̀ⲣⲉⲙϩⲉ  ⲡⲗⲏⲛ ⲙ̀ⲡⲉⲛⲥⲟⲩⲉⲛⲑⲙⲏⲓ ⲙⲏⲡⲱⲥ ⲛ̀ⲧⲉⲛⲭⲁϯⲙⲉⲧϭⲁⲥⲓϩⲏⲧ ⲛⲉⲙϯⲙⲉⲧⲁⲙⲉⲗⲏⲥ ⲛ̀ⲥⲱⲛ 

ⲁⲙⲟⲓ ⲛ̀ⲧⲉⲛⲧⲁⲓⲟ ⲛ̀ϯⲙⲉⲑⲙⲏⲓ ⲙⲁⲣⲉⲛⲧⲁⲥⲑⲟ ⲉ̀ⲛⲉⲛⲯⲩⲭⲏ ⲙⲁⲣⲉⲛⲕⲱϯ ⲛ̀ⲥⲁⲛⲉⲛϩⲏⲧ ⲙ̀ⲡⲉⲛⲑⲣⲉⲛⲙⲟϣⲓ ⲛ̀ⲥⲁⲡⲧⲁⲓⲟ ⲟⲩⲇⲉ ⲙ̀ⲡⲉⲛⲑⲣⲉⲛⲕⲱϯ ⲛ̀ⲥⲁⲡⲱⲟⲩ ⲛ̀ⲧⲉⲡⲓⲕⲟⲥⲙⲟⲥ 

ϯⲙⲉⲑⲙⲉⲑⲣⲉ ⲛ̀ⲧⲉⲁⲛⲇⲣⲉⲁⲥ

ϧⲉⲛⲧⲁ̀ⲣⲭⲏ ⲛⲉ ⲡⲓⲭⲁⲕⲓⲡⲉ ⲟⲩⲟϩ ⲡⲓⲭⲁⲕⲓ ⲛⲁϥⲭⲏ ϧⲁⲧⲉⲛⲡⲭⲁⲟⲥ ⲟⲩⲟϩⲛⲉ ⲟⲩⲭⲁⲟⲥⲡⲉ ⲡⲓⲭⲁⲕⲓ ⲫⲁⲓ ⲉ̀ⲛⲁϥⲭⲏ ⲓⲥϫⲉⲛϩⲏ ϧⲁⲧⲉⲛⲡⲭⲁⲟⲥ ϩⲱⲃ ⲛⲓⲃⲉⲛ ⲁⲧϭⲛⲟⲩϥ ⲟⲩⲟϩ ⲉ̀ⲃⲟⲗϩⲓⲧⲟⲧϥ ⲙ̀ⲡⲉϩⲗⲓ ϣⲱⲡⲓ ϧⲉⲛⲫⲏ ⲉⲧⲁϥϣⲱⲡⲓⲛⲉ ⲫⲙⲟⲩ ⲡⲉⲧⲉⲛ̀ϧⲏⲧϥ ⲟⲩⲟϩ ⲫⲙⲟⲩⲛⲉ ⲧϧⲁⲉ ⲛ̀ⲛⲓⲣⲱⲙⲓⲡⲉ ⲟⲩⲟϩ ⲫⲙⲟⲩ ⲁϥϭⲉⲛⲟ ⲙ̀ⲫⲟⲩⲱⲓⲛⲓⲓ ⲉ̀ⲃⲟⲗ ϧⲉⲛⲛⲓⲣⲱⲙⲓ ⲟⲩⲟϩ ⲙ̀ⲡⲉⲫⲟⲩⲱⲓⲛⲓ ⲧⲁϩⲟϥ

ⲁϥϣⲱⲡⲓ ⲛ̀ϫⲉⲟⲩⲣⲱⲙⲓ ⲉ̀ⲡⲉϥⲣⲁⲛⲡⲉ ⲁⲛⲇⲣⲉⲁⲥ ⲫⲁⲓ ⲁϥⲓ̀ ⲉⲩⲙⲉⲧⲙⲉⲑⲣⲉ ϩⲓⲛⲁ ⲛ̀ⲧⲉϥⲉⲣⲙⲉⲑⲣⲉ ϧⲁⲡⲓⲟⲩⲱⲓⲛⲓ ϩⲓⲛⲁ ⲛ̀ⲧⲉⲟⲩⲟⲛ ⲛⲓⲃⲉⲛ ⲉⲙⲓ ⲉ̀ⲃⲟⲗ ϩⲓⲧⲟⲧϥ ⲛⲉ ⲛ̀ⲑⲟϥ ⲁⲛⲡⲉ ⲡⲓⲟⲩⲱⲓⲛⲓ ⲁⲗⲗⲁ ϩⲓⲛⲁ ⲛ̀ⲧⲉϥⲉⲣⲙⲉⲑⲣⲉ ϧⲁⲡⲓⲟⲩⲱⲓⲛⲓ ⲛⲁϥϣⲟⲡ ⲛ̀ϫⲉⲡⲓⲟⲩⲱⲓⲛⲓ ⲛ̀ⲧⲁⲫⲙⲏⲓ ⲫⲏ ⲉⲧⲉⲣⲟⲩⲱⲓⲛⲓ ⲉ̀ⲛⲏⲉⲧϣⲟⲡ ⲙ̀ⲡⲓⲟⲩⲱⲓⲛⲓ ⲉ̀ⲣⲱⲟⲩ ⲉ̀ⲑⲛⲏⲟⲩ ⲉ̀ⲡⲓⲕⲟⲥⲙⲟⲥ ⲛⲁϥⲭⲏ ϧⲉⲛⲡⲓⲕⲟⲥⲙⲟⲥⲡⲉ ⲟⲩⲟϩ ⲡⲓⲕⲟⲥⲙⲟⲥ ⲁϥϣⲱⲡⲓ ⲟⲩⲟϩ ⲙ̀ⲡⲉ ⲡⲓⲕⲟⲥⲙⲟⲥ ⲥⲟⲩⲱⲛϥ ⲁϥⲓ̀ ϩⲁ ⲛⲏ ⲉ̀ⲧⲉⲛⲟⲩϥ ⲟⲩⲟϩ ⲛⲉⲧⲉⲛⲟⲩϥ ⲙ̀ⲡⲟⲩϣⲟⲡϥ ⲉ̀ⲣⲱⲟⲩ  ⲛⲏⲇⲉ ⲉ̀ⲧⲁⲩϣⲟⲡϥ ⲉ̀ⲣⲱⲟⲩ ⲁϥϯⲉⲣϣⲓϣⲓ ⲁⲩϣⲱⲡⲓ ⲛ̀ϩⲁⲛϣⲏⲣⲓ ⲛ̀ⲧⲉⲡⲓⲟⲩⲱⲓⲛⲓ ⲛⲏ ⲉ̀ⲧⲉⲙⲓ ⲉ̀ⲫⲟⲩⲱⲓⲛⲓ ⲛ̀ⲧⲉϯⲅⲱⲛⲥⲓⲥ ⲁⲛⲇⲣⲉⲁⲥⲇⲉ ⲁϥⲉⲣⲙⲉⲑⲣⲉ ⲉⲑⲃⲏⲧϥ ⲟⲩⲟϩ ⲁϥⲱϣ ⲉ̀ⲃⲟⲗ ⲉϥϫⲱⲙ̀ⲙⲟⲥ ϫⲉⲫⲁⲓ ⲫⲏ ⲉ̀ⲧⲁⲓϫⲟϥ ⲉⲑⲃⲏⲧϥ ϫⲉⲫⲏ ⲉ̀ⲑⲛⲏⲟⲩ ⲙⲉⲛⲉⲛⲥⲱⲓ ⲁⲟⲩⲱⲛϩ ⲉ̀ⲃⲟⲗ ϯⲛⲟⲩ  ϫⲉⲁ̀ⲛⲟⲛ ⲧⲏⲣⲉⲛ ⲁⲛϭⲓ ⲉ̀ⲃⲟⲗ ϧⲉⲛⲡⲉϥⲙⲟϩ ⲛⲉⲙ ⲟⲩⲉⲡⲓⲥⲧⲏⲙⲏ ⲛ̀ⲧϣⲉⲃⲓⲱ ⲛ̀ⲟⲩⲙⲉⲧⲁⲧⲉⲙⲓ ϫⲉⲡⲓⲭⲁⲕⲓ ⲁⲩⲧⲏⲓϥ ⲉ̀ⲃⲟⲗ ϩⲓⲧⲉⲛ ⲡⲓⲭⲁⲟⲥ ⲡⲓⲉⲙⲓⲇⲉ ⲛⲉⲙϯⲙⲉⲑⲙⲏⲓ ⲁⲩϣⲱⲡⲓ ⲉ̀ⲃⲟⲗ ϩⲓⲧⲉⲛⲡⲓⲣⲱⲙⲓ ⲉ̀ⲑⲛⲏⲟⲩ ⲉ̀ⲡⲓⲕⲟⲥⲙⲟⲥ ⲡⲓⲭⲁⲕⲓ ⲙ̀ⲡⲉ ϩⲗⲓ ⲛⲁⲩ ⲉ̀ⲣⲟϥ ⲉ̀ⲛⲉϩ ⲡⲓⲟⲩⲱⲓⲛⲓ ⲛ̀ⲧⲉϯⲅⲛⲱⲥⲓⲥ ⲫⲏ ⲉ̀ⲧϯ ⲟⲩⲃⲏϥ ⲛ̀ⲑⲟϥ ⲡⲉⲧⲁϥⲥⲁϫⲓ ⲟⲩⲟϩ ⲑⲁⲓⲧⲉ ϯⲙⲉⲧⲙⲉⲑⲣⲉ ⲛ̀ⲧⲉⲁⲛⲇⲣⲉⲁⲥ ϩⲟⲧⲉ ⲉⲧⲁⲩⲟⲩⲱⲣⲡ ϩⲁⲣⲟϥ ⲛ̀ϫⲉ ⲛⲓⲣⲱⲙⲓ ⲉ̀ⲃⲟⲗ ϧⲉⲛ ϯⲛⲓϣϯ ⲙ̀ⲃⲁⲕⲓ ⲛ̀ϩⲁⲛϧⲉⲗⲗⲟⲓ ⲛⲉⲙϩⲁⲛⲥⲁⲃⲉⲩ ϩⲓⲛⲁ ⲛ̀ⲧⲟⲩϣⲉⲛϥ ϫⲉⲛ̀ⲑⲟⲕ ⲛⲓⲙ ⲟⲩⲟϩ ⲁϥⲟⲩⲱⲛϩ ⲙ̀ⲡⲉϥϫⲱⲗ ⲉ̀ⲃⲟⲗ ⲟⲩⲟϩ ⲁϥⲟⲩⲱⲛϩ ϫⲉⲁ̀ⲛⲟⲕ ⲁⲛⲡⲉ ⲡⲓⲣⲱⲙⲓ ⲉ̀ⲑⲛⲏⲟⲩ ⲉ̀ⲡⲓⲕⲟⲥⲙⲟⲥ ⲟⲩⲟϩ ⲁⲩϣⲉⲛϥ ϫⲉⲛ̀ⲑⲟⲕⲡⲉ ⲍⲉⲩⲥ  ⲡⲉϫⲁϥ ϫⲉⲙ̀ⲙⲟⲛ ⲛ̀ⲑⲟⲕⲡⲉ ⲡⲓⲥⲟⲫⲟⲥ ⲁϥⲉⲣⲟⲩⲱ̀ ϫⲉⲙ̀ⲙⲟⲛ ⲡⲉϫⲱⲟⲩ ⲛⲁϥ ⲟⲩⲛ ϫⲉⲛ̀ⲑⲟⲕ ⲛⲓⲙ ϩⲓⲛⲁ ⲛ̀ⲧⲉⲛϫⲉⲙⲡϣⲓⲛⲓ ⲛ̀ⲛⲏ ⲉ̀ⲧⲁⲩⲧⲁⲟⲩⲟⲛ ⲟⲩ ⲡⲉⲧⲉⲕϫⲱ ⲙ̀ⲙⲟϥ ⲉⲑⲃⲏⲧⲕ ⲡⲉϫⲁϥ ϫⲉⲁ̀ⲛⲟⲕⲡⲉ ϯⲥⲙⲏ ⲉⲧⲱϣ ⲉ̀ⲃⲟⲗ ϩⲓⲡϣⲁϥⲉ ϫⲉⲥⲟⲩⲧⲉⲛⲡⲓⲙⲱⲓⲧ ⲛ̀ⲧⲉϯⲥⲟⲫⲓⲁ ⲙ̀ⲫⲣⲏϯ ⲉⲧⲁϥϫⲟⲥ ⲛ̀ϫⲉⲥⲟⲕⲣⲁⲧⲏⲥ ⲡⲓⲫⲓⲗⲟⲥⲟⲫⲟⲥ ⲉ̀ⲡⲉϥⲣⲁⲥϯⲇⲉ ⲁϥⲛⲁⲩ ⲉ̀ⲓⲏ̅ⲥ̅ ⲉⲡⲓⲣⲓ ϩⲁⲣⲟϥ ⲟⲩⲟϩ ⲡⲉϫⲁϥ ϫⲉⲓⲥ ⲡⲓⲣⲱⲙⲓ ⲛ̀ⲧⲉ ϯⲥⲟⲫⲓⲁ ⲫⲏ ⲉⲑⲛⲉⲣⲟⲩⲱⲓⲛⲓ ⲙ̀ⲡⲓⲕⲟⲥⲙⲟⲥ

ⲛⲓⲉⲛ ⲉ̀ⲧⲕⲱϯ ⲛ̀ⲥⲁⲡⲓⲙ̀ⲧⲟⲛ

ⲛⲉ ⲟⲩⲟⲛ ⲟⲩⲓⲁϩϣϣⲏⲛ ⲟⲩⲟϩ ⲛⲁⲣⲉ ⲛⲓⲉⲛ ϣⲟⲡ ⲙ̀ⲙⲁⲩ ⲁⲛⲓⲉⲛ ⲉⲧϣⲟⲡ ⲙ̀ⲙⲁⲩ ⲁⲩϣⲉⲡϧⲓⲥⲓ ϫⲉϣⲁⲩⲓ̀ ⲉⲡϣⲱⲓ ⲉϩⲣⲉⲛⲛⲓϣϣⲏⲛ ⲟⲩⲟϩϣⲁⲩⲓ̀ ⲉ̀ⲡⲉⲥⲏⲧ ⲕⲁⲧⲁ ⲉϩⲟⲟⲩ 

ⲁⲩⲑⲱⲟⲩϯⲇⲉ ⲛ̀ϫⲉⲛⲓⲉⲛ ⲟⲩⲟϩ ⲡⲉϫⲉⲟⲩⲁⲓ ⲙ̀ⲙⲱⲟⲩ ϫⲉⲁⲛⲟⲛ ϧⲁⲛⲓⲉⲛ ⲧⲉⲛⲉⲣⲡⲓⲉϩⲟⲟⲩ ⲧⲏⲣϥ ⲥⲁⲡϣⲱⲓ ⲛ̀ⲛⲓϣⲏⲛ ⲓⲉ ⲥⲁⲡⲉⲥⲏⲧ ⲙ̀ⲙⲱⲟⲩ ⲓⲥϫⲉⲛⲫⲛⲁⲩ ⲛ̀ⲧⲉϩⲁⲛⲁⲧⲟⲟⲩⲓ̀ ϣⲁⲛⲓ̇ⲉ̇ⲃⲟⲗ ⲉ̇ⲡⲉⲛϩⲱⲃ ⲛⲉⲙⲉ̇ϫⲉⲛⲧⲉⲛⲓⲟⲡⲏ ϣⲁⲫⲛⲁⲩ ⲛ̀ⲧⲉϩⲁⲛⲁⲣⲟⲩϩⲓ ⲙⲏ ⲧⲉⲛϣ̀ϥⲁⲓ ϧⲁⲡϫⲓⲛϣⲉ ⲉⲡϣⲱⲓ ⲉ̀ϫⲉⲛⲛⲁⲓϣϣⲏⲛ ⲛⲁⲓ ϧⲉⲛⲡⲁⲓⲥⲏⲟⲩ ⲫⲁⲓ ⲉ̀ⲧⲉⲙⲙⲁⲩ 

ⲛⲉⲛⲥⲩⲅⲅⲉⲛⲏⲥⲇⲉ ⲉ̀ⲧⲟⲩⲙⲟⲩϯ ⲉ̀ⲣⲱⲟⲩ ϫⲉⲛⲓⲣⲱⲙⲓ ϣⲁⲩⲕⲱⲧ ⲛ̀ϩⲁⲛⲏⲓ ⲟⲩⲟϩ ϣⲁⲩⲙ̀ⲧⲟⲛ ⲙ̀ⲙⲱⲟⲩ ⲛ̀ϧⲏⲧⲟⲩ ⲁ̀ⲛⲟⲛⲇⲉ ϩⲱⲛ ⲙⲁⲣⲉⲛⲕⲱⲱⲣⲉ ⲛ̀ⲛⲓϣⲏⲛ ϫⲉϩⲓⲛⲁ ⲛ̀ⲧⲉⲛⲕⲱⲧ ⲛⲁⲛ ⲛ̀ϩⲁⲛⲏⲓ ⲉ̀ⲧⲁⲩⲥⲱⲧⲉⲙⲇⲉ ⲉ̀ⲡⲉϥⲗⲟⲅⲟⲥ ⲛ̀ϫⲉⲛⲓⲕⲉⲉⲛ ⲁⲩⲕⲱⲗϩ ϧⲉⲛⲛⲟⲩⲙⲉⲥⲧⲉⲛϩⲏⲧ ⲁⲓⲑⲉⲗⲏⲗ ϧⲉⲛⲟⲩⲣⲁϣⲓ ⲛ̀ⲁⲧⲥⲁϫⲓ ⲙ̀ⲙⲟϥ ⲟⲩⲟϩ ⲁⲩⲓ̀ⲛⲓ ⲛ̀ⲛⲟⲩϫⲟⲣϯ ⲛⲉⲙⲛⲟⲩⲥⲏϥⲓ ⲛⲉⲙⲛⲟⲩⲃⲁϣⲟⲩⲣ ⲛ̀ⲧⲟⲩⲕⲉⲣⲉⲛⲓϣϣⲏⲛ ⲛⲉⲙⲛⲓⲃⲱ ⲛ̀ⲕⲉⲛⲧⲉ 

ⲉ̀ⲧⲁⲩϧⲱⲛⲧ ⲉⲡⲓⲓⲁϩϣϣⲏⲛ ⲁⲩⲓ̀ ⲉ̀ϩⲣⲉⲛⲡⲓϧⲉⲗⲗⲟ ⲛ̀ⲉⲛ ⲉϥϩⲉⲙⲥⲓ ⲉϥⲱϣ ⲛ̀ⲟⲩϫⲱⲙ ⲟⲩⲟϩ ⲡⲉϫⲉ ⲡⲓⲉⲛ ⲉ̀ⲧⲁϥⲥⲁϫⲓ ϫⲉⲭⲁⲙⲁ ⲛⲁⲛ ⲉⲕⲱⲱⲣⲉ ⲙ̀ⲡⲁⲓϣϣⲏⲛ ⲁϥⲉⲣⲟⲩⲱ ⲛⲱⲟⲩ ⲛ̀ϫⲉⲡⲓϧⲉⲗⲗⲟ ⲉϥϫⲱⲙ̀ⲙⲟⲥ ϫⲉⲁⲣⲉⲧⲉⲛϣⲁⲛϩⲓⲡϩⲟ ⲙ̀ⲡⲓϧⲓⲥⲓ ⲧⲉⲧⲉⲛⲛⲁ ϣⲱⲡ ⲉ̀ⲣⲱⲧⲉⲛ ⲙ̀ⲡⲓⲑⲉⲃⲓⲟ ⲟⲩⲟϩ ⲥⲉⲛⲁⲉⲛⲁⲓⲭⲙⲁⲗⲱⲧⲓⲍⲉ ⲙ̀ⲙⲱⲧⲉⲛ ⲛ̀ϯⲟⲩⲛⲟⲩ ϩⲁⲛⲟⲩⲟⲛⲇⲉ ⲉ̀ⲃⲟⲗ ϧⲉⲛⲛⲏ ⲉ̀ⲧⲟϩⲓ ⲉ̀ⲣⲁⲧⲟⲩ ⲙ̀ⲙⲁⲩ ⲉⲧⲁⲩⲥⲱⲧⲉⲙ ⲛⲁⲩϫⲱⲙ̀ⲙⲟⲥ ϫⲉϥⲉⲣϩⲟϯ ϧⲁⲧϩⲏ ⲛ̀ⲛⲓⲣⲱⲙⲓ ⲟⲩⲟϩ ⲡⲉϫⲱⲟⲩ ⲛⲁϥ ϫⲉⲛⲓⲣⲱⲙⲓ ⲙ̀ⲡⲁⲩϥⲓⲣⲱⲟⲩϣ ϧⲁⲣⲟⲛ ⲟⲩⲟϩ ⲛ̀ⲑⲟϥ ⲡⲉϫⲁϥ ⲛⲱⲟⲩ ϫⲉⲱ ⲛⲓⲁⲛⲟⲏⲧⲟⲥ ⲟⲩⲟϩ ⲉⲧⲟⲥⲕ ϧⲉⲛⲡⲟⲩϩⲏⲧ ⲉ̀ⲕⲁϯ ⲙ̀ⲡⲉⲣⲉⲣϩⲟϯⲅⲁⲣ ϧⲁⲧϩⲏ ⲛ̀ⲛⲓⲣⲱⲙⲓ  ϫⲉⲙ̀ⲙⲟⲛϣϫⲟⲙ ⲙ̀ⲙⲱⲟⲩ ⲉ̀ϧⲱⲧⲉⲃ ⲙ̀ⲙⲱⲧⲉⲛ ⲁⲣⲉⲧⲉⲛϣⲁⲛϯⲭⲱⲡ ⲟⲩⲧⲉ ⲛⲓⲕⲗⲁⲇⲟⲥ ⲁⲣⲓϩⲟϯⲇⲉ ⲛ̀ⲑⲟϥ ϧⲁⲧϩⲏ ⲛ̀ⲑⲏ ⲉ̀ⲧⲁⲥⲁⲓⲭⲙⲁⲗⲱⲧⲓⲍⲉ  ⲙ̀ⲡⲓⲣⲱⲙⲓ ⲙ̀ⲙⲓⲛ ⲙ̀ⲙⲟϥ ⲉ̀ⲧⲉ ⲑⲁⲓⲧⲉ ϯⲙⲉⲧⲁⲙⲉⲗⲏⲥ ⲟⲩⲙⲏϣⲅⲁⲣ ⲁⲥⲱϫϩ ⲙ̀ⲙⲱⲟⲩ ⲟⲩⲟϩ ⲁⲥⲣⲁϧⲧⲟⲩ ϩⲁⲛⲁⲧⲏⲡⲓⲇⲉ ⲛⲉ ⲛⲏ ⲉ̀ⲧⲁⲥϧⲟⲑⲃⲟⲩ

ⲛⲓⲣⲱⲙⲓⲅⲁⲣ ϯⲛⲟⲩ ⲥⲉⲟⲓ ⲛ̀ϩⲁⲛⲉⲭⲙⲁⲗⲱⲧⲟⲥ ⲛⲁⲓ ⲉ̀ⲧⲉ ⲧⲟⲩϧⲁⲉⲡⲉ ⲡⲧⲁⲕⲟ ⲛⲁⲓ ⲉ̀ⲧⲉ ⲡⲟⲩⲛⲟⲩϯⲡⲉ ⲧⲟⲩⲛⲉϫⲓ ⲟⲩⲟϩ ⲡⲟⲩⲱⲟⲩ ⲁϥϧⲉⲛⲟⲩϣⲓⲡⲓ ⲛⲁⲓ ⲉⲑⲙⲉⲩⲓ ⲉ̀ⲡⲓⲙ̀ⲧⲟⲛ ⲙⲟⲛⲟⲛ ϧⲟⲧϧⲉⲧ ϧⲉⲛⲛⲓϫⲱⲙ ⲛ̀ⲑⲱⲟⲩⲇⲉ ⲉ̀ⲧⲉⲣⲙⲉⲑⲣⲉ ⲉⲑⲃⲉϯⲡⲩⲗⲏ ⲉ̀ⲧϫⲏⲟⲩ ⲉ̀ⲧϭⲓ ⲉⲡⲧⲁⲓⲟ ⲛⲓⲣⲱⲙⲓⲇⲉ ⲁⲩⲧⲁⲕⲟⲅⲁⲣ ⲙ̀ⲡϩⲟ ⲙ̀ⲡⲕⲁϩⲓ ⲟⲩⲟϩ ⲁⲩϭⲱϧⲉⲙ ⲙ̀ⲡⲓⲁⲏⲣ ϩⲓⲧⲉⲛⲧⲟⲩⲙⲉⲧϭⲁⲥⲓϩⲏⲧ ⲛⲉⲙⲧⲟⲩⲙⲉⲧⲁⲙⲉⲗⲏⲥ ϣⲱⲡⲓ ⲟⲩⲛ ⲉⲣⲉⲧⲉⲛⲟⲓ ⲛ̀ⲥⲁⲃⲉ ⲙ̀ⲫⲣⲏϯ ⲛ̀ⲛⲓⲉⲛ ⲁⲕⲉⲣⲉⲟⲥⲇⲉ ⲙ̀ⲫⲣⲏϯ ⲛ̀ⲛⲓϣⲓⲧⲥ

ⲧⲟⲧⲉ ⲁⲛⲓⲉⲛ ⲭⲁ ⲛⲓⲃⲁϣⲟⲩⲣ ⲛ̀ⲥⲱⲟⲩ ⲁⲩⲟⲩⲱⲙ ⲛ̀ϩⲑⲏⲟⲩ ⲟⲩⲟϩ ⲁⲩⲉⲣⲙⲉⲧⲁⲛⲟⲓⲛ ⲁⲩϣⲉ ⲉⲡϣⲱⲓ ⲉϩⲣⲏⲓ ⲉ̀ϫⲉⲛⲛⲓϣϣⲏⲛ

ⲧⲉⲛⲁⲥⲡⲓ ⲛⲉⲙⲡⲉⲛⲕⲁϩⲓ

ϧⲉⲛⲟⲩⲁⲣⲭⲏ ⲛⲉⲡⲟⲗⲟⲅⲟⲥⲡⲉ ⲟⲩⲟϩ ⲡⲓⲗⲟⲅⲟⲥ ⲛⲁϥⲭⲏ ϧⲁⲧⲉⲛϯⲅⲛⲱⲥⲓⲥ ⲟⲩⲟϩ ⲛⲉ ⲟⲩⲛⲟⲩϯⲡⲉ ϯⲅⲛⲱⲥⲓⲥ ⲫⲁⲓ ⲉ̀ⲛⲁϥⲭⲏ ⲓⲥϫⲉⲛ ϩⲏ ϧⲁⲧⲉⲛϯⲅⲙⲱⲥⲓⲥ ϩⲱⲃ ⲛⲓⲃⲉⲛ ⲁⲩϣⲱⲡⲓ ⲉ̀ⲃⲟⲗ ϩⲓⲧⲟⲧⲥ ⲟⲩⲟϩ ⲁⲧϭⲛⲟⲩⲥ ⲙ̀ⲡⲉϩⲗⲓ ϣⲱⲡⲓ ϧⲉⲛⲫⲏⲉⲧⲁϥϣⲱⲡⲓ ⲛⲉ ⲡⲱⲛϧ ⲡⲉⲧⲉⲛ̀ϧⲏⲧⲥ ⲟⲩⲟϩ ⲡⲱⲛϧ ⲛⲉ ⲫⲟⲩⲱⲓⲛⲓ ⲛ̀ⲛⲓⲣⲱⲙⲓⲡⲉ ⲟⲩⲟϩ ⲡⲓⲟⲩⲱⲓⲛⲓ ⲁϥⲉⲣⲟⲩⲱⲓⲛⲓ ϧⲉⲛⲡⲓⲭⲁⲕⲓ ⲟⲩⲟϩ ⲙ̀ⲡⲉ ⲡⲓⲭⲁⲕⲓ ⲧⲁϩⲟϥ 

ⲁⲥϣⲱⲡⲓ ⲛ̀ϫⲉⲟⲩⲁⲥⲡⲓ ⲛ̀ⲗⲁⲥ ⲉ̀ⲁⲩⲟⲩⲟⲣⲡⲥ ⲉ̀ⲃⲟⲗ ϩⲓⲧⲉⲛ ϯⲅⲛⲱⲥⲓⲥ  ⲉ̀ⲡⲉⲥⲣⲁⲛⲡⲉ ϯⲙⲉⲧⲣⲉⲙⲛ̀ⲭⲏⲙⲓ ⲑⲁⲓ ⲁⲥⲓ̀ ⲉⲩⲙⲉⲧⲙⲉⲑⲣⲉ ϩⲓⲛⲁ ⲛ̀ⲧⲉⲥⲉⲣⲙⲉⲑⲣⲉ ϧⲁⲡⲓⲟⲩⲱⲓⲛⲓ ϩⲓⲛⲁ ⲛ̀ⲧⲉ ⲟⲩⲟⲛ ⲛⲓⲃⲉⲛ ⲛⲁϩϯ ⲉ̀ⲃⲟⲗ ϩⲓⲧⲟⲧⲥ ⲛⲉ ⲛ̀ⲑⲟⲥ ⲁⲛⲡⲉ ⲡⲓⲟⲩⲱⲓⲛⲓ ⲁⲗⲗⲁ ϩⲓⲛⲁ ⲛ̀ⲧⲉⲥⲉⲣⲙⲉⲑⲣⲉ ϧⲁⲡⲓⲟⲩⲱⲓⲛⲓ ⲛⲁϥϣⲟⲡ ⲛ̀ϫⲉ ⲡⲓⲟⲩⲱⲓⲛⲓ ⲛ̀ⲧⲁⲫⲙⲏⲓ ⲫⲏⲉ̀ⲧⲉⲣⲟⲩⲱⲓⲛⲓ ⲉ̀ⲣⲱⲙⲓ ⲛⲓⲃⲉⲛ ⲉⲑⲛⲏⲟⲩ ⲉ̀ⲡⲓⲕⲟⲥⲙⲟⲥ ⲛⲁϥⲭⲏ ϧⲉⲛⲡⲓⲕⲟⲥⲙⲟⲥⲡⲉ ⲟⲩⲟϩ ⲡⲓⲕⲟⲥⲙⲟⲥ ⲁϥϣⲱⲡⲓ ⲉ̀ⲃⲟⲗ ϩⲓⲧⲟⲧϥ ⲟⲩⲟϩ ⲙ̀ⲡⲉ ⲡⲓⲕⲟⲥⲙⲟⲥ ⲥⲟⲩⲱⲛϥ ⲁϥⲓ̀ ϩⲁ ⲛⲏⲉⲧⲉⲛⲟⲩϥ ⲟⲩⲟϩ ⲛⲉⲧⲉⲛⲟⲩϥ ⲙ̀ⲡⲟⲩϣⲟⲡϥ ⲉ̀ⲣⲱⲟⲩ  ⲛⲏ ⲇⲉ ⲉⲧⲁⲩϣⲟⲡϥ ⲉ̀ⲣⲱⲟⲩ ⲁϥϯⲉⲣϣⲓϣⲓ ⲛⲱⲟⲩ ⲉ̀ⲉⲣϣⲏⲣⲓ ⲛ̀ⲅⲙⲱⲥⲕⲥ ⲛⲏ ⲉⲑⲕⲁϯ ⲉⲧⲥⲟⲫⲓⲁ  ⲛⲏ ⲇⲉ ⲉ̀ⲃⲟⲗ ϧⲉⲛ ⲟⲩⲙⲉⲧⲁⲧⲉⲙⲓⲁⲛ ⲛⲉ ⲟⲩⲇⲉ ⲉ̀ⲃⲟⲗ ϧⲉⲛϯⲙⲉⲧⲁⲧϩⲏⲧ ⲁⲛ ⲛⲉ ⲟⲩⲇⲉ ⲉ̀ⲃⲟⲗ ϧⲉⲛ ⲫⲟⲩⲱϣ ⲛ̀ⲣⲱⲙⲓ ⲁⲛ ⲛⲉ ⲁⲗⲗⲁ ⲉⲧⲁⲩⲙⲁⲥⲟⲩ ⲉ̀ⲃⲟⲗ ϧⲉⲛϯⲅⲛⲱⲥⲓⲥ ⲟⲩⲟϩ ⲡⲓⲗⲟⲅⲟⲥ ⲁϥⲉⲣⲟⲩⲥⲁⲣⲝ ⲟⲩⲟϩ ⲁϥϣⲱⲡⲓ ⲛ̀ϧⲣⲏⲓ ⲛ̀ϧⲏⲧⲉⲛ ⲟⲩⲟϩ ⲁⲛⲛⲁⲩ ⲉ̀ⲡⲉϥⲱⲟⲩ ⲙ̀ⲫⲣⲏϯ ⲙ̀ⲡⲱⲟⲩ ⲛ̀ⲟⲩϣⲏⲣⲓ ⲙ̀ⲙⲁⲩⲁⲧϥ ⲛ̀ⲧⲟⲧϥ ⲛ̀ⲧⲉⲥⲙⲁⲩ ⲉϥⲙⲉϩ ⲛ̀ⲥⲟⲫⲓⲁ ⲛⲉⲙⲙⲉⲑⲙⲏⲓ ⲧⲉⲛⲁⲥⲡⲓ ⲁⲥⲉⲣⲙⲉⲑⲣⲉ ⲉⲑⲃⲏⲧϥ ⲟⲩⲟϩ ⲥⲱϣ ⲉ̀ⲃⲟⲗ ⲉⲥϫⲱ ⲙ̀ⲙⲟⲥ ϫⲉⲫⲁⲓ ⲫⲏⲉ̀ⲧⲁⲓϫⲟϥ ⲉⲑⲃⲏⲧϥ ϫⲉⲫⲏⲉ̀ⲑⲛⲏⲟⲩ ⲙⲉⲛⲉⲛⲥⲱⲓ ⲁϥⲉⲣϣⲟⲣⲡ ⲉ̀ⲣⲟⲓ ϫⲉⲛⲉⲟⲩϣⲟⲣⲡ ⲉ̀ⲣⲟⲓ ⲣⲱⲡⲉ  ϫⲉⲁⲛⲟⲛ ⲧⲏⲣⲉⲛ ⲁⲛϭⲓ ⲉ̀ⲃⲟⲗ ϧⲉⲛⲡⲉϥⲙⲟϩ ⲛⲉⲙⲟⲩⲥⲃⲱ ⲛ̀ⲧϣⲉⲃⲓⲱ ⲛ̀ⲟⲩⲙⲉⲧⲁⲧⲉⲙⲓ ϫⲉⲡⲓⲛⲟⲙⲟⲥ ⲁⲩⲧⲏⲓϥ ⲉ̀ⲃⲟⲗ ϩⲓⲧⲉⲛⲧⲫⲩⲥⲓⲥ ⲧⲥⲟⲫⲓⲁⲇⲉ ⲛⲉⲙϯⲙⲉⲑⲙⲏⲓ ⲁⲩϣⲱⲡⲓ ⲉ̀ⲃⲟⲗ ϩⲓⲧⲉⲛϯⲅⲛⲱⲥⲓⲥ 

ⲧⲉⲛⲁⲥⲡⲓ ⲁⲥⲣⲱⲧ ⲉⲃⲟⲗϧⲉⲛⲡⲉⲛⲕⲁϩⲓ ⲟⲩⲟϩ ϯⲅⲛⲱⲥⲓⲥ ⲁⲥⲫⲓⲣⲓ ⲉⲃⲟⲗϧⲉⲛⲡⲓϣϣⲏⲛ ⲛ̀ⲧⲉⲧⲉⲛⲁⲥⲡⲓ ⲧⲥⲟⲫⲓⲁⲡⲉ

ⲡⲟⲩⲧⲁϩ ⲛ̀ⲧⲉⲡⲁⲓϣϣⲏⲛ ⲟⲩⲟϩ ϧⲉⲛⲡⲓϭⲱⲙ ⲛ̀ⲧⲉⲡⲱⲛϧ ⲟⲩⲟⲛⲟⲩⲙⲏϣ ⲛ̀ϣϣⲏⲛ ϫⲉϯⲅⲛⲱⲥⲓⲥ ϫⲉⲙ̀ⲙⲟⲛⲁⲥⲡⲓ ⲛⲁⲧⲁϩⲉϯⲅⲛⲱⲥⲓⲥ ⲑⲁⲓ ⲉⲧⲉⲣⲟⲩⲱⲓⲛⲓ ⲉⲣⲱⲙⲓ ⲛⲓⲃⲉⲛ ⲉⲑⲛⲏⲟⲩ ⲉⲡⲓⲕⲟⲥⲙⲟⲥ 

ⲕⲉⲡⲁⲗⲓⲛ ⲟⲛ ⲟⲩⲟⲛϩⲁⲛⲕⲉⲙⲏϣ ⲛ̀ⲁⲥⲡⲓ ⲛ̀ⲗⲁⲥ ⲉ̀ⲧⲁ ϯⲅⲛⲱⲥⲓⲥ ⲟⲩⲟⲛϩⲥ ⲉ̀ⲃⲟⲗⲛ̀ϧⲏⲧⲟⲩ ϯⲙⲉⲧⲟⲩⲉⲓⲛⲓⲛ ⲛⲉⲙϯⲙⲉⲧϩⲉⲃⲣⲉⲟⲥ ⲛⲉⲙϯⲙⲉⲧⲁⲣⲁⲃⲟⲥ ⲛⲉⲙϯⲁⲥⲡⲓ ⲛ̀ⲧⲉⲙⲓⲉⲑⲁⲩϣ ⲛⲉⲙϯⲁⲥⲡⲓ ⲛ̀ⲧⲉⲁⲛⲟⲩⲃⲁ ⲛⲉⲙϩⲁⲛⲕⲉⲙⲏϣ ⲛ̀ⲁⲥⲡⲓ ⲛ̀ⲗⲁⲥ

ⲙⲁⲣⲉ ⲫⲟⲩⲱⲓⲛⲓ ⲛ̀ⲧⲉⲡⲓⲗⲟⲅⲟⲥ ⲫⲁⲓ ⲉⲧⲉⲣⲟⲩⲱⲓⲛⲓ ⲉⲃⲟⲗϩⲓⲧⲉⲛϯⲅⲛⲱⲥⲓⲥ ϣⲁⲓ ⲉϩⲣⲏⲓ ⲉϫⲱⲛ ϣⲁⲛⲧⲉϥⲫⲱⲧ ⲉⲃⲟⲗϩⲁ ⲡⲉϥϩⲟ ⲛ̀ϫⲉⲡⲭⲁⲕⲓ ⲛ̀ⲧⲉϯⲙⲉⲧⲁⲧⲉⲙⲓ

ⲉ̀ⲧⲁⲛⲭⲁⲧⲉⲛϫⲓⲛⲥⲁϫⲓ ⲛ̀ⲥⲱⲛ ⲁⲛⲉⲣⲡⲱⲃϣ ⲛ̀ⲧⲡⲟⲗⲏⲧⲉⲓⲁ ⲛⲉⲙⲧⲥⲟⲫⲓⲁ ⲛ̀ⲧⲉⲛⲉⲛⲓⲟϯ ϫⲉⲙ̀ⲙⲟⲛ ⲫⲏⲉⲧϧⲉⲛⲫⲙⲟⲩ ⲉϥⲙⲉⲩⲓ ⲉ̀ⲧⲉⲛϫⲓⲛⲥⲁϫⲓ. ⲛⲓⲙⲇⲉ ⲉⲑⲛⲁϣⲟⲩⲱⲛϩ ⲛⲁⲥ ⲉ̀ⲃⲟⲗ ⲛ̀ϧⲣⲏⲓ ϧⲉⲛⲁⲙⲉⲛϯ.

ⲛⲉⲛⲓⲟϯⲅⲁⲣ ⲁⲩⲭⲱ ⲛ̀ⲛⲟⲩⲥϧⲁⲓ ϧⲉⲛϩⲁⲛⲟⲩⲗⲱⲗ ⲟⲩⲟϩ ⲁⲩⲭⲱⲡ ⲛ̀ⲛⲁⲓⲕⲟⲩⲗⲱⲗ ⲛⲁⲓ ⲉⲧⲉⲙⲙⲁⲩ ϧⲉⲛϩⲁⲛⲃⲏⲃ ⲙⲏⲡⲱⲥ ⲛ̀ⲧⲟⲩⲣⲟⲕϩⲟⲩ ⲛ̀ϫⲉⲛⲓⲁⲛⲟⲙⲟⲥ ⲑⲁⲓⲅⲁⲣⲣⲉ ⲧⲉⲛⲕⲗⲏⲣⲟⲛⲟⲙⲓⲁ  ⲡⲗⲏⲛ ⲛⲓⲥϧⲁⲓ ⲥⲉⲉⲣⲙⲉⲑⲣⲉ ⲉϯⲙⲉⲧⲁⲧϩⲏⲧ ⲛ̀ⲧⲉⲡⲓⲗⲁⲟⲥ

ⲟⲩⲅⲁⲣ ⲉ̀ⲧⲉ ⲡⲓⲣⲱⲙⲓ ⲛⲁϫⲉⲙϩⲏⲟⲩ ⲙ̀ⲙⲟϥ ⲁϥϣⲁⲛϫⲉⲙϩⲏⲟⲩ ⲙ̀ⲡⲓⲕⲟⲥⲙⲟⲥ ⲧⲏⲣϥ ⲧⲉϥⲕⲗⲏⲣⲟⲛⲟⲙⲓⲁⲇⲉ ⲛ̀ⲧⲉϥϯⲟⲥⲓ ⲙ̀ⲙⲟⲥ ⲙ̀ⲙⲟⲛ ⲟⲩ ⲡⲉⲧⲉ ⲡⲓⲣⲱⲙⲓ ⲛⲁⲧⲏⲓϥ ⲛ̀ⲧϣⲉⲃⲓⲱ ⲛ̀ⲧⲉϥⲕⲗⲏⲣⲟⲛⲟⲙⲓⲁ ⲁⲙⲏⲛ ϯϫⲱⲙⲙⲟⲥ ⲛⲱⲧⲉⲛ ϫⲉⲫⲏⲉⲧⲉ ⲙ̀ⲡⲉϥϭⲓⲥⲃⲱ ⲉⲧϫⲓⲛⲥⲁϫⲓ ⲛⲉⲙⲧⲡⲟⲗⲏⲧⲓⲁ ⲛⲉⲙⲧⲥⲟⲫⲓⲁ ⲛ̀ⲧⲉⲛⲉϥⲓⲟϯ ϥⲟⲛⲓ ⲛ̀ϩⲁⲛⲛⲁⲫⲣⲓ ⲉⲧⲁⲩϩⲉⲓ ⲉ̀ϫⲉⲛⲡⲓⲙⲁ ⲙ̀ⲡⲉⲧⲣⲁ ⲡⲓⲙⲁ ⲉ̀ⲧⲉ ⲙ̀ⲙⲟⲛ ϣⲱⲕ ⲛ̀ⲕⲁϩⲓ ⲙ̀ⲙⲟϥ ⲟⲩⲟϩ ⲁⲩⲣⲱⲧ ⲥⲁⲧⲟⲧⲟⲩ ϫⲉⲙ̀ⲙⲟⲛⲧⲟⲩ ϣⲱⲕ ⲛ̀ⲕⲁϩⲓ ⲉⲧⲁⲫⲣⲏⲇⲉ ϣⲁⲓ ⲁⲩⲉⲣⲕⲁⲩⲙⲁ ⲟⲩⲟϩ ϫⲉⲙ̀ⲙⲟⲛⲧⲟⲩ ⲛⲟⲩⲛⲓ ⲙ̀ⲙⲁⲩ ⲁⲩϣⲱⲟⲩⲓ̀

ⲁϥⲉⲣⲡⲣⲟⲫⲏⲧⲉⲩⲓⲛ ⲛ̀ϫⲉⲡⲓⲙⲟⲛⲁⲭⲟⲥ ϫⲉϧⲉⲛⲧⲁⲓⲅⲉⲛⲉⲁ ⲑⲁⲓ ϥⲛⲏⲟⲩ ⲛ̀ϫⲉⲫⲏⲉⲑⲛⲁⲛⲁϩⲙⲉⲛ ⲉⲃⲟⲗϩⲁ ϯⲙⲉⲧⲁⲧϩⲏⲧ ⲁⲗⲗⲁ ϩⲁⲣⲁ ⲛ̀ⲑⲟϥ ⲟⲩⲡⲣⲟⲫⲏⲧⲏⲥ ⲛ̀ⲛⲟⲩϫⲡⲉ

ⲧⲉⲛⲉⲣⲭⲣⲓⲁⲅⲁⲣ ⲁⲛ ⲛ̀ⲟⲩⲡⲣⲟⲫⲏⲧⲓⲁ ⲙⲁⲗⲗⲟⲛⲇⲉ ⲉⲛⲉ̀ⲕⲱϯ ⲛ̀ⲥⲁⲛⲓⲥϧⲁⲓ ⲛ̀ⲧⲉⲛⲉⲛⲓⲟϯ ⲉⲛⲉ̀ⲱϣ ⲙ̀ⲙⲱⲟⲩ ⲟⲩϫⲱⲙⲅⲁⲣ ⲉϥϣⲑⲏⲟⲩⲧ ⲟⲛⲓ ⲛ̀ⲟⲩϫⲱⲙ ⲉⲧⲁⲩⲣⲟⲕϩϥ ⲉⲑⲃⲉⲟⲩ ⲧⲉⲧⲉⲛⲛⲉϩⲡⲓ ⲉⲣⲱⲟⲩ ⲛ̀ⲛⲓϫⲱⲙ ⲉⲧⲁⲩⲧⲁⲕⲟ ⲛⲓϫⲱⲙⲇⲉ ⲉⲧⲁⲩⲁⲣⲉϩ ⲉⲣⲱⲟⲩ ⲛⲁⲛ ⲙ̀ⲡⲁⲣⲉⲧⲉⲛⲟϣⲟⲩ

ⲛⲓϣⲏⲣⲓ ⲛ̀ⲧⲉⲡⲓⲭⲁⲕⲓ ⲙ̀ⲡⲉⲣⲣⲓⲙⲓ ⲉ̀ϫⲉⲛⲛⲓⲅⲣⲁⲫⲏ ⲉ̀ⲧⲁⲩⲧⲁⲕⲟ ⲟⲩⲇⲉ ⲙ̀ⲡⲉⲣⲣⲓⲙⲓ ⲉ̀ϫⲉⲛϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲡⲗⲏⲛ ⲣⲓⲙⲓ ⲉ̀ϫⲉⲛⲑⲏⲛⲟⲩ ⲛⲉⲙⲉ̀ϫⲉⲛⲧⲉⲧⲉⲛⲙⲉⲧⲁⲧⲉⲙⲓ ⲛⲉⲙⲧⲉⲧⲉⲛⲙⲉⲧⲁⲧϩⲏⲧ

ϯⲅⲛⲱⲥⲓⲥⲅⲁⲣ ⲥⲟⲛⲓ ⲛ̀ⲟⲩⲛⲉϩ ⲉ̀ⲧⲉⲣⲟⲩⲱⲓⲛⲓ ⲙ̀ⲡⲓⲗⲁⲙⲡⲁⲥ ⲟⲩⲟϩ ⲛⲓⲗⲁⲙⲡⲁⲥ ⲥⲉⲟⲛⲓ ⲙ̀ⲫⲣⲏϯ ⲛ̀ⲛⲓⲁⲥⲡⲓ ⲛ̀ⲗⲁⲥ ⲛⲓⲥⲟϫⲅⲁⲣ ⲉ̀ⲧⲁⲩϭⲓ ⲛ̀ⲛⲟⲩⲗⲁⲙⲡⲁⲥ ⲙ̀ⲡⲟⲩⲉⲗⲛⲉϩ ⲛⲉⲙⲱⲟⲩ ⲛⲓⲥⲁⲃⲉⲩⲇⲉ ⲁⲩⲉⲗⲛⲉϩ ⲛ̀ϧⲣⲏⲓ ϧⲉⲛⲛⲟⲩⲙⲟⲕⲓ ⲛⲉⲙⲛⲟⲩⲗⲁⲙⲡⲁⲥ ⲉ̀ⲧⲁⲩϣⲉ ⲉ̀ⲃⲟⲗ ⲛ̀ⲧⲟⲩⲓ̀ ⲉ̀ϩⲣⲉⲛⲛⲓⲙⲩⲥⲧⲏⲣⲓⲟⲛ ⲛ̀ⲧⲉⲡⲱⲛϧ

ⲁ̀ⲛⲟⲛⲇⲉ ϩⲱⲛ ⲙ̀ⲡⲉⲛⲑⲣⲉⲛⲣⲓⲙⲓ ⲉ̀ϫⲉⲛⲡⲓⲛⲉϩ ⲉⲧⲁⲩϫⲟϣϥ ϩⲓϫⲉⲛⲡⲕⲁϩⲓ ⲟⲩⲇⲉ ⲙ̀ⲡⲉⲛⲑⲣⲉⲛⲛⲉϩⲡⲓ ϫⲉⲁⲩⲕⲱϣ ⲛ̀ⲛⲉⲛⲗⲁⲙⲡⲁⲥ ⲡⲗⲏⲛ ⲙⲁⲣⲉⲛⲑⲱⲟⲩϯ ⲛ̀ⲛⲓⲗⲁⲙⲡⲁⲥ ⲛ̀ⲧⲉⲛⲉⲛⲓⲟϯ ⲉ̀ⲧⲉⲙ̀ⲡⲟⲩⲧⲁⲕⲟ ⲟⲩⲟϩ ⲙⲁⲣⲉⲛⲕⲱϯ ⲛ̀ⲥⲁⲡⲁⲉⲡⲓ ⲙ̀ⲡⲓⲛⲉϩ ϩⲓⲛⲁ ⲛ̀ⲧⲉⲛϭⲉⲣⲟ ⲛ̀ⲛⲉⲛⲗⲁⲙⲡⲁⲥ ⲟⲩⲟϩ ⲛ̀ⲧⲉⲛⲥⲟⲗⲥⲉⲗ ⲙ̀ⲙⲱⲟⲩ ⲧⲟⲧⲉ ⲡⲓⲟⲩⲱⲓⲛⲓ ⲙ̀ⲙⲏⲓ ⲛ̀ⲧⲉϯⲅⲛⲱⲥⲓⲥ ϥⲛⲁⲉⲣⲟⲩⲱⲓⲛⲓ ϧⲉⲛⲡⲓⲭⲁⲕⲓ ⲛ̀ⲧⲉϯⲙⲉⲧⲁⲧⲉⲙⲓ

ⲁⲙⲱⲓⲛⲓ ⲉ̀ϧⲟⲩⲛ ⲉ̀ⲃⲟⲗ ϩⲓⲧⲉⲛϯⲡⲩⲗⲏ ⲉ̀ⲧϫⲏⲟⲩ ⲛ̀ⲧⲉϯⲅⲛⲱⲥⲓⲥ ⲙ̀ⲙⲏⲓ ϫⲉⲥⲟⲩⲟϣⲥ ⲛ̀ϫⲉϯⲡⲩⲗⲏ ⲛ̀ⲧⲉⲡⲓⲣⲓⲙⲓ ⲟⲩⲟϩ ϥⲟⲩⲉⲥⲑⲱⲛ ⲛ̀ϫⲉⲡⲓⲙⲱⲓⲧ ⲛ̀ⲧⲉⲡⲓⲛⲉϩⲡⲓ ⲉ̀ⲧϭⲓ ⲉⲡⲧⲁⲕⲟ ⲟⲩⲟϩ ⲥⲉⲟϣ ⲛ̀ϫⲉⲛⲏⲉ̀ⲑⲛⲁϣⲉⲛⲱⲟⲩ ⲉ̀ϧⲟⲩⲛ ⲉ̀ⲃⲟⲗϩⲓⲧⲟⲧϥ ϫⲉⲥϫⲏⲟⲩ ⲛ̀ϫⲉϯⲡⲩⲗⲏ ⲟⲩⲟϩ ϥϩⲉϫϩⲱϫ ⲛ̀ϫⲉⲡⲓⲙⲱⲓⲧ ⲉⲧϭⲓ ⲉ̀ϯⲅⲛⲱⲥⲓⲥ ⲙ̀ⲙⲏⲓ ⲟⲩⲟϩ ϩⲁⲛⲕⲟⲩϫⲓ ⲡⲉⲑⲛⲁϫⲉⲙϥ ⲧⲉⲛⲁⲥⲡⲓⲅⲁⲣⲡⲉ ⲡⲉⲛⲙⲱⲓⲧ ⲁⲗⲏⲑⲱⲥⲅⲁⲣ ϧⲉⲛⲟⲩⲙⲉⲑⲙⲏⲓ ϯϫⲱⲙ̀ⲙⲟⲥ ⲛⲱⲧⲉⲛ ϫⲉⲟⲩⲟⲛ ϩⲁⲛⲕⲉⲙⲏϣ ⲙ̀ⲙⲓⲧⲱⲟⲩⲓ ϩⲱⲥ ϩⲁⲛϩⲉⲗϫⲉⲩⲛⲉ ⲛⲓⲥⲁϫⲓ ⲛ̀ⲧⲉⲧⲉⲛⲁⲥⲡⲓ ⲛ̀ⲧⲁϣⲃⲱⲃⲓ ⲉ̀ϩⲟⲧⲉ ⲡⲓⲁⲗⲟⲗⲓ ⲛⲉⲙⲡⲓⲕⲉⲛⲧⲉ ϧⲉⲛⲣⲱⲓ ⲉⲑⲃⲉ ⲫⲁⲓ ⲁⲓϭⲓⲥⲃⲱ ⲉ̀ⲣⲟⲥ

ⲧⲉⲛⲉⲣⲭⲣⲓⲁ ⲛ̀ⲛⲉϩ ϩⲓⲛⲁ ⲛ̀ⲧⲉⲛϭⲉⲣⲟ ⲛ̀ⲛⲉⲛⲗⲁⲙⲡⲁⲥ ⲁⲗⲗⲁ ⲡⲓⲭⲁⲕⲓ ϥⲉⲣⲭⲉⲣⲓⲁ ⲁⲛ ⲛ̀ⲛⲉϩ

ⲡⲓⲟⲩⲱⲓⲛⲓ ϥϣⲟⲡ ϧⲉⲛⲡⲓⲟⲩⲱⲓⲛⲓ ⲡⲓⲟⲩⲱⲓⲛⲓⲙⲉⲛ ϣⲁϥⲉⲣⲟⲩⲱⲓⲛⲓ ⲙⲟⲛⲟⲛ ϧⲉⲛⲡⲓⲭⲁⲕⲓ ϩⲁⲣⲁ ⲟⲩⲛ ⲡⲓⲟⲩⲱⲓⲛⲓ ϥⲉⲣⲭⲉⲣⲓⲁ ⲙ̀ⲡⲓⲭⲁⲕⲓ ϩⲟⲡⲱⲥ ⲛ̀ⲧⲉϥⲉⲣⲟⲩⲱⲓⲛⲓ ⲡⲭⲁⲕⲓⲇⲉ ⲙ̀ⲡⲁϥⲉⲣⲭⲣⲓⲁ ⲙ̀ⲡⲓⲟⲩⲱⲓⲛⲓ ⲟⲩⲇⲉ ⲙ̀ⲡⲁϥⲟⲩⲱϣ ⲉⲧⲁϩⲟϥ ⲙⲏⲡⲱⲥ ⲛ̀ⲧⲉϥⲧⲁⲕⲟ

ϩⲁⲣⲁ ⲟⲩⲛ ⲡⲓⲭⲁⲕⲓⲡⲉ ⲡⲉⲧϫⲏⲕ ⲉ̀ⲃⲟⲗ ⲁⲗⲗⲁ ⲙⲏ ⲡⲓⲭⲁⲕⲓⲡⲉ. ⲫⲏⲉⲧϣⲟⲡ ⲓⲉ ⲡⲓⲭⲁⲕⲓⲡⲉ ⲡⲓⲙⲁ ⲉ̀ⲧⲉ ⲙ̀ⲡⲉ ⲡⲓⲟⲩⲱⲓⲛⲓ ⲧⲁϩⲟϥ ⲉⲑⲃⲉ ⲫⲁⲓ ⲡⲓⲭⲁⲕⲓ ϥϣⲟⲡ ⲁⲛ ⲁⲗⲗⲁ ⲡⲓⲭⲁⲕⲓⲡⲉ ⲡⲓⲙⲁ ⲉ̀ⲧⲉ ⲙ̀ⲙⲟⲛ ⲟⲩⲱⲓⲛⲓ ϣⲟⲡ ⲛ̀ϧⲏⲧϥ

ⲡⲁⲓⲣⲏϯ ⲟⲛ ϯⲙⲉⲧⲁⲧϩⲏⲧⲡⲉ ⲡⲉⲛⲧⲁⲫⲟⲥ ⲁⲗⲗⲁ ϯⲅⲛⲱⲥⲓⲥⲧⲉ ⲧⲉⲛⲁⲛⲁⲥⲧⲁⲥⲓⲥ ⲙ̀ⲙⲏⲓ ⲡⲉϫⲱⲟⲩ ϫⲉⲧⲉⲕϫⲓⲛⲥⲁϫⲓ ⲟⲩⲱⲛϩ ⲙ̀ⲙⲟⲕ ⲁⲛⲟⲕⲇⲉ ϯϫⲱⲙ̀ⲙⲟⲥ ⲛⲱⲧⲉⲛ ϫⲉⲧⲁⲁⲥⲡⲓ ⲟⲩⲱⲛϩ ⲙ̀ⲙⲟⲓ ⲁⲛ ⲡⲗⲏⲛ ⲁⲛⲟⲕⲙⲉⲛ ⲡⲉⲑⲟⲩⲱⲛϩ ⲛ̀ⲧⲁⲁⲥⲡⲓ

ⲁⲥϫⲟⲥ ⲛⲁⲛ ⲛ̀ϫⲉϯⲥⲟⲫⲟⲥ ϫⲉⲛⲓⲁⲥⲡⲓ ⲙ̀ⲡⲁⲩⲙⲟⲩ ϫⲉⲙ̀ⲙⲟⲛ ⲱⲛϧ ϣⲟⲡ ⲛ̀ϧⲏⲧⲟⲩ ⲁⲗⲗⲁ ⲛⲏⲉ̀ⲧⲥⲁϫⲓ ⲙⲟⲩ ϫⲉⲟⲩⲟⲛ ⲟⲩⲱⲛϧ ϣⲟⲡ ⲛ̀ϧⲏⲧⲟⲩ

ⲡⲓⲟⲩⲱⲛϣ

ⲉⲡⲓⲇⲏ ⲟⲩⲙⲏϣ ⲁⲩϩⲓⲧⲟⲧⲟⲩ ⲉ̀ⲥϧⲉ ϩⲁⲛⲥⲁϫⲓ ⲉⲑⲃⲉ ⲛⲓϩⲃⲏⲟⲩⲓ ⲉⲧⲁⲩϫⲱⲕ ⲉ̀ⲃⲟⲗ ⲛ̀ϧⲣⲏⲓ ⲛ̀ϧⲏⲧⲉⲛ ⲁⲥⲣⲁⲛⲏⲓ ϩⲱ ⲉ̀ⲁⲓⲙⲟϣⲓ ⲛ̀ⲥⲁ ⲡⲁⲓϩⲱⲃ ⲫⲁⲓ ⲛⲓⲃⲉⲛ ⲉ̀ⲥϧⲁⲓ ⲛⲁⲕ ⲉ̀ⲫⲣⲏϯ ⲕⲣⲁⲧⲓⲥⲧⲉ ⲁⲣⲥⲉⲛⲓⲟⲥ 

ⲡⲉϫⲱⲟⲩ ϫⲉϩⲁⲛⲣⲱⲙⲓ ⲉⲩⲉⲉⲣⲁⲣⲭⲱⲛ ⲉ̀ⲛⲓⲧⲉⲃⲧ ⲛ̀ⲧⲉⲫⲓⲟⲙ ⲛⲉⲙⲛⲓϩⲁⲗⲁϯ ⲛ̀ⲧⲉⲧⲫⲉ ⲛⲉⲙⲛⲓⲧⲉⲃⲛⲱⲟⲩⲓ ⲛⲉⲙⲡⲕⲁϩⲓ ⲧⲏⲣϥ ⲛⲉⲙϭⲁⲧϥⲓⲛⲓⲃⲉⲛ ⲉⲧⲕⲓⲙ ϩⲓϫⲉⲛⲡⲕⲁϩⲓ ⲁⲗⲗⲁ ⲙ̀ⲡⲟⲩϫⲟⲥ ⲛⲁⲛ ϫⲉϯⲇⲓⲕⲁⲓⲟⲩⲥⲩⲛⲏ ⲛⲁϣⲱⲡⲓ ⲙ̀ⲡⲁⲓⲣⲏϯ ⲟⲩⲟϩ ⲉⲑⲃⲉⲫⲣⲱⲙⲓ ⲁⲩⲟⲩⲱⲛϩ ⲉ̀ⲃⲟⲗ ⲛ̀ⲧⲫⲩⲥⲓⲥ ⲛ̀ⲛⲓⲍⲱⲟⲛ. 

ⲡⲉϫⲉ ⲡⲓⲯⲁⲗⲧⲏⲥ ϫⲉⲟⲩⲛⲁⲓ ⲛⲉⲙⲟⲩⲙⲉⲑⲙⲏⲓ ⲁⲩⲓ̀ ⲉ̀ⲃⲟⲗ ⲉ̀ϩⲣⲉⲛ ⲛⲟⲩⲉⲣⲏⲟⲩ: ⲟⲩⲇⲓⲕⲉⲟⲥⲩⲛⲏ ⲛⲉⲙⲟⲩϩⲓⲣⲏⲛⲏ ⲁⲩϣⲉⲡⲧⲟⲧⲟⲩ ⲛ̀ⲛⲟⲩⲉⲣⲏⲟⲩ ⲁⲗⲗⲁ ⲛⲓⲙ ⲡⲉ ϯϫⲓⲛⲑⲙⲏϯ ⲛ̀ⲧⲉⲡⲓⲑⲱⲙ ⲟⲩⲧⲉ ⲡⲓⲛⲁⲓ ⲛⲉⲙϯⲙⲉⲑⲙⲏⲓ

ⲁⲥϣⲱⲡⲓ ϧⲉⲛⲛⲓⲉϩⲟⲟⲩ ⲡⲓⲁⲃⲟⲧ ⲉⲡⲏⲡ ⲁⲯ̅ⲙ̅ⲃ̅ ⲙ̀⳥ ⲛⲉ ⲟⲩⲟⲛ ⲟⲩⲥϩⲓⲙⲓ ⲉⲥⲙⲟϣⲓ ⲛⲉⲙⲡⲉⲥⲟⲩϩⲟⲣ. ϧⲉⲛϯⲁⲅⲟⲣⲁ ⲡⲓⲟⲩϩⲟⲣⲇⲉ ⲛⲁϥⲙⲟϣⲓ ⲛ̀ⲥⲱⲥ ⲉⲛⲉ ϯⲥϩⲓⲙⲓ ⲙⲟϣⲓ ⲛ̀ⲥⲁ ⲡⲓⲓⲉⲃⲧ ⲓⲉ ⲛ̀ⲥⲁ ⲡⲉⲙⲉⲛⲧ ⲡⲓⲟⲩϩⲟⲣ ϥⲙⲟϣⲓ ⲛ̀ⲥⲱⲥ ⲁⲣⲉϣⲁⲛϯⲥϩⲓⲙⲓ ϩⲟⲛϩⲉⲛ ⲙ̀ⲙⲟϥ ⲉϩⲉⲙⲥⲓ ⲉϥⲉϩⲉⲙⲥⲓ ⲓⲉ ⲛ̀ⲧⲉϥⲟϩⲓ ⲉⲣⲁⲧϥ ⲉϥⲉⲟϩⲓ ⲉ̀ⲣⲁⲧϥ ⲁⲥϯⲥⲁⲭⲟⲗ ⲉϩⲣⲉⲛⲡⲉⲥⲟⲩϩⲟⲣ ⲟⲩⲟϩ ⲉⲣⲉⲟⲩⲕⲟⲗⲗⲁⲣⲓⲟⲛ ϧⲉⲛⲡⲉϥⲙⲟⲩⲧ

ⲁⲓⲉⲣⲫⲙⲉⲩⲓ ⲙ̀ⲡⲓⲟⲩϩⲱⲣ ⲛ̀ⲧⲉⲧⲁⲙⲁⲩ ⲁⲛⲙⲉⲓ ⲙ̀ⲙⲟϥ ⲟⲩⲟϩ ϯⲛⲁϩϯ ϫⲉⲁϥⲙⲉⲓ ⲙ̀ⲙⲟⲛ ⲟⲛ ⲁⲛⲧⲁⲓⲟ ⲙ̀ⲙⲟϥ ⲁⲗⲗⲁ ⲁⲛⲉⲣⲟⲩⲣⲟ. ⲉϫⲱϥ ⲉⲡϧⲁⲉⲇⲉ ⲁϥⲙ̀ⲧⲟⲛ ⲙ̀ⲙⲟϥ ⲙⲁⲗⲗⲟⲛⲇⲉ ⲧⲉⲛⲙⲉⲓ ϣⲁϯⲛⲟⲩ

ϧⲉⲛϯⲁⲅⲟⲣⲁ ⲁⲓⲥⲟⲙⲥ ⲉⲡⲓⲟⲩϩⲟⲣ ⲛⲉⲙϯⲥϩⲓⲙⲓ ⲡⲓⲟⲩϩⲟⲣⲇⲉ ⲙ̀ⲡⲁϥⲭⲣⲉⲙⲣⲉⲙ ⲟⲩⲇⲉ ⲙ̀ⲡⲁϥⲫⲱⲧ ⲟⲩⲇⲉ ⲙ̀ⲡⲁϥϩⲱⲗⲉⲙ ⲛ̀ⲧⲉϥ⳪̅ ⲁⲗⲗⲁ ϣⲁⲣⲉ ⲡⲓⲟⲩϩⲟⲣ ⲟⲩⲱⲙ ⲉ̀ⲃⲟⲗϧⲉⲛⲛⲓⲗⲉϥⲗⲓϥⲓ ⲛⲏⲉ̀ϣⲁⲩϩⲉⲓ ⲉ̀ⲃⲟⲗ ϩⲓϯⲧⲣⲁⲡⲉⲍⲁ ⲛ̀ⲧⲉⲧⲉϥ⳪̅

ⲁⲓⲉⲣⲫⲙⲉⲩⲓ ⲛ̀ⲧⲁⲙⲁⲩ ⲉⲧⲁⲥⲙⲟⲩϯ ⲉⲣⲟⲓ ⲕⲁⲧⲁⲫⲣⲁⲛ ⲙ̀ⲡⲉⲥⲟⲩϩⲱⲣ ϩⲁⲣⲁ ⲁⲥⲧⲁⲓⲟ ⲙ̀ⲡⲉⲥⲟⲩϩⲱⲣ ⲓⲉ ⲁⲥⲧⲁⲓⲟⲓ

ⲁⲓⲭⲁ ⲛⲁⲓⲙⲉⲩⲓ ⲛ̀ⲥⲱⲓ ⲉⲧⲁⲓϯⲛⲓⲁⲧⲧ ⲉϯⲥϩⲓⲙⲓ ⲛⲉⲙⲡⲓⲟⲩϩⲟⲣ ⲉⲧϧⲉⲛ ϯⲁⲅⲟⲣⲁ ϩⲁⲣⲁ ⲁⲥϭⲓⲧϥ ⲉⲃⲟⲗϧⲉⲛⲕⲉⲛⲥ ⲛ̀ⲧⲉϥⲙⲁⲩ ⲓⲉ ⲁⲥⲁⲓϥ ⲛ̀ⲟⲩⲥⲓⲟⲩⲣ. ϩⲁⲣⲁ ⲟⲩⲟⲛϣϫⲟⲙ ⲙ̀ⲙⲟϥ ⲛ̀ⲧⲉϥϩⲱⲗⲉⲙ ⲁϥϣⲁⲛϩⲕⲟ ⲓⲉ ϣⲁϥⲟϩⲓ ⲛⲁϥ ϣⲁⲛⲧⲟⲩⲧⲉⲙⲙⲟϥ ϫⲉⲁⲥⲑⲉⲃⲓⲟϥ ⲥⲁⲡⲉⲥⲏⲧ ⲛ̀ⲛⲉⲥϭⲁⲗⲁⲩϫ ⲛⲓⲙⲅⲁⲣ ϧⲉⲛⲛⲓⲣⲱⲙⲓ ⲉⲧⲟⲛⲓ ⲛ̀ⲛⲓⲛⲟⲩϯ ⲛⲏ ⲉⲧϣⲓⲃϯ ⲧⲫⲩⲥⲓⲥ ⲛⲧⲉⲛⲓⲑⲏⲣⲓⲟⲛ

ⲉⲧⲁϥⲉⲛⲕⲟⲧ ⲛ̀ϫⲉⲡⲁⲙⲏⲧⲣⲟⲡⲁⲧⲱⲣ ϧⲉⲛⲫⲛⲁϩϯ ⲁϥⲙⲟⲕϩ ⲛ̀ϩⲏⲧ ⲛ̀ϫⲉⲡⲟⲩϩⲱⲣ ⲛ̀ⲧⲉⲧⲁⲙⲁⲩ ⲁⲗⲗⲁ ⲁⲧⲁⲙⲁⲩ ⲧⲉⲙⲙⲟϥ ⲟⲩⲟϩ ⲁⲥϣⲁⲛϣ ⲙ̀ⲙⲟϥ 

ⲓⲥϫⲉⲛ ϩⲁⲛϣⲟ ⲛ̀ⲣⲟⲙⲡⲓ ⲛⲉⲟⲩⲟⲛ ϩⲁⲛⲟⲩⲱⲛϣ ⲛ̀ⲣⲉϥϩⲱⲗⲉⲙ ⲉⲧⲁⲩⲓ̀ ⲉϩⲣⲉⲛ ϩⲁⲛⲫⲩⲗⲏ ⲛ̀ⲣⲱⲙⲓ ⲛⲓⲟⲩⲱⲛϣ ⲁⲩⲟⲩⲱⲙ ⲉ̀ⲃⲟⲗϧⲉⲛⲛⲓⲗⲉϥⲗⲓϥⲓ ⲛ̀ⲧⲉⲛⲓⲣⲱⲙⲓ ⲟⲩⲟϩ ⲕⲁⲧⲁ ⲕⲟⲩϫⲓ ⲕⲟⲩϫⲓ ⲛⲓⲟⲩⲱⲛϣ ⲁⲩⲭⲁ ⲧⲟⲩⲫⲩⲥⲓⲥ ⲛ̀ⲥⲱⲟⲩ ⲟⲩⲟϩ ⲁⲩϣⲱⲡⲓ ⲛ̀ϩⲁⲛⲟⲩϩⲟⲣ 

ⲉⲧⲁⲥⲙ̀ⲧⲟⲛ ⲙ̀ⲙⲟⲥ ⲛ̀ϫⲉⲑⲙⲁⲩ ⲛ̀ⲧⲁⲙⲁⲩ (ⲗ︦ⲏ︦) ⲧⲟⲧⲉ ⲁⲧⲯⲩⲭⲏ ⲛ̀ⲧⲉⲡⲟⲩϩⲱⲣ ⲛ̀ⲧⲁⲙⲁⲩ ⲙⲟⲕϩ ⲛ̀ϩⲏⲧ ϣⲁ ⲉ̀ϧⲣⲏⲓ ⲉ̀ⲫⲙⲟⲩ ⲙ̀ⲡⲉϥⲟⲩⲱⲙ ⲟⲩⲟϩ ⲁϥⲙⲟⲩ ⲧⲁⲙⲁⲩⲇⲉ ⲉⲧⲁⲥⲑⲱⲙ ⲛ̀ⲧⲉⲥⲙⲁⲩ ⲁⲥⲕⲟⲥϥ ⲟⲛ ⲡⲉϥⲣⲁⲛⲙⲉⲛ ⲁϥⲙⲟⲩⲛ ⲉ̀ⲃⲟⲗ ϫⲉⲁⲩϯⲣⲉⲛⲧⲅⲁⲣ ⲕⲁⲧⲁⲡⲉϥⲣⲁⲛ

ⲛⲓⲣⲱⲙⲓⲇⲉ ϣⲁⲩⲧⲉⲙⲙⲟ ⲛ̀ⲛⲟⲩⲟⲩϩⲱⲣ ⲟⲩⲟϩ ϣⲁⲩⲧⲟⲩⲃⲟ ⲙ̀ⲙⲱⲟⲩ. ⲕⲉ ⲡⲁⲗⲓⲛ ⲟⲛ ϣⲁⲣⲉ ⲛⲓⲣⲱⲙⲓ ⲕⲱⲧ ⲛ̀ϩⲁⲛⲙⲛϣⲱⲡⲓ ⲉⲑⲃⲉ ⲛⲟⲩⲟⲩϩⲟⲣ ⲉⲧⲁⲩϣⲁⲛϣ ⲙ̀ⲙⲱⲟⲩ ⲓⲥϫⲉⲛ ⲧⲟⲩⲕⲉⲧⲕⲟⲩϫⲓ 

ⲉⲓⲥ ⲛⲓⲣⲱⲙⲓ ⲁⲩⲕⲱⲧ ⲛ̀ϩⲁⲛϣⲧⲉⲕⲱⲟⲩ ⲛ̀ⲛⲟⲩⲃ ⲉⲑⲃⲉ ⲛⲓⲑⲏⲣⲓⲟⲛ ⲥⲉⲟⲛⲓ ⲛ̀ϩⲁⲛⲕⲁⲥⲧⲣⲟⲛ ⲁⲗⲗⲁ ⲛⲓⲥⲱⲛϩ ⲛ̀ⲧⲉⲛⲓⲣⲱⲙⲓ ⲁⲩⲧⲁϫⲇⲟ ⲉϩⲣⲏⲓ ⲉ̀ϫⲉⲛⲧⲫⲩⲥⲓⲥ ⲛ̀ⲧⲉⲛⲓⲟⲩⲱⲛϣ ⲉⲧⲟⲩⲙⲟⲩϯ ⲉⲣⲱⲟⲩ ϫⲉⲛⲓⲟⲩϩⲱⲣ ⲛ̀ⲁⲧⲗⲱⲓⲗⲓ ⲕⲉⲡⲁⲗⲓⲛ ⲟⲛ ⲛⲓⲟⲩϩⲱⲣ ⲛ̀ⲥⲓⲟⲩⲣ 

ⲛⲓⲙ ⲡⲉ ⲡⲓⲑⲏⲣⲓⲟⲛ ⲙ̀ⲙⲏⲓ ⲉⲧⲟⲩⲉⲙⲧⲥⲁⲣⲝ ⲛ̀ⲧⲉⲙⲓⲕⲉⲍⲱⲟⲛ ⲟⲩⲟϩ ⲛⲓⲙ ⲡⲉⲧϣⲉⲙϣⲓ ⲙ̀ⲡⲓⲭⲉⲧ

ⲟⲩⲟⲓ ⲛⲁϥ ⲙ̀ⲫⲏⲉⲧⲭⲱ ⲛ̀ⲥⲱϥ ⲙ̀ⲫⲛⲟⲙⲟⲥ ⲛ̀ⲧⲉⲍⲉⲩⲥ ϧⲉⲛⲧⲉϥⲅⲛⲱⲙⲏ: ⲟⲩⲟϩ ⲛⲁϥ ⲙ̀ⲫⲏⲉⲧⲉⲣⲁ̀ⲙⲉⲗⲏⲥ ⲉ̀ⲛⲉϥⲉⲛⲧⲟⲗⲏ. 

ⲱⲟⲩⲛⲓⲁⲧⲟⲩ ⲛ̀ⲛⲓⲛⲁⲏⲧ ϫⲉⲛⲓⲣⲱⲙⲓ ⲛⲉⲙⲛⲓⲑⲏⲣⲓⲟⲛ ⲡⲉⲧⲟⲩⲛⲁⲛⲁⲓ ⲛⲱⲟⲩ

ⲫⲏⲉⲧⲉ ⲟⲩⲟⲛ ϣⲁⲓ ⲙ̀ⲙⲟϥ ⲉϣⲱⲗⲉⲙ ⲙⲁⲣⲉϥϣⲱⲗⲉⲙ

ⲟⲩⲟⲛ ⲛ̀ⲧⲉⲡⲓⲟⲩϩⲟⲣ ⲛ̀ⲟⲩⲣⲁⲛ ⲙ̀ⲙⲁⲩ ⲙ̀ⲫⲣⲱⲙⲓ ⲟⲩⲟϩ ⲛ̀ⲑⲟϥ ⲟⲩⲟⲩϩⲟⲣⲡⲉ

ⲟⲩⲟⲛ ⲛ̀ⲧⲉⲫⲣⲱⲙⲓ ⲛ̀ⲛⲟⲩⲣⲁⲛ ⲙ̀ⲙⲁⲩ ⲙ̀ⲡⲟⲩϩⲟⲣ ⲁⲗⲗⲁ ⲛ̀ⲑⲟϥ ⲟⲩⲣⲱⲙⲓ ⲡⲉ 

ⲁⲫⲣⲏ ⲭⲁⲧ ⲛ̀ⲥⲱϥ

ⲡⲉϫⲱⲟⲩ ⲛⲏⲓ ϫⲉⲉⲓⲉⲥϧⲁⲓ ⲕⲁⲧⲁ ⲉϩⲟⲟⲩ ϫⲉϩⲓⲛⲁ ⲛ̀ⲧⲁⲧⲁⲓⲟ ⲙ̀ⲡⲁⲓⲙⲁ ⲫⲁⲓ ⲕⲉ ⲡⲁⲗⲓⲛ ⲟⲛ ⲁϥⲥϧⲁⲓ ⲛⲁⲛ ⲛ̀ϫⲉⲡⲁⲩⲗⲟⲥ ⲡⲓⲁⲡⲟⲥⲧⲟⲗⲟⲥ ϫⲉⲉⲣⲉⲧⲉⲛϣⲱⲡ ⲙ̀ⲡⲓⲥⲏⲟⲩ ϫⲉⲛⲓⲉϩⲟⲟⲩ ⲥⲉϩⲱⲟⲩ ⲉⲑⲃⲉ ⲫⲁⲓ ⲉⲓⲉⲥϧⲁⲓ ⲉⲓⲉⲣⲙⲉⲑⲣⲉ ⲛⲱⲧⲉⲛ ⲙ̀ⲫⲏⲉⲧϣⲟⲡ ⲛ̀ϩⲣⲏⲓ ϧⲉⲛⲡⲁⲓⲥⲏⲟⲩ ⲫⲁⲓ

ⲁⲓⲉⲣϩⲱⲧ ⲉⲡⲓⲧⲟⲩⲥⲥⲁⲓ (Πιτυοῦσσαι) ⲉⲧⲁⲓⲓ̀ ⲉ̀ⲃⲟⲗ ⲉⲑⲛⲏⲥⲟⲥ ⲁⲓⲛⲁⲩ ⲉⲛⲓⲧⲱⲟⲩ ⲉⲧⲉⲙⲙⲁⲩ ⲛⲉⲙⲛⲓⲃⲉⲛⲓ ⲛⲁⲓϣⲟⲡⲅⲁⲣ ϧⲉⲛⲑⲛⲏⲥⲟⲥ ⲉⲓⲛⲏⲃⲓ ϧⲉⲛⲫⲓⲟⲙ ⲛ̀ⲁⲧϩⲱⲓⲙⲓ ⲙ̀ⲡⲁϯⲛⲏⲃⲓ ϧⲉⲛⲑⲁⲗⲁⲥⲥⲁ ⲁⲩⲑⲱϩⲥⲙⲉⲛ ⲛ̀ⲧⲁⲁⲫⲉ ⲛ̀ⲟⲩⲛⲉϩ ⲙⲏⲡⲱⲥ ⲛ̀ⲧⲉϥⲣⲟⲕϩⲧ ⲛ̀ϫⲉⲡⲓϧⲙⲟⲧ ⲛ̀ⲧⲣⲫⲣⲏ ϫⲉⲁⲓⲉⲣ ⲡⲓⲉϩⲟⲟⲩ ⲧⲏⲣϥ ⲉⲓⲛⲏⲃⲓ ϧⲉⲛⲫⲓⲟⲙ ⲙ̀ⲫⲣⲏϯ ⲛ̀ⲟⲩⲧⲉⲃⲧ ⲡⲗⲏⲛ ⲫⲣⲏ ⲡⲉⲛⲧⲁϥⲭⲁⲧ ⲛ̀ⲥⲱϥ ⲁϥϧⲓϯ ⲙ̀ⲡⲁϣⲁⲣ  ⲉⲑⲃⲉ ⲫⲁⲓ ⲡⲁϣⲁⲣ ⲁϥⲑⲣⲟⲩϣⲣⲉϣ ⲙ̀ⲫⲣⲏϯ ⲛ̀ⲟⲩⲑⲣⲓⲣ ⲉⲡϧⲁⲉⲇⲉ ⲁⲩⲣⲁϧⲧϥ ⲁⲛⲓⲑⲏⲣⲁⲡⲓⲥⲧⲏⲥ ⲑⲱϩⲥ ⲙ̀ⲙⲟⲓ ⲛ̀ⲕⲉⲥⲟⲡ ϧⲉⲛⲟⲩⲛⲉϩ ⲁⲩϩⲟⲛϩⲉⲛ ⲛⲏⲓ ⲉϣⲱⲡⲓ ϧⲉⲛⲡⲏⲓ

ϯⲛⲟⲩⲇⲉ ϣⲁⲓⲫⲱⲧ ⲙ̀ⲡⲉⲙⲑⲟ ⲙ̀ⲫⲣⲏ ⲛⲉⲙⲡⲓϧⲙⲟⲙ ϣⲁⲛⲧⲉϥⲧⲟⲩϫⲟ ⲛ̀ϫⲉⲡⲁϣⲁⲣ ⲟⲩⲟϩ ϩⲟⲡⲱⲥ ⲛ̀ⲧⲉⲡⲉϥⲁⲟⲩⲁⲛ ⲛ̀ⲧⲉϣⲟⲣⲡ ⲕⲟⲧϥ ⲉⲣⲟⲓ ⲟⲩⲟϩ ⲛ̀ⲧⲁⲟⲩϫⲁⲓ ⲁⲓⲉⲙⲓⲅⲁⲣ ϫⲉⲁⲛⲟⲕ ⲟⲩⲧⲉⲃⲧ ⲁⲛ

ϯⲕⲟⲩϫⲓ ⲙ̀ⲙⲟⲩⲕⲓ

ⲁⲛⲟⲕ ⲡⲉϣⲉⲛϯ ⲉⲓⲥϧⲁⲓ ⲙ̀ⲫⲏⲉⲧϥⲓⲣⲱⲟⲩϣ ϧⲁϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ϫⲉϣⲟⲣⲡⲙⲉⲛ ⲛ̀ϩⲱⲃ ⲛⲓⲃⲉⲛ ϯϣⲓⲛⲓ ⲉ̀ⲣⲟⲕ ⲛⲉⲙⲡⲉⲕⲏⲓ ⲧⲏⲣϥ ⲡⲓⲟⲩⲁⲓ ⲡⲓⲟⲩⲁⲓ ⲕⲁⲧⲁ ⲡⲉϥⲣⲁⲛ ⲛⲉⲙϯⲟⲩⲓ ϯⲟⲩⲓ ⲕⲁⲧⲁ ⲡⲉⲥⲣⲁⲛ ⲭⲁⲓⲣⲉⲓⲛ ⲁⲓⲉⲙⲓⲅⲁⲣ ϫⲉⲟⲩⲟⲛ ⲟⲩⲟⲛ ⲟⲩⲙⲏϣ ⲉⲑⲟⲩⲱϣ ⲉⲑⲁⲙⲓⲟ ⲛ̀ⲟⲩⲁⲥⲡⲓ ⲉⲧⲟⲛⲓ ⲉⲧⲉⲛⲁⲥⲡⲓ ⲟⲩⲟϩ ⲛⲏⲇⲉ ⲉⲧⲉⲣ ⲫⲁⲓ ⲥⲉⲙⲟⲩϯ ⲉⲧⲟⲩϫⲓⲛⲥⲁϫⲓ ⲉⲑⲙⲉϩ ⲛ̀ϣⲱϥⲧ ϫⲉϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ

ⲡⲉϫⲉⲡⲓϧⲉⲗⲗⲟ ⲡⲁⲣⲥⲱⲙⲁ ⲛⲏⲓ ϫⲉⲙ̀ⲡⲉⲣⲥⲁϩⲟⲩⲓ ⲉⲡⲭⲁⲕⲓ ⲁⲗⲗⲁ ϭⲉⲣⲉ ⲟⲩϧⲏⲃⲥ ⲟⲩⲟϩ ⲭⲁϥ ϩⲓϫⲉⲛϯⲗⲩⲭⲛⲓⲁ ⲉⲑⲣⲉϥⲉⲣⲟⲩⲱⲓⲛⲓ ⲉ̀ⲟⲩⲟⲛ ⲛⲓⲃⲉⲛ ⲉⲧϣⲟⲡ ϧⲉⲛⲡⲓⲏⲓ

ⲉⲓⲥ ϯⲕⲟⲩϫⲓ ⲙ̀ⲙⲟⲩⲕⲓ ϩⲁⲣⲁ ⲥⲛⲁϭⲓⲙⲱⲓⲧ ϧⲁϫⲱⲛ ⲉⲧϫⲓⲛⲥⲁϫⲓ ⲛ̀ⲧⲉⲛⲉⲛⲓⲟϯ ⲁⲩⲑⲱⲟⲩϯⲇⲉ ⲛ̀ⲛⲓⲗⲉⲝⲓⲥ ⲉⲧⲭⲏ ϧⲉⲛ ϯⲇⲓⲁⲑⲏⲕⲏ ⲛ̀ⲁⲡⲁⲥ ⲛⲉⲙϯⲇⲓⲁⲑⲏⲕⲏ ⲙ̀ⲃⲉⲣⲓ ⲛⲉⲙⲛⲓⲡⲣⲁⲝⲓⲥ ⲛ̀ⲧⲉⲛⲓ⳥ ϩⲁⲣⲁ ⲧⲉⲛϫⲓⲛⲥⲁϫⲓ ⲟⲩⲱⲛϩ ⲙ̀ⲙⲟⲛ

ⲁⲩⲓ̀ ⲛ̀ϫⲉⲛⲓⲉⲕⲱⲧ ⲛⲉⲙⲛⲓⲁⲣⲭⲏⲧⲉⲕⲧⲱⲛ ⲛⲉⲙⲛⲓⲥⲁϧ ⲛ̀ⲧⲟⲩⲥϧⲁⲓ ⲙ̀ⲡⲁⲓϫⲱⲙ ⲫⲁⲓ ⲉⲧⲉⲙⲙⲁⲩ ⲡⲓϫⲱⲙⲙⲉⲛ ⲟⲩⲁⲓⲡⲉ ⲛⲓⲉⲣⲅⲁⲧⲏⲥⲇⲉ ϩⲁⲛⲙⲏϣ ⲉⲑⲃⲉ ⲫⲁⲓ ⲡⲓϫⲱⲙ ⲉϥⲉⲁⲓⲁⲓ ⲟⲩⲟϩ ⲁϣⲁⲓ ⲁⲙⲱⲓⲛⲓ ⲛⲓⲗⲁⲟⲥ ⲧⲏⲣⲟⲩ ⲛ̀ⲧⲉⲛⲥϧⲁⲓ ⲛ̀ⲟⲩϫⲱⲙ ⲛ̀ⲟⲩⲱⲧ 

ⲕⲁⲧⲁ ⲕⲟⲩϫⲓ ⲕⲟⲩϫⲓ ⲧⲉⲛⲛⲁⲕⲱϯ ⲛ̀ⲥⲁ ⲛⲓⲗⲉⲝⲓⲥ ⲛⲉⲙⲛⲓⲥⲁϫⲓ ⲧⲉⲛⲛⲁⲑⲱⲟⲩϯ ⲛ̀ⲛⲓⲫⲓⲣⲓ ⲛⲉⲙϯⲥⲟⲫⲓⲁ ⲛ̀ⲧⲉⲛⲉⲛⲓⲟϯ ⲕⲉ ⲡⲁⲗⲓⲛ ⲟⲛ ⲧⲉⲛϭⲓⲥⲃⲱ ⲉⲃⲟⲗϩⲓⲧⲉⲛ ⲧⲟⲩⲡⲟⲗⲏⲧⲓⲁ 

ⲁⲗⲏⲑⲱⲥⲅⲁⲣ ϧⲉⲛⲟⲩⲙⲉⲑⲙⲏⲓ ⲧⲉⲛⲉⲣⲭⲣⲓⲁ ⲛ̀ⲧⲉⲛⲙⲟϣⲓ ⲛ̀ⲥⲁ ⲡⲓⲗⲟⲅⲟⲥ ⲛ̀ⲧⲉⲛⲓⲥⲁⲃⲉⲩ ⲉⲧⲁⲩϭⲓⲙⲱⲓⲧ ϧⲁϫⲱⲟⲩ ⲛ̀ⲛⲟⲩⲙⲑⲏⲧⲏⲥ ⲛⲁⲓ ⲉⲧⲁⲩⲧⲥⲁⲃⲉ ⲛⲉⲛⲓⲟϯ ⲁ̀ⲛⲟⲛⲇⲉ ϩⲱⲛ ⲉⲛⲉϫⲉⲙϯⲡⲓ ⲟⲩⲟϩ ⲁⲛⲁⲩ ϫⲉⲥϩⲟⲗϫ ⲛ̀ϫⲉϯⲥⲟⲫⲓⲁ ⲛ̀ⲧⲉⲛⲓⲑⲙⲏⲓ 

ϯⲥⲟⲫⲓⲁ ⲛ̀ⲁⲕⲁⲛⲑⲁ

ⲓⲥ ϩⲏⲡⲡⲉ ⲁⲕϫⲓⲙⲓ ⲛⲁⲕ ⲛ̀ⲟⲩⲥϩⲓⲙⲓ ⲗⲟⲓⲡⲟⲛ ⲡⲓϩⲱⲃ ⲉⲣⲭⲣⲉⲓⲁ ⲉⲑⲣⲉⲕⲉⲣϩⲱⲃ ⲛ̀ϫⲱⲣϩ ⲛⲉⲙⲙⲉⲣⲓ ϫⲉϩⲓⲛⲁ ⲛ̀ⲧⲉⲕϣⲁⲛⲟⲩϣⲕ ⲛⲉⲙⲁⲥ ⲛⲉⲙⲡⲉⲥϣⲏⲣⲓ

ⲉⲣⲉ ⲍⲱⲟⲛ ⲛⲓⲃⲉⲛ ⲙⲉⲓ ⲙ̀ⲡⲉⲧⲓⲛⲓ ⲙ̀ⲙⲟϥ

ⲟⲩ ⲧⲉ ⲧⲕⲟⲓⲛⲱⲛⲓⲁ ⲛ̀ⲟⲩⲟⲩⲱⲛϣ ⲛⲉⲙⲟⲩϩⲓⲏⲃ

ⲁϣ ⲧⲉ ⲧϩⲓⲣⲏⲛⲏ ⲛ̀ⲟⲩⲃⲟⲓϣⲓ ⲛⲉⲙⲟⲩⲟⲩϩⲟⲣ

ϯⲥⲟⲫⲓⲁ ⲧⲏⲣⲥ ⲟⲩ ⲉ̀ⲃⲟⲗ ϩⲓⲧⲉⲛ ϯⲅⲛⲱⲥⲓⲥ ⲟⲩⲟϩ ⲥϣⲟⲡ ⲛⲉⲙⲁⲥ ϣⲁ ⲉⲛⲉϩ

ⲡⲓⲭⲗⲟⲙ ⲛ̀ⲧⲉϯⲥⲟⲫⲓⲁⲡⲉ ⲡϫⲓⲛⲕⲱϯ ⲛ̀ⲥⲁϯⲅⲛⲱⲥⲓⲥ ⲉⲥϯⲟⲩⲱ ⲛ̀ⲟⲩϩⲓⲣⲏⲛⲏ ⲛⲉⲙⲟⲩⲕⲱⲧ

ⲙ̀ⲙⲟⲛϣϫⲟⲙ ⲛ̀ⲟⲩⲣⲉϥϫⲱⲛⲧ ⲉⲑⲙⲁⲓⲟ ⲡⲓⲣⲓⲕⲓⲅⲁⲣ ⲛ̀ⲧⲉⲡⲉϥϫⲱⲛⲧⲡⲉ ⲡⲉϥϩⲉⲓ

ⲙ̀ⲡⲉⲣⲉⲣⲙⲉⲧϣⲟⲃⲓ ⲙ̀ⲡⲉⲙⲑⲟ ⲉ̀ⲃⲟⲗ ⲛ̀ⲛⲓⲣⲱⲙⲓ ⲙⲁϩⲑⲏⲕ ⲉ̀ⲣⲱⲕ ⲛⲉⲙⲛⲉⲕⲥⲫⲟⲧⲟⲩ

ⲙ̀ⲡⲉⲣϭⲓⲥⲓ ⲙ̀ⲙⲟⲕ ϫⲉⲛ̀ⲛⲉⲕϩⲉⲓ ⲛ̀ⲧⲉⲕⲓⲛⲓ ⲛ̀ⲟⲩϣⲱϣ ⲉ̀ϫⲉⲛⲧⲉⲕⲯⲩⲭⲏ

ⲓⲥϫⲉ ⲭⲛⲁϯ ⲙ̀ⲡⲉⲕⲟⲩⲟⲓ ⲉ̀ⲉⲣⲃⲱⲕ ⲛ̀ϯⲙⲉⲑⲙⲏⲓ ⲥⲉⲃⲧⲉⲧⲉⲕⲯⲩⲭⲏ ⲉ̀ϩⲁⲛⲡⲓⲣⲁⲥⲙⲟⲥ

ⲥⲟⲩⲧⲉⲛ ⲡⲉⲕϩⲏⲧ ⲟⲩⲟϩ ϥⲁⲓ ⲉ̀ⲣⲟⲕ ⲛ̀ⲧⲉⲕϣ̀ⲧⲉⲙϫⲁⲡϫⲉⲡ ϧⲉⲛⲡⲥⲏⲟⲩ ⲛ̀ⲛⲉⲕϧⲓⲥⲓ

ϩⲱⲃⲛⲓⲃⲉⲛ ⲉⲑⲛⲏⲟⲩ ⲉ̀ϫⲱⲕ ϣⲟⲡⲟⲩ ⲉ̀ⲣⲟⲕ ⲛ̀ⲧⲉⲕϣⲱⲡⲓ ⲛ̀ⲣⲉϥⲱⲟⲩⲛϩⲏⲧ ϧⲉⲛⲡⲕⲁϩⲓ ⲙ̀ⲡⲉⲕⲑⲉⲃⲓⲟ

ϫⲉⲉ̀ϣⲁⲩⲉⲣⲇⲟⲕⲓⲙⲁⲍⲓⲛⲅⲁⲣ ⲙ̀ⲡⲓⲛⲟⲩⲃ ϩⲓⲧⲉⲛⲡⲓⲭⲣⲱⲙ ⲛⲓⲥⲱⲧⲡ ϩⲱⲧⲉⲛ ⲛ̀ⲧⲉⲛⲓⲣⲱⲙⲓ ϧⲉⲛⲟⲩϩⲣⲱ ⲛ̀ⲑⲉⲃⲓⲟ

ϩⲁⲛⲙⲏϣⲅⲁⲣ ⲛⲏⲉⲑⲙⲉⲩⲓ ⲛ̀ϧⲏⲧⲟⲩ ⲡⲗⲁⲛⲁⲛ ⲙ̀ⲙⲱⲟⲩ ⲟⲩⲟϩ ⲁⲛⲟⲩⲙⲉⲩⲓ ⲉⲧϩⲱⲟⲩ ϯⲥⲗⲁϯ ⲙ̀ⲙⲱⲟⲩ

ⲁⲗⲏⲑⲱⲥ ⲡⲉⲧϣⲁⲛϣ ⲉⲡⲉϫⲁϫⲓ ⲉϥⲉⲣⲛⲟⲃⲓ ⲉⲣⲟϥ ⲙ̀ⲙⲓⲛⲙ̀ⲙⲟϥ

ⲁⲣⲉϩⲇⲉ ⲉ̀ⲣⲱⲧⲉⲛ ⲉ̀ⲃⲟⲗϩⲁⲛⲓⲥⲁϧ ⲛ̀ⲛⲟⲩϫ ⲛⲏⲉⲑⲛⲏⲟⲩ ϩⲁⲣⲱⲧⲉⲛ ϧⲉⲛϩⲁⲛϩⲉⲃⲥⲱ ⲛⲉⲥⲱⲟⲩ ⲥⲁϧⲟⲩⲛⲇⲉ ⲙ̀ⲙⲱⲟⲩ ϩⲁⲛⲟⲩⲱⲛϣ ⲛ̀ⲣⲉϥϩⲱⲗⲉⲙ ⲛⲉ

ⲡϩⲏⲧ ⲙ̀ⲡⲥⲁⲃⲉ ϣⲁϥⲙⲉⲩⲓ ⲉⲟⲩⲡⲁⲣⲁⲃⲟⲗⲏ ⲟⲩⲟϩ ⲫⲟⲩⲱϣ ⲛ̀ⲟⲩⲥⲁⲃⲉⲡⲉ ⲟⲩⲙⲁϣϫ.

ⲙⲁϩⲑⲏⲕ ⲉⲡⲓⲥⲏⲟⲩ ⲛ̀ⲧⲉⲕⲁⲣⲉϩ ⲉⲣⲟⲕ

ⲙ̀ⲡⲉⲣⲁⲙⲟⲛⲓ ⲛ̀ⲟⲩⲥⲁϫⲓ ϧⲉⲛⲟⲩⲥⲏⲟⲩ ⲛ̀ⲟⲩϫⲁⲓ ⲉ̀ϣⲁⲩⲥⲟⲩⲉⲛϯⲥⲟⲫⲓⲁⲅⲁⲣ ϧⲉⲛⲡⲓⲥⲁϫⲓ ⲟⲩⲟϩ ϯⲙⲉⲧⲥⲁⲃⲉ ϧⲉⲛⲡⲥⲁϫⲓ ⲙ̀ⲡⲓⲗⲁⲥ

ⲡⲉϫⲉ ⲡⲓⲥⲟⲫⲟⲥ ϫⲉⲓⲥϫⲉ ⲁⲛⲟⲕ ⲟⲩⲥⲟⲫⲟⲥⲡⲉ ⲛ̀ϯⲉⲙⲓ ⲁⲛ ⲟⲩⲁⲓ ⲗⲇⲉ ⲡⲉϯⲥⲱⲟⲩⲛ ⲙ̀ⲙⲟϥ ϫⲉϯⲥⲱⲟⲩⲛ ⲛ̀ϩⲗⲓ ⲁⲛ

ⲙⲉⲛⲣⲉϯⲙⲉⲑⲙⲏⲓ ϫⲉⲙ‌ⲡⲁⲣⲉϯⲥⲟⲫⲓⲁ ϣⲉ ⲉϧⲟⲩⲛ ⲉⲟⲩⲯⲩⲭⲏ ⲉⲥϩⲱⲟⲩ ϯⲥⲟⲫⲓⲁⲅⲁⲣ ϣⲁⲥⲫⲱⲧ ⲉ‌ⲃⲟⲗ ⲛ‌ⲭⲣⲟϥ ⲛⲓⲃⲉⲛ 

ϫⲉϣⲁⲩϫⲓⲙⲓ ⲙ‌ⲙⲟⲥ ⲛ‌ϫⲉ ⲛⲏⲉⲧⲉ ⲛ‌ⲥⲉⲉⲣⲡⲓⲣⲁⲍⲓⲛ ⲙ‌ⲙⲟⲥ ϣⲁⲥⲟⲩⲱⲛϩ ⲉ‌ⲃⲟⲗ ⲛ‌ⲛⲏⲉⲧⲉ ⲛ‌ⲥⲉⲟⲓ ⲛ‌ⲁⲑⲛⲁϩϯ ⲉ‌ⲣⲟⲥ

ϯⲥⲟⲫⲓⲁⲅⲁⲣ ⲥⲕⲓⲙ ⲉ‌ϧⲟⲩⲛ ⲉ‌ⲛⲏⲉⲧⲕⲓⲙ ⲧⲏⲣⲟⲩ ⲥⲫⲟϩ ⲟⲩⲟϩ ⲉⲥⲛⲏⲟⲩ ⲉ‌ⲃⲟⲗ ϩⲓⲧⲉⲛ ⲡⲧⲏⲣϥ ⲉⲑⲃⲉ ⲡⲉⲥⲧⲟⲩⲃⲟ

ⲟⲩⲟⲩⲱⲓⲛⲓⲅⲁⲣ ⲧⲉ ⲛ‌ⲧⲉⲡⲓⲟⲩⲱⲓⲛⲓ ⲛⲉⲛⲉϩ ⲟⲩⲟϩ ⲧϩⲓⲕⲱⲛ ⲛ‌ⲧⲉⲧⲉϥⲙⲉⲧⲁⲅⲁⲑⲟⲥ ⲧⲉ

ⲟⲩ ⲓⲧⲉ ⲉⲥϫⲉⲙϫⲟⲙ ⲉ‌ϩⲱⲃ ⲛⲓⲃⲉⲛ ⲟⲩⲟϩ ⲥⲭⲏ ϧⲁⲣⲓϧⲁⲣⲟⲥ ⲉⲥⲓⲣⲓ ⲙⲡⲧⲏⲣϥ ⲙ‌ⲃⲉⲣⲓ ⲟⲩⲟϩ ⲕⲁⲧⲁ ⲅⲉⲛⲉⲁ ⲉⲥϣⲉ ⲉ‌ϧⲟⲩⲛ ⲉ‌ϩⲁⲛⲯⲩⲭⲏ ⲉⲩⲟⲩⲁⲃ ⲉⲥⲓⲣⲓ ⲙ‌ⲙⲱⲟⲩ ⲛ‌ϩⲁⲛⲥⲟⲫⲟⲥ

ⲥⲉϫⲟⲩϣⲧ ϫⲉⲁⲣⲏⲟⲩ ⲁⲥϫⲟⲥ ⲛ‌ϩⲁⲛⲙⲏⲓⲛⲉ ⲉⲩⲉⲣⲇⲟⲕⲓⲙⲁⲍⲓⲛ ⲙ‌ⲫⲏⲉⲑⲛⲁϣⲱⲡⲓ ⲁⲩϣⲁⲛⲙⲟϣⲓ ⲛ‌ⲥⲁ ϯⲥⲟⲫⲓⲁ

ⲛ‌ⲧⲁⲥϯϩⲏⲟⲩ ⲙ‌ⲙⲟⲛ ⲛ‌ⲟⲩ ⲛ‌ϫⲉⲧⲉⲛⲙⲉⲧϭⲁⲥⲓϩⲏⲧ

ⲛⲁⲓⲛⲉ ⲛⲓⲉⲛⲧⲟⲗⲏ ⲛ̀ⲧⲉⲡⲓⲥⲁⲃⲉ ⲉ̀ⲧⲁⲧⲥⲟⲫⲓⲁ ⲉⲣⲟⲩⲱⲓⲛⲓ ⲉ̀ⲣⲟϥ

ⲛ̀ⲛⲉⲕϧⲱⲧⲉⲃ

ⲛ̀ⲛⲉⲕⲉⲣⲛⲱⲓⲕ

ⲛ̀ⲛⲉⲕϭⲓⲟⲩⲓ

ⲛ̀ⲛⲉⲕⲑⲓϧⲓ

ⲛ̀ⲛⲉⲕⲉⲣⲙⲉⲑⲣⲉ ⲛ̀ⲛⲟⲩϫ

ⲡⲉϫⲉ ⲡⲁⲥⲁϧ ϣⲁϥⲓⲕ ⲡϣⲏⲣⲓ ⲛ‌ⲇⲁⲙⲓⲁⲛⲟⲥ ⲛⲏⲓ

ϫⲉⲱⲟⲩⲛⲓⲁⲧϥ ⲙ‌ⲡⲓⲣⲱⲙⲓ ⲉⲧⲭⲱ ⲛ‌ⲥⲱϥ ⲛ‌ϯⲙⲉⲧϭⲁⲥⲓϩⲏⲧ ⲛⲉⲙϯϩⲟϯ ϩⲓⲛⲁ ⲛ‌ⲧⲉϥⲕⲱϯ ⲛ‌ⲥⲁϯⲁⲗⲏⲑⲓⲁ

ⲁⲡⲟⲧⲁⲥⲥⲉ ⲛ‌ⲧⲕⲁⲧⲁⲗⲁⲗⲓⲁ ⲛ‌ⲧⲉⲕϣⲧⲉⲙⲟⲩⲉⲙⲧⲥⲁⲣⲝ ⲛ‌ⲧⲉⲛⲉⲕⲥⲛⲏⲟⲩ

ⲱⲟⲩⲛⲓⲁⲧϥ ⲙ‌ⲫⲏⲉⲧⲕⲱϯ ⲛ‌ⲥⲁϯⲅⲛⲱⲥⲓⲥ ⲙ‌ⲙⲏⲓ ϫⲉⲥⲛⲁϭⲓⲙⲱⲓⲧ ϧⲁϫⲱϥ

ⲁⲡⲟⲧⲁⲥⲥⲉ ⲛ‌ϯⲙⲉⲧϭⲁⲥⲓϩⲏⲧ ⲛ‌ⲧⲉⲕϣⲧⲉⲙⲣⲓⲕⲓ ⲥⲁⲃⲟⲗ ⲥⲁⲃⲟⲗ ⲛ‌ϯⲙⲉⲑⲙⲏⲓ

ⲱⲟⲩⲛⲓⲁⲧϥ ⲙ‌ⲫⲏⲉⲧⲉⲣⲉⲧⲓⲛ ⲛ‌ⲧⲥⲟⲫⲓⲁ ϫⲉϥⲛⲁⲉⲣⲥⲁⲃⲉ

ⲁⲡⲟⲧⲁⲥⲥⲉ ⲙ‌ⲡϫⲱⲛⲧ ⲛⲉⲙⲫⲙⲟⲥϯ ⲛ‌ⲧⲉⲕϣⲧⲉⲙⲛⲉϫⲙⲁⲧⲟⲩ ⲉⲧⲉⲕⲯⲩⲭⲏ

ⲱⲟⲩⲛⲓⲁⲧϥ ⲙ‌ⲡⲓⲇⲓⲕⲉⲟⲥ ϫⲉϣⲁϥϯϩⲁⲡ ϧⲉⲛⲟⲩⲙⲉⲑⲙⲏⲓ ⲛⲉⲙⲟⲩⲥⲱⲟⲩⲧⲉⲛ

ⲁⲡⲟⲧⲁⲥⲥⲉ ⲛ‌ϯⲙⲉⲧⲁⲙⲉⲗⲏⲥ ϫⲉϣⲁⲣⲉ ⲫⲣⲏ ϣⲁⲓϩⲓϫⲱⲕ ⲟⲩⲟϩ ⲡⲓⲉϩⲟⲟⲩ ϣⲁϥⲥⲓⲛⲓ ⲙ‌ⲡⲁⲧⲉⲕⲉⲣⲡⲉⲑⲛⲁⲛⲉϥ

ⲱⲟⲩⲛⲓⲁⲧϥ ⲙ‌ⲫⲏⲉⲧⲉⲣⲙⲉⲗⲉⲧⲁⲛ ϧⲉⲛⲛⲓⲥⲃⲱⲟⲩⲓ ϫⲉϥⲛⲁϫⲫⲟ ⲛⲁϥ ⲛ‌ⲧⲉⲡⲓⲥⲧⲏⲙⲏ

ⲁⲡⲟⲧⲁⲥⲥⲉ ⲛ‌ϯⲙⲉⲧⲁⲧⲉⲙⲓ ⲟⲩⲟϩ ϩⲉⲛⲕ ⲥⲁⲃⲟⲗ ⲙ‌ⲙⲟⲥ ⲕⲁⲧⲁⲫⲣⲏϯ ⲉⲧⲁ ⲫⲟⲩⲱⲓⲛⲓ ϭⲟϫⲓ ⲛ‌ⲥⲁⲡⲭⲁⲕⲓ ϩⲟⲡⲱⲥ ⲛ‌ⲧⲉⲕⲥⲱⲟⲩⲛ ⲛ‌ⲛⲓⲙⲓⲧⲱⲟⲩⲓ ⲉ‌ⲧϭⲓ ⲉⲡⲱⲛϧ ⲙ‌ⲙⲏⲓ

ⲁⲓⲟⲩⲛⲟϥ ⲉ‌ϫⲉⲛⲛⲏⲉⲧⲁⲩϫⲟⲥ ⲛⲏⲓ ϫⲉⲧⲉⲛⲛⲁϣⲉⲛⲁⲛ ⲉ‌ϯⲃⲓⲃⲗⲓⲟⲑⲏⲕⲏ

ⲁ‌ⲛⲟⲛ ϩⲱϯ ⲉ‌ⲣⲟⲛⲡⲉ ⲛ‌ⲧⲉⲛⲉⲣϩⲱⲃ ⲉ‌ⲛⲓϩⲃⲏⲟⲩⲓ‌ ⲉ‌ⲑⲛⲁⲛⲉϥ ϩⲱⲥ ⲡⲓⲉ‌ϩⲟⲟⲩⲡⲉ ϩⲓⲛⲁ ⲛ‌ⲧⲉⲛⲥⲓϯ ⲛ‌ⲧⲁⲅⲁⲡⲏ ⲛⲉⲙⲧϩⲓⲣⲏⲛⲏ ⲛⲉⲙⲧⲇⲓⲕⲉⲟⲩⲥⲩⲛⲏ ϧⲉⲛⲡⲉⲛⲕⲁϩⲓ ϩⲓⲛⲁⲛ‌ⲧⲉⲛⲱⲥϧ ⲛ‌ⲧⲥⲟⲫⲓⲁ ⲛⲉⲙϯⲅⲛⲱⲥⲓⲥ ⲛⲉⲙϯⲙⲉⲑⲙⲏⲓ

ⲫⲏⲉⲧⲉ ⲟⲩⲟⲛ ⲙⲁϣϫ ⲙ‌ⲙⲟϥ ⲙⲁⲣⲉϥⲥⲱⲧⲉⲙ ⲟⲩⲟϩ ⲙⲁⲣⲉϥϧⲟⲧϧⲉⲧ ϧⲉⲛⲛⲓⲥⲁϫⲓ ϫⲉⲡⲓⲥⲁⲃⲉ ϧⲟⲧϧⲉⲧ ⲛ‌ⲉⲛⲭⲁⲓ ⲛⲓⲃⲉⲛ ⲛⲉⲙⲉⲧϣⲏⲕ ⲛ‌ϯⲅⲛⲱⲥⲓⲥ

ⲡⲓϩⲟϥ ⲛⲉⲙⲡⲓⲃⲁϣⲟⲩⲣ

 ⲟⲩⲡⲣⲉⲡⲱⲛ ⲡⲉ ⲟⲩⲟϩ ⲟⲩⲟⲇⲓⲕⲁⲓⲟⲛⲡⲉ ⲉⲑⲣⲓϫⲟⲥ ⲛⲱⲧⲉⲛ ϫⲉⲛⲉⲟⲩⲟⲛ ⲟⲩϩⲁⲙϣⲉ ⲙ̀ⲙⲁⲩ ⲉⲟⲩⲟⲛⲧⲉϥ ⲟⲩⲃⲁϣⲟⲩⲣ ⲟⲩⲟϩ ⲉⲧⲁⲣⲟⲩϩⲓⲇⲉ ϣⲱⲡⲓ ⲁⲡⲓϩⲁⲙϣⲉ ⲉⲛⲕⲟⲧ ⲛ̀ⲧⲉϥϩⲓⲛⲓⲙ ⲁⲟⲩϩⲟϥ ⲓ̀ ⲉⲃⲟⲗϧⲉⲛⲟⲩⲭⲟⲗ ⲙ̀ⲡⲕⲁϩⲓ. ⲉⲁϥⲙⲟϣⲓⲇⲉ ⲉϫⲉⲛ ⲧⲉϥⲙⲉⲥⲧⲉⲛϩⲏⲧ ⲉϥⲕⲱϮ ⲛ̀ⲥⲁ ⲟⲩϧⲣⲉ ⲁⲡⲓⲃⲁϣⲟⲩⲣ ϫⲱⲧϩ ⲙ̀ⲙⲟϥ ⲁϥϧⲣⲁϫⲣⲉϫⲙⲉⲛ ⲛ̀ⲛⲉϥⲛⲁϫϩⲓ ⲛ̀ϫⲉⲡⲓϩⲟϥ ⲁϥⲕⲱϮ  ⲙ̇ⲡⲕⲱϯ ⲙ̇ⲡⲓⲃⲁϣⲟⲩⲣ ⲁϥϭⲱⲛⲧ ⲉⲟⲩⲉⲙⲡⲓⲃⲁϣⲟⲩⲣ ⲁⲗⲗⲁ ⲡⲓⲃⲁϣⲟⲩⲣ ⲁϥϫⲱⲧϩ ⲛ̀ⲣⲱϥ ⲁϥϫⲱⲛⲇⲉ ⲛ̀ϫⲉⲡⲓϩⲟϥ ⲟⲩⲟϩ ⲁϥⲕⲱϮ ⲙ̇ⲡⲕⲱϯ ⲡⲓⲃⲁϣⲟⲩⲣ ⲛ̀ⲕⲉⲥⲟⲡ ⲁϥⲕⲱⲗ ϩⲓⲛⲁ ⲛ̀ⲧⲉϥϧⲟⲙϧⲉⲙ ⲙ̀ⲡⲓⲁⲃϣⲟⲩⲣ ⲉϥϭⲱⲛⲧ ⲉⲥⲡⲗⲏⲗⲓⲛ ⲙ̀ⲙⲟϥ ⲁⲗⲗⲁ ⲡⲓⲃⲁϣⲟⲩⲣ ⲁϥϫⲱⲧϩ ⲙ̀ⲡⲓϩⲟϥ ⲛ̀ⲥⲁⲥⲁ ⲛⲓⲃⲉⲛ ⲥⲟⲡⲅⲁⲣ ⲛⲓⲃⲉⲛ ⲉⲧⲉ ⲡⲓϩⲟϥ ⲥⲡⲗⲏⲗⲓⲛ ⲙ̀ⲟⲩⲃⲁϣⲟⲩⲣ ⲡⲓⲃⲁϣⲟⲩⲣ ϣⲱⲧ ⲛ̀ⲛⲓⲙⲉⲗⲟⲥ ⲛ̀ⲧⲉⲡⲓϩⲟϥ ⲉϥϯⲙⲃⲟⲛ ⲙ̀ⲙⲟϥ 

ⲉⲡϧⲁⲉⲇⲉ ⲁϮⲙⲉⲧϭⲁⲥⲓϩⲏⲧ ⲛⲉⲙⲡⲓⲙⲃⲟⲛ ⲛ̀ⲧⲉⲡⲓϩⲟϥ ⲧⲁⲕⲟϥ. ⲉⲧⲁⲧⲟⲟⲩⲓⲇⲉ ϣⲱⲡⲓ ⲁϥⲛⲉϩⲥⲓ ⲛ̇ϫⲉⲡⲓϩⲁⲙϣⲉ ⲁϥⲧⲟⲩⲃⲟ ⲙ̇ⲡⲓⲃⲁϣⲟⲩⲣ ⲟⲩⲟϩ ⲁϥⲑⲱⲟⲩϯ ⲙ̇ⲡⲥⲱⲙⲁ ⲛ̇ⲧⲉⲡⲓϩⲟϥ ⲉⲧⲁϥⲙⲟⲩ ⲟⲩⲟϩ ⲁϥⲑⲟⲙⲥϥ

ⲁⲛⲟⲛⲇⲉ ϩⲱⲛ ⲱ ⲛⲁⲙⲉⲛⲣⲁϯ ⲙⲁⲣⲉⲛⲉⲣⲫⲙⲉⲩⲓ ϫⲉⲛⲓⲉⲣϧⲟⲧ ⲛ̇ⲥⲱⲙⲁⲧⲓⲕⲟⲥ ϯⲙⲕⲁϩ ⲛⲁⲛ ⲙⲟⲛⲟⲛ ⲡⲗⲏⲛ ⲡⲓϫⲱⲛⲧ ⲛⲉⲙϯⲙⲉⲧϭⲁⲥⲓϩⲏⲧ ⲥⲉⲟⲛⲓ ⲛ̇ⲟⲩⲫⲁⲣⲙⲁⲅⲓⲁ ⲉⲧⲧⲁⲕⲟ ⲛ̇ⲧⲯⲩⲭⲏ ⲕⲉ ⲡⲁⲗⲓⲛ ⲟⲛ ⲙⲁⲣⲉⲛⲙⲟϣⲓ ⲙⲫⲣⲏϯ ⲛ̇ⲛⲓⲥⲁⲃⲉⲩ ⲡⲉϫⲉ ⲡⲓⲥⲟⲫⲟⲥ ϫⲉϣⲱⲡⲓⲟⲩⲛ ⲉⲣⲉⲧⲉⲛⲟⲓ ⲛ̇ⲥⲁⲃⲉ ⲙ̇ⲫⲣⲏϯ ⲛ̇ⲛⲓϩⲱϥ ⲁⲗⲗⲁ ⲁⲣⲉⲧⲉⲛⲉⲙⲓ ϯⲛⲟⲩ ϫⲉⲡϫⲱⲛⲧ ⲛⲉⲙϯⲙⲉⲧϭⲁⲥⲓϩⲏⲧ ϣⲁⲩⲭⲱⲣϥ ⲛ̇ϯⲥⲟⲫⲓⲁ ⲉⲧϭⲓⲙⲱⲓⲧ ϧⲁϫⲱⲛ ⲙⲁⲣⲉⲛⲙⲟϣⲓ ϧⲉⲛⲟⲩϩⲩⲡⲟⲙⲟⲛⲏ ⲕⲁⲧⲁⲡⲥⲁϫⲓ ⲛ̇ⲁⲡⲁ ⲡⲁϧⲱⲙ ϫⲉϣⲱⲡⲓ ⲛ̀ϩⲁⲣϣϩⲏⲧ ϫⲉⲉⲕⲉⲱⲡ ⲉⲡⲓⲁⲣⲓⲑⲙⲟⲥ ⲛ̀ⲛⲓⲥⲁⲃⲉⲩ

ⲯⲁⲗⲙⲟⲥ ⲫⲁ ⲧⲁⲁⲥⲡⲓ

ϩⲓϫⲉⲛ ⲫⲓⲁⲣⲟ ⲛ‌ⲭⲏⲙⲓ ⲁⲓϩⲉⲙⲥⲓ ⲙ‌ⲙⲁⲩ

ⲟⲩⲟϩ ⲙ‌ⲡⲓⲣⲓⲙⲓ ⲉ‌ⲡϫⲓⲛϯⲉⲣⲫⲙⲉⲩⲓ ⲛ‌ϯⲁⲥⲡⲓ ⲛ‌ⲣⲉⲙⲛ‌ⲭⲏⲙⲓ

ϩⲓϫⲉⲛ ⲛⲓⲃⲱ ⲛ‌ⲕⲉⲛⲧⲉ ϧⲉⲛⲧⲉϥⲙⲏϯ ⲁⲓⲓϣⲓ ⲛ‌ⲧⲁⲕⲩⲑⲁⲣⲁ

ⲉ‌ϣⲱⲡ ⲁⲓϣⲁⲛⲉⲣⲡⲉⲱⲃϣ ⲛ̀ⲧⲁⲁⲥⲡⲓ ⲉⲓⲉ‌ⲉⲣⲡⲱⲃϣ ⲛ‌ⲧⲁⲟⲩⲓⲛⲁⲙ:
ⲡⲁⲗⲁⲥ ⲉϥⲉ‌ϫⲱⲗϫ ⲉ‌ⲧⲁϣⲃⲱⲃⲓ ⲉ‌ϣⲱⲡ ⲁⲓϣⲧⲉⲙⲉⲣⲡⲉⲙⲉⲩⲓ

ⲛ‌ϯⲛⲁϭⲓϣⲓⲡⲓ ⲁⲛ ϫⲉϯⲟⲓ ⲛ‌ⲁⲑⲛⲟⲃⲓ ⲉⲃⲟⲗϩⲁ ⲡⲧⲁⲕⲟ ⲛ‌ⲧⲁⲁⲥⲡⲓ

ⲕⲉ ⲡⲁⲗⲓⲛ ⲟⲛ ϯϯϩⲁⲡ ⲁⲛ ⲉⲛⲁⲓⲟϯ

ⲛ‌ϯⲛⲁⲣⲓⲙⲓⲅⲁⲣ ⲁⲛ ϫⲉϯⲛⲁⲁⲣⲉϩ ⲉⲧⲁⲕⲗⲏⲣⲟⲛⲟⲙⲓⲁ

ⲧⲉⲣⲃⲟⲛⲏ ⲛⲟⲩⲥ ⲛ‌ⲧⲉⲗⲉⲟⲥ

ⲛ‌ⲧⲁⲧⲁⲧⲟⲩⲓ ⲁⲛⲟⲕ ⲉⲃⲟⲗϧⲉⲛϫⲟⲙ
ⲟⲩⲟϩ ⲛ‌ⲧⲁⲓ‌ ϣⲁⲛⲏⲉⲧⲙⲉⲩⲓ ⲉⲣⲟⲓ
ⲟⲩⲟϩ ⲁⲓϫⲓⲙⲓ ⲙ‌ⲙⲟⲓ ϧⲉⲛⲛⲏⲉⲧϣⲓⲛⲓ ⲛ‌ⲥⲱⲓ
ⲉⲛⲁⲩⲉⲣⲟⲓ ⲛⲏⲉⲧⲙⲉⲩⲓ ⲉⲣⲟⲓ
ⲟⲩⲟϩ ⲛ‌ⲓⲣⲉϥⲥⲱⲧⲉⲙ ⲥⲱⲧⲉⲙ ⲉⲣⲟⲓ
ⲛⲏⲉⲧϫⲟⲩϣⲧ ⲉⲃⲟⲗϧⲁⲧϩⲏⲓ ϣⲟⲡⲧ ⲉⲣⲱⲧⲉⲛ

ⲟⲩⲟϩ ⲙ‌ⲡⲉⲣⲫⲱⲧ ⲛ‌ⲥⲱⲓ ⲙ‌ⲡⲉⲙⲑⲟ ⲛ‌ⲛⲉⲧⲉⲛⲃⲁⲗ ⲉⲃⲟⲗ
ⲟⲩⲟϩ ⲙ‌ⲡⲉⲣⲑⲣⲉ ⲡⲉⲧⲉⲛϧⲣⲱⲟⲩ ⲙⲉⲥⲧⲱⲓ
ⲙ‌ⲡⲉⲣⲉⲣⲁⲧⲥⲱⲟⲩⲛ ⲙ‌ⲙⲟⲓ ⲕⲁⲧⲁ ⲙⲁ ⲓⲉ ⲕⲁⲧⲁ ⲕⲉⲥⲏⲟⲩ
ⲁⲣⲉϩ ⲙ‌ⲡⲉⲣⲉⲣⲁⲧⲥⲱⲟⲩⲛ ⲙ‌ⲙⲟⲓ
ⲁⲛⲟⲕⲅⲁⲣ ⲧⲉ ⲧϣⲟⲣⲡ ⲟⲩⲟϩ ⲧϧⲁⲉ
ⲁⲛⲟⲕⲧⲉ ⲑⲏⲉⲧⲧⲁⲓⲏⲟⲩⲧ ⲟⲩⲟϩ ⲑⲏⲉⲧϣⲏϣ
ⲁⲛⲟⲕⲧⲉ ⲧⲡⲟⲣⲛⲏ ⲟⲩⲟϩ ⲧⲥⲉⲙⲛⲏ
ⲁⲛⲟⲕⲧⲉ ϯⲥϩⲓⲙⲓ ⲟⲩⲟϩ ϯⲡⲁⲣⲑⲉⲛⲟⲥ
ⲁⲛⲟⲕⲡⲉ ϯⲙⲁⲩ ⲟⲩⲟϩ ϯϣⲉⲣⲓ
ⲁⲛⲟⲕ ⲛⲓⲙⲉⲗⲟⲥ ⲛ‌ⲧⲉ ⲧⲁⲙⲁⲩ
ⲁⲛⲟⲕⲧⲉ ϯⲁϭⲣⲏⲛ ⲟⲩⲟϩ ⲛⲁϣⲉ ⲛⲉⲥϣⲏⲣⲓ
ⲁⲛⲟⲕⲧⲉ ⲑⲏⲉⲧϣⲉ ⲡⲉⲥⲅⲁⲙⲟⲥ ⲟⲩⲟϩ ⲙ‌ⲡⲓϭⲓϩⲁⲓ
ⲁⲛⲟⲕⲧⲉ ⲑⲙⲉⲥⲓⲱ ⲟⲩⲟϩ ⲑⲏⲉⲧⲉ ⲙ‌ⲡⲉⲥⲙⲓⲥⲓ
ⲁⲛⲟⲕⲡⲉ ⲡⲥⲟⲗⲥⲉⲗ ⲛ‌ⲛⲁⲁⲛⲁⲁⲕⲉ
ⲁⲛⲟⲕⲧⲉ ⲧϣⲉⲗⲉⲧ ⲟⲩⲟϩ ⲡⲓⲡⲁⲧϣⲉⲗⲉⲧ ⲟⲩⲟϩ ⲡⲁϩⲱⲟⲩⲧ ⲡⲉⲛⲧⲁϥϫⲫⲟⲓ

ⲁⲛⲟⲕⲧⲉ ⲑⲙⲁⲩ ⲛ‌ⲧⲉ ⲡⲁⲓⲱⲧ ⲟⲩⲟϩ ⲧⲥⲱⲛⲓ ⲙ‌ⲡⲁϩⲱⲟⲩⲧ
ⲟⲩⲟϩ ⲛ‌ⲑⲟϥ ⲡⲉ ⲡⲁϣⲏⲣⲓ
ⲁⲛⲟⲕⲧⲉ ϯⲃⲱⲕⲓ ⲙ‌ⲡⲉⲛⲧⲁϥⲥⲉⲃⲧⲱⲧ
ⲁⲛⲟⲕⲧⲉ ⲧϭⲟⲓⲥ ⲙ‌ⲡⲁϫⲫⲟ
ⲛ‌ⲑⲟϥⲇⲉ ⲡⲉⲛⲧⲁϥϫⲫⲟⲓ ϧⲁⲧϩⲏ ⲙ‌ⲡⲁⲥⲏⲟⲩ ϧⲉⲛ ⲟⲩϩⲟⲩⲙⲓⲥⲓ
ⲟⲩⲟϩ ⲧⲁⲇⲩⲛⲁⲙⲓⲥ ⲟⲩⲉⲃⲟⲗⲛ‌ϧⲏⲧϥⲧⲉ
ⲁⲛⲟⲕ ⲡϭⲁⲣⲱⲃ ⲛ‌ⲧⲉϥϫⲟⲙ ϧⲉⲛⲧⲉϥⲙⲉⲧϣⲏⲙ
ⲟⲩⲟϩ ⲛ‌ⲑⲟϥⲡⲉ ⲧⲕⲉⲗⲉⲗⲓ ⲛ‌ⲧⲁⲙⲉⲧϧⲉⲗⲗⲱ
ⲟⲩⲟϩ ⲡⲉⲧⲁϥⲟⲩⲟϣϥ ϣⲁϥϣⲱⲡⲓ ⲙ‌ⲙⲟⲓ
ⲁⲛⲟⲕⲡⲉ ⲡⲭⲁⲣⲱϥ ⲉⲧⲉ ⲙ‌ⲡⲁⲩϣⲧⲁϩⲟϥ
ⲟⲩⲟϩ ⲧⲉⲡⲓⲛⲟⲓⲁ ⲉⲧⲉ ⲛⲁϣⲉ ⲡⲉⲥⲉⲣⲫⲙⲉⲩⲓ
ⲁⲛⲟⲕⲧⲉ ϯⲥⲙⲏ ⲉⲧⲉ ⲛⲁϣⲉ ⲡⲉⲥϧⲣⲱⲟⲩ
ⲟⲩⲟϩ ⲡⲓⲗⲟⲅⲟⲥ ⲉⲧⲉ ⲛⲁϣⲉ ⲡⲉϥⲓ‌ⲛⲓ
ⲁⲛⲟⲕⲡⲉ ⲡⲥⲁϫⲓ ⲙ‌ⲡⲁⲣⲁⲛ
ⲉⲑⲃⲉⲟⲩ ⲛⲏⲉⲑⲙⲟⲥϯ ⲙ‌ⲙⲟⲓ ⲧⲉⲧⲉⲛⲙⲉⲓ ⲙ‌ⲙⲟⲓ ⲟⲩⲟϩ ⲧⲉⲧⲉⲛⲙⲟⲥϯ ⲛ‌ⲛⲏⲉⲑⲙⲉⲓ ⲙ‌ⲙⲟⲓ
ⲛⲏⲉⲧⲉⲣⲁⲣⲛⲓ ⲙ‌ⲙⲟⲓ ⲉⲣϩⲓⲙⲟⲗⲟⲅⲓⲛ ⲙ‌ⲙⲟⲓ ⲟⲩⲟϩ ⲛⲏⲉⲧⲉⲣϩⲓⲙⲟⲗⲟⲅⲓⲛ ⲙ‌ⲙⲟⲓ ⲉⲣⲁⲣⲛⲓ ⲙ‌ⲙⲟⲓ
ⲛⲏⲉⲧϫⲉⲙⲉⲑⲛⲟⲩϫ ⲉⲣⲟⲓ ϫⲉ ϯⲙⲉⲑⲙⲏⲓ ⲉⲣⲟⲓ
ⲛⲏⲉⲧϫⲉϯⲙⲉⲑⲙⲏⲓ ⲉⲣⲟⲓ ϫⲉⲙⲉⲑⲛⲟⲩϫ ⲉⲣⲟⲓ
ⲛⲏⲉⲧⲥⲱⲟⲩⲛ ⲙ‌ⲙⲟⲓ ⲉⲣⲁⲧⲥⲱⲟⲩⲛ ⲙ‌ⲙⲟⲓ
ⲟⲩⲟϩ ⲛⲏⲉⲧⲉ ⲙ‌ⲡⲟⲩⲥⲟⲩⲟⲛⲧ ⲙⲁⲣⲟⲩⲥⲟⲩⲟⲛⲧ
ⲁⲛⲟⲕⲅⲁⲣⲡⲉ ⲡⲥⲱⲟⲩⲛ ⲟⲩⲟϩ ϯⲙⲉⲧⲁⲧⲥⲱⲟⲩⲛ
ⲁⲛⲟⲕⲡⲉ ⲡϣⲓⲡⲓ ⲟⲩⲟϩ ⲧⲡⲁⲣϩⲓⲥⲓⲁ
ⲁⲛⲟⲕ ⲟⲩⲁⲧϣⲓⲡⲓⲁⲛⲟⲕ ⲟⲩϫⲫⲏⲓⲧ
ⲁⲛⲟⲕ ⲟⲩⲛⲁϣⲧ
ⲁⲛⲟⲕ ⲟⲩϩⲟϯ
ⲁⲛⲟⲕⲡⲉ ⲡⲓⲡⲟⲗⲉⲙⲟⲥ ⲟⲩⲟϩ ϯϩⲓⲣⲏⲛⲏ
 

ⲙⲁϩⲑⲏⲧⲉⲛ ⲉⲣⲟⲓ ⲁⲛⲟⲕⲧⲉ ⲑⲏⲉⲧⲑⲉⲃⲓⲏⲟⲩⲧ ⲟⲩⲟϩ ⲑⲛⲓϣϯ
ⲙⲁϩⲑⲏⲧⲉⲛ ⲉⲧⲁⲙⲉⲧϩⲏⲕⲓ ⲟⲩⲟϩ ⲧⲁⲙⲉⲧⲣⲁⲙⲁⲟ
ⲙ̀ⲡⲉⲣϭⲓⲥⲓⲛ̇ϩⲏⲧ ⲉⲣⲟⲓ ⲉⲉⲓⲛⲏϫ ⲉⲃⲟⲗϩⲓϫⲉⲛⲡⲕⲁϩⲓ
ⲟⲩⲟϩ ⲧⲉⲧⲉⲛⲛⲁϫⲓⲙⲓ ⲙ̇ⲙⲟⲓ ϧⲉⲛⲛⲉⲧⲉⲛⲑⲏⲛⲟⲩ
ⲟⲩⲟϩ ⲙ̇ⲡⲉⲣⲛⲁⲩ ⲉⲣⲟⲓ ϩⲓⲧⲕⲟⲡⲣⲓⲁ ⲛ̀ⲧⲉⲧⲉⲛϣⲉⲛⲱⲧⲉⲛ ⲛ̇ⲧⲉⲧⲉⲛⲭⲁⲧ ⲉⲓⲛⲏϫ ⲉⲃⲟⲗ
ⲟⲩⲟϩ ⲧⲉⲧⲉⲛⲛⲁϫⲓⲙⲓ ⲙ̇ⲙⲟⲓ ϧⲉⲛⲛⲓⲙⲉⲧⲟⲩⲣⲟ
ⲟⲩⲇⲉ ⲙ̇ⲡⲉⲣⲛⲁⲩ ⲉⲣⲟⲓ ⲉⲓⲛⲏϫ ⲉⲃⲟⲗϧⲉⲛⲛⲏⲉⲧⲑⲉⲃⲓⲏⲟⲩⲧ
ⲟⲩⲟϩ ϧⲉⲛⲛⲓⲉⲗⲁⲭⲓⲥⲧⲟⲥ ⲛ̇ⲧⲟⲡⲟⲥ ⲛ̇ⲛⲉⲧⲉⲛⲥⲱⲃⲓ ⲛ̇ⲥⲱⲓ ⲛ̇ⲥⲱⲓ
ⲟⲩⲇⲉ ⲙ̇ⲡⲉⲣⲛⲟϫⲧ ⲉϩⲣⲏⲓ ⲉⲛⲏⲉⲧϣⲁⲧ ϧⲉⲛⲟⲩⲙⲉⲧⲁⲩⲥⲧⲏⲣⲟⲥ

 

ⲁⲛⲟⲕⲇⲉ ⲁⲛⲟⲕ ⲟⲩϣⲁⲛϩⲑⲏⲥ
ⲟⲩⲟϩ ⲁⲛⲟⲕ ⲟⲩⲁⲧϣⲉⲛϩⲏⲧ
ⲟⲩⲟϩ ⲧⲁⲉⲅⲕⲣⲁⲧⲉⲓⲁ  ⲛ̇ⲛⲉⲧⲉⲛⲙⲉⲛⲣⲓⲧⲥ ϧⲉⲛⲧⲁⲙⲉⲧϫⲱⲃ ⲙ̇ⲡⲉⲣⲃⲟϣⲧⲉⲛ ⲉⲣⲟⲓ
ⲟⲩⲟⲏ ⲛ̇ⲛⲉⲧⲉⲛⲉⲣϩⲟϯ ϧⲁⲧϩⲏ ⲛ̇ⲧⲁϫⲟⲙ
ⲉⲑⲃⲉⲟⲩⲅⲁⲣ ⲧⲉⲧⲉⲛⲛⲕⲁⲧⲁⲫⲣⲟⲛⲓⲛ ⲛ̇ⲧⲁϩⲟϯ
ⲟⲩⲟϩ ⲧⲉⲧⲉⲛⲥⲁϩⲟⲩⲓ ⲙ̇ⲡⲁϣⲟⲩϣⲟⲩ
ⲁⲛⲟⲕⲇⲉ ⲑⲏⲉⲧϣⲟⲡ ϧⲉⲛⲛⲓⲫⲟⲃⲟⲥ ⲧⲏⲣⲟⲩ
ⲟⲩⲟϩ ϥⲛⲁϣⲧ ϧⲉⲛⲓⲟⲩⲥⲧⲱⲧ
ⲁⲛⲟⲕⲇⲉ ⲑⲏⲉⲧϫⲱⲃ
ⲟⲩⲟϩ ⲉⲓⲟⲩⲟϫ ϧⲉⲛⲟⲩϩⲏⲥⲟⲛⲏ ⲛ̇ⲧⲟⲡⲟⲥ
ⲁⲛⲟⲕ ⲟⲩⲁⲧϩⲏⲧ ⲟⲩⲟϩ ⲁⲛⲟⲕ ⲟⲩⲥⲁⲃⲏ

ⲉⲑⲃⲉⲟⲩ ⲁⲧⲉⲧⲉⲛⲙⲉⲥⲧⲱⲧ ϧⲉⲛⲛⲉⲧⲉⲛⲥⲟϭⲛⲓ
ϫⲉϯⲛⲁⲭⲁⲣⲱⲓ ϧⲉⲛⲛⲏⲉⲑⲭⲁⲣⲱⲟⲩ
ⲟⲩⲟϩ ϯⲛⲁⲟⲩⲱⲛϩ ⲉⲃⲟⲗ ⲛ̇ⲧⲁⲥⲁϫⲓ
ⲉⲑⲃⲉⲟⲩ ⲟⲩⲛ ⲁⲧⲉⲧⲉⲛⲙⲉⲥⲧⲱⲧ ⲛⲓϩⲏⲗⲗⲏⲛ 

ⲁⲛⲟⲕ ⲟⲩⲃⲁⲣⲃⲁⲣⲟⲥ ϧⲉⲛⲛⲓⲃⲁⲣⲃⲁⲣⲟⲥ
ⲁⲛⲟⲕⲅⲁⲣⲧⲉ ⲧⲥⲟⲫⲓⲁ ⲛ̇ⲛⲓϩⲏⲗⲗⲏⲛ
ⲟⲩⲟϩ ⲧⲅⲛⲱⲥⲓⲥ ⲛ̇ⲛⲓⲃⲁⲣⲃⲁⲣⲟⲥ
ⲁⲛⲟⲕⲡⲉ ⲡϩⲁⲡ ⲛ̇ⲛⲓϩⲏⲗⲗⲏⲛ ⲛⲉⲙⲛⲓⲃⲁⲣⲃⲁⲣⲟⲥ
ⲁⲛⲟⲕ ⲡⲉⲑⲛⲁϣⲉ ⲡⲉⲥⲓ̇ⲓⲛⲓ ϧⲉⲛⲭⲏⲙⲓ
ⲟⲩⲟϩ ⲑⲏⲉⲑⲙⲉⲧⲁⲧⲓ̇ⲓⲛⲓ ϧⲉⲛⲛⲓⲃⲁⲣⲃⲁⲣⲟⲥ 

ⲁⲛⲟⲕ ⲑⲏⲉⲧⲁⲩⲙⲉⲥⲧⲱⲥ ϧⲉⲛⲙⲁⲓⲛⲓⲃⲉⲛ
ⲟⲩⲟϩ ⲑⲏⲉⲧⲁⲩⲙⲉⲛⲣⲓⲧⲥ ϧⲉⲛⲙⲁⲓⲛⲓⲃⲉⲛ
ⲁⲛⲟⲕ ⲑⲏⲉⲧⲉ ϣⲁⲩⲙⲟⲩϯ ⲉⲣⲟⲥ ϫⲉⲡⲱⲛϧ
ⲟⲩⲟϩ ⲁⲧⲉⲧⲉⲛⲙⲟⲩϯ ϫⲉⲫⲙⲟⲩ
ⲁⲛⲟⲕ ⲑⲏⲉⲧⲉ ϣⲁⲩⲙⲟⲩϯ ⲉⲣⲟⲥ ϫⲉⲫⲛⲟⲙⲟⲥ
ⲟⲩⲟϩ ⲁⲧⲉⲧⲉⲛⲙⲟⲩϯ ϫⲉⲧⲁⲛⲟⲙⲓⲁ
ⲁⲛⲟⲕ ⲑⲏⲉⲧⲁⲧⲉⲧⲉⲛⲫⲱⲧ ⲛ̀ⲥⲱⲓ
ⲁⲛⲟⲕ ⲑⲏⲉⲧⲁⲧⲉⲧⲉⲛⲁⲙⲁϩϯ ⲙ̀ⲙⲟⲓ
ⲁⲛⲟⲕⲧⲉ ⲑⲏⲉⲧⲁⲧⲉⲧⲉⲛϫⲟⲣⲧ ⲉⲃⲟⲗ
ⲟⲩⲟϩ ⲁⲧⲉⲧⲉⲛⲥⲱⲟⲩϩⲧ ⲉϧⲟⲩⲛ
ⲁⲛⲟⲕ ⲑⲏⲉⲧⲁⲧⲉⲛϣⲓⲡⲓ ⲛ̇ϧⲏⲧⲥ
ⲟⲩⲟϩ ⲁⲧⲉⲧⲉⲛⲉⲣⲁⲧϣⲓⲡⲓ ⲛⲏⲓ
ⲁⲛⲟⲕ ⲑⲏⲉⲧⲉ ⲛ̇ⲁⲧⲉⲣϣⲁⲓ
ⲟⲩⲟϩ ⲁⲛⲟⲕ ⲑⲏⲉⲧⲉ ⲛⲁϣⲉ ⲛⲉⲥϣⲁⲓ

ⲁⲛⲟⲕ ⲁⲛⲟⲕ ⲟⲩⲁⲑⲛⲟⲩϯ
ⲟⲩⲟϩ ⲁⲛⲟⲕ ⲑⲏⲉⲧⲉ ⲛⲁϣⲉ ⲛⲉⲥⲛⲟⲩϯ
ⲁⲛⲟⲕ ⲫⲏⲉⲑⲁⲧⲉⲧⲉⲛⲙⲉⲩⲓ ⲉ̇ⲣⲟⲓ ⲟⲩⲟϩ ⲁⲧⲉⲧⲉⲛϣⲟϣⲧ
ⲁⲛⲟⲕ ⲟⲩⲁⲧⲥⲃⲱ
ⲟⲩⲟϩ ⲉⲩϭⲓⲥⲃⲱ ⲉⲃⲟⲗϩⲓⲧⲟⲧ
ⲁⲛⲟⲕⲧⲉ ⲑⲏⲉⲧⲁⲧⲉⲧⲉⲛⲕⲁⲧⲁⲫⲣⲟⲛⲓⲛ ⲙ̇ⲙⲟⲓ
ⲟⲩⲟϩ ⲧⲉⲧⲉⲛⲙⲉⲩⲓ ⲉⲣⲟⲓ
ⲁⲛⲟⲕ ⲫⲏⲉⲧⲁⲧⲉⲧⲉⲛⲭⲱⲡ ⲉⲣⲟⲓ
ⲟⲩⲟϩ ⲁⲧⲉⲧⲉⲛⲟⲩⲱⲛϩ ⲛⲏⲓ ⲉⲃⲟⲗ

ϩⲟⲧⲁⲛⲇⲉ ⲁⲧⲉⲧⲉⲛϣⲁⲛⲭⲱⲡ ⲙ̇ⲙⲱⲧⲉⲛ
ⲁⲛⲟⲕ ϩⲱ ϯⲛⲁⲟⲩⲱⲛϩ ⲉⲃⲟⲗ
ϩⲟⲧⲁⲛⲅⲁⲣ ⲁⲣⲉϣⲁⲛ ⲧⲉⲧⲉⲛⲟⲩⲟⲛϩⲧ ⲉⲃⲟⲗ
ⲁⲛⲟⲕ ϩⲱ ϯⲛⲁⲭⲱⲡ ⲉⲣⲱⲧⲉⲛ

.............
.............

ϥⲓ ⲙ̀ⲙⲟⲓ ϧⲉⲛⲧⲟⲩⲉⲡⲓⲥⲧⲏⲙⲏ ⲉⲃⲟⲗϧⲉⲛⲟⲩⲙⲕⲁϩ ⲛ̀ϩⲏⲧ
ⲟⲩⲟϩ ⲛ̀ⲧⲉⲧⲉⲛϣⲟⲡⲧ ⲉⲣⲱⲧⲉⲛ ⲉⲃⲟⲗϧⲉⲛⲟⲩⲉⲡⲓⲥⲧⲏⲙⲏ ⲛⲣⲙⲟⲩⲙⲕⲁϩ ⲛ̀ϩⲏⲧ
ⲛ̀ⲧⲉⲧⲉⲛϣⲟⲡⲧ ⲉⲣⲱⲧⲉⲛ ⲉⲃⲟⲗϧⲉⲛϩⲁⲛⲧⲟⲡⲟⲥ ⲉⲩϫⲁⲓⲱⲟⲩ ⲟⲩⲟϩ ϧⲉⲛⲟⲩⲧⲁⲛⲟ
 

 

 

ϩⲁⲛⲥⲩⲅⲅⲣⲁⲙⲙⲁ ⲛ̀ⲧⲉ ϩⲁⲛⲫⲓⲗⲟⲥⲟⲫⲟⲥ ⲛⲉⲙϩⲁⲛⲁⲥⲕⲏⲧⲏⲥ

ⲛⲓⲣⲱⲙⲓ ⲧⲏⲣⲟⲩ ⲁⲩⲙⲁⲥⲟⲩ ⲉⲩⲣⲉⲙϩⲉⲩ ⲟⲩⲟϩ ⲉⲩϣⲟⲡ ⲛ‌ϩⲁⲛϩⲩⲥⲱⲥ ⲛⲉⲙⲛⲟⲩⲉⲣⲏⲟⲩ ϧⲉⲛⲡⲓⲧⲓⲙⲏ ⲛⲉⲙⲧⲟⲩⲁⲝⲓⲱⲙⲁ ⲁⲩⲧⲏⲧⲟⲩⲇⲉ ⲛ‌ϯⲗⲟⲅⲓⲁ ⲛⲉⲙϯⲥⲩⲛⲏⲇⲉⲥⲓⲥ ⲟⲩⲟϩ ⲉⲩⲉⲡⲟⲗⲓⲧⲉⲩⲉⲥⲑⲁ ⲙ‌ⲡⲓⲟⲩⲁⲓ ⲡⲓⲟⲩⲁⲓ ϧⲉⲛⲡⲓⲡⲛⲉⲩⲙⲁ ⲛ‌ⲧⲉϯⲙⲉⲧⲥⲟⲛ

ⲕⲉⲅⲁⲣ ⲁϥϫⲟⲥ ϧⲉⲛⲛⲓⲫⲓⲗⲟⲥⲟⲫⲟⲥ ϫⲉⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲙⲟⲩⲓ ⲟⲩϫⲱⲣⲓ ⲁⲛ ⲡⲉ ⲟⲩⲟϩ ⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲡⲁⲛⲑⲏⲣ ⲟⲩⲇⲩⲛⲁⲧⲟⲥ ⲁⲛ ⲡⲉ ⲫⲏⲉⲑⲛⲁⲙⲟⲩⲇⲉ ⲛ̀ⲑⲟϥ ⲉϥⲟⲩⲁⲃ ⲉⲧⲁⲡⲁⲧⲏ ⲛ̀ϯⲙⲉⲧⲁⲧⲉⲙⲉⲗⲏⲥ ⲫⲁⲓ ⲟⲩϫⲱⲣⲓ ⲡⲉ ⲛ̀ϩⲟⲩⲟ

ϯⲉⲡⲓⲥⲧⲟⲗⲏ ⲉⲧⲁⲩⲥϧⲏⲧⲥ ⲛ‌ⲗⲁⲩⲥⲓⲟⲥ ⲡⲓⲡⲣⲉⲡⲟⲥⲓⲧⲟⲥ

ⲱⲟⲩⲛⲓⲁⲧⲥ ⲛⲧⲉⲕⲡⲣⲟϩⲉⲣⲉⲥⲓⲥ

ⲥⲉⲙⲡϣⲁⲅⲁⲣ ⲛⲧⲁⲉⲣϩⲏⲧⲥ ⲛ̀ϯⲉⲡⲓⲥⲧⲟⲗⲏ ⲉⲃⲟⲗϩⲓⲧⲉⲛ ϯⲙⲉⲧⲛⲁⲓⲁⲧⲥ

ϫⲉⲟⲩⲏⲓⲅⲁⲣ ⲉⲣⲉ ⲟⲩⲟⲛⲛⲓⲃⲉⲛ ⲉⲣⲉⲣⲱⲟⲩϣ ⲟⲩⲏⲛ ϧⲉⲛⲛⲓⲙⲉⲧⲉⲫⲗⲏⲟⲩ

ⲟⲩⲟϩ ⲛⲁⲓⲥⲉⲕⲱⲧ ⲛϩⲁⲛⲏⲓ ⲛⲱⲟⲩ ⲛⲏⲉⲧⲉ ⲡⲟⲩϯϩⲏⲟⲩ ⲛⲱⲟⲩ

ⲟⲩⲟⲛⲅⲁⲣ ⲛⲓⲃⲉⲛ ⲉⲧϫⲱ ⲙ̀ⲙⲟⲥ ϫⲉⲧⲉⲛⲉⲣⲭⲣⲓⲁ ⲁⲛ ⲛ̀ⲣⲉϥϯⲥⲃⲱ ⲟⲩⲟϩ ⲉⲣⲉⲡⲟⲩϩⲏⲧ ⲑⲏⲧ ⲁⲛ ⲛⲉⲙⲛⲏⲉⲧϯⲥⲃⲱ ⲛⲱⲟⲩ ⲛⲁⲓⲉⲧⲉⲧⲙⲁⲩ ⲉⲩϣⲱⲛⲓ ϧⲉⲛⲡⲓϣⲱⲛⲓ ϯⲙⲉⲧⲁⲧⲉⲙⲓ ⲉⲧⲉⲙⲁⲩ ⲧⲉ ⲛϯⲙⲉⲧϭⲁⲥⲓϩⲏⲧ ⲑⲏⲉⲧⲁⲩⲙⲉⲛⲣⲓⲧⲥ ⲛϫⲉⲛⲏⲉⲧⲁⲩⲥⲉⲃⲧⲱⲧⲟⲩ ϫⲉⲡⲧⲁⲕⲟ ⲓⲥϫⲉⲛ ϣⲟⲣⲡ

ⲁϥϫⲟⲥ ⲟⲛ ⲛ̀ϫⲉⲁⲡⲁ ⲁⲛⲧⲱⲛⲓⲟⲥ ϫⲉϧⲓⲥⲓ ⲛⲓⲃⲉⲛ ⲉⲣⲉⲡⲓⲣⲉϥϫⲱⲛⲧ ⲛⲁⲁⲓⲧⲟⲩ ⲥⲉⲧⲁⲕⲏⲟⲩⲧ ⲛ̀ⲧⲟⲧϥ ⲙ̀ⲙⲏⲛⲓ

ⲁϥϫⲟⲥ ⲟⲛ ⲛ̀ϫⲉⲡⲓⲥⲟⲫⲟⲥ ϫⲉⲛ̀ⲛⲉⲕⲟⲩⲉⲙⲧⲥⲁⲣⲝ ⲛ̀ⲛⲉⲕⲥⲛⲏⲟⲩ ϩⲓⲧⲉⲛ ⲧⲕⲁⲧⲁⲗⲁⲗⲉⲓ

ⲡⲉϫⲉ ⲥⲉⲝⲧⲟⲥ ⲡⲓⲥⲟⲫⲟⲥ ϫⲉⲉⲣⲉ ⲉⲟⲩⲉⲡⲓⲥⲧⲏⲙⲏⲧⲉ ⲉⲥⲁϫⲓ ⲟⲩⲉⲡⲓⲥⲧⲏⲙⲏ ⲟⲛ ⲧⲉ ⲉⲭⲁⲣⲱϥ

ⲇⲓⲟⲥ ⲡⲉⲧⲏⲡ ⲉⲡⲗⲓⲛⲟⲥ ⲁϥϫⲟⲥ ϫⲉⲧⲙⲉⲗⲉⲧⲁⲡⲉ ϩⲱⲃⲛⲓⲃⲉⲛ

ⲁⲛⲁⲭⲁⲣⲥⲓⲥ ⲡⲓⲫⲓⲗⲥⲟⲫⲟⲥ ⲡⲉⲧⲏⲡ ⲉⲧⲉⲥⲕⲩⲑⲓⲁ ⲁϥϫⲟⲥ ⲉⲑⲃⲉ ϯⲃⲱ ⲛⲁⲗⲟⲗⲓ ϫⲉ ϣⲁⲥⲛⲟⲩϫ ⲉⲃⲟⲗ ⲛϣⲟⲙⲧ ⲛⲥⲙⲁϩ ⲛϣⲟⲣⲡ ⲙⲉⲛ ⲟⲩⲟⲩϫⲁⲓ ⲡⲉ ⲡⲓⲙⲁϩⲥⲛⲁⲩ ⲟⲩϩⲏⲇⲟⲛⲏ ⲡⲉ ⲡⲓⲙⲁϩϣⲟⲙⲧ ⲟⲩϣⲱϣ ⲡⲉ.

ⲡⲉϫⲁϥ ⲛ̀ϫⲉ ⲡⲓⲥⲟⲫⲟⲥ ϫⲉⲡⲓϫⲁϫⲓⲙⲉⲛ ⲛ̀ⲧⲉⲡⲓⲉⲙⲓⲡⲉ ϯⲙⲉⲧⲁⲧⲉⲙⲓ ⲁⲛ ⲁⲗⲗⲁ ⲡⲓϫⲁϫⲓ ⲛ̀ⲁⲗⲏⲑⲓⲛⲟⲥⲡⲉ ϯⲁⲡⲁⲧⲏ ⲛ̀ⲧⲉⲡⲓⲉⲙⲓ

ⲡⲉϫⲉ ⲡⲓⲁϧⲱⲙ ϫⲉⲙ̀ⲡⲉⲣϯ ⲉ̀ϧⲟⲩⲛ ⲉϩⲣⲉⲛ ⲡⲓⲁⲃⲱⲕ ⲁⲗⲗⲁ ϩⲁⲗⲁⲓ ⲥⲁⲡϣⲱⲓ ⲟⲩⲟϩ ⲛ̀ϥⲛⲁϣⲧⲁϩⲟⲕ ⲁⲛ

ⲇⲓⲟⲅⲉⲛⲏⲥ ⲡⲓⲫⲓⲗⲟⲥⲟⲫⲟⲥ ⲁϥⲛⲁⲩ ⲉⲟⲩⲡⲁⲣⲑⲉⲛⲟⲥ ⲉⲩⲧⲥⲁⲃⲟ ⲙⲙⲟⲥ ⲉⲥϧⲁⲓ ⲡⲉϫⲁϥ ϫⲉ ⲉⲓⲥ ⲟⲩⲥⲏϥⲓ ⲉⲩϫⲱⲣ ⲙⲙⲟⲥ

ⲇⲓⲟⲅⲉⲛⲏⲥ ⲡⲓⲫⲓⲗⲟⲥⲟⲫⲟⲥ ⲁϥⲛⲁⲩ ⲉⲟⲩⲥⲟϫ ⲉϥϩⲉⲙⲥⲓ ϩⲓϫⲉⲛ ⲟⲩⲱⲛⲓ. ⲡⲉϫⲁϥ ϫⲉ ⲉⲓⲥ ⲟⲩⲱⲛⲓ ⲉϥϩⲉⲙⲥⲓ ϩⲓϫⲉⲛ ⲟⲩⲱⲛⲓ

ⲇⲓⲟⲅⲉⲛⲏⲥ ⲡⲓⲫⲓⲗⲟⲥⲟⲫⲟⲥ ⲁⲟⲩⲁⲓ ϣⲉⲛϥ ϫⲉ ⲟⲩ ⲡⲉⲧϫⲏⲣ ⲉⲧϫⲟⲣϯ ⲡⲉϫⲁϥ ϫⲉ ϯⲉⲡⲓⲃⲟⲩⲗⲏ ⲛⲣⲱⲙⲓ ⲧⲉ

ⲁⲟⲩⲫⲓⲗⲟⲥⲟⲫⲟⲥ ϫⲟⲥ ϫⲉⲛⲁⲛⲉ ⲉⲉⲣ ⲡⲓⲡⲉⲑⲛⲁⲛⲉϥ ⲛⲟⲩⲟⲩϩⲟⲣ ⲛⲉⲙⲟⲩⲙⲟⲩⲓ ⲉϩⲟⲧⲉ ⲉⲉⲣⲫⲁⲓ ⲛⲟⲩⲣⲱⲙⲓ ⲛⲁⲧϣⲉⲡϩⲙⲟⲧ ⲓⲥϫⲉ ⲡⲓⲟⲩϩⲟⲣ ⲛⲉⲙⲡⲓⲙⲟⲩⲓ ϣⲁⲩϣⲱⲡⲓ ⲛⲅⲛⲏⲥⲓⲟⲥ ⲉⲩⲁⲣⲉϩ ⲉϯⲙⲉⲧϣⲫⲏⲣ ⲙⲡⲉⲧϣⲁⲛϣ ⲙⲙⲱⲟⲩ ⲡⲁⲇⲓⲁⲑ[ⲉ]ⲧⲟⲥⲇⲉ ⲛⲑⲟϥ ⲟⲩ ⲙⲟⲛⲟⲛ ϫⲉⲙ̀ⲡⲉϥⲁⲣⲉϩ ⲉϯⲙⲉⲧϣⲫⲏⲣ ⲁⲗⲗⲁ ϣⲁⲕϫⲉⲙϥ ⲉⲕⲉⲣⲡⲉⲑⲛⲁⲛⲉϥ ⲛⲁϥ ⲉϥϣⲓⲛⲓ ⲛⲥⲁ ⲡϩⲱⲗⲉⲙ ⲙ̀ⲡⲉⲕⲏⲓ ⲟⲩⲟϩ ⲉⲧⲏⲓⲕ ⲉϩⲣⲏⲓ ⲛ̀ϫⲓϫ ⲛⲛⲉⲕϫⲁϫⲓ

ⲁϥϫⲟⲥ ⲛ̀ϫⲉⲟⲩⲫⲓⲗⲟⲥⲟⲫⲟⲥ ϫⲉⲁⲩⲉⲛⲥⲛⲁⲩ ⲛ̀ⲕⲁⲧⲁⲇⲓⲕⲟⲥ ⲙ̀ⲡⲟⲩⲣⲟ ⲉⲁⲩⲉⲣⲛⲟⲃⲓ ϧⲉⲛⲟⲩⲛⲟⲃⲓ ⲛ̀ⲟⲩⲱⲧ. ⲙ̀ⲡⲓⲥⲛⲁⲩ ⲟⲩⲁⲓ ⲟⲩⲣⲁⲙⲁⲟⲡⲉ ⲟⲩⲟϩ ⲡⲓⲕⲉⲟⲩⲁⲓ ⲟⲩϩⲏⲕⲓⲡⲉ. ⲁⲫⲣⲁⲙⲁⲟ ϯⲭⲣⲏⲙⲁ ⲁⲩⲭⲁϥ ⲉⲃⲟⲗ. ⲡϩⲏⲕⲓⲇⲉ ⲉⲧⲉⲙ̀ⲡⲉϥϫⲓⲙⲓ ⲉϯ ⲁⲩⲉⲝⲟⲣⲓⲁⲍⲉⲓⲛ ⲙ̀ⲙⲟϥ. ⲗⲟⲓⲡⲟⲛ ⲉϥϫⲱⲙⲙⲟⲥ ϫⲉⲱ ⲃⲓⲁ ϫⲉϣⲁⲣⲉⲑⲙⲉⲧⲣⲁⲙⲁⲟ ⲑⲱⲧ ⲙ̀ⲡϩⲏⲧ ⲛ̀ⲁϣ ⲛ̀ⲣⲏϯ ϯⲙⲉⲧϩⲏⲕⲓ ϩⲱⲥ ϣⲁⲥϣⲱⲡⲓ ϧⲁⲡϩⲁⲡ

ⲉⲣⲙⲏⲛⲓⲁ

ⲕⲁⲗⲱⲥ ⲁϥϫⲟⲥ ⲛ̀ϫⲉⲡⲓⲫⲓⲗⲟⲥⲟⲫⲟⲥ ϫⲉⲑⲁⲓⲅⲁⲣⲧⲉ ⲧϧⲉ ⲉⲑⲛⲁϣⲱⲡⲓ ϧⲁⲧϩⲏ ⲙ̀ⲡⲓⲕⲣⲓⲧⲏⲥ ⲙ̀ⲙⲏⲓ ϫⲉⲛⲉⲛⲣⲁⲙⲁⲟ ϧⲉⲛⲛⲉⲛⲁⲣⲉⲧⲏ ⲛⲁⲑⲱⲧ ⲛ̀ϩⲏⲧ. ⲡⲓϩⲏⲕⲓⲇⲉ ϧⲉⲛⲧⲇⲓⲕⲁⲓⲟⲩⲥⲩⲛⲏ ϥⲛⲁϣⲱⲡⲓ ϧⲁⲡϩⲁⲡ

ⲁⲗⲏⲑⲱⲥ ⲫⲏⲉⲧϣⲁⲛϣ ⲉⲡⲉϥϫⲁϫⲓ ⲉϥⲉⲣⲛⲟⲃⲓ ⲉⲣⲟϥ ⲙ̀ⲙⲓⲛⲙ̀ⲙⲟϥ

ⲟⲩⲥⲟⲫⲟⲥ ⲁϥϭⲓϩⲁⲡ ⲛⲉⲙⲕⲉⲥⲟⲫⲟⲥ ⲉⲁⲡϫⲱⲛⲧ ⲕⲓⲙ ⲉⲟⲩⲁⲓ ⲙ̀ⲙⲱⲟⲩ. ⲁϥⲉⲣϩⲛⲁϥ ⲉϣⲱϣ ⲙ̀ⲡⲕⲉⲟⲩⲁⲓ ⲉϥϫⲱⲙⲙⲟⲥ ϫⲉⲡⲁⲅⲉⲛⲟⲥ ⲧⲁⲓⲏⲟⲩⲧ ⲉϩⲟⲧⲉⲫⲱⲕ. ⲟⲩⲟϩ ⲉⲧⲓ ⲉⲩⲥⲁϫⲓ ⲁⲩⲓ̀ ⲉ̀ϫⲉⲛⲟⲩⲕⲉⲣⲁⲙⲉⲩⲥ ⲉϥⲉⲣϩⲱⲃ ⲉⲡⲟⲙⲓ. ⲡⲉϫⲉⲫⲏⲉⲧⲟⲩϣⲱϣ ⲙ̀ⲙⲟϥ ⲙ̀ⲡⲓⲣⲉϥϯϣⲱϣ ⲉ̀ϣⲱⲡ ⲕⲕⲉⲗⲉⲩⲉ ⲫⲁⲫⲛⲓϣϯ ⲛ̀ⲅⲉⲛⲟⲥ ⲁⲙⲟⲩ ⲛ̀ⲧⲉⲛⲛⲁⲩ ⲉⲛⲉⲛⲥⲩⲅⲅⲉⲛⲏⲥ ⲉⲩⲑⲁⲙⲓⲟ ⲙ̀ⲙⲱⲟⲩ. ⲟⲩⲟϩ ⲁⲡⲉⲧϯϣⲱϣ ϣⲓⲡⲓ. ⲡⲉϫⲁϥ ⲛⲁϥ ϫⲉⲁⲗⲏⲑⲱⲥ ⲁⲕⲑⲉⲃⲓⲟ ⲛ̀ⲧⲁⲙⲉⲧϭⲁⲥⲓϩⲏⲧ ϩⲓⲧⲉⲛⲧⲉⲕⲥⲟⲫⲓⲁ. ⲟⲩⲟϩ ⲟⲛ ⲉⲧⲓ ⲉϥⲙⲟϣⲓ ⲁⲩⲓ̀ ⲉϫⲉⲛ ϩⲁⲛⲡⲁⲡⲉⲓⲧ ⲉⲩⲑⲁⲙⲓⲉϩⲁⲛⲧⲱⲃⲓ. ⲡⲉϫⲁϥ ⲙ̀ⲡⲉϥϣⲫⲏⲣ ϫⲉⲫⲁⲫⲛⲓϣϯ ⲛ̀ⲅⲉⲛⲟⲥ ⲉⲓⲥϩⲁⲛⲕⲉⲥⲩⲅⲅⲉⲛⲏⲥ ⲛ̀ⲧⲁⲕ ϧⲉⲛⲡⲁⲓⲙⲁ ⲟⲩⲟϩ ⲁϥⲉⲣϩⲑⲏϥ ⲁⲩϩⲱⲧⲡ ⲛⲉⲙⲛⲟⲩⲉⲣⲏⲟⲩ ⲁⲩϣⲉⲛⲱⲟⲩ ϧⲉⲛⲟⲩϩⲓⲣⲏⲛⲏ

ⲛⲓⲙ ⲡⲉ ⲡⲓϫⲱⲣⲓ

ⲕⲉⲅⲁⲣ ⲁϥϫⲟⲥ ϧⲉⲛⲛⲓⲫⲓⲗⲟⲥⲟⲫⲟⲥ ϫⲉⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲙⲟⲩⲓ ⲟⲩϫⲱⲣⲓ ⲁⲛ ⲡⲉ ⲟⲩⲟϩ ⲫⲏⲉⲑⲛⲁⲡⲁⲧⲁⲥⲥⲉⲓⲛ ⲛ̀ⲟⲩⲡⲁⲛⲑⲏⲣ ⲟⲩⲇⲩⲛⲁⲧⲟⲥ ⲁⲛ ⲡⲉ ⲫⲏⲉⲑⲛⲁⲙⲟⲩⲇⲉ ⲛ̀ⲑⲟϥ ⲉϥⲟⲩⲁⲃ ⲉⲧⲁⲡⲁⲧⲏ ⲛ̀ϯⲙⲉⲧⲁⲧⲉⲙⲉⲗⲏⲥ ⲫⲁⲓ ⲟⲩϫⲱⲣⲓ ⲡⲉ ⲛ̀ϩⲟⲩⲟ

ⲁϥⲑⲱⲛ ⲡⲁⲗⲁⲥ

ⲁⲓⲛⲉϩⲥⲓⲇⲉ ⲟⲩⲟϩ ⲉⲧⲁⲓⲥⲁϫⲓ ⲙ̀ⲡⲓϫⲓⲙⲓ ⲙ̀ⲡⲁⲗⲁⲥ ⲙ̀ⲙⲟⲛϣϫⲟⲙⲙ̀ⲙⲟⲓ ⲉϣⲓⲛⲓ ⲛ̀ϩⲗⲓⲛ̀ⲣⲱⲙⲓ ⲙⲏⲡⲱⲥ ⲛ̀ⲧⲟⲩ 

ϯϣⲓⲡⲓ ⲛⲏⲓ ⲙ̀ⲙⲟⲛⲅⲁⲣ ⲡⲉⲧⲕⲁϯ ⲉⲣⲟⲓ ⲁⲓⲕⲱϯⲙⲉⲛ ⲛ̀ⲥⲁ ⲧⲁⲁⲥⲡⲓ ϧⲉⲛⲛⲉⲛϫⲱⲙ ⲛ̀ⲧⲉ ϯϩⲓⲥⲧⲟⲣⲓⲁ ⲁⲗⲗⲁ ⲁⲩⲧⲁⲙⲟⲓ ϫⲉⲁⲥⲧⲁⲕⲟ ⲟⲩⲟϩ ⲁⲥⲉⲣⲁⲑⲟⲩⲱⲛϩ ⲁⲓⲕⲱϯⲇⲉ ⲛ̀ⲥⲱⲥ ϧⲉⲛϯⲉⲕⲕⲗⲏⲥⲓⲁ ⲁⲩϫⲟⲥ ⲛⲏⲓ ϫⲉⲡⲉⲥⲗⲁⲟⲥ ⲁϥⲉⲣⲡⲱⲃϣ ⲙ̀ⲙⲟⲥ ⲛ̀ⲥⲉⲕⲁϯ ⲉⲣⲟⲥ ⲁⲛ ϯⲛⲟⲩ ⲁⲓϣⲉⲛⲏⲓ ⲉⲛⲓⲙⲟⲛⲁⲥⲧⲏⲣⲓⲟⲛ ⲟⲩⲟϩ ⲡⲉϫⲱⲟⲩ ⲛⲏⲓ ϫⲉⲁⲛϯ ⲛⲉⲛϫⲱⲙ ⲛ̀ⲁⲡⲁⲥ ⲉⲃⲟⲗ ϫⲉⲁⲛⲟⲛⲅⲁⲣ ⲁⲛⲟⲛ ϩⲁⲛⲓⲇⲓⲱⲧⲏⲥ ⲛ̀ⲣⲱⲙⲓ ⲙ̀ⲡⲉⲛϭⲓⲥⲃⲱ ⲛ̀ⲧⲉⲡⲁⲓⲕⲟⲥⲙⲟⲥ ⲟⲩⲇⲉ ⲛ̀ⲛⲉⲥϣⲱⲡⲓ ⲙ̀ⲙⲟⲛ ⲁⲓϩⲱⲗ ⲉⲛⲓⲣⲉⲙⲛ̀ⲭⲏⲙⲓ ⲙ̀ⲫⲁⲣⲁⲱ ⲙ̀ⲃⲉⲣⲓ ⲡⲉϫⲱⲟⲩ ⲛⲏⲓ ϫⲉⲧⲉⲕⲁⲥⲡⲓ ⲥⲟⲛⲓ ⲛ̀ϯⲙⲉⲧⲟⲩⲉⲓⲛⲓⲛ ⲁⲛⲟⲛⲇⲉ ⲧⲉⲛⲧⲟⲩⲃⲟⲥ ⲉⲃⲟⲗϩⲁ ⲡⲑⲱⲗⲉⲃ ⲛ̀ⲧⲉ ⲛⲓⲕⲉⲁⲥⲡⲓ ⲛ̀ⲗⲁⲥ ⲙⲏⲡⲱⲥ ⲛ̀ⲧⲟⲩⲙⲟⲩϯ ⲉⲣⲟⲛ ϫⲉϩⲁⲛϣⲉⲙⲙⲱⲟⲩ ⲧⲉⲛⲛⲁⲧⲁⲕⲟⲅⲁⲣ ⲙ̀ⲙⲟⲥ ϩⲓⲛⲁ ⲛ̀ⲧⲉⲛⲧⲟⲩⲃⲟⲥ ⲁⲩϫⲕⲥ ϫⲉϯⲕⲉⲁⲥⲡⲓ ⲙ̀ⲃⲉⲣⲓⲧⲉ ϯⲁⲥⲡⲓ ⲛ̀ⲗⲁⲥ ⲛ̀ⲁⲡⲁⲥ ⲙ̀ⲙⲓⲛⲙ̀ⲙⲟⲥ ⲁⲩⲥⲱⲃⲓ ⲙ̀ⲙⲟⲓ ⲁⲩϫⲟⲥ ϫⲉⲕⲕⲁϯ ⲁⲛ ϫⲉⲕⲥⲱⲟⲩⲛ ⲁⲛ ⲛ̀ⲧⲉⲕⲁⲥⲡⲓ ⲙ̀ⲃⲉⲣⲓ ⲛ̀ⲑⲟⲕ ⲟⲩⲣⲉⲙⲛ̀ⲭⲏⲙⲓ ⲙ̀ⲙⲏⲓ ⲁⲛ ⲁⲓϣⲉⲡϣⲉⲙⲙⲟ ⲉⲓⲕⲱϯ ⲛ̀ⲥⲱⲥ ⲛⲓⲥⲟⲫⲟⲥⲇⲉ ⲁⲩϫⲟⲥ ⲛⲏⲓ ϫⲉⲧⲉⲛⲕⲁϯ ⲉⲣⲟⲥ ⲕⲁⲗⲱⲥ ⲧⲉⲛⲥⲁϫⲓⲙⲉⲛ ⲙ̀ⲙⲟⲥ ⲁⲛ ⲁⲓⲧⲁⲥⲑⲟ ⲉⲛⲁϣⲫⲏⲣ ⲁⲩϫⲟⲥ ⲛⲏⲓ ⲛ̀ⲑⲟⲕ ⲟⲩϩⲟⲡⲗⲟⲥ ⲙⲁϯϩⲓⲱⲧⲕ ⲛ̀ϯϧⲉⲗⲗⲓⲃϣ ⲟⲩⲟϩ ⲁⲙⲟⲛⲓ ⲛ̀ⲧⲉⲕⲥⲏϥⲓ ⲉⲧⲁⲓϫⲟⲥ ϫⲉϯⲉⲣⲉⲧⲓⲛ ⲛ̀ϯϩⲓⲣⲏⲛⲏ ⲁⲩⲱϣ ⲉⲃⲟⲗ ⲉⲩϫⲱⲙ̀ⲙⲟⲥ ϫⲉⲉⲓⲥ ⲡⲓⲡⲣⲟⲇⲟⲧⲏⲥ ϯϫⲱⲙⲙⲟⲥ ⲛⲱⲧⲉⲛ ϫⲉϯⲛⲁⲥϧⲁⲓ ⲛ̀ⲧⲁⲁⲥⲡⲓ ϩⲓ ⲡϣⲱ ⲛ̀ⲧⲉ ⲫⲓⲟⲙ ⲟⲩⲟϩ ⲁⲣⲉϣⲁⲛ ⲛⲓϩⲱⲙⲓ ⲱⲙⲥ ⲙ̀ⲙⲟⲥ ϯⲛⲁⲥϧⲏⲧⲥ ⲛ̀ⲕⲉⲥⲟⲡ 

ϯⲡⲁⲣⲁⲥⲕⲉⲩⲏ ⲧⲉ ϯⲕⲩⲣⲓⲁⲕⲏ

 ϧⲉⲛⲭⲏⲙⲓ ϯⲡⲁⲣⲁⲥⲕⲉⲩⲏ ⲧⲉ ϯⲕⲩⲣⲓⲁⲕⲏ ϣⲁⲓϣⲉⲛⲏⲓⲇⲉ ⲉϯⲉⲕⲕⲗⲏⲥⲓⲁ ⲛ̀ϯⲡⲁⲣⲁⲥⲕⲉⲩⲏ ϫⲉϣⲁⲓⲉⲣϩⲱⲃ ⲛ̀ϯⲕⲩⲣⲓⲁⲕⲏ ⲓⲥϫⲉⲛ ⲧⲁⲙⲉⲧⲕⲟⲩϫⲓ ⲁⲓⲉⲣϣⲫⲏⲣⲓ ϫⲉⲁⲩⲙⲟⲩϯ ⲉⲡⲓⲧⲱⲧⲉⲣ ⲛ̀ⲧⲉ ϯⲉⲕⲕⲗⲏⲥⲓⲁ ϫⲉϯⲁⲛⲍⲏⲃ ⲛ̀ⲧⲉ ϯⲕⲩⲣⲓⲁⲕⲏ ⲁⲗⲗⲁ ϣⲁⲛⲣⲁⲟⲩⲱ ⲛ̀ϯⲡⲁⲣⲁⲥⲕⲉⲩⲏ  

ϧⲉⲛⲧⲁⲙⲉⲧⲕⲟⲩϫⲓ ⲛⲉ ϣⲁⲓϣⲉⲛⲏⲓ ⲉϯⲉⲕⲕⲗⲏⲥⲓⲁ ⲛ̀ϯⲡⲁⲣⲁⲥⲕⲉⲩⲏ ϣⲁⲓϣⲗⲏⲗ ⲛ̀ϯⲁⲛⲁⲫⲟⲣⲁ ⲟⲩⲟϩ ⲱϣ ⲛ̀ⲛⲓϩⲩⲙⲛⲟⲥ ϧⲉⲛⲡϫⲓⲛⲑⲱⲟⲩϯ ⲛ̀ⲧⲉ ⲛⲓⲇⲓⲁⲕⲱⲛ ⲙⲉⲛⲉⲛⲥⲁ ⲫⲁⲓ ⲛⲉ ϣⲁⲓ ϣⲉⲛⲏⲓ ⲉϯⲁⲛⲍⲏⲃ ⲛ̀ⲧⲉ ϯⲕⲩⲣⲓⲁⲕⲏ ⲁⲓⲓ̀ ⲉϩⲣⲉⲛ ϩⲁⲛⲙⲏϣ ⲛ̀ϣⲫⲏⲣ ⲛ̀ⲭⲣⲓⲥⲧⲓⲁⲛⲟⲥ ⲙ̀ⲙⲁⲩ 

ⲡⲉϫⲉ ⲓⲏ̅ⲥ̅ ϫⲉⲁⲙⲱⲓⲛⲓ ϩⲁⲣⲟⲓ ⲟⲩⲟⲛ ⲛⲓⲃⲉⲛ ⲉⲧϧⲟⲥⲓ ⲟⲩⲟϩ ⲉⲧⲟⲡⲧ ϧⲁ ⲛⲟⲩⲉⲧⲫⲱⲟⲩⲓ ⲁⲗⲗⲁ ϯⲉⲕⲕⲗⲏⲥⲓⲁ ⲥϫⲟⲥ ϫⲉⲁⲙⲱⲓⲛⲓ ϩⲁⲣⲟⲓ ⲱ ⲛⲓⲭⲣⲓⲥⲧⲓⲁⲛⲟⲥ ⲛ̀ⲟⲣⲑⲟⲇⲟⲝⲟⲥ ⲡⲓⲛⲁϩϯⲅⲁⲣ ⲁϥϣⲱⲡⲓ ⲛ̀ⲟⲩⲥⲟⲃⲧ ⲟⲩⲧⲉ ⲛⲓⲡⲓⲥⲧⲟⲥ ⲛ̀ⲭⲣⲓⲥⲧⲓⲁⲛⲟⲥ ⲛⲉⲙⲛⲓⲕⲉⲭⲱⲟⲩⲛⲓ ⲛⲉⲛⲥⲃⲟⲧⲇⲉ ⲛ̀ⲧⲉ ϯⲉⲕⲕⲗⲏⲥⲓⲁ ⲙ̀ⲡⲁⲩⲁⲣⲉϩ ⲉⲣⲟⲥ ⲁⲗⲗⲁ ⲥⲉⲫⲱⲣϫ ⲟⲩⲧⲉ ⲛⲓⲥⲛⲏⲟⲩ ⲉⲧϧⲉⲛⲡⲓⲕⲟⲥⲙⲟⲥ ⲛ̀ⲟⲩⲱⲧ ⲉⲑⲃⲉ ⲡⲟⲩⲛⲁϩϯ ⲥⲉϣⲗⲏⲗ ⲉⲩϫⲱⲙⲙⲟⲥ ϫⲉⲁⲣⲓⲥⲟⲃⲧ ⲉⲣⲟⲥ ⲛ̀ⲛⲉⲥⲕⲓⲙ ϣⲁ ⲉⲛⲉϩ

ⲱⲟⲩⲛⲓⲁⲧϥ ⲙ̀ⲫⲏⲉⲧⲧⲁⲕⲟ ⲛ̀ⲛⲓⲥⲟⲃⲧ ⲛ̀ⲧⲉ ⲛⲉⲛϩⲏⲧ ⲛⲉⲙⲛⲉⲛⲛⲟⲩⲥ ϩⲓⲛⲁ ⲛ̀ⲧⲉⲛⲉⲣⲁⲅⲁⲡⲁⲛ ⲙ̀ⲡⲓⲟⲩⲁⲓ ⲡⲓⲟⲩⲁⲓ ϧⲉⲛⲟⲩⲙⲉⲑⲙⲏⲓ ⲟⲩⲟϩ ⲛ̀ⲧⲉⲛⲙⲉⲓ ⲛ̀ϯⲟⲓⲕⲟⲩⲙⲉⲛⲏ ⲛⲉⲙⲟⲩⲟⲛⲛⲓⲃⲉⲛ ⲉⲧϣⲟⲡ ⲛ̀ϧⲏⲧⲥ

ⲡⲭ̅ⲥ̅ ϥⲭⲏ ϧⲉⲛϯⲉⲕⲕⲗⲥⲓⲁ ⲙⲟⲛⲟⲛ ⲓⲏ̅ⲥ̅ⲇⲉ ϥϣⲟⲡ ⲥⲁⲃⲟⲗ ⲛ̀ⲛⲓⲥⲃⲟⲧ ⲛ̀ϯⲉⲕⲕⲗⲏⲥⲓⲁ